Luk 22 - RUAC KUƆTH IN RƐL RƆ

Ca̱p go̱rä na̱k Yecu

¹ Täämɛ ci gua̱a̱th thia̱k kɛ kui̱ ti̱mä mi̱eth jurayä mi thil thuɔp, min cɔali “Cäŋ Bälä”.

² Cu bööth palä tin di̱t kɛnɛ ji̱ gɔ̱rkä ca̱p mi ba näk ni Yecu kɛ tɛ̱̈ɛ̱̈ go̱r, kɛ ɣöö dualkɛ kɛ naath.

Nhök Ju-däth kɛ kɔk Yecu

³ Cu Cɛy-tan wä lɔɔc Ju-däth min cɔal i̱ Ith-kɛ̈-ri-ɔt, ram kɛl kä jaak da̱ŋ wäl rɛw.

⁴ Cuɛ wä ruac kɛ bööth palä tin di̱t kɛnɛ ga̱a̱ŋ luaak Kuɔth, kɛ ca̱p in derɛ Yecu kök kɛ kɛ jɛ.

⁵ Kä cu lo̱ckiɛn tɛɛth ɛlɔ̱ŋ, kä cukɛ jɛ mat ɛn ɣöö bi kɛn ɛ moc yio̱w.

⁶ Kä cu Ju-däth ɛ nhɔk, kä cuɛ gua̱a̱th mi bɛ kɛ kök jɛ a /ci buɔ̱n te thi̱n go̱r.

Ca̱m Yecu kɛ Mi̱eth Ca̱ŋ Bälä

⁷ Kä cu cäŋ ti̱mkä juray mi thil thuɔp cop, min la ruath dɛ̈ɛ̈l rɔɔmä Ca̱ŋ Bälä a thöpkɛ thi̱n.

⁸ Cu Yecu Pi-tɔr kɛnɛ Jɔ̱ɔ̱n ja̱k, jio̱kɛ kɛ i̱, “Wiaa, rialɛ mi̱eth Ca̱ŋ Bälä ikä kɛ kui̱dan, kɛ ɣöö dënɛ jɛ wä cam.”

⁹ Cukɛ jɛ thiec i̱, “Go̱o̱ri ɣöö bakɔ jɛ wä rialikä winith?”

¹⁰ Cuɛ kɛ jiök i̱, “Liɛŋɛ jɛ, mi wä yɛn cop rɛy wec, bia röm kɛ wut mi kap pi̱ kɛ dhaar guɔ̱ɔ̱rɛ jɛ cieŋ ɔ bɛ wä thi̱n ɔ.

¹¹ Kä jiökɛ gua̱n ciëŋ i̱, ‘Ci Ŋi̱i̱c thiec ɛn ɣöö, duel ja̱a̱li a nikä min bä mi̱eth Ca̱ŋ Bälä cam thi̱n kɔnɛ ji̱ kɔaarä?’

¹² Kä bɛ yɛ nyuɔ̱th duel mi di̱i̱t mi te nhial wi̱i̱ duëël mi ca pap ni wen. Rialɛ jɛ ikä kɛ kui̱dan.”

¹³ Cukɛ wä, kä cukɛ jɛ wä jek ce̱tnikɛ min cɛ la̱r kɛ. Kä cukɛ mi̱eth Ca̱ŋ Bälä rialikä.

Mi̱eth Kua̱r ni Kuoth in jɔak

¹⁴ Mëë ci thaak cop, cu Yecu nyuur guäth mi̱eth kɛnɛ jaakɛ kɛɛl.

¹⁵ Kä cuɛ kɛ jiök i̱, “Cä jɛ go̱r ɛlɔ̱ŋ ɛn ɣöö bä mi̱eth Ca̱ŋ Bälä ɛmɛ cam kɛɛl kɛ yɛ a /ka̱n ni cuuc.

¹⁶ Kɛ ɣöö ɣän la̱rä jɛ yɛ, /cä mi̱eth ɛmɛ bi cam, amäni mi wëë wä thuɔ̱k rɛy kuäärä Kuɔth.”

¹⁷ Kä cuɛ liɛɛr ka̱n. Mëë cɛ tɛ̈th lɔaac lar, cuɛ wee i̱, “Ka̱nɛ nɛmɛ kä da̱a̱kɛ jɛ kamdun

¹⁸ kɛ ɣöö ɣän la̱rä jɛ yɛ a tɛmɛ ni ɛn täämɛ /cä bi maath kɛ pi̱ dɛɛni wal ti̱ti̱ amäni mi wä ciaŋ kuäärä Kuɔth wä ben.”

