Luk 1 - RUAC KUƆTH IN RƐL RƆ

¹ Nɛy ti ŋuan ca ɣɔ̱n ɛn ɣöö bikɛ ŋɔaani tëë ci tuɔɔk rɛydan gɔ̱r.

² Ca tëë ca la̱t kɔ ɛ nɛy tëë ca ti̱ti̱ nɛn ni tukädɛ kɛn nɛy tëë la̱tkɛ ruac Kuɔth.

³ Kä min cä ti̱ti̱ diaal go̱r agɔaa ni tukädiɛn, ɣän cä jɛ car ɛn ɣöö bäkɛ gɔ̱a̱r ji̱ nikɛ ta̱a̱ in ci tuɔɔk kɛ kɛ lö määthdä ni Thi-ɔ-pi-läth.

⁴ Kɛ ɣöö bi thuɔ̱k ŋa̱c kɛ kui̱ ŋɔaani tin ca nyuɔ̱th ji̱.

Lär däpä Jɔ̱ɔ̱n in la lääk

⁵ Kɛ ni̱n tëë Ɣɛ-rod ɛ kuäär kä Ju-dia, tëëkɛ bo̱o̱th palä mi cɔal i̱ Dhɛ-kar-yaa, mi la ram kɛl kä bööth palä Ä-bi-yaa. Kä ciekdɛ ɛ kuɛ̈ɛ̈ Ä-ron, kä cɔalkɛ ciötdɛ i̱ I-li-dha-bɛth.

⁶ Kɛn da̱ŋ rɛw kɛ ji̱ cuŋni nhiam Kuɔth, cieŋkɛ ala nɛy ti thil bɛ̈l kɛ ɣöö ka̱pkɛ ŋut Kua̱r ni Kuoth diaal kɛnɛ ruaacnikɛ.

⁷ Kä duundɛ ɣöö thilɛ kɛ gaat, kɛ ɣöö I-li-dha-bɛth ɛ rol, kä ci kɛn da̱ŋ rɛw dɔŋ.

⁸ Kɛ cäŋ kɛl min lätdɛ la̱tdɛ ala bo̱o̱th palä rɛy luaak Kuɔth, kä te buɔ̱ndɛ lät.

⁹ Kä cua jɛ kuany kɛ yor gaakni, kɛ ciaaŋ bo̱thä palä ɛn ɣöö bɛ wä rɛy luaak Kuɔth, kɛ ɣöö bɛ wäl in kurkur wä waŋ.

¹⁰ Cu buɔ̱n nath kɛɛliw Kuoth pal raar, kɛ gua̱a̱th in waŋkɛ wäl.

¹¹ Kä cu jääk kua̱r ni Kuoth päl kä jɛ, tëë cuŋä kui̱c cuëëc yi̱kä in la wäl a waŋkɛ thi̱n.

¹² Mëë ci Dhɛ-kar-yaa jɛ nɛn, cuɛ wi̱cdɛ yi̱c, kä cuɛ dual ɛlɔ̱ŋ.

¹³ Kä cu jääk nhial ɛ jiök i̱, “/Cu dual, Dhɛ-kar-yaa, kɛ ɣöö ca palu liŋ. Bi ciekdu ni I-li-dha-bɛth ruët, kä bɛ dap kɛ gat mi dho̱o̱l, kä bi ciötdɛ cɔl i̱ Jɔ̱ɔ̱n.

¹⁴ Bi lɔcdu tɛɛth, kä bi nɛy ti ŋuan lo̱ckiɛn tɛɛth kɛ kui̱ däpädɛ.

¹⁵ Kɛ ɣöö jɛn bɛ a ram mi di̱i̱t nhiam Kua̱r ni Kuoth. Kä thilɛ kɔaŋ mi kɛc mi bɛ math. Kä bɛ thia̱a̱ŋ kɛ Yiëë in Gɔaa in Rɛl Rɔ, /ka̱n jɛ ni dap.

¹⁶ Jɛn bɛ ji̱ I-thɛ-rɛl ti ŋuan luɔ̱c Kuäär ni Kuothdiɛn.

¹⁷ Bɛ wä nhiamdɛ kɛ yiëë kɛnɛ buɔ̱m E-li-yaa, kɛ ɣöö bɛ diëëth gan luɔc maarä kɛ gaatkiɛn. Kä bɛ nɛy tin thil luth luɔc pɛlä cuŋni, kä bɛ naath jakä ba rɔ̱ rialikä kɛ kui̱ kua̱r ni Kuoth.”

¹⁸ Kä cu Dhɛ-kar-yaa jääk nhial jiök i̱, “Bä nɛmɛ kulɛ ŋa̱c i̱di? Kɛ ɣöö ɛ ɣän wut mi di̱i̱t, kä ci ciekdä dɔŋ.”

¹⁹ Kä cu jääk nhial ɛ loc i̱, “Ɛ ɣän Gab-ri-yel. Ɣän cuɔ̱ŋä nhiam Kuɔth, kä cɛ ɣä ja̱k kɛ ɣöö bä ben ruac kɛ ji̱, nöŋä ji̱ thuk ti gɔw ti̱ti̱.

²⁰ Kɛ ɣöö /keni ruacdä min bi cop guäthdɛ cäŋ kɛl ŋäth bɛ ji̱ di̱w a /ci bi ruac, amäni cäŋ in bi ŋɔaani ti̱ti̱ tuɔɔk.”

²¹ Kä ɛn guäth ɛmɔ liip naath Dhɛ-kar-yaa. Kä cukɛ ga̱a̱c kɛ mɔ cɛ jääny luaak Kuɔth ɔ.

²² Mëë cɛ ben raar, /kenɛ rɔ luäŋ kɛ ruac kɛ kɛ. Kä cukɛ jɛ ŋa̱c ɛn ɣöö cɛ nyuuth nɛn rɛy luaak Kuɔth. Cuɛ ruac kɛ tetkɛ, kä cuɛ ŋot kɛ mi /cɛ ruac luäŋ.

²³ Mëë ci ni̱n la̱tdɛ thuuk, cuɛ wä cieeŋdɛ.

²⁴ Kɛ kɔr ni̱ni tɔ̱tɔ̱ cu ciekdɛ ni I-li-dha-bɛth ruët, kä cuɛ te cieŋ kɛ päth da̱ŋ dhieec.

²⁵ Kä cuɛ wee i̱, “Ci Kuäär ni Kuoth ɣä lät kä mi gɔaa, kɛ ɣöö bɛ pöcdä woc rɛy nath.”

Lär däpä Yecu

²⁶ Kɛ bäkɛl päthni cua jääk nhial ni Gab-ri-yel ja̱k ɛ Kuoth, jäkɛ jɛ rɛy ciëŋ Gɛ̈-lɛ-li mi cɔal i̱ Na-dha-rɛth.

²⁷ Wëë kä nyam mi /ken met te kɛɛl kɛ wut mi ca la̱r kuën ɛ wut mi cɔal i̱ Jo-thɛp, raan thuɔk duëël Dee-bid. Kä cɔal ciöt nyam ɛmɔ i̱ Mɛri.

²⁸ Cu jääk nhial ben kä Mɛri, kä cuɛ jiök i̱, “Malɛ, ji̱n nyam mi ca poth! Kuoth a kɛɛl kɛ ji̱.”

²⁹ Kä cuɛ Mɛri wi̱cdɛ yi̱c ɛlɔ̱ŋ kɛ ruac ɛmɔ. Kä cuɛ ca̱r i̱ dee luɔt nërä nɔmɔ a ŋu.

³⁰ Kä cu jääk nhial ɛ jiök i̱, “/Cu dual, Mɛri, kɛ ɣöö ci puɔ̱th jek kä Kuɔth.

³¹ Kä nɛn ɛ, bi ruët. Kä bi dap kɛ gat mi dho̱o̱l, kä bi ciötdɛ cɔl i̱ Yecu.

³² Jɛn bɛ a ram mi di̱i̱t, kä ba jɛ cɔl i̱ Gat Kuɔth Nhial in Di̱t ni jɛn. Kä bi Kuäär ni Kuoth jɛ ka̱m kɔm kuäärä gua̱ndɔɔŋdɛ ni Dee-bid.

³³ Bɛ thok duëël Je-kɔb ruac amäni cäŋ kɛl, kä /ci kuäärɛ bi te kɛ pek.”

³⁴ Kä cu Mɛri jääk nhial jiök i̱, “Dee mɛmɛ tuɔɔk i̱di, kä ɛ ɣä nyal?”

³⁵ Cu jääk nhial jɛ jiök i̱, “Bi Yiëë in Gɔaa in Rɛl Rɔ ben kä ji̱, kä bi buɔ̱m Kuɔth in Di̱t ni jɛn ji̱ kum. Kɛ kui̱c ɛmɔ bi gat mi in ba dap a mi rɛl rɔ, kä ba jɛ cɔl i̱ Gat Kuɔth.

³⁶ Kä täämɛ, ci watdu ni I-li-dha-bɛth ruët kɛ gat mi dho̱o̱l, dɔŋädɛ. Kä ɛ jɛn pay in bäkɛliɛn kä jɛ, ɛn ram in latkɛ i̱ rol.

³⁷ Kɛ ɣöö thilɛ mi /ci Kuoth ɛ dee luäŋ kɛ lätni.”

³⁸ Kä cu Mɛri wee i̱, “Ɣän ɛn, ɣän ja̱ŋ Kua̱r ni Kuoth. A jɛ tekɛ ɣä ce̱tkɛ min ci lar.” Kä cu jääk nhial jiɛɛn kä jɛ.

Gui̱l Mɛri kɛ I-li-dha-bɛth

³⁹ Kä ɛn ni̱ni tɔ̱tɔ̱ cu Mɛri jiɛɛn, cuɛ wä Ju-dia kɛ pɛ̈th ro̱o̱l päämni.

⁴⁰ Cuɛ wä dueel Dhɛ-kar-yaa, kä cuɛ I-li-dha-bɛth ner.

⁴¹ Mëë ci I-li-dha-bɛth ner Mɛri liŋ, cu gat rɔ wany jiidɛ. Kä cu I-li-dha-bɛth thia̱a̱ŋ kɛ Yiëë in Gɔaa in Rɛl Rɔ.

⁴² Kä cuɛ ciöt kɛ jɔw mi di̱i̱t i̱, “Ca ji̱ poth rɛy mään, kä puɔ̱th akɛ gat in te jiidu.

⁴³ Kä ɛŋu ci mɛ di̱i̱t ɛmɛ tuɔɔk kä ɣä mɔ, ɛn ɣöö ci man Kua̱rä ni Kuoth ben kä ɣä?

⁴⁴ Kɛ ɣöö niɛ guäth in cä neru liŋ, cu gat rɔ wany jiidä kɛ tɛ̈th lɔaac.

⁴⁵ Ca ji̱ poth kɛ ɣöö ci ŋa̱th ɛn ɣöö bi min ca la̱r ji̱ ɛ Kuäär ni Kuoth dhil tuɔɔk kä ji̱.”

Dit Puɔnyä Mɛri

⁴⁶ Kä cu Mɛri wee i̱, “Yiëëdä liakɛ Kuäär ni Kuoth,

⁴⁷ kä tɛth lɔcdä kɛ Kuoth in la Käändä,

⁴⁸ kɛ ɣöö cɛ ciaŋ kuɛɛkä nya la̱tdɛ nɛn. Kä nɛnɛ, a tɛmɛ ni ɛn täämɛ, bi ri̱c diaal ɣä cɔl i̱ mi ca poth.

⁴⁹ Kɛ ɣöö ci Kuoth in Bum ni jɛn ɣä lät kä ti buɔ̱m buɔ̱ɔ̱m, kä cɔl ciötdɛ i̱ mi Rɛl Gɔɔydɛ rɔ.

⁵⁰ Kä te kɔ̱a̱c lɔɔcdɛ kɛ nɛy tin luɔ̱thkɛ jɛ, ri̱cɔ kɛ ri̱cɔ.

⁵¹ Cɛ buɔ̱m nyoth kɛ tetdɛ, kä cɛ nɛy tin liak rɔ rɛy cärikiɛn riaw dɔɔr.

⁵² Cɛ nɛy ti buɔ̱m buɔ̱ɔ̱m woc wuɔ̱thni kɔamni kuäärädiɛn, kä cuɛ nɛy ti mua̱l mua̱a̱l kap nhial.

⁵³ Cuɛ nɛy ti näk buɔthkɛ riäŋ kɛ ŋɔak ti gɔw, kä cuɛ nɛy ti ria̱ŋ ria̱a̱ŋ jakä wä baaŋ.

⁵⁴ Cuɛ ja̱ŋdɛ ni I-thɛ-rɛl luäk, kɛ ti̱emdɛ kɛ kɔ̱a̱c lɔaacdɛ.

⁵⁵ Ce̱tkɛ mëë cɛ la̱r gua̱ndɔɔŋnikɔn, kɛ A-bɛ-ram kɛnɛ kuaykɛ amäni cäŋ kɛl.”

⁵⁶ Kä cu Mɛri te kɛɛl kɛ I-li-dha-bɛth kɛ päth da̱ŋ diɔ̱k, kä cu Mɛri loc cieeŋdɛ.

Da̱p Jɔ̱ɔ̱n in la lääk

⁵⁷ Täämɛ cu gua̱a̱th dapä I-li-dha-bɛth cop, kä cuɛ dap kɛ gat mi dho̱o̱l.

⁵⁸ Kä cu ji̱ thieekädɛ kɛnɛ watkɛ jɛ liŋ ɛn ɣöö ci Kuäär ni Kuoth ɛ nyuɔ̱th kɔ̱a̱c lɔaac mi di̱i̱t, kä cu lo̱ckiɛn tɛɛth kɛ jɛ kɛɛl.

⁵⁹ Kä kɛ bädäk ni̱ni cukɛ ben kɛ ɣöö ba gat ben cuɛl, kä ɛ kɛn i̱ ba jɛ cɔl i̱ Dhɛ-kar-yaa kɛ ciöt gua̱n.

⁶⁰ Kä cu man wee i̱, “/Ciɛ jɛn, ba jɛ cɔl i̱ Jɔ̱ɔ̱n.”

⁶¹ Kä cukɛ jɛ jiök i̱, “Thilɛ ji̱ watdu mi cɔalkɛ kɛ jɛn ciöt ɛmɛ.”

⁶² Cukɛ gua̱n wɛt, thiëckɛ jɛ kɛ ciöt in go̱o̱rɛ i̱ ba cɔl ni jɛ.

⁶³ Cuɛ kɛ thiec duɔ̱ɔ̱r mi derɛ gɔ̱a̱r thi̱n, kä cuɛ jɛ gɔ̱r i̱, “Ciötdɛ ɛ jɛn Jɔ̱ɔ̱n.” Kä cu kɛn diaal ga̱a̱c.

⁶⁴ Kä ni ɛn guäth ɛmɔ cu jɔwdɛ rɔ nyɔk kɛ lɛ̈p. Cuɛ lɛpdɛ lony, kä cuɛ ruac a liakɛ Kuoth.

⁶⁵ Kä cu ji̱ thieekädiɛn diaal dual. Kä ca ruaacni ti̱ti̱ diaal da̱k rɛy rööl päämni kä Ju-dia.

⁶⁶ Cu nɛy diaal tëë cakɛ liŋ ga̱a̱c, wäkɛ i̱, “Bi gat ɛmɛ ku la ŋa?” Kɛ ɣöö te Kuäär ni Kuoth kɛ jɛ kɛɛl.

Ruac go̱o̱kä Dhɛ-kar-yaa

⁶⁷ Cu gua̱n ni Dhɛ-kar-yaa ro̱ŋ kɛ Yiëë in Gɔaa in Rɛl Rɔ, kä cuɛ ruac go̱o̱kä lat wëë i̱,

⁶⁸ “Puɔ̱th akɛ Kuäär ni Kuoth ni Kuoth I-thɛ-rɛl, kɛ ɣöö cɛ nɛɛkɛ ben luäk, kä cuɛ kɛ ben kän.

⁶⁹ Kä cuɛ moc kään mi bum, rɛy gɔaal Dee-bid in la kuanydɛ.

⁷⁰ Cɛ jɛ lat kɛ thuk gööknikɛ tin rɛ̈lkɛ rɔ̱ ni wal.

⁷¹ Kɛ ɣöö ba kɔn kän kä ji̱ tɛ̈ran, kɛnɛ tet nɛɛni diaal ti nyiɛrkɛ kɔn.

⁷² Kɛ ɣöö bɛ lät kɛ kɔ̱a̱c lɔaac ce̱tkɛ mëë cɛ la̱r gua̱ndɔɔŋnikɔn, kä bɛ mat ruacdɛ min rɛl rɔ tit,

⁷³ mëë yacɛ rɔ nhiam gua̱ndɔɔŋdan ni A-bɛ-ram,

⁷⁴ ɛn ɣöö ca kɔn kän tetni ji̱ tɛ̈ran, banɛ jɛ lätikä a thil dual.

⁷⁵ Kɛ rɛy ciɛɛŋä mi rɛl rɔ, kɛnɛ rɛy cuŋni nhiamdɛ kɛ pek teekädan kɛɛliw.

⁷⁶ Kä ji̱n, gatdä ba ji̱ cɔl i̱, ‘Gök Kuɔth in Di̱t ni jɛn,’ kɛ ɣöö bi wä nhiam Kua̱r ni Kuoth, kɛ ɣöö bi dupkɛ rialikä,

⁷⁷ kä bi jɛ la̱r nɛɛkɛ ɛn ɣöö bakɛ kän kɛ päl dueerikiɛn.

⁷⁸ Kä kɛ kɔ̱a̱c lɔaac Kuothdan, bɛ cäŋ känä mi buɔy jakä lɛp kɛ kui̱dan.

⁷⁹ Kä bɛ buay ka̱n nɛy ti nyuur rɛy muɔ̱th kɛnɛ rɛy ti̱pä li̱eth, kä bɛ kɔn böth dup malä.”

⁸⁰ Kä cu gatdä piith, kä cuɛ buɔ̱m rɛy yieekä. Kä cuɛ cieŋ däär dɔaar amäni cäŋ nyuuthädɛ kɛ rɔ̱ ji̱ I-thɛ-rɛl.