Luk 14 - RUAC KUƆTH IN RƐL RƆ

Jak Yecu kɛ ram mi tekɛ muul kä gɔaa

¹ Kɛ cäŋ lɔ̱ŋä kɛl, mëë ci Yecu wä mi̱th dhɔr bo̱o̱thä mi la raan Pa-ri-thii, cukɛ jɛ tit agɔaa.

² Nɛ̈nɛ jɛ, cuɛ tekɛ ram mi cu ben nhiamdɛ, mi te puɔ̱nydɛ kɛ muul.

³ Kä cu Yecu ŋi̱eec ŋuɔ̱tni kɛnɛ ji̱ Pa-ri-thii, thiec i̱, “Lotdɛ rɔ kɛ ŋuɔ̱t Muthɛ ɛn ɣöö ba raan jakä gɔaa kɛ cäŋ lɔ̱ŋä, kiɛ /cɛ rɔ lot?”

⁴ Kä duundɛ ɣöö cukɛ biɛt. Kä cu Yecu ram ɛmɔ käp, kä cuɛ jɛ jakä gɔaa, kä cuɛ jɛ jakä jiɛy.

⁵ Kä cu Yecu kɛ jiök i̱, “Mi te raan kɛ gat kä yɛ kiɛ thäk mi ci pɛn rɛy jiɛw kɛ cäŋ lɔ̱ŋä, ni ɛn guäth ɛmɔ cɛ jɛ dee ka̱m raar kɛ jɛn cäŋ lɔ̱ŋä?”

⁶ Kä cuɛ thil mi cu kɛn ɛ loc.

Ciaaŋ kɔ̱cä kɛnɛ nyuur nath

⁷ Kä mëë ci Yecu ɛ nɛn ɛn ɣöö ci tha̱a̱ŋ ja̱a̱li rɔ̱ mëk gua̱th nyuuri ti gɔw, cuɛ kɛ la̱t ruac cäätdɛ i̱,

⁸ “Mi ca ji̱ cɔal guäth mi̱thni kuën ɛ raan, /cu nyuur guäth luthä, kɛ ɣöö dɔ̱ŋ tëëkɛ ram mi di̱t ni jɛn kä ji̱ mi ca cɔal thi̱n.

⁹ Kä dɔ̱ŋ bi ram in ci yɛ cɔl ben a bɛ ji̱ ben jiök i̱, ‘Guenyni ram ɛmɛ gua̱a̱th ɛmɛ,’ bi cu pöc, kä bi wä nyuur ni guäth mi /ci gɔaa.

¹⁰ Mi ca ji̱ cɔal guäth mi̱eth, wër nyuuri guäth raam mi tɔt, kɛ ɣöö mi wä gua̱n cieŋ wä ben dɔ̱ŋ bɛ ji̱ jiök i̱, ‘Määthdä, bër, nyuuri guäth ɛmɛ,’ kä ba ji̱ cu luɔ̱th ɛ nɛy diaal tin nyuur guäth mi̱eth kɛ ji̱ kɛɛl.

¹¹ Kɛ ɣöö nɛy diaal tin kapkɛ rɔ̱ nhial ba kɛ luɔc piny, kä nɛy diaal tin luɔckɛ rɔ̱ piny ba kɛ kap nhial.”

¹² Kä cu Yecu ram in ci jɛ ciöl mi̱eth jiök i̱, “Mi cio̱li naath mi̱eth ca̱ŋda̱a̱r kiɛ thiaŋ, /cu cɔl ni mäthniku kiɛ dämuɔɔri, kiɛ watku, kiɛ ji̱ thieekädu tin ria̱ŋ ria̱a̱ŋ, kɛ ɣöö deekɛ ji̱ lɛ cɔl a bikɛ ji̱ luɔ̱c min ci la̱t.

¹³ Mi wi̱i̱ mi̱th wä rialikä, cɔl ni can kɛnɛ dua̱nyni, kɛ ŋöt kɛnɛ ciöör.

¹⁴ Kä ba ji̱ poth kɛ jɛ, kɛ ɣöö /ci nɛy tɔ̱tɔ̱ ji̱ dee luɔ̱c min ci lät kä kɛ. Ba jɛ luɔ̱c ji̱ kɛ cäŋ in wa ji̱ cuŋni jiɛc li̱th.”

Cäät mi̱eth mi di̱i̱t

¹⁵ Mëë ci ram kɛl kä ja̱a̱l mi ti nyuurä kɛɛl kɛ Yecu ruac ɛmɛ liŋ, cuɛ wee i̱, “Puɔ̱th akɛ nɛy tin bi mi̱th cieŋ kuäärä Kuɔth mac.”

¹⁶ Kä cu Yecu ɛ jiök i̱, “Tëë ram mi ci nɛy ti ŋuan cɔal guäth mi̱eth mi di̱i̱t.

¹⁷ Kä min ci gua̱a̱th mi̱eth cop, cuɛ läätdɛ ja̱k, kɛ ɣöö bɛ nɛy tin ca cɔl jiök i̱, ‘Bia, ci ti diaal rialikä ɛn täämɛ.’