¹⁹ Kä cuɛ juray ka̱n. Mëë cɛ tɛ̈th lɔaac lar, cuɛ jɛ puɔ̱ny, kä cuɛ jɛ ka̱m kɛ wëë i̱, “Mɛmɛ ɛ jɛn puɔ̱nydä, min ca thöp kɛ kui̱dun. La̱tdɛ mɛmɛ kɛ kui̱ ti̱mädä.”

²⁰ Kä cuɛ liɛɛr lɛni ka̱n bä, kɛ kɔr mi̱eth wëë i̱, “Jɛn liɛɛr ɛmɛ min ca tith kɛ kui̱dun, ɛ mat ruac in pay tuɔɔk kɛ riɛmdä.

²¹ Kä nɛ̈nɛ jɛ, ram in ɣä kɔak tëë kɛɛl kɛ ɣä, kä mi̱ethɛ kɛ ɣä kɛɛl.

²² Kɛ ɣöö Gat Ran bɛ wä ce̱tkɛ min ca rialikä, kä riɛk a kä jɛn ram in bi jɛ kɔak!”

²³ Kä cu jaakɛ jɛ tok kɛ mi thiëckɛ rɔ̱ i̱ ɛŋa kä kɛ ɛnɔ bi jɛ ku lɛ la̱t ɔ?

Ŋaknɔm kɛ kui̱ raam in di̱t ni jɛn

²⁴ Kä cu ŋaknɔm tuɔɔk kamdiɛn, kɛ kui̱ raam ɔ dëë car ɔ i̱ di̱t ni jɛn.

²⁵ Kä cuɛ kɛ jiök i̱, “Te kua̱r juri kɛ buɔ̱m nɛɛkiɛn, kä cɔalkɛ nɛy tin ruackɛ kɛ i̱, ‘lua̱a̱k nath’.

²⁶ Kä /ciɛ jɛn inɔ kä yɛ, ram min di̱t ni jɛn kä yɛ bɛ la ram min kuiy ni jɛn, kä bi bo̱o̱th ce̱tkɛ ram min läät.

²⁷ Kɛ ɣöö ɛŋa di̱t ɔ, ɛ ram min nyuur guäth mi̱eth kiɛ ɛ ram in lät naath ikä? /Ci di̱tni ram min nyuur guäth mi̱eth? Kä duundɛ ɣöö ta̱a̱ rɛydun ala ram mi läät.

²⁸ “Kɛ yɛn nɛy tin ci cuɔ̱ŋ kɛɛl kɛ ɣä min luɔ̱kɛ ɣä.

²⁹ Ɣän cä yɛ ka̱m ce̱tkɛ min ci Gua̱a̱r ɣä ka̱m ruec,

³⁰ kɛ ɣöö dɔ̱ŋ bia mi̱th kä bia maath kɛ ɣä kɛɛl rɛy kuäärädä, kä bia nyuur wi̱i̱ kɔamni kuäärä luɔ̱kɛ thuk duëli I-thɛ-rɛl da̱ŋ wäl rɛw.”

Ma̱r Yecu kɛ ga̱k Pi-tɔr kɛ jɛ

³¹ “Thay-mɔn, Thay-mɔn, liŋɛ! Cia Cɛy-tan nhök ɣöö bɛ yɛn diaal ciɛth ce̱tkɛ bɛl.

³² Kä cä pal kɛ kui̱du, ɛn ɣöö /ci ŋa̱thdu bi bath, kä mi wi̱i̱ rɔ wä riet ɣä jakni dämuɔɔri kä bum.”

³³ Kä cuɛ Yecu jiök i̱, “Kuäär, ɣän cä rɔ rialikä bä wä kɛɛl kɛ ji̱ guäth yieenä kɛnɛ gua̱a̱th li̱eth!”

³⁴ Cu Yecu wee i̱, “Ɣän la̱rä jɛ ji̱, Pi-tɔr, /ci tuut manpalɛ̈k bi röt walɛ, a /keni ɣä gak ni kä diɔ̱ɔ̱k.”

Ki̱th yio̱o̱ni kɛnɛ gök kɛ thɛp

³⁵ Kä cu Yecu ji̱ kɔaarɛ kɛ jiök i̱, “Mëë cä yɛ jäkä raar a thil ki̱th yio̱o̱ni, kiɛ gök, kiɛ wa̱a̱ri, tëëkɛ mi cu dak kä yɛ?” Cukɛ wee i̱, “Thilɛ mi ci dak kä kɔ.”

