Luk 19 - RUAC KUƆTH IN RƐL RƆ

Yecu kɛnɛ Dhɛ̈-ki-yäth

¹ Cu Yecu wä kä Jɛ-ri-ko, kä cuɛ rët kɛ jɛ.

² Kä te kuäär thuɔ̱l tho̱lbo̱kä mi cɔal i̱ Dhɛ̈-ki-yäth mi riäŋ riäŋ thi̱n.

³ Kä cuɛ go̱r ɛn ɣöö bɛ Yecu nɛn mi ɛ ram mi te di, kä kui̱ bunä, kɛ ɣöö ɛ wut mi ciɛk ciɛk.

⁴ Inɔ cuɛ riŋ nhiam, kä cuɛ wä kɔt wi̱i̱ jiaath, kɛ ɣöö bɛ Yecu nɛn, kɛ ɣöö bɛ rët kɛ jɛn duɔ̱ɔ̱p ɛmɔ.

⁵ Mëë ci Yecu cop ɛn guäth ɛmɔ, cuɛ nhial liɛc kä cuɛ jɛ jiök i̱, “Dhɛ̈-ki-yäth, bër piny kɛ pɛ̈th, kɛ ɣöö bä dhil wä te cieŋdu ɛn walɛ.”

⁶ Cuɛ ben piny kɛ pɛ̈th, kä cuɛ jɛ nyuɔ̱ɔ̱r kɛ tɛ̈th lɔaac.

⁷ Kä cu nɛy diaal tëë ca jɛ nɛn, ɛ tok kɛ mi kɛ wäkɛ i̱, “Jɛn bɛ wa̱a̱ ja̱l raam mi gua̱n dueeri.”

⁸ Cu Dhɛ̈-ki-yäth cuɔ̱ŋ ɛn wi̱ni, kä cuɛ Kuäär ni Yecu jiök i̱, “Nɛn ɛ, Kuäärä, bä kui̱c kɛl kä nyinkä diaal ka̱m nɛy ti can. Kä mi cä raan mac kɛ duɔ̱ɔ̱r, bä jɛ cuɔ̱lɛ ni kä ŋuaan.”

⁹ Kä cu Yecu ɛ jiök i̱, “Walɛ ci ka̱n teekä ben cieŋ ɛmɛ, kɛ ɣöö jɛn bä ɛ gat A-bɛ-ram.

¹⁰ Kɛ ɣöö bä Gat Ran kɛ ɣöö bɛ nɛy ti ci bath ben go̱r, kä bɛ kɛ kän.”

Cäät yio̱o̱ni dääpä

¹¹ Mëë liŋ naath ŋɔaani ti̱ti̱, cu Yecu ruac cäätdä lat, kɛ ɣöö cɛ thia̱k kɛ Jɛ-ru-tha-lɛm, kɛnɛ ɣöö cukɛ jɛ car bi ciaŋ kuäärä Kuɔth mal ben ni ɛn guäth ɛmɔ.

¹² Kɛ kui̱ ɛmɔ cuɛ wee i̱, “Ci wut mi luɔ̱thkɛ jiɛɛn, wëë ro̱o̱l mi na̱n, kɛ ɣöö bɛ buɔ̱m kuäärä wä jek kä bɛ luny jɔk.

¹³ Cuɛ kuaanykɛ da̱ŋ wäl cɔl, kä cuɛ kɛ ka̱m yio̱w dääpä da̱ŋ wäl. Kä cuɛ kɛ jiök i̱, ‘La̱a̱tdɛ yio̱w ti̱ti̱ amäni mi cä luny jɔk.’

¹⁴ Kä duundɛ ɣöö cu ji̱ röölɛ jɛ nyir kä cukɛ naath jäkä kɔɔrɛ, wäkɛ i̱, ‘Cakɔ jɛ go̱r ɛn ɣöö bi wut ɛmɔ a kuäära.’

¹⁵ Mëë cɛ luny jɔk, kä cɛ buɔ̱m kuäärä jek, cuɛ la̱a̱tkɛ tëë cɛ ka̱m yio̱w cɔl, kɛ ɣöö bɛ jɛ ben ŋa̱c ɛŋu mi ca jek ala rëp kɛ läätni yio̱o̱ni.

