Luk 10 - RUAC KUƆTH IN RƐL RƆ

Jäkni Yecu kɛ nɛy ti jiɛn bärɔw wi̱cdɛ rɛw

¹ Kɛ kɔr kä mɛmɛ cu Kuäär ni Yecu nɛy ti jiɛn bärɔw wi̱cdɛ rɛw kɔ̱kiɛn mɛk. Cuɛ kɛ jäkä nhiam rɛw kɛɛl rɛy wi̱i̱ni kɛnɛ gua̱th diaal tin bɛ wä thi̱n.

² Kä cuɛ kɛ jiök i̱, “Bɛl ŋuankɛ, kä ji̱ ŋër kuiy kɛ. Kɛ kui̱ ɛmɔ thiëcɛ Kuäär ŋër kɛ ɣöö bɛ ji̱ ŋër jäkä rɛy kakädɛ.

³ Wiaa dupdun. Kä nɛ̈nɛ jɛ, ɣän ja̱kä yɛ kä raar ce̱tkɛ dɛy rɔɔmni ti wä rɛy jio̱o̱kni nyapëc.

⁴ /Cuarɛ ki̱th yio̱o̱ni, kiɛ gök, kiɛ wa̱a̱ri naŋ, kä /cuarɛ raan ner dup.

⁵ Kä duelɔ bia wä thi̱n ɔ, kɛ nhiam wiaa i̱, ‘Ɛ mal te dueel ɛmɛ.’

⁶ Kä mi tëëkɛ ram mi looc malun ɛn wa̱nɔ, bi malun wä kä jɛn ram ɛmɔ. Kä mi thilɛ ram mi te thi̱n bi malun luny kä yɛ.

⁷ Ta̱a̱ yɛ ɛn dueel ɛmɔ, camɛ kä mathɛ mɔ ca ka̱m yɛ mɔ, kɛ ɣöö läät ba jɛ ka̱m min lätkɛ jɛ. /Cuarɛ duël luk.

⁸ Kä mi cia wä rɛy wec, kä nyuur ji̱kɛ yɛ agɔaa, camɛ min ca la̱th nhiamdun.

⁹ Jakɛ ji̱ jua̱thni tin te wi̱ni kä gɔw, kä la̱rɛ jɛ kɛ i̱, ‘Ci kuäär Kuɔth ben thiäkä kä yɛ’

¹⁰ Kä mi cia wä rɛy wec kä /ken ji̱kɛ yɛ nyuɔ̱ɔ̱r agɔaa, wiaa duɔ̱pnikɛ kä wiaa i̱,

¹¹ ‘Cäŋɛ ni tur wecdun in ci dɔp ciöknikɔ, tɛ̈ŋkɔ jɛ kɛ ɣöö ba go̱o̱ny kɛ kui̱dun. Kä ŋa̱cɛ mɛmɛ ɛn ɣöö ci kuäär Kuɔth ben thiäkä.’

¹² Kä ɣän la̱rä jɛ yɛ, i̱ bi ŋua̱n ni tɔa̱ŋ Thɔ-dɔm kä tɔ̱a̱ŋ wec ɛmɔ.

Riɛk akɛ wi̱i̱ ti thil ŋa̱th

¹³ “Riɛk akɛ yɛ, yɛn ji̱ Ko-rä-dhin! Riɛk akɛ yɛ, yɛn ji̱ Beth-the-da! Kɛ ɣöö mi ca lät ti buɔ̱m buɔ̱ɔ̱m tëë ca la̱t rɛydun la̱t kä Dhor kɛnɛ Dhi-don, ce̱t cikɛ rɔ̱ ri̱t dueeri ni wal kɛ läth bieyni cuali kɛnɛ nyuur rɛy ŋɛthä.

¹⁴ Bi gɔaa ni luk Dhor kɛnɛ Dhi-don kä luk in ba luk ni yɛ.

¹⁵ Kä yɛn ji̱ Ka-pɛr-ni-äm, ɛ yɛn i̱ ba yɛ kap nhial? Ëëy ba yɛ naŋ ni piny guäth li̱eth.

¹⁶ “Ramɔ ci ruacdun liŋ ɔ, liŋɛ ni ruacdä, kä ramɔ ci ruacdun lo̱k ɔ, lo̱kɛ ni ruacdä, kä ramɔ ci ruacdä lo̱kɔ, lo̱kɛ ni ruac raam ëë jäk ɣä.”

