Luk 13 - RUAC KUƆTH IN RƐL RƆ

Rietdɛ rɔ̱ dueeri kiɛ bia li̱w

¹ Ɛn cäŋ ɛmɔ cu tha̱a̱ŋ nath Yecu la̱t ruac kɛ kui̱ ji̱ Gɛ̈-lɛ-li tëë ca näk ɛ Pay-lɛt, mëë thöpkɛ Kuoth muc thi̱n.

² Kä cuɛ Yecu kɛ thiec i̱, “Carɛ jɛ i̱ jiäkni kɛn ji̱ Gɛ̈-lɛ-li tɔ̱tɔ̱ kä ji̱ Gɛ̈-lɛ-li diaal tin kɔ̱kiɛn, kɛ ɣöö cikɛ ti bɛ̈c bɛ̈ɛ̈c rut inɔ?

³ Ëëy, ɣän la̱rä jɛ yɛ, ɛ ni mi /cia rɔ̱ ri̱t dueerikun, bi yɛn diaal li̱w ce̱tkɛ kɛ.

⁴ Kiɛ carɛ jɛ i̱ jiäkni nɛy da̱ŋ wäl wi̱cdɛ bädäk tëë ci li̱w, mëë ci luaak mi bäär pɛn wuɔ̱thnikiɛn kä Thay-loam, kä nɛy diaal kɔ̱kiɛn tëë cieŋ kä Jɛ-ru-tha-lɛm?

⁵ Ëëy, ɣän la̱rä jɛ yɛ, ɛ ni mi /cia rɔ̱ ri̱t dueerikun, bi yɛn diaal li̱w ce̱tkɛ kɛ.”

Cäät jiath ŋɔa̱a̱p mi thil dɛy

⁶ Kä cu Yecu ruac cäätdä mɛmɛ lat i̱, “Tëëkɛ wut mi ci jiath ŋɔa̱a̱p pith rɛy kakä wal kɛ kui̱ kɔaŋ, kä cuɛ dɛy wä go̱r thi̱n, kä thilɛ dɛy ti cuɛ jek.

⁷ Cuɛ pi̱i̱th kakä jiök i̱, ‘Nɛnɛ! Ɣän cä ben kɛ run da̱ŋ diɔ̱k ti la göörä dɛy kä jiath ŋɔa̱a̱p ɛmɛ, kä thilɛ mi la jëkä thi̱n. Jɔp ni jɛ piny! Ɛŋu thukɛ gɔɔy muɔ̱ɔ̱n ɔ?’

⁸ Kä cuɛ jɛ jiök i̱, ‘Kuäärä, päli jɛ thi̱n ɛn walɛ! A bä mundɛ tɛt, kä bä jɛ moc kɛ wär.

⁹ Mi wëë dɛy wä kuir ithaar, bɛ cua mi gɔaa. Kä mi wëë thil dɛy bi jɛ jɔap piny.’ ”

Jak Yecu kɛ ciek mi duääny kä gɔaa kɛ cäŋ lɔ̱ŋä

¹⁰ Täämɛ mëë ŋi̱i̱c Yecu naath rɛy luaak dolä ji̱ Juudh kɛ cäŋ lɔ̱ŋä.

¹¹ Kä cuɛ tekɛ ciek mi ca käp ɛ yiëë mi ci jɛ goŋ kɛ run da̱ŋ wäl wi̱cdɛ bädäk. Kä cuɛ jɔkdɛ to̱l, a /cɛ rɔ dee luäŋ kɛ mi cuuŋɛ rɔ.

¹² Mëë ci Yecu ɛ nɛn, cuɛ jɛ cɔl, kä cuɛ jɛ jiök i̱, “Ciek, ca ji̱ lony a lɔr kä riɛkdu.”

¹³ Kä cu Yecu tetkɛ la̱th puɔ̱nydɛ, kä ni ɛn guäth ɛmɔ cuɛ cuɔ̱ŋ. Kä cuɛ tok kɛ mi liakɛ Kuoth.

¹⁴ Kä cu bo̱o̱th duëël dolä ji̱ Juudh ruac kɛ naath a ci lɔcdɛ kac nhial kɛ ɣöö ci Yecu ciek jakä gɔaa kɛ cäŋ lɔ̱ŋä, wëë i̱, “Tëëkɛ ni̱n da̱ŋ bäkɛl ti ba lät la̱t thi̱n. Bia kɛ kɛn ni̱n tɔ̱tɔ̱ ba pua̱nykun ben jakä gɔw, kä /cuarɛ bä kɛ cäŋ lɔ̱ŋä.”

¹⁵ Kä cu Kuäär ni Yecu jɛ loc i̱, “Yɛn nɛy ti ji̱ mɛɛtdä! Thilɛ te ram kɛl kä yɛ mi /ci thääkdɛ kiɛ muulɛ met luɔny luaak, kä naŋɛ jɛ maath kɛ cäŋ lɔ̱ŋä?

¹⁶ /Cɛ rɔ lot ɛn ɣöö ba ciek ɛmɛ, min la nya A-bɛ-ram, kä ca yian ɛ Cɛy-tan kɛ run wäl bädäk, lony kä yieen ɛmɛ kɛ cäŋ lɔ̱ŋä?”

¹⁷ Mëë cɛ ti̱ti̱ lat, cu ji̱ tɛ̈rɛ diaal pöc, kä cu nɛy diaal lo̱ckiɛn tɛɛth kɛ lätkɛ ti gɔw diaal tëë lätdɛ.

Cäät kuaayä mi tɔt

¹⁸ Cuɛ wee i̱, “Ce̱t ciaŋ kuäärä Kuɔth kɛ ŋu? Kä bä jɛ pa̱a̱r kɛ ŋu?

