Luk 16 - RUAC KUƆTH IN RƐL RƆ

Cäät läätdä mi /ca ŋäth

¹ Cu Yecu ji̱ kɔaarɛ jiök i̱, “Tëëkɛ wut mi riäŋ riäŋ mi tekɛ läät mi yoop nyinkɛ, kä cu wut in riäŋ ɛ liŋ i̱ yär wut ɛmɔ ni nyinkɛ.

² Cuɛ wut in lät nyinkɛ cɔl kä cuɛ jɛ jiök i̱, ‘Ɛŋu ɛn mɛ cä liŋ kɛ kui̱du mɛ? Kueni ɣä pek la̱tdu kɛ nyinkä, kɛ ɣöö /ci biɛlɛ ŋot ala yuup nyinäkä.’

³ Kä cu yuup ɛmɔ ruac kärɔaadɛ wëë i̱, ‘Bä ŋu la̱t, kä ci kuäärä ɣä tuk lät yupä ŋɔaanikɛ? /Cä lɛ ŋot kɛ buɔ̱m a dëë puɔ̱r luäŋ, kä pöcä kɛ li̱em.

⁴ Ɣän ŋa̱cä min bä la̱t, kɛ ɣöö bi naath ɣä nyuɔ̱ɔ̱r ciëëŋnikiɛn, mi wa ɣä wä woc guäth la̱tdä.’

⁵ Kä cuɛ nɛy tin tekɛ ŋua̱l kɛ kuäärɛ cɔl kɛ̈l kɛ̈ɛ̈li, kä cuɛ ram in nhiam thiec i̱, ‘Ti̱i̱ kɛ ŋua̱l mi ni̱n di kɛ kuäärä?’

⁶ Cuɛ jɛ loc i̱, ‘Go̱o̱rɛ thapini liɛth ti kuɔ̱r kɛl kä ɣä.’ Cuɛ jɛ jiök i̱, ‘Käni warɛgak denädu, nyuuri kɛ pɛ̈th, kä gɔ̱rkɛ i̱ jiɛn dhieec.’

⁷ Kä cuɛ ram in dɔ̱diɛn thiec i̱, ‘Ji̱n ti̱i̱ kɛ ŋua̱l mi ni̱n di?’ Cuɛ jɛ loc i̱, ‘Ta̱a̱kɛ theemni bɛɛl ti kuɔ̱r kɛl.’ Kä cuɛ jɛ jiök i̱, ‘Käni warɛgak denädu, kä gɔ̱rkɛ i̱ jiɛn bädäk.’

⁸ Kä cu kuäär ɛmɔ raan la̱tdɛ min /ca ŋäth liak kɛ kui̱ pɛlädɛ, kɛ ɣöö pɛl ni ji̱ ɣɔaa ɛmɛ kɛ lätnidiɛn kɛ ŋɔak kä nɛy tin la gaat buɔyä.

⁹ Kä ɣän la̱rä jɛ yɛ, muɔcɛ rɔ̱ kɛ mäthni a cäŋ kɛ nyin riäŋä ɣɔaa ɛ jiäk ɛmɛ, kɛ ɣöö mi wäkɛ wä thuuk, ba yɛ nyuɔ̱ɔ̱r ciëëŋni ti thil pek.

¹⁰ “Ram mi ŋa̱thkɛ kɛ mi tɔt, dëë jɛ ŋäth bä kɛ mi di̱i̱t. Kä ram mi /ca ŋäth kɛ mi tɔt, /ca jɛ dee ŋäth kɛ mi di̱i̱t bä.

¹¹ Kä ɛnɔ, mi /ka̱n yɛ ŋäth kɛ ria̱ŋ piɛny ɛmɛ, ɛŋa mi dee yɛ ŋäth kɛ riäŋä in thuɔ̱k?

¹² Mi /ka̱n yɛ ŋäth kɛ yuɔ̱pdun kɛ nyin raam mi dɔ̱diɛn, ɛŋa mi bi yɛ ka̱m ti la nyinkun?

¹³ Thilɛ kuany mi dee kua̱r da̱ŋ rɛw lätikä, kɛ ɣöö kuany bɛ kɛl dhil nyir, kä bɛ min dɔ̱ŋ nhɔk. Kiɛ bɛ rɔɔdɛ ka̱m kuäär kɛl, kä bɛ min dɔ̱diɛn to̱k cany. /Cia Kuoth kɛnɛ ria̱ŋ lätikä kɛn da̱ŋ rɛw kɛɛl.”

Tha̱a̱ŋ rieetni Yecu

¹⁴ Cu ji̱ Pa-ri-thii tin nhɔakɛ yio̱w, ti̱ti̱ diaal liŋ, kä cukɛ Yecu cany.

¹⁵ Kä cuɛ kɛ jiök i̱, “Kɛ yɛn nɛy ti muɔckɛ rɔ̱ cuɔ̱ɔ̱ŋ nhiam nɛɛni kɔ̱kiɛn, duundɛ ɣöö ŋäc Kuoth lo̱ckun. Kɛ ɣöö min liak naath ɛ, ɛ mi jiääk nhiam Kuɔth.