Luny nɛɛni ti jiɛn bärɔw wi̱cdɛ rɛw jɔk

¹⁷ Cu nɛy ti jiɛn bärɔw wi̱cdɛ rɛw luny jɔk kɛ tɛ̈th lɔaac wäkɛ i̱, “Kuäär, a cäŋɛ ni yiey ti jiäk cikɛ rɔ̱ lua̱r kɔ kɛ ciötdu.”

¹⁸ Kä cuɛ kɛ jiök i̱, “Ɣän cä Cɛy-tan nɛn pɛnɛ piny nhial ce̱tkɛ yiel nhial.

¹⁹ Nɛ̈nɛ jɛ, cä yɛ ka̱m lua̱ŋ kɛ ɣöö bia thɔ̱ɔ̱l kɛnɛ jiɛth dɔany, kɛnɛ ɣöö bia buɔ̱m gua̱n tɛ̈run kɛɛliw tiam, kä thilɛ mi bi yɛ guëër.

²⁰ A lo̱ckun /ci tɛth kɛ ɣöö ci yiey ti jiäk rɔ̱ lua̱r yɛ, a lo̱ckun tɛth kɛ ɣöö ca ciöötkun gɔ̱r nhial.”

Tɛ̈th lɔaac Yecu

²¹ Ɛn guäth ɛmɔ cu Yecu lɔcdɛ tɛɛth rɛy Yieekä in Gɔaa in Rɛl Rɔ, kä cuɛ wee i̱, “Ɣän la̱rä ji̱ tɛ̈th lɔaac, Gua̱di̱n, in la Kuäär nhial kɛnɛ piny, kɛ ɣöö ci ŋɔaani ti̱ti̱ tey kä nɛy ti pɛl kɛnɛ ti ŋa̱ckɛ ŋɔak, kä ci kɛ nyuɔ̱th ruɔri. Ɣɔ̱ɔ̱n, Gua̱di̱n, ɛ jɛn min nhɔk lɔcdu jɛ.

²² Ŋɔaani diaal ca kɛ ka̱m ɣä ɛ Gua̱a̱r. Kä thilɛ ram mi ŋäc Gat ɛ ni Gua̱n kärɔa, kä thilɛ ram mi ŋäc Gua̱n ɛ ni Gat kärɔa, kɛnɛ ram mi ci Gat ɛ mɛk, ɛn ɣöö bɛ jɛ nyuɔ̱th jɛ.”

²³ Kä cu Yecu rɔ riet ji̱ kɔaarɛ, mëë tekɛ kärɔ̱ wëë i̱, “Puɔ̱th akɛ wäŋ tin guɛckɛ min nɛɛn yɛn ɛ!

²⁴ Kä ɣän la̱rä jɛ yɛ, ɛn ɣöö ci göök kɛnɛ kua̱r ɛ go̱r i̱ nɛ̈nkɛ min nɛɛn yɛn ɛ, kä /ken kɛn ɛ nɛn. Kä cukɛ li̱eŋ kä min liɛŋɛ go̱r, kä /ken kɛn ɛ liŋ.”

Cäät ran Tha-mɛ-ria mi gɔaa

²⁵ Kä cu ram mi bo̱o̱th ŋuɔ̱tni rɔ jiɛc kɛ ɣöö bɛ Yecu ɣɔ̱n. Kä cuɛ wee i̱, “Ŋi̱i̱c, ɛŋu mi bä la̱t kɛ ɣöö bä tëk mi do̱raar jek?”

²⁶ Kä cuɛ jɛ jiök i̱, “Ɛŋu mi ca gɔ̱r ɛ ŋuɔ̱t Muthɛ? Ɛŋu ci kuɛn thi̱n ɔ?”

²⁷ Kä cuɛ jɛ loc i̱, “Bi Kuäär ni Kuothdu nhɔk kɛ lɔcdu kɛɛliw, kɛ tieydu kɛɛliw, kɛ buɔ̱mdu kɛɛliw. Kɛ ca̱ru kɛɛliw, kä nhɔk gua̱n thieekädu, ce̱tkɛ min nhɔki rɔɔdu.”

²⁸ Cu Yecu jɛ jiök i̱, “Ci jɛ loc kɛ thuɔ̱k, lätni mɛmɛ kä bi tëk.”

