Luk 20 - RUAC KUƆTH IN RƐL RƆ

Thiec kɛ kui̱ luäŋä Yecu

¹ Cäŋ kɛl mëë ŋi̱i̱c Yecu naath rɛy luaak Kuɔth kä lätdɛ kɛ thuk Kuɔth ti gɔw, cu bööth palä kɛnɛ ji̱ gɔ̱rkä kɛ di̱t ji̱ Juudh ben kä jɛ.

² Cukɛ jɛ jiök i̱, “Läri jɛ kɔ, ɛ lua̱ŋ ŋa mi lätdi ŋɔaani ti̱ti̱? Kä ɛŋa mi käm ji̱ lua̱ŋ ɛmɛ?”

³ Cuɛ kɛ loc i̱, “Ɣän bä yɛ thiec kɛ duɔ̱ɔ̱r bä, kä luɔ̱cɛ jɛ ɣä.

⁴ La̱k Jɔ̱ɔ̱n ëë lakɛ ni naath, bëë nhial kiɛ bëë kä naath?”

⁵ Cukɛ ruac kärɔ̱, wäkɛ i̱, “Mi wanɛ jɛ lar i̱, ‘Bëë nhial’, bɛ wee i̱, ‘Kä ɛŋu /ka̱nɛ jɛ ŋäth ɔ?’

⁶ Kä mi larnɛ jɛ i̱, ‘Bëë kä naath’, bi nɛy diaal kɔn bök, kɛ ɣöö ci kɛn ɛ ŋa̱c i̱ Jɔ̱ɔ̱n ɛ gök.”

⁷ Cukɛ jɛ loc i̱, “/Kɔn kueckɔ gua̱a̱th in bëë thi̱n.”

⁸ Kä cu Yecu kɛ jiök i̱, “Amäni ɣän bä, /cä yɛ bi la̱r lua̱ŋ in la̱tdä ŋɔak ti̱ti̱.”

Cäät la̱a̱tni rɛy kakä wal kɛ kui̱ kɔaŋ

⁹ Cu Yecu ɛ tok kɛ mi lätdɛ naath cäät ɛmɛ. “Ci raan kak wal kɛ kui̱ kɔaŋ pith, kä cuɛ jɛ ba̱ny ji̱ pi̱thä wal, kä cuɛ wä ro̱o̱l mi dɔ̱diɛn mi bɛ wä jääny thi̱n.

¹⁰ Mëë ci gua̱a̱th ciɛkä wal cop, cuɛ läätdɛ jäkä ji̱ pi̱thä, kɛ ɣöö bikɛ jɛ wä ka̱m kui̱dɛ kä dɛy wal. Kä cu ji̱ pi̱thä jɛ duäc, kä cukɛ jɛ jakä loc jɔk kɛ tetkɛ baaŋ.

¹¹ Kä cuɛ läätdɛ dɔ̱diɛn jakä kɛ, kä cukɛ jɛ duäc bä, kä cukɛ jɛ kuëth, kä cukɛ jɛ jakä jiɛn nikɛ tetkɛ baaŋ.

¹² Kä cuɛ kɛ jäk kä läätdɛ in diɔ̱ɔ̱kdiɛn bä. Kä cukɛ jɛ moc kɛ buɔ̱ɔ̱t, kä cukɛ jɛ yuɔr raar.

¹³ Kä cu gua̱n kakä wal kɛ kui̱ kɔaŋ wee i̱, ‘Ɣän bä ni ŋu la̱t? Ɣän bä ku ja̱k ni gatdä min nhɔakä, dɔ̱ŋ bikɛ jɛ luɔ̱th.’

¹⁴ Kä mëë ci la̱a̱t ɛ nɛn a bëë, cukɛ ruac kärɔ̱ wäkɛ i̱, ‘Nɛmɛ ɛ jɛn gatdɛ min bi nyinkɛ guäl, kuanɛ jɛ näk, kɛ ɣöö bi nyin gua̱n cua̱ nyinkɔn.’

¹⁵ Cukɛ jɛ yuɔr raar rɛy kakä wal kɛ kui̱ kɔaŋ, kä cukɛ jɛ näk. Täämɛ ɛŋu mi, bi gua̱n kakä wal kɛ kui̱ kɔaŋ ɛ lät kä ji̱ pi̱thä?

