Luk 12 - RUAC KUƆTH IN RƐL RƆ

Lui̱k kɛ kui̱ mɛɛtdä

¹ Kä ɛn guäth ɛmɔ, mëë ci nɛy ti bathdɔɔri ti ŋuan rɔ̱ duɔ̱ɔ̱l, a kɔatkɛ rɔ̱, cu Yecu ruac tok kɛ ji̱ kɔaarɛ kɛ nhiam wëë i̱, “Niɛkɛ rɔ̱ kɛ thuɔp ji̱ Pa-ri-thii, min la mɛɛtdiɛn.

² Thilɛ mi ca kum, mi /ca bi lɛp, kä thilɛ mi ca tɛ̱̈ɛ̱̈, mi /ca bi ŋa̱c.

³ Kɛ kui̱c ɛmɔ mɔ cia lar rɛy muɔ̱thɔ ba jɛ liŋ rɛy buɔyä, kä min cia lat kɛ mua̱th mua̱th rɛy duëël, ba jɛ lat raar, wuɔ̱thni duëli.”

Ram in dee naath dual kɛ jɛ

⁴ “Ɣän la̱rä jɛ yɛ mäthnikä, /cuarɛ dual kɛ nɛy ti na̱kɛ ni puɔ̱ny, kä kɛ kɔrɛ thilɛ kɛ mi dɔ̱diɛn mi dee kɛn ɛ la̱t.

⁵ Kä bä yɛ la̱r lär kɛ ram in bia dual kɛ jɛ. Dualɛ kɛ ram min tekɛ buɔ̱m kɛ kɔr kä min ca raan näk, dërɛ raan yuɔr rɛy maac mi thil pek. Ɣɔ̱ɔ̱n, ɣän la̱rä jɛ yɛ, dualɛ kɛ jɛ.

⁶ /Ca kɛc da̱ŋ dhieec kɔk kɛ taripni da̱ŋ rɛw? Kä thilɛ kɛl kä kɛ mi dee Kuoth ɛ pa̱l ruëëc.

⁷ Kä a cäŋɛ ni mi̱em wecdun ca pekdiɛn diaal kuɛn. /Cuarɛ dual, di̱tni kökdun kä kök kɛcni ti ŋuan.”

Lat ŋäthä kɛnɛ lo̱k Kritho

⁸ “Kä ɣän la̱rä jɛ yɛ, ramɔ wä ciötdä wä lat nhiam nath ɔ, bi Gat Ran ɛ lat bä nhiam ja̱a̱kni Kuɔth nhial.

⁹ Kä ram mi wä ɣä gak nhiam nath, ba jɛ gak nhiam ja̱a̱kni Kuɔth nhial.

¹⁰ Kä ram mi wä Gat Ran wä kuëth ba duerɛ päl, kä /ca duer raam mi kueth Yiëë in Gɔaa in Rɛl Rɔ bi met pälikä.

¹¹ Mi wa yɛ wä luk guäth dolä ji̱ Juudh kɛnɛ nhiam ruëëcni kɛnɛ kua̱ri, /cuarɛ diɛɛr kɛ kɛ ɣöö bia rɔ̱ gaŋ i̱di, kiɛ min bia lar.

¹² Kɛ ɣöö bi Yiëë ni Gɔaa in Rɛl Rɔ yɛ ŋi̱eec kɛ jɛn thaak ɛmɔ pa̱ny kɛ min bia lar.”

Cäät kɛ dɔ̱a̱r mi riäŋ

¹³ Cu ram kɛl rɛy bunä Yecu jiök i̱, “Ŋi̱i̱c, jio̱kni dämaar, ɛn ɣöö bakɔ nyin gua̱a̱ra da̱a̱k.”

¹⁴ Kä cu Yecu jɛ jiök i̱, “Määthdä, ɛŋa mi ci ɣä jäk kä luuk kiɛ dääk mi bi yɛ dääk kä nyinkun?”

¹⁵ Kä cu Yecu naath jiök i̱, “Tiɛtdɛ rɔ̱ kä gaŋɛ rɔ̱ agɔaa kɛ nyin di̱tdä lɔaac diaal kɛ ɣöö /ci tëk ran a pek ŋɔaani ti ŋuan tin tekɛ jɛ.”

