Luk 23 - RUAC KUƆTH IN RƐL RƆ

Naŋ Yecu nhiam Pay-lɛt

¹ Cu buɔ̱n kɛɛliw rɔ jiɛc, kä cukɛ Yecu naŋ nhiam Pay-lɛt.

² Cukɛ jɛ tok kɛ mi gɔanykɛ, jɛ wäkɛ i̱, “Cakɔ wut ɛmɛ jek nyonɛ do̱ra, kä penɛ kɔ ɣöö luɔ̱nykɔ Thii-thɛr tho̱lbo̱k, kä latdɛ jɛ ɛn ɣöö ɛ jɛn Mɛ-thia in la Kuäär.”

³ Kä cu Pay-lɛt ɛ thiec i̱, “Ɛ ji̱n Kuäär ji̱ Juudh?” Cuɛ jɛ loc i̱, “Ci jɛ lar.”

⁴ Cu Pay-lɛt bööth palä tin di̱t kɛnɛ buɔ̱n jiök i̱, “Thilɛ duer mi cä jek kä wut ɛmɛ.”

⁵ Kä cukɛ jɛ kuɔk thi̱n, wäkɛ i̱, “Jɛn jakɛ naath kä nyuɔɔn, kɛ ŋi̱i̱cdɛ rɛy Ju-dia kɛɛliw, ni kä Gɛ̈-lɛ-li gua̱a̱th in tookɛ jɛ thi̱n cu mäni wanɛ mɛ.”

Yecu nhiam Ɣɛ-rod

⁶ Mëë ci Pay-lɛt mɛmɛ liŋ, cuɛ thiec mi wut ɛmɛ ɛ raan Gɛ̈-lɛ-li.

⁷ Mëë cɛ jɛ ŋa̱c ɛn ɣöö ɛ raan rööl Ɣɛ-rod, cuɛ jɛ jäk kä Ɣɛ-rod mëë ci ben kä Jɛ-ru-tha-lɛm ɛn ni̱ni tɔ̱tɔ̱.

⁸ Täämɛ, mëë ci Ɣɛ-rod Yecu nɛn, cu lɔcdɛ tɛɛth ɛlɔ̱ŋ, kɛ ɣöö go̱o̱rɛ ɣöö derɛ jɛ nɛn kɛ gua̱a̱th mi bäär, kɛ ɣöö cɛ kɛ̈kdɛ liŋ. Kä go̱o̱rɛ ɣöö derɛ jɛ nɛn a lätdɛ nyuuth mi gääy naath.

⁹ Kä cuɛ jɛ thiëc kɛ gua̱a̱th mi bäär, kä thilɛ mi ci Yecu ɛ loc.

¹⁰ Kä te bööth palä tin di̱t kɛnɛ ji̱ gɔ̱rkä cuŋä ɛn wanɔ, kä gɔanykɛ jɛ.

¹¹ Cu mäni Ɣɛ-rod kɛnɛ lathkëërikɛ cukɛ jɛ la̱t a jiäk, kä cukɛ jɛ buy. Cua jɛ jäk kä jɔk kä Pay-lɛt a ca jɛ rony kɛ bi̱i̱ mi gɔaa.

¹² Ni ɛn cäŋ ɛmɔ cu Ɣɛ-rod kɛnɛ Pay-lɛt cua mäth, kä mëëdan kɛ ji̱ tɛ̈r.

Kuɛth Yecu li̱th

¹³ Cu Pay-lɛt bööth palä tin di̱t kɛ bööth kɛnɛ naath cɔl.

¹⁴ Kä cuɛ kɛ jiök i̱, “Cia wut ɛmɛ nöŋ ɣä, kɛ ɣöö ɛ ram mi bo̱th naath jɔ̱ɔ̱r. Kä kɛ kɔr kä mëë cä jɛ thɛm ni nhiamdun /ka̱n ɛ jek ɛn ɣöö te wut ɛmɛ kɛ duer kɛ ŋɔaani tin ci yɛn ɛ gɔny ni jɛ.

¹⁵ Kä thilɛ mi ci Ɣɛ-rod ɛ jek kä jɛ bä, kɛ ɣöö cɛ jɛ jäk kä kɔn. Kä kɛ thuɔ̱k, thilɛ mi cɛ la̱t mi dee lia̱a̱ cop.

¹⁶ Kɛ kui̱ ɛmɔ ɣän bä jɛ duäc, kä bä jɛ lony.” [

¹⁷ Täämɛ kɛ gua̱a̱th ti̱mä, la lunyɛ naath ram kɛl kä nɛy tin ca yian.]