¹⁶ Bɛ ji̱ pi̱thä tɔ̱tɔ̱ ben näk, kä bɛ kakä wal wal kɛ kui̱ kɔaŋ gua̱l nɛy ti kɔ̱kiɛn.” Mëë cikɛ mɔmɔ liŋ, cukɛ wee i̱, “A jɛ /ci tuɔɔk!”

¹⁷ Kä cuɛ kɛ guic, cuɛ wee i̱, “Kä ɛŋu lot nɛmɛ jɛ mɔ? Mëë cɛ wee i̱, ‘Päm ëë ca lo̱k ɛ ta̱a̱th duëli, ɛ jɛn ci a päm gɔŋtɔtdä mɔ?’

¹⁸ Kä ram ɔ bi tɛth wi̱i̱ pa̱a̱m ɛmɔ ɔ bɛ tööl. Kä mi wä päm ɛmɔ pɛn wi̱i̱ ran bɛ jɛ riac.”

¹⁹ Kä mëë ci ji̱ gɔ̱rä kɛnɛ bööth palä tin di̱t jɛ ŋa̱c ɛn ɣöö ci Yecu ruac cäätdä nɛmɛ lat kɛ kui̱diɛn. Cukɛ jɛ go̱r ɛn ɣöö deekɛ jɛ käp ɛn guäth ɛmɔ, kä duundɛ ɣöö cukɛ dual kɛ naath.

Thiec kɛ kui̱ tho̱pä tho̱lbo̱kä

²⁰ Kɛ kui̱ ɛmɔ cukɛ jɛ tit, kä cukɛ naath ja̱k ti bi̱emkɛ jɛ ti ca rɔ̱ lɛl i̱ kɛ nɛy ti gɔw, kɛ ɣöö bikɛ Yecu gɔany kɛ ruaacnikɛ, kɛnɛ ɣöö deekɛ jɛ naŋ nhiam kua̱ri luɔ̱k kɛnɛ ji̱ kumɛ tin tekɛ lua̱ŋ.

²¹ Kä cukɛ Yecu thiec i̱, “Ŋi̱i̱c, kɔn ŋa̱ckɔ jɛ ɛn ɣöö ti kɛ cuɔ̱ɔ̱ŋ kä tin latdi kä ŋi̱i̱ci naath, kä /ci naath lɛy, kä duundɛ ɣöö ŋi̱i̱ci naath kɛ duɔ̱ɔ̱p Kuɔth kɛ thuɔ̱k.

²² Lotdɛ rɔ ɛn ɣöö bakɔ Thii-thɛr luɔ̱ny tho̱lbo̱k, kiɛ /cɛ rɔ lot?”

²³ Kä duundɛ ɣöö cu Yecu pɛliɛn ŋic, kä cuɛ kɛ jiök i̱,

²⁴ “Nyuɔ̱thɛ ɣä yiëëth. Kä ɛ wi̱c ŋa kɛnɛ ciöt ŋa ca gɔ̱a̱r thi̱n ɔ?” Cukɛ wee i̱, “Ɛ Thii-thɛr.”

²⁵ Cuɛ kɛ jiök i̱, “Kä ka̱mɛ Thii-thɛr tin la nyin Thii-thɛr, kä ka̱mɛ Kuoth tin la nyin Kuɔth.”

²⁶ Kä /ken kɛn ɛ luäŋ kɛ käp nhiam naath, kɛ kui̱ ruaacnikɛ. Kä cukɛ ga̱a̱c kɛ min cɛ loc kä cukɛ biɛt.

Thiec kɛ kui̱ jiecä nath li̱th

²⁷ Cu tha̱a̱ŋ ji̱ Thɛ̈d-du-thii tin larkɛ jɛ i̱ thilɛ jiëc nath li̱th, ben kä Yecu.

²⁸ Cukɛ jɛ thiec i̱, “Ŋi̱i̱c, ci Muthɛ ruac gɔ̱r kɛ kui̱da ɛn ɣöö mi ci däman ran li̱w, kä tëëkɛ ciek kä thilɛ kɛ gat, bi wut ɛmɔ ciek däman ka̱n, kä bɛ däman diëth gaat.