¹⁶ Kä cuɛ kɛ la̱t ruac cäätdä, wëë i̱, “Mun raam mi riäŋ riäŋ no̱o̱ŋɛ dɛy ti nyin ŋuan.

¹⁷ Kä cuɛ wi̱cdɛ car wëë i̱, ‘Bä ŋu la̱t, kɛ ɣöö thilɛ ɣä gua̱a̱th mi bä bɛlkä tɔ̱w thi̱n?’

¹⁸ Kä cuɛ wee i̱, ‘Ɣän, bä nɛmɛ la̱t. Ɣän bä lueekä däk, kä bä ti di̱et ni kɛn la̱t. Bä bɛlkä diaal kɛnɛ kuakä diaal tɔ̱w thi̱n.

¹⁹ Kä bä tieeydä jiök i̱, “Tieey, ci kuak ti ŋuan dol kɛ kui̱ runi ti ŋuan dol. Ku lɔ̱ɔ̱ŋ, kä mi̱thni, kä mäthni, kä a lɔcdu tɛth.” ’

²⁰ Kä cu Kuoth ɛ jiök i̱, ‘Ji̱n dɔ̱a̱r! Ba tëkdu go̱r kä ji̱ ni ɛn wäär. Kä bi ŋɔak tin ci rialikä kula nyin ŋa?’

²¹ Ɛ jɛn ta̱a̱ raam mi go̱r ŋɔak ti ŋuan kɛ kui̱dɛ kärɔa, kä duundɛ ɣöö /cikɛ riäŋ nhiam Kuɔth.”

/Cuarɛ diɛɛr

²² Kä cu Yecu ji̱ kɔaarɛ jiök i̱, “Kɛ kui̱ ɛmɔ ɣän la̱rä jɛ yɛ, i̱ /Cuarɛ diɛɛr kɛ kui̱ teekädun, kɛ mi bi yɛn ɛ cam, kiɛ kɛ puɔ̱nydun kɛ mi bia kum ni jɛ.

²³ Kɛ ɣöö di̱t ni tëk ran kä mi̱eth, kä di̱t ni puɔ̱ny kä bieyni.

²⁴ Carɛ wuɔ̱thkun kɛ jakɔa̱a̱k, /cikɛ pi̱th, kä /cikɛ ŋer, kä thilɛ kɛ duël tɔ̱wä kiɛ luaak, kä mi̱i̱th Kuoth kɛ. Kä gɔw ni yɛn ɛlɔ̱ŋ kä diit!

²⁵ Ɛŋa kä yɛ, mi dee tëkdɛ rëp kɛ thaak kɛl kɛ diɛɛrɛ?

²⁶ Kä mi thilɛ yɛ lua̱ŋ kɛ la̱t kä mɛ tɔt ɛmɛ, ɛŋu diɛɛr yɛn ɔ kɛ tin kɔ̱kiɛn?

²⁷ Carɛ wuɔ̱thkun kɛ do̱ny tuaali, /cikɛ lät, kä /cikɛ täk. Kä ɣän la̱rä jɛ yɛ, a cäŋ ɛ ni Thɔ-lo-mon kɛ wuɔ̱tdɛ kɛɛliw, /ka̱nɛ runyikä ce̱tkɛ gaak kɛl kä ti̱ti̱.

²⁸ Kä mi ci Kuoth juaac dɔaar moc biɛɛl ti gɔw, tin la tëk walɛ, kä iruun bakɛ pɛt, /cɛ yɛ bi kum bä, yɛn nɛy ti kuiy ŋa̱thdun?

²⁹ /Cuarɛ go̱r kɛ mi bia cam, kiɛ kɛ mi bia math, kä /cuarɛ diɛɛr.

³⁰ Kɛ ɣöö go̱o̱r ji̱ ɣɔaa ɛmɛ ti̱ti̱ diaal. Kä ŋäc Guurun ɣöö go̱o̱r yɛn kɛ bä.