³⁶ Cuɛ kɛ jiök i̱, “Kä täämɛ, a ram mi tekɛ ki̱th yio̱o̱ni kiɛ gök naŋ jɛ. Kä ram mi thil thɛp kɔk bi̱i̱dɛ, kä a kɔk thɛp.

³⁷ Kɛ ɣöö ɣän la̱rä jɛ yɛ bi ruac Kuɔth ëë ca gɔ̱r dhil a thuɔ̱k kɛ ɣä i̱, ‘Cua jɛ mat rɛy nɛɛni ti ji̱ nyuɔɔni’, kä ɛ thuɔ̱k ci min ca gɔ̱r kɛ kui̱dä a thuɔ̱k.”

³⁸ Kä cukɛ wee i̱, “Kuäär, nɛn ɛ, te thɛpni da̱ŋ rɛw wanɛ.” Cuɛ wee i̱, “Ro̱ŋkɛ.”

Pal Yecu wi̱i̱ Pa̱a̱m Ɔ-lip

³⁹ Cu Yecu jiɛɛn rɛy wec, kä cuɛ wä wi̱i̱ Pa̱a̱m Ɔ-lip kɛ ciaaŋdɛ min wen, kä cu ji̱ kɔaarɛ jɛ guɔ̱ɔ̱r.

⁴⁰ Kä min cɛ cop ɛn guäth ɛmɔ, cuɛ kɛ jiök i̱, “Pal kɛ ɣöö da̱ŋ /cia bi pɛn dui̱rä.”

⁴¹ Kä cuɛ kɛ ba̱ny piny, cuɛ räth nhiam kɛ kam mi ce̱tkɛ pek do̱lä mi ca yuɔr. Cuɛ rɔ ka̱m mua̱a̱l, kä cuɛ pal,

⁴² i̱, “Gua̱di̱n, mi nhɔki jɛ, woc liɛɛr ɛmɛ kä ɣä, kä /ciɛ ruacdä, kä duundɛ ɣöö ruacdu ba la̱t ɔ.” [

⁴³ Kä cu jääk Kuɔth mi bëë nhial päl kä jɛ kä cuɛ jɛ bum.

⁴⁴ Kä kɛ jiath lɔaac, cuɛ pal kɛ loc mi thuɔ̱k, kä cu lethdɛ pɛn piny, tithɛ ce̱tnikɛ riɛm.]

⁴⁵ Min cɛ rɔɔdɛ jiɛcɛ guäth palä, cuɛ ben kä ji̱ kɔaarɛ. Cuɛ kɛ jek a cikɛ niɛɛn, kɛ kui̱ jiɛthä lɔaac.

⁴⁶ Cuɛ kɛ jiök i̱, “Ɛŋu niɛnɛ mɔ? Jiacɛ rɔ̱ kä palɛ, kɛ ɣöö /cia bi pɛn dui̱rä.”

Kɔk Yecu kɛnɛ ka̱pdɛ

⁴⁷ Min ŋot Yecu kɛ ruac, cu buɔ̱n ben, kä böthkɛ kɛ ɛ wut mi cɔal i̱ Ju-däth, min la ram kɛl kä jaakɛ da̱ŋ wäl wi̱cdɛ rɛw. Cuɛ ben kä Yecu kɛ ɣöö bɛ jɛ wä cim.

⁴⁸ Kä cu Yecu jɛ jiök i̱, “Ju-däth, ji̱n kɔki Gat Ran kɛ ci̱emdɛ?”

⁴⁹ Mëë ci nɛy tin te gekädɛ ɛ nɛn ɛn ɣöö bi duɔ̱ɔ̱r tuɔɔk, cukɛ thiec i̱, “Kuäär, bakɔ nyiëëny kɛ kɛ kɛ thɛp?”

⁵⁰ Kä cu ram kɛl kä kɛ kuany bo̱o̱thä palä in di̱i̱t yɔ̱t, kä cuɛ ji̱th cuëëcdɛ yup.

⁵¹ Kä cu Yecu wee i̱, “/Cuarɛ nɛmɛ nyɔk!” Kä cuɛ ji̱thdɛ thiap kä cuɛ jakä gɔaa.

⁵² Kä cu Yecu bööth palä tin di̱t kɛnɛ ga̱a̱ŋ luaak Kuɔth kɛ di̱t tëë ci ben kä jɛ thiec i̱, “Ci yɛn ben kɛ thɛpni kɛnɛ kɛtni ce̱tkɛ mi lapä määc nath?