²⁹ Täämɛ tëëkɛ gaat raam kɛl da̱ŋ bärɔw. Cu kɛ̱̈ɛ̱̈ kuɛɛn, kä cuɛ li̱w a thilɛ jɛ gat.

³⁰ Kä cu gat in rɛwdɛ ciek kuɛn,

³¹ kä cu gat in diɔ̱ɔ̱kdiɛn ciek kuɛn, kä cu kɛn da̱ŋ bärɔw diaal li̱w a thil gaat.

³² Kä kɛ kɔrɛ cu ciek li̱w bä.

³³ Kɛ kui̱ ɛmɔ bi ciek ku la ciek ŋa jiecä nath li̱th? Kɛ ɣöö ci kɛn da̱ŋ bärɔw ciek kuɛn.”

³⁴ Cu Yecu kɛ jiök i̱, “Gaat runi ti̱ti̱ kuenkɛ, kä kuɛ̈n kɛ kɛ.

³⁵ Kä nɛy tin ro̱ŋ kɛ ɣöö ba jiɛc li̱th kä bi cieŋ runi tin bi ben /cikɛ bi kuɛɛn, kä /cakɛ bi kuɛn.

³⁶ Kɛ thuɔ̱k /cikɛ bi lɛ li̱w, kɛ ɣöö ce̱tkɛ kɛ ja̱a̱k nhial, kä kɛ gaat Kuɔth tin la gaat jiecä li̱th.

³⁷ Kä ci Muthɛ jɛ nyoth a jɔc, ɛn ɣöö jiɛc nɛy ti ci li̱w rɔ̱ li̱th. Cäät buɔ̱t buɔ̱ɔ̱t ëë waŋ, cɛ ruac thi̱n kɛ kui̱ Kua̱r ni Kuoth i̱, ‘Kuoth A-bɛ-ram, Kuoth Ay-dhɛk, Kuoth Je-kɔb.’

³⁸ Täämɛ, /ciɛ Kuoth nɛɛni ti ci li̱w, ɛ Kuoth nɛɛni ti tëk, kɛ ɣöö tëk kɛn diaal kɛ jɛ.”

³⁹ Kä cu tha̱a̱ŋ ji̱ gɔ̱rkä jɛ loc i̱, “Ŋi̱i̱c, ci ruac agɔaa.”

⁴⁰ Kɛ ɣöö /ci kɛn ɛ go̱r i̱ dëë lɛ thiec kɛ mi dɔ̱diɛn.

Thiec kɛ kui̱ Mɛ-thia

⁴¹ Kä cu Yecu kɛ thiec i̱, “Dee kɛn ɛ lar i̱di ɛn ɣöö Mɛ-thia ɛ gat Dee-bid?

⁴² Kɛ ɣöö ɛn Dee-bid puɔ̱nydɛ cɛ jɛ lar rɛy buɔk Diit i̱, ‘Ci Kuäär ni Kuoth Kuäärä jiök i̱, “Nyuuri kui̱c cuëëcdä,

⁴³ amäni mi cä ji̱ tɛ̈ru jakä la̱th ciökniku.” ’

⁴⁴ Kä inɔ cɔɔl Dee-bid jɛ i̱ Kuäär ni Kuoth, kä derɛ ku la gatdɛ i̱di?”

Lui̱k Yecu kɛ kui̱ ŋi̱eecni ŋuɔ̱tni

⁴⁵ Kä a liɛŋkɛ ɛ nɛy diaal, cu Yecu ji̱ kɔaarɛ jiök i̱,

⁴⁶ “Niɛkɛ rɔ̱ kɛ ji̱ gɔ̱rkä tin nhɔakɛ ɣöö bikɛ ja̱l kɛ bieyni ti ba̱a̱r ba̱a̱r kä nhɔakɛ ɣöö nërkɛ kɛ luthä guäth ko̱kä, kä nhɔakɛ nyuur kɔamni tin gɔw guäth duɔ̱ɔ̱li ji̱ Juudh, kɛnɛ gua̱th tin gɔw guäth mi̱thni.

⁴⁷ Kɛn mackɛ dho̱r mään jɔɔkni kä nyuɔthkɛ rɔ̱ kɛ pali ti ba̱a̱r ba̱a̱r. Bikɛ duäc mi jiäk ni jɛn jek.”