³¹ Kä kɔanɛ go̱r ni ciaaŋ kuäärä Kuɔth kɛ nhiam, kä ba yɛ ka̱m ŋɔak diaal tɔ̱tɔ̱ bä.”

Ria̱ŋ ciëŋ nhial

³² “/Cuarɛ dual, yɛn buɔ̱n deet mi tɔt, kɛ ɣöö ɛ tɛ̈th lɔaac Guurun ɛn ɣöö bɛ yɛ ka̱m kuäär.

³³ Kɔakɛ nyinkun, kä thöpɛ yio̱w nɛy ti can. Muɔcɛ rɔ̱ ki̱thni yio̱o̱ni ti /ci bi met da̱k, kɛ ria̱ŋ ciëŋ nhial mi /ci bi met thuuk, gua̱a̱th mi /ci cueer cup thi̱n, kä /ci tor ŋɔak cam thi̱n.

³⁴ Kɛ ɣöö gua̱a̱th ɔ bi ria̱ŋdu te thi̱n ɔ, ɛ jɛn bi lɔcdu te thi̱n ɔ bä.”

La̱a̱t ti te jinä

³⁵ “Ruɔnyɛ rɔ̱ kä rialɛ rɔ̱ ikä kɛ la̱t, kä dɔapɛ lɛmbärikun.

³⁶ Bia ce̱tkɛ nɛy ti liɛpkɛ ben kua̱riɛn mi luny jɔk guäth mi̱eth kuën, kɛ ɣöö dee kɛ jɛ lëp thi̱i̱k kɛ cuɔ̱pdɛ kɛɛl, mi wëë döŋ.

³⁷ Puɔ̱th akɛ la̱a̱t tin bi kuääriɛn kɛ jek jinä mi wëë ben. Ɛpuc, ɣän la̱rä jɛ yɛ, bɛ la̱a̱kdɛ yian agɔaa, kä bɛ la̱a̱tkɛ jakä nyuur guäth mi̱eth, kä jɛn puɔ̱nydɛ bɛ kɛ lätikä.

³⁸ Mi wëë ben kɛ wäärdär kiɛ ni bakä, kä bɛ kɛ jek ɛ jinkɛ inɔ, bɛ la̱a̱t tɔ̱tɔ̱ poth.

³⁹ “Kä ŋa̱cɛ nɛmɛ mi ci gua̱n ciëŋ thaak in bi ben kɛ cuer ŋa̱c, /cɛ ciëëŋdɛ dee jak kä ba jɛ to̱l.

⁴⁰ Amäni yɛn bä, bia rɔ̱ yi̱k rialikä, kɛ ɣöö bi Gat Ran ben kɛ thaak in /ci yɛn ɛ car.”

Läät mi ŋa̱thkɛ kɛnɛ mi /ca ŋäth

⁴¹ Cu Pi-tɔr wee i̱, “Kuäär, latdi ruac cäätdä ɛmɛ kɛ kui̱da, kiɛ kɛ kui̱ nɛɛni diaal?”

⁴² Kä cu Kuäär ni Yecu ɛ jiök i̱, “Ɛŋa la läät mi ŋa̱thkɛ kä pɛl mi bi Kuäärɛ jɛ jakä bo̱o̱th la̱a̱tnikɛ mi bikɛ dääk kä mi̱thkiɛn kɛ gua̱a̱thdɛ?

⁴³ Puɔ̱th akɛ läät in bi kuäärɛ jɛ jek lät mi wëë cop.

⁴⁴ Ɛpuc, ɣän la̱rä jɛ yɛ, bɛ jɛn ram ɛmɔ jakä kuäär nyinäkɛ diaal.

⁴⁵ Kä mi wä läät ɛmɔ wä wee i̱, ‘Ci kuäärä jääny jɔ̱ɔ̱r’, kä bɛ jɛ tok kɛ mi duääcɛ la̱a̱t wutni kɛnɛ män, kä bɛ mi̱th kä bɛ maath, kä bɛ yɔ̱ŋ,

⁴⁶ bi kuäär läätdä ɛmɔ ben kɛ cäŋ mi /kenɛ car, kɛnɛ thaak mi kui̱c ɛ. Bɛ jɛ ŋuɔk raar, kä bɛ jɛ mat kɛɛl kɛ nɛy ti thil ŋa̱th.