¹⁸ Kä cu kɛn diaal rɔal kɛɛl kɛ jɔw mi di̱i̱t i̱, “Naŋɛ wut ɛmɛ, kä luɔ̱nyɛ kɔ Bä-ra-bäth!”

¹⁹ (Ɛ jɛn wut ëë ca la̱th dueel yieenä kɛ kui̱ rɔlä mi ci tuɔɔk rɛy wec, kɛnɛ luc ran.)

²⁰ Kä cu Pay-lɛt rɔ nyɔk kɛ ruac kɛ naath, kɛ ɣöö go̱o̱rɛ luɔ̱ny Yecu.

²¹ Kä cukɛ wak kɛ jɔw mi di̱i̱t ɛlɔ̱ŋ i̱, “Pua̱tdɛ jɛ jiaath, pua̱tdɛ jɛ jiaath!”

²² Cuɛ kɛ jiök kɛ diɔ̱ɔ̱kdiɛn, “Ɛŋu, mi jiääk ɛnɔ cɛ la̱t ɔ? /Ka̱n duer mi dee lia̱a̱ cop kä jɛ jek. Kɛ kui̱ ɛmɔ, ɣän bä jɛ duäc, kä bä jɛ lony.”

²³ Cukɛ ŋot kɛ mi rɔalkɛ kɛ jɔw mi di̱i̱t ɛn ɣöö a jɛ pua̱tkɛ jiaath. Kä cua rɔaliɛn liŋ.

²⁴ Kä cu Pay-lɛt ruac lat ɛn ɣöö ba min cikɛn ɛ thiec ka̱m kɛ.

²⁵ Cuɛ wut in ca thiec luɔ̱nykɛ, mëë ca yian kɛ kui̱ rɔlä kɛnɛ luc ran. Kä cuɛ Yecu ka̱m kɛ, kɛ ɣöö dee kɛn ɛ lät kä min go̱o̱r kɛn ɛ.

Puɔ̱t Yecu jiaath

²⁶ Kä min naŋkɛ Yecu raar, cukɛ raan Thay-rin mi cɔal i̱ Thay-mɔn mi bëë rɛy ciëŋ käp, kä cukɛ jiath la̱th jɔɔkdɛ kɛ ɣöö bɛ jɛ kap kɔɔr Yecu.

²⁷ Kä cu buɔ̱n nath mi di̱i̱t ɛ guɔ̱ɔ̱r kä te män rɛydiɛn ti pa̱tkɛ lo̱ckiɛn, kä parkɛ jɛ.

²⁸ Kä cu Yecu rɔɔdɛ rietkɛ, cuɛ kɛ jiök i̱, “Yɛn nyier Jɛ-ru-tha-lɛm, /cuarɛ wiee kɛ kui̱dä wieeɛ kɛ kui̱dun kɛnɛ gaatkun.

²⁹ Kɛ ɣöö bi ni̱n ben ti bikɛ wee i̱, ‘Ca rol poth kɛnɛ män ti /ka̱n gaat met dap, kɛ thi̱n ti /ka̱n met luɛth.’

³⁰ Bikɛ jɛ tok kɛ mi jiökɛ pääm i̱, ‘Tɛ̈thɛ wi̱i̱da kä kuɔ̱mɛ kɔ piny.’

³¹ Kɛ ɣöö mi lätkɛ inɔ min ŋot jiath a tɔ̱c, ɛŋu mi bi tuɔɔk mi wä jiath wä kööt?”

³² Cua nɛy da̱ŋ rɛw ti ji̱ dueeri naŋ, kɛ ɣöö bakɛ wä näk kɛ jɛ kɛɛl.

³³ Mëë cikɛ cop guäth mi cɔal i̱, “Pöör”, cukɛ jɛ pua̱t jiaath kɛnɛ ji̱ dueeri, te ram kɛl cueecdɛ, kä te ram min dɔ̱ŋ caamdɛ. [

³⁴ Cu Yecu wee i̱, “Gua̱di̱n, päli kɛ ikä, kɛ ɣöö kui̱c kɛn min lät kɛn ɛ.”] Kä cukɛ bieynikɛ da̱a̱k kamnikiɛn kɛ yor gaakni.

³⁵ Cu naath cuɔ̱ŋ gekä, guɛckɛ jɛ. Kä cu bööth ɛ buy wäkɛ i̱, “Cɛ nɛy kɔ̱kiɛn kän. A jɛ kään rɔ, mi ɛ Mɛ-thia Kuɔth in cɛ mɛk.”

³⁶ Cu lathkëëri jɛ buy bä, cukɛ ben ka̱mkɛ jɛ kɔaŋ mi wac wac,

³⁷ kä jiökɛ jɛ i̱, “Mi ɛ ji̱n Kuäär ji̱ Juudh, kän rɔɔdu!”

