Luk 17 - RUAC KUƆTH IN RƐL RƆ

Duer

¹ Kä cu Yecu ji̱ kɔaarɛ jiök i̱, “Tin ba naath jakä dui̱r dhil tuɔɔk, kä riɛk akɛ ram in bikɛ ben kɛ jɛ!

² Bi gɔaa ni jɛn kä ji̱ ɛn ɣöö ba päm gua̱r mi di̱i̱t yian ŋuäkdu, kä ba ji̱ yuɔr rɛy baar, kä ɣöö bi gat kɛl kä nyin tiɛtni ti̱ti̱ jakä dui̱r.

³ Niɛkɛ rɔ̱! Mi dui̱r dämuɔɔr ji̱ duer, luek ɛ, kä mi cɛ rɔɔdɛ ri̱t dui̱rädɛ, päli jɛ ikä.

⁴ Kä mi cɛ ji̱ dui̱rä nikä bärɔw kɛ jɛn cäŋ ɔ kɛl ɔ, kä lunyɛ kä ji̱ kä bärɔw, a jio̱kɛ ji̱ i̱, ‘Cä duer,’ bɛ yi̱k pälikä.”

Ŋa̱th

⁵ Cu jaak Kuäär ni Yecu jiök i̱, “Rep ŋa̱thda.”

⁶ Kä cu Kuäär wee i̱, “Mi ta̱yɛ kɛ ŋa̱th mi ce̱tkɛ kuɛ̈ɛ̈ mi duŋ tiit, dee yɛn jiath pi̱li̱i̱r ɛmɔ jiök i̱, ‘Cuni rɔɔdu raar, kä pith rɔɔdu baar,’ kä bɛ ruacdun liŋ.

La̱t kuanyä

⁷ “Ɛŋa kä yɛ, mi dee ci läätdɛ luny jɔk guäth puɔ̱r rɛy kakä kiɛ yien deet, mi bi jɛ jiök i̱, ‘Bër ɛn täämɛ, kä nyuuri bi mi̱th?’

⁸ Kä ci yɛn dee jiök ni jɛ i̱, ‘Riali mi̱eth ikä kɛ kui̱dä moc rɔ bi̱i̱, kä bi ɣä lip guäth in mi̱ethä kä ma̱thä. Kä kɛ kɔrɛ bi kulɛ wä mi̱th kä mäthi’?

⁹ Kä /ca jɛ dee la̱r tɛ̈th lɔaac kɛ ɣöö cɛ min ca la̱r jɛ la̱t?

¹⁰ Amäni yɛn bä, mi cia tin diaal tin ca la̱r yɛ la̱t, la wä yɛn i̱, ‘Kɛ kɔn la̱a̱t ti thil luɔt, kɛ ɣöö cakɔ la̱t ni min dëëkɔ la̱t!’ ”

Jak Yecu wutni da̱ŋ wäl kä gɔw

¹¹ Kä min wä Yecu kä Jɛ-ru-tha-lɛm, cuɛ rët kɛ rɛy rööl in te kam Tha-mɛ-ria kɛnɛ Gɛ̈-lɛ-li.

¹² Kä min wee rɛy wec, cu ji̱ dhɔapni da̱ŋ wäl ben kä jɛ. Cukɛ cuɔ̱ŋ a na̱n,

¹³ kä cukɛ ciöt i̱, “Yecu, Kuäär, a lɔcdu kɔ̱c kɛ kɔ!”

¹⁴ Mëë cɛ kɛ nɛn, cuɛ kɛ jiök i̱, “Wiaa nyuɔ̱thɛ pua̱nykun bööth palä.” Kä min wäkɛ cu pua̱nykiɛn cu gɔw.

¹⁵ Kä cu ram kɛl kä kɛ loc jɔk, mëë cɛ jɛ nɛn ɛn ɣöö ci puɔ̱nydɛ gɔaa, kä liakɛ Kuɔth kɛ jɔw mi di̱i̱t.

¹⁶ Cuɛ rɔɔdɛ yuɔr piny ciökni Yecu, kä cuɛ jɛ la̱r tɛ̈th lɔaac. Kä ram ɛmɔ ɛ raan Tha-mɛ-ria.

¹⁷ Kä cu Yecu wee i̱, “/Cikɛ nɛy da̱ŋ wäl kɛn tin ci gɔw? Kä nɛy da̱ŋ bäŋuan anikä?

¹⁸ Cuɛ thil ram kɛl mi cu luny jɔk mi dee Kuoth liak ɛ ni jur ɛmɛ kärɔa?”