⁴⁷ Läät mi ŋäc min göör kuäärɛ jɛ, kä /kenɛ rɔ rialikä agɔaa, a /kɛnɛ min görkɛ la̱t, ba jɛ duäc kɛ duäc mi bɛc bɛ̈c.

⁴⁸ Kä läät mi kui̱c min göör kuäärɛ jɛ, kä cɛ jiäk ti ro̱ŋ kɛ duäcdɛ la̱t, bɛ duäc mi tɔt jek. Ram mi wa ka̱m mi di̱i̱t, ba mi di̱i̱t go̱r kä jɛ, kä ram mi wa ti nyin ŋuan kuëŋ tetädɛ, ba ti ŋuan ni kɛn go̱r kä jɛ bä.”

Yecu ɛ tuk dääkä

⁴⁹ “Ba̱a̱ kɛ ɣöö bä mac yuɔr wi̱i̱ muɔ̱n, kä cua̱ go̱r ni ɣöö cɛ ku thuŋ dɔap!

⁵⁰ Ɣän akɛ la̱k mi ba lak ni ɣä, kä duundɛ ɣöö diɛɛr lɔcdä amäni mi cɛ thuuk!

⁵¹ Caar yɛn ɛ ɛn ɣöö cä mal nööŋ wi̱i̱ muɔ̱ɔ̱n? Ëëy, ɣän la̱rä jɛ yɛ ɛn ɣöö nööŋä ni dääk.

⁵² A tɛmɛ ni ɛn täämɛ, bi nɛy da̱ŋ dhieec ti te dueel rɔ da̱a̱k, a bi nɛy da̱ŋ diɔ̱k tekɛ tɛr kɛ nɛy da̱ŋ rɛw, kä bi nɛy da̱ŋ rɛw tekɛ tɛr kɛ nɛy da̱ŋ diɔ̱k.

⁵³ Kɛn, bakɛ da̱a̱k, bi gua̱n gatdä tekɛ gɛ̈m kɛnɛ gatdɛ, kä gat kɛnɛ gua̱n, kɛ man kɛnɛ nyaadɛ, kɛ nyal kɛnɛ man, kä bi manthu gɛɛm kɛnɛ ciek gatdɛ, kɛ ciek gatdä kɛnɛ manthudɛ.”

Ŋäc nyinä ɣɔaa

⁵⁴ Cu Yecu buɔ̱n nath jiök i̱, “Mi cia pua̱r nɛn mi bä kui̱c konyä ca̱ŋ, ni ɛn guäth ɛmɔ la yɛn a wee i̱, ‘Bɛ dɛ̈m,’ kä la tuɔɔkɛ.

⁵⁵ Kä mi nɛnɛ jiɔam, mi bëë kui̱c cuëëc ɣɔaa, la yɛn a wee i̱, ‘Bi piny lëth ɛlɔ̱ŋ,’ kä bɛ cu tuɔɔk.

⁵⁶ Yɛn ji̱ mɛɛtdä! Ŋäc yɛn luɔt ciɛɛŋä piɛny kɛnɛ nhial, kä ɛŋu /cia luɔt kä min tuɔɔk ɛn täämɛ ŋäc ɔ?”

Lat määth kɛ gua̱n tɛ̈ru

⁵⁷ “Kä ɛŋu /cia rɔ̱ moc cuɔ̱ŋ kɛ kui̱dun yɛn kärɔ mɔ?

⁵⁸ Min wi̱i̱ yɛnɛ ram min gɔɔny ji̱ nhiam luɔ̱ɔ̱kni, ɣɔ̱n ɛ ɛn ɣöö bi yɛn maar lat kamdun rɛy duɔ̱p, kiɛ bɛ ji̱ naŋ nhiam kua̱r luɔ̱k, kä bi kuäär luɔ̱k ji̱ ka̱m yiëën, a bi yiëën ji̱ la̱th dueel yieenä.

⁵⁹ Kä ɣän la̱rä jɛ ji̱, /ca ji̱ bi met lony amäni mi ci yio̱w diaal thöp.”