¹⁶ “Mëë ŋot a /ken Jɔ̱ɔ̱n ni ben, te ŋuɔ̱t Muthɛ kɛnɛ ruaacni göökni thi̱n, kä ni ɛn guäth ɛmɔ latkɛ thuk ti gɔw kɛ kui̱ kuäärä Kuɔth, kä go̱o̱r nɛy diaal coth thi̱n kɛ buɔ̱m.

¹⁷ Thia̱k ni ɣöö bi piny kɛnɛ nhial thuuk kä ɣöö bi riet kɛl mi tɔt kä ŋuɔ̱t Muthɛ bath.

¹⁸ “Ram mi bi ciekdɛ däk, kä bɛ dɔ̱diɛn kuɛn cɛ dhɔm, kä ram mi kuɛɛn ciek mi ca däk ɛ cɔwdɛ cɛ dhɔm.”

Wut mi riäŋ kɛnɛ La-dha-räth

¹⁹ “Tëëkɛ wut mi riäŋ riäŋ, mi cieŋ kɛ bieyni ti mɛr ti ca tak agɔaa, kä riäŋɛ kɛ mi̱th ti gɔw ni ciaŋ.

²⁰ Kä tëëkɛ li̱i̱m mi cɔal i̱ La-dha-räth mi ci tɔ̱ɔ̱c thok dhɔaarɛ, mi ci puɔ̱nydɛ thia̱a̱ŋ kɛ buɔ̱ɔ̱t.

²¹ Jɛn go̱o̱rɛ ɣöö derɛ thuɔr thuɔɔri tin ci pɛ̈ɛ̈n guäth mi̱eth wutdä min riäŋ riäŋ cam. Cäŋɛ ni jio̱o̱k deekɛ ben, ba buɔ̱ɔ̱tkɛ ben bɛ̈l.

²² Kä cu wut in cam ɛmɔ li̱w, kä cua jɛ naŋ ɛ ja̱a̱k nhial, kɛ ɣöö bɛ wä te kɛɛl kɛ A-bɛ-ram. Kä cu wut in riäŋ riäŋ li̱w bä, kä cua jɛ kony.

²³ Rɛy maac mi thil pek, mëë ci puɔ̱nydɛ bɛ̈c ɛlɔ̱ŋ, cuɛ nhial liɛc kä cuɛ A-bɛ-ram nɛn guäth mi na̱n, kä te La-dha-räth gekädɛ.

²⁴ Kä cuɛ ciöt kɛ jɔw mi di̱i̱t i̱, ‘A-bɛ-ram Gua̱di̱n, a lɔcdu kɔ̱c kɛ ɣä, kä jäkni La-dha-räth kɛ ɣöö bɛ wi̱c yiɛtädɛ cua̱th rɛy pi̱i̱ni kä bɛ lɛpdä ben jakä kɔ̱a̱c, kɛ ɣöö cuɔ̱cä guäth bo̱lä maac ɛ bɛc bɛc ɛmɛ.’

²⁵ Kä cu A-bɛ-ram ɛ jiök i̱, ‘Gatdä, timɛ ɛn ɣöö rɛy teekädu ci ti gɔw jek kä ci La-dha-räth ti jiäk jek. Kä ɛn täämɛ, buɔ̱mkɛ jɛ ɛn wanɛ mɛ, kä bɛc puɔ̱nydu ɛn wanɛ.

²⁶ Kä dɔ̱diɛn ɛn, kamdan tëëkɛ lo̱o̱l mi lueŋ, kɛ ɣöö mi tëëkɛ ram mi go̱o̱r jiɛɛn kä kɔ mi kä yɛ, /cɛ jɛ dee luäŋ, kä thilɛ ram mi dee ben kui̱dun kä kɔ wanɛ mɛ.’

²⁷ Kä cuɛ wee i̱, ‘Mi ca jɛn inɔ, ɣän la̱ŋä ji̱, gua̱di̱n, ɛn ɣöö bi jɛ jäkä dhɔr gua̱a̱r,

²⁸ (kɛ ɣöö ta̱a̱kɛ dämaari da̱ŋ dhieec) kɛ ɣöö derɛ kɛ wä luek a /cikɛ dee lɛ ben guäth bo̱lä maac ɛ bɛc bɛc ɛmɛ.’

²⁹ Cu A-bɛ-ram ɛ loc i̱, ‘Tekɛ kɛ ŋuɔ̱t Muthɛ kɛn ruaacni göökni. Akɛ liɛŋkɛ kɛ.’

³⁰ Kä cuɛ wee i̱, ‘Ëëy, A-bɛ-ram gua̱di̱n, mi wä ram mi ci rɔ jiɛc li̱th wä kä kɛ, bikɛ rɔ ri̱t kä dueerkiɛn.’

³¹ Kä cu A-bɛ-ram ɛ jiök i̱, ‘Mi /cikɛ ŋuɔ̱t Muthɛ kɛnɛ ruaacni göökni bi liŋ, /cakɛ dee jakä ŋa̱th ɛ raan a cäŋɛ mi ci raan rɔ jiɛc li̱th.’ ”