¹⁶ Cu ram in nhiam ben nhiamdɛ, wëë i̱, ‘Kuäär, yiëëth dääpädu cɛ yio̱w da̱ŋ wäl.’

¹⁷ Kä cuɛ jɛ jiök i̱, ‘Gɔaaɛ ɛlɔ̱ŋ. Ɛ ji̱n läät mi gɔaa. Kɛ ɣöö ŋa̱a̱thä ji̱ kɛ yuɔ̱p kä min tɔt, bi a kuäär wi̱i̱ni da̱ŋ wäl.’

¹⁸ Kä cu ram in rɛwdɛ ben bä, cuɛ wee i̱, ‘Kuäär, yiëëth dääpädu cɛ yio̱w da̱ŋ dhieec kɔ̱kiɛn nööŋ.’

¹⁹ Kä cuɛ jɛ jiök i̱, ‘Bi ji̱n a rueec wi̱i̱ni da̱ŋ dhieec.’

²⁰ Cu ram in dɔ̱diɛn ben, kä cuɛ wee i̱, ‘Kuäär, yiëëth dääpädu mɛn. Cä jɛ yiɛn kɛ bi̱i̱.

²¹ Cä dual kɛ ji̱, kɛ ɣöö ɛ ji̱n ram mi tekɛ ruac mi jiääk. Kä la käni ti /ci tɔ̱ a nyinku, kä la ŋɛɛri ti /keni pith.’

²² Cuɛ jɛ jiök i̱, ‘Bä ji̱ luk nikɛ ruaacni thuɔkdu pa̱ny lö kuany mi jiääk! Ɛpuc, ci jɛ ŋa̱c ɛn ɣöö ɛ ɣän ram mi bɛc ruacdɛ, kä ka̱nä ti /ci tɔ̱ a nyinkä, kä ŋɛ̈ɛ̈rä ti /ka̱n pith?

²³ Kä kuɛ la ŋu /keni yio̱o̱kä la̱th guäth tɔ̱wä yio̱o̱ni mɔ? Kɛ ɣöö mi ca luny jɔk dëë kɛ ka̱n kɛ rëpdiɛn.’

²⁴ Kä cuɛ nɛy ti cuŋ gekädɛ jiök i̱, ‘Ka̱nɛ yiëëth dääpä kä jɛ, kä ka̱mɛ jɛ ram in tekɛ yio̱w da̱ŋ wäl.’

²⁵ Kä cukɛ jɛ jiök i̱, ‘Kuäär, jɛn akɛ yio̱w da̱ŋ wäl!’

²⁶ ‘Kä ɣän la̱rä jɛ yɛ, ram mi tekɛ ti ŋuan ba jɛ ma̱t ti ŋuan. Kä ram mi thil ŋu, a cäŋɛ ni min tekɛ jɛ, ba ka̱n kä jɛ.

²⁷ Kä kɛ kui̱ ji̱ tɛ̈rä ti̱ti̱, tin lökɛ ɣöö bäkɛ ruac, nööŋɛ kɛ wanɛ mɛ, kä na̱kɛ kɛ nhiamdä.’ ”

Cuɔ̱p Yecu kä Jɛ-ru-tha-lɛm

²⁸ Mëë ci Yecu mɛmɛ lar, cuɛ wä nhiam kä kɛ, wëë kä Jɛ-ru-tha-lɛm.

²⁹ Mëë cɛ ben thiekä Beth-pac kɛnɛ Beth-ani guäth mi cɔal i̱ Päm Ɔ-lip. Cuɛ ji̱ kɔaarɛ da̱ŋ rɛw ja̱k,

³⁰ wëë i̱, “Wiaa rɛy ciëŋ mia̱ nhiamdun, kä niɛ wädun rɛc bia ruath muɔ̱l mi ca yian piny jek, mi /ken raan met kɔt jɔɔkdɛ. Luɔnyɛ jɛ kä nööŋɛ jɛ wanɛ mɛ.

