Luk 18 - RUAC KUƆTH IN RƐL RƆ

Cäät ciëk jɔkä kɛnɛ luuk

¹ Kä cu Yecu ji̱ kɔaarɛ la̱t ruac cäätdä kɛ ɣöö bikɛ a pal ni ciaŋ, kä /ci lo̱ckiɛn bi baath.

² Cuɛ wee i̱, “Tëëkɛ kuäär luɔ̱k mi te rɛy wec mi /ci dual kɛ Kuoth, kä thilɛ jɛ luth kɛ naath.

³ Kä ɛn wec ɛmɔ te ciek jɔkä thi̱n mi la bä kä jɛ, kä jio̱kɛ jɛ i̱, ‘Kämni ɣä cuɔ̱ɔ̱ŋ kä ram min go̱o̱ny kɛ ɣä.’

⁴ Cuɛ jɛ lo̱k kɛ tha̱a̱ŋ ni̱ni, kɛ jɔak cuɛ rɔ jiök i̱, ‘Cäŋ thilɛ ɣä luth kɛ Kuoth kä thilɛ ram mi dualä kɛ jɛ,

⁵ kä kɛ ɣöö jut ciek ɛmɔ ɣä ɛlɔ̱ŋ, bä jɛ moc cuɔ̱ɔ̱ŋ kɛ ɣöö /cɛ ɣä bi lɛ cuc kɛ bendɛ mi thil pa̱k.’ ”

⁶ Kä cu Kuäär ni Yecu wee i̱, “Liɛŋɛ ruac min lat kuäär luɔ̱k mi thil cuɔ̱ɔ̱ŋ ɛ.

⁷ Kä /ci Kuoth nɛɛkɛ tin cɛ mɛk, tin la cɔalkɛ jɛ kɛ cäŋ kɛnɛ wäär bi moc cuɔ̱ɔ̱ŋ? Kɛn bɛ gaal ɛlɔ̱ŋ kɛ luäkdɛ kɛ kɛ?

⁸ Ɣän la̱rä jɛ yɛ, bɛ kɛ moc cuɔ̱ɔ̱ŋ kɛ pɛ̈th. Kä mi wä Gat Ran wä ben, tëëkɛ nɛy ti ŋa̱thkɛ jɛ ti bɛ jek wi̱i̱ muɔ̱ɔ̱n?”

Cäät ran Pa-ri-thii kɛnɛ thuul tho̱lbo̱kä

⁹ Cu Yecu cäät ɛmɛ la̱t tha̱a̱ŋ nath tin ŋa̱thkɛ ni rɔ̱, kɛ ji̱ cuŋni, kä canykɛ nɛy tin kɔ̱kiɛn.

¹⁰ “Cu wutni da̱ŋ rɛw wä pal luaak Kuɔth, ram kɛl ɛ raan Pa-ri-thii, kä min dɔ̱diɛn ɛ thuul tho̱lbo̱kä.

¹¹ Cu Pa-ri-thii cuɔ̱ŋ kä rɔ a palɛ i̱, ‘Kuoth, ɣän la̱rä ji̱ tɛ̈th lɔaac kɛ ɣöö /cä ce̱tkɛ nɛy tin kɔ̱kiɛn, kuëël, ti thil cuŋ, ti dhööm, kä /cä ce̱tkɛ thuul tho̱lbo̱kä ɛ mɛ.

¹² La thɛ̈ɛ̈kä mi̱th kä rɛɛw kɛ juɔk. Kä la ɣän kɛl kä wäli nyinkä diaal a tho̱p Kuoth.’

¹³ Kä cu thuul tho̱lbo̱kä cuɔ̱ŋ a na̱n, a cäŋɛ ni nhial /kenɛ jɛ liɛc. Kä duundɛ ɣöö cuɛ lɔcdɛ pa̱t wëë i̱, ‘Kuoth, a lɔcdu kɔ̱c kɛ ɣä, ɛ ɣän gua̱n dueeri!’

¹⁴ Ɣän la̱rä jɛ yɛ, ci wut ɛmɔ loc dhɔrɛ a cɛ cuɔ̱ɔ̱ŋ jek nhiam Kuɔth kä ram in dɔ̱diɛn. Kɛ kui̱ ɛmɔ ram mi kap rɔɔdɛ nhial ba jɛ luɔ̱ɔ̱c piny, kä ram mi loc rɔɔdɛ piny ba jɛ kap nhial.”

Puɔ̱th Yecu kɛ gaat ti tiɛtni

¹⁵ Kä cu naath Yecu nöŋ gaatkiɛn ti tɔatni kɛ ɣöö bɛ kɛ thiap. Mëë ci ji̱ kɔaarɛ jɛ nɛn, cukɛ naath yɔ̱r.

¹⁶ Cu Yecu kɛ cɔl wëë i̱, “A dho̱li ti nyin tiɛtni bä kä ɣä. /Cuarɛ kɛ pen ben, kɛ ɣöö kuäär Kuɔth ɛ duŋ nɛɛni ti ce̱tkɛ kɛ.

¹⁷ Ɛpuc, ɣän la̱rä jɛ yɛ, ramɔ /ci kuäär Kuɔth bi nhɔk ɔ, ce̱tkɛ gat mi tɔt ɔ, /cɛ bi met coth thi̱n.”

Wut mi riäŋ riäŋ

¹⁸ Cu kuäär kɛl Yecu thiec i̱, “Ŋi̱i̱c mi gɔaa, ɛŋu mi bä la̱t kɛ ɣöö bä tëk mi do̱raar jek?”

¹⁹ Cu Yecu jɛ jiök i̱, “Ɛŋu cɔɔli ɣä i̱ ram mi gɔaa ɔ? Thilɛ ram mi gɔaa ɛ ni Kuoth kärɔa.