²⁹ Kä min go̱o̱rɛ ɣöö mocɛ rɔ cuɔ̱ɔ̱ŋ, cuɛ Yecu thiec i̱, “Gua̱n thieekädä ɛŋa?”

³⁰ Cu Yecu jɛ loc i̱, “Tëëkɛ ram mi jiɛy kä Jɛ-ru-tha-lɛm, wëë kä Jɛ-ri-ko, kä cuɛ pɛn tetni ma̱a̱cni, cukɛ nyinkɛ ka̱n, kä cukɛ jɛ duäc, cukɛ jɛ ba̱ny piny a cɛ muɔn.

³¹ Kä cuɛ tekɛ bo̱o̱th palä mi cu wä kɛ jɛn duɔ̱ɔ̱p ɛmɔ. Mëë cɛ jɛ nɛn, cuɛ jɛ gɔ̱l kä cuɛ wä nhiam.

³² Cu raan Lii-bay ɛ la̱t inɔ bä. Mëë cɛ ben kɛ jɛn gua̱a̱th ɛmɔ, cɛ jɛ nɛn, kä cuɛ jɛ gɔ̱l kä cuɛ wä nhiam.

³³ Cu raan Tha-mɛ-ria mi jääl ben kɛ gua̱a̱th ëë tëë thi̱n. Kä mëë cɛ ɛ nɛn, cu lɔcdɛ luäkdɛ go̱r.

³⁴ Cuɛ wä kä jɛ, kä cuɛ buɔ̱ɔ̱tkɛ yiɛn, kä yi̱i̱rɛ kɛ kɛ liɛɛth kɛnɛ kɔaŋ. Cuɛ jɛ kap jɔk muɔ̱lɛ, kä cuɛ jɛ nööŋ duëël ja̱a̱li, kä cuɛ jɛ ŋɔ̱th.

³⁵ Kä mëë ruɔ̱n cuɛ yio̱w da̱ŋ rɛw ka̱n, cuɛ kɛ ka̱m gääŋ duëël ja̱a̱li, kä cuɛ jɛ jiök i̱, ‘Ŋɔ̱th ɛ, kä mi wi̱i̱ yio̱w kɔ̱kiɛn thöp kɛ kui̱dɛ, bäkɛ ben cuɔ̱l ji̱ mi wa̱a̱ wä luny jɔk.’

³⁶ Ɛŋadiɛn kä kɛn nɛy da̱ŋ diɔ̱k ti̱ti̱ mi caari ɛn ɣöö ɛ jɛn la gua̱n thieekä raam min ci pɛn tetni ma̱a̱cni nathɔ?”

³⁷ Cuɛ jɛ loc i̱, “Ɛ jɛn ram min ci jɛ nyuɔ̱th kɔ̱a̱c lɔaac.” Kä cu Yecu jɛ jiök i̱, “Wër, kä lätni mi ce̱tkɛ ɛ nɔ.”

Gui̱l Yecu kɛ Mɛri kɛnɛ Mar-tha

³⁸ Täämɛ, mëë wä Yecu kɛnɛ ji̱ kɔaarɛ dupdiɛn, cuɛ cop rɛy ciëŋ, guäth ëë cu ciek mi cɔal i̱ Mar-tha jɛ nyuɔ̱ɔ̱r dueelɛ.

³⁹ Te Mar-tha kɛ nyiman mi cɔal i̱ Mɛri, mi cu nyuur ciökni Kua̱r ni Yecu liŋɛ ŋi̱i̱cdɛ.

⁴⁰ Kä cu Mar-tha lɔcdɛ jiääk kɛ lät tin lätdɛ, kä cuɛ wä kä Yecu, cuɛ jɛ jiök i̱, “Kuäär, /ci riɛk kɛ ɣöö ci nyimaar ɣä pa̱l la̱t, ɣän kärɔa? Jio̱kni jɛ bɛ ɣä ben luäk.”

⁴¹ Kä cu kuäär ɛ loc i̱, “Mar-tha, Mar-tha, ji̱n diɛɛri kä ti̱i̱ kɛ riɛk kɛ ti ŋuan.

⁴² Kä ɛ kɛl kärɔa görkɛ mɔ. Kä ci Mɛri mɛkni min gɔaa ni jɛn, mi /ca bi woc kä jɛ.”