⁵³ Mëë ta̱a̱ kɛɛl kɛ yɛ ni ciaŋ rɛy luaak Kuɔth, kä /ken yɛn ɣä käp. Kä nɛmɛ thaakdu kɛnɛ buɔ̱m muɔ̱th!”

Ja̱y Pi-tɔr kɛ Yecu

⁵⁴ Cukɛ Yecu käp, kä cukɛ jɛ naŋ, cukɛ jɛ naŋ dhɔr bo̱o̱thä palä in di̱i̱t. Cu Pi-tɔr ɛ guɔ̱ɔ̱r a na̱n.

⁵⁵ Mëë ci naath mac dɔp rɛy kal, kä cikɛ nyuur gekä maac, cu Pi-tɔr nyuur rɛydiɛn.

⁵⁶ Cu nyam mi läät, jɛ nɛn, mɛr mac ɛ cuɛ wee i̱, “Wut ɛmɛ tëë kɛɛl kɛ jɛ bä.”

⁵⁷ Kä cu Pi-tɔr jɛ gak, wëë i̱, “Ciek, ɣän kuecä jɛ.”

⁵⁸ Kä kɛ kɔr mi tɔt cu ram mi dɔ̱diɛn ɛ nɛn, kä cuɛ wee i̱, “Amäni ji̱n bä lapi ram kɛl kä kɛ.” Kä cu Pi-tɔr wee i̱, “Wutdɛ, /ciɛ ɣän!”

⁵⁹ Kä kɛ kɔr mi ce̱tkɛ thaak, cu ram mi dɔ̱diɛn ɛ lar i̱, “Ɛpuc, wut ɛmɛ tëë kɛɛl kɛ kɛ, kɛ ɣöö ɛ raan Gɛ̈-lɛ-li.”

⁶⁰ Kä cu Pi-tɔr wee i̱, “Wutdɛ, ɣän kuecä mɔ latdi mɔ!” Kä ni ɛn guäth ɛmɔ, min ŋotdɛ kɛ ruac, cu tuut manpalɛ̈k wak.

⁶¹ Cu Kuäär ni Yecu liɛɛc, cuɛ Pi-tɔr guic. Kä cu Pi-tɔr ruac Kua̱r tim, ɛn mëë cɛ la̱r jɛ i̱, “Ɛn walɛ, a ŋot /ken tuut manpalɛ̈k ni röt bi ɣä gak ni kä diɔ̱ɔ̱k.”

⁶² Cuɛ wä raar, kä cuɛ wä wiee kɛ jiath lɔaac mi di̱i̱t.

Yiöŋ Yecu kɛnɛ duäcdɛ

⁶³ Täämɛ cu wutni tëë yiënkɛ Yecu ɛ tok kɛ mi yɔaŋkɛ jɛ, kä cukɛ jɛ duäc.

⁶⁴ Cukɛ nyinkɛ yiɛn, kä cukɛ jɛ thiec i̱, “Mar ram mɔ ci ji̱ yɔ̱t ɔ?”

⁶⁵ Cukɛ jɛ kuëth kɛ rieet ti ŋuan kɔ̱kiɛn.

Yecu nhiam ji̱ luɔ̱k

⁶⁶ Mëë ci ɣɔw baak, cu buɔ̱n di̱tni nath rɔ̱ dol bööth palä tin di̱t kɛnɛ ji̱ gɔ̱rkä. Cukɛ Yecu naŋ nhiam ji̱ luɔ̱ɔ̱kni.

⁶⁷ Cukɛ jɛ jiök i̱, “Mi ɛ ji̱n Mɛ-thia, läri jɛ kɔ.” Kä cuɛ kɛ loc i̱, “Cäŋ la̱rä jɛ yɛ, /ci yɛn ɛ bi ŋäth.

⁶⁸ Kä mi wa̱a̱ yɛ thiec /ci yɛn ɛ bi loc.

⁶⁹ Kä duundɛ ɣöö a tɛmɛ ni ɛn täämɛ, bi Gat Ran nyuur kui̱c cuëëc bumä Kuɔth.”

⁷⁰ Kä cu kɛn diaal ɛ thiec i̱, “Ɛ jɛn ji̱n Gat Kuɔth, jɔɔk?” Kä cuɛ kɛ jiök i̱, “Ci yɛn ɛ lar i̱ ɛ ɣän.”

⁷¹ Cukɛ wee i̱, “Ɛ ruac nenä ŋukä dɔ̱diɛn mi gör nɛ? Kä canɛ jɛ liŋ ni thokdɛ pa̱ny!”