³⁸ Tëëkɛ mi ca gɔ̱r nhial wi̱i̱dɛ i̱, “Mɛmɛ ɛ Kuäär ji̱ Juudh.”

³⁹ Cu gua̱n dui̱rä kɛl mi ca pua̱t jiaath jɛ kuëth wëë i̱, “/Ciɛ ji̱n Mɛ-thia? Kän rɔɔdu, amäni kɔn!”

⁴⁰ Kä cu wut in dɔ̱diɛn jɛ gak, wëë i̱, “Thilɛ ji̱ dual kɛ Kuoth, cäŋ nɛni jɛ i̱ ca ji̱ kuɛ̈th li̱th ce̱tkɛ jɛ?

⁴¹ Kä ɛ cuɔ̱ɔ̱ŋ ɛn kuɛthdan li̱th, kɛ ɣöö jek kɔn ni min ro̱ŋ kɛ lätkɔn, kä thilɛ mi jiääk mi ci wut ɛmɛ jɛ la̱t.”

⁴² Kä cuɛ Yecu jiök i̱, “Yecu tim ɣä mi wi̱i̱ wä cop rɛy kuäärädu.”

⁴³ Kä cu Yecu jɛ jiök i̱, “Ɛpuc, ɣän la̱rä jɛ ji̱, ɛn walɛ bi tekɛ ɣä kɛɛl cieŋ Kuɔth mi gɔaa.”

Lia̱a̱ Yecu

⁴⁴ Mëë ci ɣɔw a cäŋ däär, cu piny kɛɛliw cuɔl cu mäni bua̱k ca̱ŋ.

⁴⁵ Kä min ci cäŋ kony däär, cu bi̱i̱ luaak Kuɔth in di̱i̱t rɛ̈ɛ̈t ni däär.

⁴⁶ Kä cu Yecu wak kɛ jɔw mi di̱i̱t, wëë i̱, “Gua̱di̱n, ɣän kuëŋä yiëëdä tetädu.” Mëë cɛ nɔmɔ lar, cuɛ yiëëdɛ in jɔakdiɛn cu ŋök raar.

⁴⁷ Mëë ci kuäär rɛ̈m min ci tuɔɔk nɛn, cuɛ Kuoth liak, kä cuɛ wee i̱, “Ɛpuc, wut ɛmɛ thilɛ jɛ duer.”

⁴⁸ Kä mëë ci buɔ̱n kɛɛliw mëë ci rɔ dol min ci tuɔɔk nɛn, cukɛ loc ciëëŋnikiɛn a pa̱tkɛ kathkiɛn.

⁴⁹ Cu nɛy diaal tëë ŋa̱ckɛ Yecu amäni män tëë guɔ̱ɔ̱rkɛ jɛ kä Gɛ̈-lɛ-li cuɔ̱ŋ ɛ na̱n, guɛckɛ ti̱ti̱ diaal.

Kuɔ̱ny Yecu

⁵⁰ Täämɛ tëëkɛ wut mi gɔaa kä gua̱n cuŋni mi cɔali Jo-thɛp, cäŋ ni mëë ɛ ram kɛl kä bööth luɔ̱k.

⁵¹ Jɛn /kenɛ ca̱a̱pkiɛn lätkiɛn nhɔk. Kä bëë wi̱c ji̱ Juudh mi cɔali A-ri-ma-thia kä liipɛ ni ben kuäärä Kuɔth.

⁵² Cu wut ɛmɔ wä kä Pay-lɛt, kä cuɛ puɔ̱ny Yecu wä thiec kä jɛ.

⁵³ Cuɛ jɛ wä luɔny piny, kä cuɛ jɛ rith kɛ bi̱i̱ mi puɔth puɔth. Kä cuɛ jɛ tɔa̱a̱c rɛy kɔ̱kä pa̱a̱m mi ca guaŋ kä /ka̱n raan met kony thi̱n.

⁵⁴ Kä ɛ cäŋ riali ŋɔaani ikä, kä ci cäŋ lɔ̱ŋä tuɔɔk.

⁵⁵ Cu män tëë bä kɛɛl kɛ Yecu kä Gɛ̈-lɛ-li wä kɔɔr. Cukɛ gua̱a̱th kunyädɛ wä nɛn kɛnɛ tɔ̱ɔ̱c ëë ca tɔ̱ɔ̱c ni puɔ̱nydɛ.

⁵⁶ Cukɛ loc jɔk, kä cukɛ wal kɛnɛ liɛɛth yi̱i̱rä wä rialikä. Kä cukɛ lɔ̱ɔ̱ŋ kɛ cäŋ lɔ̱ŋä, ce̱tkɛ ŋut.