³¹ Mi tëëkɛ ram mi wä yɛ thiec i̱, ‘Ɛŋu luɔnyɛ jɛ mɔ?’ bia luɔ̱c jɛ i̱, ‘Go̱o̱r Kuäär ɛ.’ ”

³² Cu nɛy tin ca ja̱k wä, kä cukɛ jɛ jek ce̱tkɛ min cɛ la̱r kɛ.

³³ Kä min luɔnykɛ ruath muɔ̱l, cu ji̱kɛ kɛ thiec i̱, “Ɛŋu luɔnyɛ ruath muɔ̱l ɔ?”

³⁴ Cukɛ wee i̱, “Go̱o̱r Kuäär ɛ.”

³⁵ Kä cukɛ jɛ nöŋ Yecu, kä mëë cikɛ bieynikiɛn pap jɔk muɔ̱l, cukɛ Yecu jakä nyuur jɔɔkdɛ.

³⁶ Kä min jälɛ jɔkdɛ, cu naath bieynikiɛn ɣa̱r dup.

³⁷ Kä min wëë dup in wä piny kɛ Päm Ɔ-lip, cu ji̱ kɔaarɛ ti ŋuan ɛ tok kɛ mi liakɛ Kuoth kɛ tɛ̈th lɔaac kɛ jɔw mi di̱i̱t kɛ kui̱ lätni bumä diaal tëë ci kɛn kɛ nɛn,

³⁸ wäkɛ i̱, “A puɔ̱th tekɛ kuäär min bëë kɛ ciöt Kua̱r ni Kuɔth! A mal te nhial kä a buay te ni puɔ̱ɔ̱rä nhial!”

³⁹ Kä cu tha̱a̱ŋ ji̱ Pa-ri-thii ti te rɛy bunä jɛ jiök i̱, “Ŋi̱i̱c, luek ji̱ kɔaaru kɛ ɣöö bikɛ biɛt.”

⁴⁰ Cuɛ kɛ loc i̱, “Ɣän la̱rä jɛ yɛ, mi ci nɛy ti̱ti̱ biɛt, bi pääm pua̱nykiɛn ɛ tok kɛ mi rɔalkɛ.”

Wiee Yecu kɛ kui̱ Jɛ-ru-tha-lɛm

⁴¹ Mëë ci Yecu ben thiekä wec, kä cɛ wec nɛn, cuɛ wiee kɛ kui̱dɛ,

⁴² wëë i̱, “Duŋ mi deri jɛ ŋa̱c a cäŋɛ walɛ kɛn tin nööŋkɛ mal! Kä täämɛ cakɛ tey kä ji̱.

⁴³ Kɛ thuɔ̱k bi ni̱n ben, ti bi ji̱ tɛ̈ru ji̱ göl piny kɛ ko̱o̱tni kui̱cni diaal.

⁴⁴ Kä bikɛ ji̱n Jɛ-ru-tha-lɛm da̱k piny, yɛnɛ gaatku tin cieŋ rɛydu, kä /ca päm kɛl mi ca täth rɛydu bi pa̱l wi̱i̱ pa̱a̱m mi dɔ̱diɛn. Kɛ ɣöö /keni gua̱a̱th ëë gui̱l Kuoth ɛ ni ji̱ ŋa̱c.”

Wä Yecu rɛy luaak Kuɔth

⁴⁵ Kä cu Yecu wä rɛy luaak Kuɔth, kä cuɛ tok kɛ mi tuk nɛy tin kɔakɛ ŋɔak ɛn wi̱ni raar.

⁴⁶ Kä cuɛ wee i̱, “Ca jɛ gɔ̱r i̱, ‘Luaakdä bɛ a luaak palä,’ kä cia jɛ jakä gua̱a̱th dolä ma̱a̱cni nath.”

⁴⁷ Ni ciaŋ la ŋi̱i̱cɛ naath rɛy luaak Kuɔth. Cu bööth palä tin di̱i̱t kɛnɛ ji̱ gɔ̱rkä kɛ bööth nath duɔ̱ɔ̱p go̱r ɛn ɣöö bikɛ jɛ näk.

⁴⁸ Kä cuɛ thil gua̱a̱th mi cu kɛn ɛ jek mi dëë gueer ni jɛ, kɛ ɣöö ci nɛy diaal rɔ̱ mat kɛ ɣöö liɛŋkɛ min latdɛ.