¹⁸ Kä cu kɛn diaal ɛ tok kɛ mi muɔckɛ rɔ̱ ca̱a̱p ti bi pa̱k kɛ kɛ. Cu ram min nhiam ɛ jiök i̱, ‘Ɣän payä mun kɔk, ɣän bä jɛ yi̱k wä guic. Ɣän la̱ŋä ji̱, päli ɣä wä.’

¹⁹ Kä cu ram in dɔ̱diɛn wee i̱, ‘Ɣän cä thääk wäl kɔk, ɣän wa̱a̱ la̱t puɔ̱riɛn ɣɔ̱n. Ɣän la̱ŋä ji̱, päli ɣä wä.’

²⁰ Cu ram in dɔ̱diɛn wee i̱, ‘Ɣän payä kuɛɛn, kɛ kui̱c ɛmɔ cä bi ben.’

²¹ Kä ɛnɔ cu läät luny jɔk cuɛ kuäärɛ ben la̱r mɛmɛ. Kä cu gua̱n ciëŋ lɔcdɛ jiääk, kä cuɛ läätdɛ jiök i̱, ‘Wër, rɛy caari kɛnɛ dup wec nikä kɛɛl, kä no̱o̱ŋni nɛy tin can kɛnɛ dua̱nyni, kɛ ciöör, kɛnɛ ŋöt.’

²² Kä cu läät ɛmɔ wee i̱, ‘Kuäär, ca min ci lar ku thuŋ la̱t, kä ŋot gua̱a̱th di̱tdɛ.’

²³ Kä cu kuäär läätdɛ jiök i̱, ‘Wër duɔ̱pni tin di̱t kɛnɛ jɔk wec, jakni naath kä bä kɛ ɣöö dɔ̱ŋ bi dhɔrä thia̱a̱ŋ.

²⁴ Ɣän la̱rä jɛ ji̱, ɛn ɣöö thilɛ ram kɛl kä nɛy tin ca cɔal guäth mi̱eth mi̱ethdä bi met.’ ”

Tin bi ram mi guur Yecu kɛ jëk

²⁵ Täämɛ cu buɔ̱n nɛɛni ti ŋuan ja̱l kɛɛl kɛ Yecu. Cuɛ rɔɔdɛ riet kɛ kä cuɛ kɛ jiök i̱,

²⁶ “Kä ram ɔ bi ben kä ɣä mɔ, kä /cɛ gua̱n, kɛ ciekdɛ, kiɛ gaatkɛ, kiɛ dämani, kiɛ nyiemani bi lo̱k, ɣɔ̱ɔ̱n, a cäŋ lo̱kɛ ni tëkdɛ pa̱ny, /cɛ dee a raan kɔaarä.

²⁷ Kä ram mi /ci jiathdɛ bi kap, kä bɛ ɣä guɔ̱ɔ̱r, /cɛ dee a raan kɔaarä.

²⁸ Ɛŋa kä yɛ mi go̱o̱r ɣöö bi duel mi bäär la̱t, mi /ci bi nyuur kɛ nhiam a bɛ pek lätädɛ thɛm, kɛ ɣöö bɛ jɛ ŋa̱c i̱ tëëkɛ ti bi ro̱ŋ kɛ thuɔ̱kdɛ?

²⁹ Kɛ ɣöö mi wëë keŋkɛ wä la̱t, kä bɛ thil lua̱ŋ kɛ thuɔ̱k la̱t duëël in cɛ tok, bi nɛy diaal tin ca jɛ nɛn ɛ ya̱a̱m.

³⁰ Bikɛ wee i̱, ‘Ci wut ɛmɛ duel tok kɛ la̱t, kä /kenɛ jɛ luäŋ kɛ thuɔ̱k.’

³¹ Kä ɛ kuäär in mi̱th, mi bi ko̱r wä tɛr kɛ kuäär mi dɔ̱diɛn, mi /ci bi kɔŋ nyuur kɛ nhiam a bɛ wi̱cdɛ car, ɛ mi bɛ tekɛ lua̱ŋ kɛ ɣöö bɛ ko̱r tɛr kuäär mi tekɛ lathkëëri ti bathdɔɔri ti jiɛn da̱ŋ rɛw, kä te ni jɛn kɛ bathdɔɔri da̱ŋ wäl kärɔ̱?

³² Kä mi cɛ jek i̱ thilɛ jɛ lua̱ŋ, bɛ nɛɛkɛ ja̱k a ŋot kuäär ɛmɔ kɛ na̱n, bɛ jɛ wä la̱t ruac kɛ kui̱ malä.

³³ Kɛ kui̱c ɛmɔ, thilɛ ram kɛl kä yɛ, mi bi a raan kɔaarä, mi /ka̱nɛ nyinkun diaal päl.”

Milɛ mi thil luɔt

³⁴ “Milɛ gɔaaɛ, kä mi ci wac milɛkä thuuk, dëë wacdɛ nyɔk kɛ loc thi̱n i̱di?

³⁵ Thilɛ jɛ luɔt kɛ mun, kiɛ kɛ buth wäär, cu naath yäk ni jɛ. Kä ɛ ram mi tekɛ ji̱th ti li̱ŋ kɛ jɛ, a jɛ li̱ŋ.”