¹⁹ Ce̱tdɛ kɛ kuɛ̈ɛ̈ mi duŋ tiit mi ci wut ɛ ka̱n, kä cuɛ jɛ pith rɛy kakädɛ. Cuɛ do̱ny, kä cua jiath mi di̱i̱t, kä cu diit duëlkiɛn ben la̱t nɔa̱a̱knikɛ.”

Cäät thopä

²⁰ Cu Yecu lɛni ruac i̱, “Ɣän bä ciaŋ kuäärä Kuɔth pa̱a̱r kɛ ŋu?

²¹ Ce̱tdɛ kɛ thuɔp mi tɔt mi ci ciek ɛ ka̱n, kä cuɛ jɛ liɔam rɛy nuɔ̱p mi tekɛ theemni da̱ŋ diɔ̱k, amäni min cɛ pua̱a̱r kɛɛliw.”

Duɔ̱ɔ̱p teekä mi ciw

²² Cu Yecu ja̱l rɛy ciëëŋni kɛnɛ wi̱i̱ ŋi̱i̱cɛ naath min wëë kä Jɛ-ru-tha-lɛm.

²³ Cu ram kɛl ɛ thiec i̱, “Kuäär, ba kän ni nɛy ti tɔt?” Kä cuɛ kɛ loc i̱,

²⁴ “Riɛnyɛ rɔ̱ kɛ ɣöö bia wä rɛc kɛ thok mi ciw ciw, kɛ ɣöö ɣän la̱rä jɛ yɛ i̱ go̱o̱r nɛy ti ŋuan ɣöö bikɛ coth rɛc, kä /cikɛn ɛ bi luäŋ.

²⁵ Ni ɛn guäth ɔ, bi gua̱n duëël rɔ jiɛc kä bɛ thi̱i̱k gäk ɔ, bia tok kɛ mi cuɔ̱ŋɛ raar, kɛnɛ mi dɔaŋɛ thi̱i̱k, wä yɛn i̱, ‘Kuäär lepni jɛ kɔ.’ Kä bɛ yɛ loc i̱, ‘Ɣän kuecä gua̱a̱th in bä yɛn thi̱n.’

²⁶ Bi yɛn ɛ tok kɛ mi jiökɛ jɛ i̱, ‘Kɔn cakɔ mi̱th kä cakɔ maath kɛ ji̱ kɛɛl, kä ci naath ŋi̱eec rɛy duɔ̱pnikɔ.’

²⁷ Kä bɛ kɛ jiök i̱, ‘Ɣän kuecä gua̱a̱th in bä yɛn thi̱n. Wuɔcɛ rɔ̱ kä ɣä, yɛn ji̱ la̱a̱t jiäkni diaal.’

²⁸ Bɛ tekɛ wiee kɛnɛ muɔ̱th lɛc, mi wä yɛn A-bɛ-ram kɛnɛ Ay-dhɛk, kɛ Je-kɔb kɛnɛ göök diaal wä nɛn cieŋ kuäärä Kuɔth, kä ca pua̱nykun yuɔr raar.

²⁹ Kä bi naath ben kui̱c känyä ca̱ŋ kɛnɛ kony ca̱ŋ, kɛ kui̱c caam ɣɔaa kɛnɛ cuec ɣɔaa, kä bikɛ mi̱th cieŋ kuäärä Kuɔth.

³⁰ Kä nɛ̈nɛ jɛ, tha̱a̱ŋ nath ti te jɔk bikɛ a nɛy tin nhiam, kä tha̱a̱ŋ nɛɛni tin te nhiam bikɛ a nɛy tin jɔak.”

Pa̱r Yecu kɛ Jɛ-ru-tha-lɛm

³¹ Kä ni ɛn guäth ɛmɔ cu tha̱a̱ŋ ji̱ Pa-ri-thii ben kä Yecu, cukɛ jɛ jiök i̱, “Woc rɔ ɛn wanɛ mɛ, kɛ ɣöö go̱o̱r Ɣɛ-rod näkdu.”

³² Cuɛ kɛ loc i̱, “Wiaa la̱rɛ jɛ, ɛn wanɛ mɔ i̱, ‘Liŋɛ, ɣän wuɔcä kuth ti jiäk, kä jakä pua̱ny nath kä gɔw ɛn wa̱lɛ kɛnɛ ruun, kä kɛ diɔ̱ɔ̱k ni̱ni bä la̱tdä thuk.

³³ Kä ŋotdɛ ɛn walɛ kɛnɛ ruun kɛ imuɔlä, ɣän bä wä dupdä kɛ ɣöö /cɛ rɔ lot ɛn ɣöö ba gök näk guäth mi /ci mɔ a Jɛ-ru-tha-lɛm.’

³⁴ Jɛ-ru-tha-lɛm, Jɛ-ru-tha-lɛm wec mi näk göök kä bo̱k nɛy tëë ca jäkä jɛ! Kɛ gua̱th da̱ŋ di ti cä go̱r ɛn ɣöö dëë gaatku kul, ce̱tkɛ min la rol manpalɛ̈k dɛykɛ kɛ gɔ̱kɛ, kä ci yɛn ɛ lo̱k!

³⁵ Nɛ̈nɛ jɛ, ca duelun ba̱ny yɛ. Kä ɣän la̱rä jɛ yɛ, /ci yɛn ɣä bi nɛn, amäni mi wä yɛn ɛ lar i̱, ‘Puɔ̱th akɛ ram mi bëë kɛ ciöt Kua̱r ni Kuoth.’ ”