²⁰ Ji̱n, ŋäci ŋuɔ̱t i̱, ‘/Cu dho̱m, kä /cu raan näk, /cu kuel, /cu raan gɔny kɛ kac, kä luthni guur kɛnɛ muɔɔr.’ ”

²¹ Kä cuɛ wee i̱, “Cä ti̱ti̱ diaal la̱t ni mëë ɛ ɣän ŋuɛ̈t.”

²² Mëë ci Yecu mɛmɛ liŋ, cuɛ jɛ jiök i̱, “Ŋotdɛ te kɛl jɔ̱ɔ̱r kä ji̱. Wër, kɔk ni nyinku diaal, kä dääk ni yio̱w kä nɛy ti can, bi ria̱ŋ wä jek nhial, kä bër guuri ɣä.”

²³ Mëë cɛ nɔmɔ liŋ cu lɔcdɛ jiääk, kɛ ɣöö ɛ ram mi riäŋ riäŋ ɛlɔ̱ŋ.

²⁴ Kä cu Yecu ɛ guic, cuɛ wee i̱, “Kä bɛ buɔ̱m i̱di ɛn ɣöö bi nɛy ti ria̱ŋ ria̱a̱ŋ wä rɛy kuäärä Kuɔth!

²⁵ Kɛ thuɔ̱k bi thia̱k ni ɣöö dee thɔ̱rɔ̱l cooth kɛ waŋ librɔkä kä wä raam mi riäŋ riäŋ rɛy kuäärä Kuɔth.”

²⁶ Cu nɛy tëë ca nɔmɔ liŋ wee i̱, “Kä ɛŋa dee kään ɔ?”

²⁷ Kä cu Yecu wee i̱, “Mi /ca dee luäŋ ɛ raan, luäŋ Kuoth ɛ.”

²⁸ Kä cu Pi-tɔr wee i̱, “Nɛnɛ, kɔn cakɔ dho̱rkɔ ba̱ny piny kä guɔ̱ɔ̱rkɔ ji̱.”

²⁹ Kä cu Yecu kɛ jiök i̱, “Ɛpuc, ɣän la̱rä jɛ yɛ, thilɛ ram mi ci dhɔrɛ ba̱ny piny, kiɛ ciekdɛ, kiɛ dämani, kiɛ diëëthkɛ, kiɛ gaatkɛ, kɛ kui̱ kuäärä Kuɔth,

³⁰ mi /ci ti ŋuan bi jek ɛn täämɛ, kɛnɛ tëk in do̱raar kɛ gua̱a̱th ɛ bi beni.”

Diɔ̱ɔ̱k lärä Yecu kɛ lia̱a̱dɛ

³¹ Kä cu Yecu jaakɛ da̱ŋ wäl rɛw cɔal guäthdiɛn kärɔ̱, cuɛ kɛ jiök i̱, “Nɛ̈nɛ jɛ, wä kɔn kä Jɛ-ru-tha-lɛm. Kä bi ti diaal tëë ca gɔ̱r ɛ göök kɛ kui̱ Gatdä Ran a thuɔ̱ɔ̱k.

³² Ba jɛ wä la̱th tetni juri, kä ba jɛ dɔl, kä ba jɛ kuëth, kä ba jɛ ŋul kä ruɛy.

³³ Kä kɛ kɔr duäcädɛ, ba jɛ näk, kä kɛ diɔ̱ɔ̱k ni̱ni bɛ rɔ nyɔk kɛ jiëc li̱th.”

³⁴ Kä /ken ŋɔaani ti̱ti̱ cop rɛy lo̱cnikiɛn. Kɛ thuɔ̱k ca ruac ɛmɛ tëë kä kɛ, kä /ken kɛn luɔtdɛ ŋa̱c.

Jak Yecu kɛ wäŋ cɔaar mi li̱i̱m kä gɔaa

³⁵ Kä mëë ci Yecu thia̱k kɛ Jɛ-ri-ko, tëëkɛ wut mi cɔr mi nyuur gekä duɔ̱p, li̱mɛ.

³⁶ Mëë cɛ buɔ̱n mi ja̱l liŋ, cuɛ min lät rɔ thiec.

³⁷ Cu kɛn ɛ jiök i̱, “Ret ni Yecu, raan Na-dha-rɛth kɛ wanɛ mɛ.”

³⁸ Kä cuɛ ciöt i̱, “Yecu, Gat Dee-bid, a lɔcdu kɔ̱c kɛ ɣä!”

³⁹ Cu nɛy tin te nhiam ɛ yɔ̱r, kɛ ɣöö bɛ biɛt. Kä cuɛ ku rɔal ɛlɔ̱ŋ wëë i̱, “Gat Dee-bid a lɔcdu kɔ̱c kɛ ɣä!”

⁴⁰ Cu Yecu rɔ ka̱p cuɔ̱ŋ, kä cuɛ wee a wut ɛmɔ nöŋ kɛ jɛ. Kä min ci wut ben thiekä, cuɛ jɛ thiec i̱,

⁴¹ “Ɛŋu mi go̱o̱ri bä lät kä ji̱?” Cuɛ wee i̱, “Kuäär, göörä ɣöö bä rɔ nyɔk kɛ guec.”

⁴² Cu Yecu jɛ jiök i̱, “Ku guic, ŋa̱thdu cɛ ji̱ kän.”

⁴³ Cu wut ɛmɔ guic ni ɛn guäth ɛmɔ, kä cuɛ jɛ guɔ̱ɔ̱r a puɔnyɛ Kuoth. Kä mëë ci naath ɛ nɛn, cu kɛn diaal Kuoth liak.