¹⁹ Cuɛ jɛ jiök i̱, “Jiɛc rɔ, kä wër dupdu, ci ŋa̱thdu ji̱ jakä gɔaa.”

Ben kuäärä Kuɔth

²⁰ Kä cu tha̱a̱ŋ ji̱ Pa-ri-thii Yecu thiec kɛ gua̱a̱th in bi ben kɛ kuäär Kuɔth. Cuɛ kɛ loc i̱, “Kuäär Kuɔth /cɛ bi ben kɛ nyuuthni ti ba nɛn.

²¹ Kä /cikɛ bi wee i̱, ‘Nɛnɛ, jɛn ɛn,’ kiɛ ‘Jɛn ni!’ Kɛ ɣöö, ɛ puc, Kuäär Kuɔth a rɛydun.”

²² Kä cu Yecu ji̱ kɔaarɛ jiök i̱, “Ci ni̱n thia̱k ti bia go̱r ɛn ɣöö bia cäŋ kɛl kä ni̱n Gatdä Ran nɛn, kä /ci yɛn ɛ bi nɛn.

²³ Kä ba yɛ jiök i̱, ‘Guɛcɛ jɛ wanɛ mi!’ kiɛ ‘Guɛcɛ jɛ wanɛ mi!’ /Cuarɛ wä, kä /cuarɛ jɛ wä guic.

²⁴ Ce̱tkɛ yiel nhial in la mɛr nhial kui̱cɔ kɛnɛ kui̱cɔ, ɛ jɛn bi ce̱tkɛ ta̱a̱ Gatdä Ran ɔ kɛ cäŋdɛ.

²⁵ Kä duundɛ ɣöö kɛ nhiam bɛ cuuc ɛlɔ̱ŋ, kä ba jɛ lo̱k ɛ ri̱c ɛmɛ.

²⁶ Ce̱tkɛ ta̱a̱ ni̱ni Nowa ɛ jɛn ta̱a̱ in bi tekɛ ni̱n Gatdä Ran.

²⁷ Mëë mi̱thkɛ kä mäthkɛ, kä cukɛ kuɛɛn, kä kuɛ̈n kɛ kɛ, amäni cäŋ ëë wä kɛ Nowa rɛy murkäbä, kä cu nyɔc ben kä cuɛ kɛ näk kɛn diaal.

²⁸ Kä bɛ ce̱tnikɛ ni̱n Lɔt bä. Mëë ci mi̱th naath kä mäthkɛ, kä ko̱kɛ kä kɔakɛ ŋɔak, pi̱thkɛ kä la̱tkɛ tiec.

²⁹ Kä kɛ cäŋ ëë jiɛn kɛ Lɔt kä Thɔ-dɔm, cu mac kɛnɛ wäl mi kɛc ŋuänydɛ dɛ̈m nhial, kä cuɛ kɛn diaal näk.

³⁰ Bɛ te inɔ bä kɛ cäŋ in bi jɔɔc kɛ Gat Ran.

³¹ Ɛn cäŋ ɛmɔ, a ram mi te wi̱i̱ duëël nhial /ci lɛ ben piny, kɛ ɣöö bɛ kuakɛ ti te rɛy duëël ben ka̱m raar. Kä inɔ bä kä ram mi te rɛy kakä a jɛ /ci lɛ loc wi̱c.

³² Tiɛmɛ ciek Lɔt.

³³ Nɛy tin görkɛ ɣöö ba tëkdiɛn yop bikɛ jɛ bath, kä nɛy ti tho̱p tëkdiɛn bɛ jɛ yop.

³⁴ Ɣän la̱rä jɛ yɛ, ɛn wäär ɛmɔ bi nɛy da̱ŋ rɛw tɔ̱ɔ̱c kɛɛl, ba kɛl naŋ kä bi min dɔ̱ŋ duɔth.

³⁵ Bi män da̱ŋ rɛw guär kɛɛl, ba kɛl naŋ kä bi min dɔ̱ŋ duɔth.” [

³⁶ Kä bi män da̱ŋ rɛw te rɛy kakä, ba kɛl naŋ kä bi min dɔ̱ŋ duɔth.]

³⁷ Kä cu jaak Yecu thiec i̱, “Winith, Kuäär?” Kä cuɛ kɛ jiök i̱, “Gua̱a̱th mi te duɔ̱ɔ̱r mi ci li̱w thi̱n, bi cor rɔ̱ dol thi̱n.”