Liib 6 - RUAC KUƆTH IN RƐL RƆ

¹ Ɛn wa̱nɔ cu Kuoth Nhial ruac kɛ Muthɛ i̱,

² “Mi ci raan ŋa̱thdɛ ya̱r nhiam Kuɔth Nhial, kɛ ka̱ŋdɛ kɛ raan I-thɛ-rɛl kɛ mi ca tɔ̱a̱w jɛ kiɛ cɛ kual, kiɛ cɛ mac kɛ pɛl,

³ kiɛ cɛ mëë ci bath jëk kä cɛ kac kac kɛ kui̱dɛ. Kä cɛ rɔ yac kɛ kac, kɛ ga̱kdɛ kɛ jɛ i̱ /kenɛ jɛ nɛn.

⁴ Kä mi ci raan duer la̱t kä cɛ duerɛ ŋa̱c, a jɛ luuc min cɛ kual kiɛ min cɛ wen jɔk, kiɛ min ca tɔ̱a̱w jɛ, kiɛ kuak ti ci bath kä cɛ jek,

⁵ kiɛ mi dɔ̱ŋ mi cɛ rɔ yac kɛ jɛ kɛ kac. Bɛ nɔmɔ cuɔ̱l gua̱ndɛ kɛɛliwdɛ, kä bɛ jɛ rep nikɛ dhieec dhieecni kɛ gua̱a̱th in tho̱pɛ ni muc dui̱rädɛ.

⁶ Kä bɛ karaamdɛ nööŋ bööth palä ala luur dui̱rä mi thöpɛ Kuoth Nhial ruath dɛ̈ɛ̈l rɔɔmä mi thil diw rɛy detkɛ, kä bi kökdɛ a mi ro̱ŋ kɛ kök in wen

⁷ bi bööth palä jɛ cu luɛl nhiam Kuɔth Nhial kä bajɛ cu pälikä.”

Muc ti waŋkɛ kɛ ruɔliɛn

⁸ Kä cu Kuoth Nhial Muthɛ jiök i̱,

⁹ “Käm ni Ä-ron kɛnɛ gaatkɛ laat ti̱ti̱ kɛ kui̱ luuri ti waaŋ, kä ɛn luur mi waŋkɛ ba la̱th maac wi̱i̱ yi̱kä kɛ wäär kɛ li̱w amäni runwaŋ, kä thɔalkɛ macdɛ thi̱n.

¹⁰ Bi bööth palä bi̱i̱dɛ mi bäär la̱th kɛnɛ thuruaalikɛ. Kä bɛ ŋɛ̈th in ci mac ɛ pɛt wi̱i̱ yi̱kä puɔc piny, kä bɛ jɛ duɔl thaar yi̱kä.

¹¹ Kä kɛ kɔrɛ bɛ bieynikɛ, cu wäny kä bɛ ŋɛ̈th naŋ jɔk wec guäth mi lɛy lɛy.

¹² Kä ba mac in te wi̱i̱ yi̱kä a thɔalkɛ, kä ca bi jak kä li̱w, kä bi bööth palä jiɛɛn thuɔl maac kɛ runwaŋ. Kä bɛ luur in waŋkɛ cu car wi̱i̱dɛ, kä bɛ kɔali luurä nyuaakä cu waŋ thi̱n.

¹³ Kä bamac jak kä pɛt wi̱i̱ yi̱kä ni ciaŋ a /ci li̱w.

Muc bɛɛl

¹⁴ “Ti̱ti̱ kɛ ŋuɔ̱t kɛ kui̱ mucä bɛɛl bi gaat Ä-ron ɛ nööŋ nhiam Kuɔth Nhial kä bikɛ jɛ ben thöp nhiam yi̱kä.

¹⁵ Kä bi bööth palä rɔ̱ muc kɛ tetdɛ a thiäŋ kɛ mi tekɛ liɛɛth, kä tekɛ wal ti tekɛ ŋuäny mi kurkur kä bɛ jɛ cu waŋ wi̱i̱ yi̱kä, ɛ ti̱em kɛ ɣöö ca kɛ kɔn ka̱m Kuoth Nhial. Kä bi ŋuäny gɔɔydɛ la mi gɔaa kä Kuoth Nhial.

¹⁶ Kä bi Ä-ron kɛnɛ gaatkɛ duɔth nuɔ̱p ɛmɔ cam ala juray mi thil rɛydɛ thuɔp. Bikɛ jɛ cam guäth mi rɛl gɔɔydɛ rɔ rɛy kal kɛmɛkä ro̱mä kɛ Kuoth Nhial.

¹⁷ Ɛn böth in cä ka̱m kɛ ala duundiɛn kä luurä min la wa̱ŋkɛ ɣä, /ca jɛ bi läny kɛ thuɔp, ɛ duŋ gɔaa mi rɛl gɔɔydɛ rɔ ce̱tdɛ nikɛ luur dui̱rä kɛnɛ muc cutdä.

¹⁸ Kä bi kuay Ä-ron diaal tin la wutni la mi̱th thi̱n kɛ ɣöö ɛ kui̱diɛn kä luur in la wa̱ŋkɛ Kuoth Nhial rɛy ri̱cnikiɛn diaal. Kä ɛn ram ɔ wä jɛ met ɔ ɛn mi̱eth ɛmɔ bi gɔɔydɛ jɛ moc riɛk.”

¹⁹ Kä cu Kuoth Nhial Muthɛ lɛni jiök,

²⁰ “Nɛmɛ ɛ jɛn muc in bi Ä-ron kɛnɛ gaatkɛ jɛ nöŋ Kuoth Nhial kɛ cäŋ in ba yi̱i̱r ni jɛ. Ɛ them nupä mi gɔaa nööŋɛ ce̱tkɛ muc bɛɛl in wenkä, bɛ tha̱a̱ŋdɛ nööŋ kɛ runwaŋ kä min dɔ̱ŋ bɛ nööŋ kɛ thiaŋ.

²¹ Ba jɛ la̱t kɛ liɛɛth rɛy thacä, biɛ nööŋ ciɛ lia̱a̱p kɛ liɛɛth agɔaa, kä biɛ nööŋ ɛn muc bɛɛl a ciɛ thia̱y gööli kɛ ɣöö ɛ ŋuäny mi gɔaa kä Kuoth Nhial.

²² Kɛ ɣöö ɛ mi bala̱tkɛ ni ciaŋ kä biɛ la̱t gat Ä-ron bööth palä in diit min ca yi̱i̱r, kä ba waŋ kɛɛliwdɛ kɛ ɣöö ɛ muc Kuɔth Nhial.

²³ Ɛn muc bööthni palä diaal min mɔ muc bɛɛl bawaŋ nikɛ liwdɛ, thilɛ mi bacam thi̱n.”

Muc Kuɔth kɛ kui̱ dui̱rä

²⁴ Cu Kuoth Nhial Muthɛ jiök i̱,

²⁵ “Jio̱kni Ä-ron kɛnɛ gaatkɛ, ɛn ɣöö nɛmɛ ɛ jɛn ŋuɔ̱t kɛ kui̱ mucä dui̱rä ɛn guäth in la muc in waŋkɛ a na̱kɛ thi̱n, ɛ jɛn bia muc dui̱rä näk thi̱n ɔ nhiam Kuɔth Nhial, kɛ ɣöö rɛl gɔɔydɛ rɔ.

²⁶ Kä ɛn bööth palä in thöp muc mi̱eth ɛmɔ, bɛ jɛ cam guäth in rɛl gɔɔydɛ rɔ, gua̱a̱th luɔ̱ɔ̱kni rɛy kