Liib 7 - RUAC KUƆTH IN RƐL RƆ

Muc ti cuɔlkɛ

¹ “Ti̱ti̱ kɛ kɛn ŋuɔ̱t kɛ kui̱ mucni tin cuɔlkɛ, tin rɛl gɔɔydiɛn rɔ.

² Ɛn luur cutdä bajɛ näk wi̱i̱ yi̱kä in la luuri a waŋkɛ thi̱n, kä bariɛmdɛ kiɛth kui̱ni yi̱kä da̱ŋ ŋuaan.

³ Kä bathiɔlɛ ka̱m raar kä ba thöp wi̱i̱ yi̱kä thiɔl jua̱a̱lɛ kɛnɛ thiɔl jiɛcdɛ.

⁴ Kɛ rokɛ kɛ kɛ kɔalikɛ amäni go̱o̱k cua̱nydɛ.

⁵ Bi bööth palä kɛ waŋ wi̱i̱ yi̱kä ala muc mi wa̱ŋkɛ Kuoth Nhial, kɛ ɣöö ɛ muc cutdä.

⁶ Kä bi tut diaal thukni duëli bööthni palä mi̱th thi̱n, kä ba jɛ cam guäth in ley gɔɔydɛ rɔ.

⁷ Ɛn luɔt kä mɛmɛ, ɛ jɛn bä mi balät kä muc dui̱rä kɛnɛ muc cutdä bikɛ a nyin bööth palä min thöp luur.

⁸ Kä ɛn bööth palä mɔ wä muc mi waŋ wä thöp ɔ kɛ kui̱ ran, a jɛ tɔ̱ɔ̱w rɔ kölɛ,

⁹ kä muc bɛɛl diaal tɔ̱ ca bul tɔ̱ kiɛ tin ca thal kɛ ɣa̱lɛ kiɛ thac, bikɛ a nyin bööth palä min thöpkɛ kuoth.

¹⁰ Kä duundɛ ɣöö kɛn muc bɛɛl diaal tin /ken tuak a ca lia̱a̱p kɛ liɛɛth kiɛ thil liɛɛth kɛ nyin gan Ä-ron, bakɛ da̱a̱k a päär.”

Muc nyuaakä

¹¹ “Ti̱ti̱ kɛ kɛn ŋuɔ̱t kɛ kui̱ luurä nyuaakä min dëë raan ɛ ka̱m Kuoth Nhial.

¹² Mi nööŋɛ ni yaŋ mi la muc tɛthkä lɔaac, a jɛ nööŋɛ kɛ kɛ jurayni ti thil thuɔp kä ca lia̱a̱p kɛ liɛɛth kɛ pat patni ti ca lia̱a̱p kɛ liɛɛth kä thil thuɔp, kɛ pat patni ti rɛ̈p rɛ̈ɛ̈p ti ca lia̱a̱p kɛ liɛɛth kä thil thuɔp.

¹³ Kä bɛ jurayni ti ca muc thuɔp nööŋ kɛ kɛ muc nyuaakädɛ.

¹⁴ Kä bɛ kɛl nööŋ kä ti diaal ala muc kɛ kui̱ Kuɔth Nhial. Kä ba duŋ bööth palä mɔ bi riɛm mucä nyuaakä ben kithɔ.

¹⁵ Kä bari̱ŋ lɛ̱̈ɛ̱̈ ɛmɔ cam nikɛ li̱w ɛn cäŋ ɛ luɔɔrkɛ ni jɛ mɔ a thilɛ mi bi baak piny thi̱n.

¹⁶ Kä mi mucdɛ ɛ luur yäcä ŋäthädɛ kɛ rɔ, kiɛ ɛ muc tɛthkä lɔacdɛ, ba ri̱i̱ŋdɛ cam ɛn cäŋ ɛ ca luurni jɛ mɔ kä mi tëë mi wä duɔth thi̱n bacam kɛ cäŋ in rɛwdɛ.

¹⁷ Kä mi wä tha̱a̱ŋdɛ rɔ, nyɔk kɛ duɔth mäni cäŋ in diɔ̱ɔ̱kdiɛn, a jɛ kua waŋ.

¹⁸ Kä mi wee ri̱ŋ mucä tɛthkä lɔacdɛ wä cam kɛ diɔ̱ɔ̱k ni̱ni, /ca jɛ bi nhɔk cukɛ a /ca bi kuen ram in thöp jɛ. Kɛ ɣöö cɛ jiäk, kä ɛn ram ɔ bi mi̱th thi̱n ɔ bi riɛkdɛ jëk ni jɛ.

¹⁹ “Kä ri̱ŋ luurä mi ca nyɔt ɛ duɔ̱ɔ̱r mi jiääk /ca jɛ bi cam, bawaŋ ni jɛ, kä nɛy diaal tin gɔw röŋkɛ kɛ mi̱eth.

²⁰ Kä mi wä raan ri̱ŋ wä cam kä ri̱ŋ tin jiäk, kä luur in ka̱mkɛ Kuoth Nhial ba jɛ koc rɛy nɛɛnikɛ.

²¹ Kä mi wä raan puɔ̱nydɛ ya̱r kɛ thiëp kä mi jiäk, raan kiɛ le̱y kiɛ kɛl kä tin canykɛ, kä cɛ mi̱th kɛ ri̱ŋ luurä maarä Kuɔth Nhial, jɛn badääk raar rɛy nɛɛnikɛ.”

Thɛ̈k thiɔaal kɛnɛ riɛm

²² Cu Kuoth Nhial Muthɛ jiök,

²³ “Jiök ni ji̱ I-thɛ-rɛl i̱, ‘/Cuarɛ thiɔl ɣɔ̱ɔ̱k kiɛ rɔɔm kiɛ böwni cam.

²⁴ Thiɔl lɛ̱̈ɛ̱̈ mi ci li̱w kärɔa, kiɛ le̱y mi ca näk ɛ lɛy dɔaar /ca bi cam, balät ni jɛ lät kɔ̱kiɛn.

²⁵ Kä ram ɔ bi thiɔl lɛ̱̈ɛ̱̈ in wa̱ŋkɛ Kuoth Nhial cam ɔ, badääk raar rɛy nɛɛnikɛ.

²⁶ Kä ɛn gua̱a̱th ɛ cieŋ ji̱ I-thɛ-rɛl thi̱n ɔ, a thil riɛm diɛt kiɛ le̱y mi camkɛ.

²⁷ Kä ram ɔ bi riɛm cam ɔ, ba dääk raar rɛy nɛɛnikɛ.’ ”

Böth bööthä palä

²⁸ Cu Kuoth Nhial Muthɛ lɛni jiök,

²⁹ “Jiök ni ji̱ I-thɛ-rɛl i̱, ‘Ram ɔ wä muc maarädɛ wä nöŋ Kuoth Nhial, a jɛ nööŋ tha̱a̱ŋdɛ ala luur Kuɔth Nhial.

³⁰ Kä bɛ mucdɛ min mucdɛ nööŋ mi ba wa̱ŋ Kuoth Nhial, bɛ thiɔl kɛnɛ kaw nööŋ, kä ba kaw ŋuëŋ Kuoth Nhial, ala muc mi ŋuaŋ.

³¹ Kä bi bööth palä thiɔl waŋ wi̱i̱ yi̱kä, kä bi kaw cua̱ duundɛ.

³² Kä bi ɣäm cuëëc ka̱m bööth palä, kä muc nyuaakädu ala muc,

³³ kä ram kɛl kä gaat Ä-ron min thöp riɛm kɛnɛ thiɔl mucä maarä mɔmɔ bɛ ciök ɛmɔ ka̱n ala cuɔ̱ɔ̱ŋdɛ.

³⁴ Kä kä muc nyuaakä ji̱ I-thɛ-rɛl ɣän cä kaw in ŋuëŋkɛ ni ɣä kɛnɛ ɣäm cuëëc in ca ŋun ka̱n, kä cä kɛ ka̱m Ä-ron kɛnɛ gaatkɛ, ala cuɔ̱ɔ̱ŋdiɛn rɛy gan I-thɛ-rɛl.

³⁵ Nɔmɔ ɛ jɛn cuɔ̱ɔ̱ŋ Ä-ron kɛnɛ gaatkɛ kä luur in la wa̱ŋkɛ Kuoth Nhial kɛ mac, ba ka̱m kɛ cäŋ in leykɛ nikɛ ala la̱a̱t palä nhiam Kuɔth Nhial.’

³⁶ Kä ɛn cäŋ ɛmɛ cu Kuoth Nhial ɛ la̱r ji̱ I-thɛ-rɛl ɛn ɣöö bikɛ kɛ ka̱m pëk ɛmɔ kä luuri ala duundiɛn mi do̱raar rɛy ri̱cnikiɛn diaal tin bi ben.”

³⁷ Nɛmɛ ɛ jɛn luɔt kɛ kui̱ mucni tin waŋkɛ, muc bɛɛl, muc dui̱rä, muc cutdä, muc kue̱ny bööthni la̱t Kuɔth muc nyuaakä.

³⁸ Kɛ kɛn tëë ci Kuoth Nhial kɛ ka̱m Muthɛ wi̱i̱ pa̱a̱m kä Thi-nay, cäŋ ëë jiökɛ ji̱ I-thɛ-rɛl i̱, akɛ nööŋkɛ muckiɛn Kuoth Nhial, däär dɔaar Thi-nay.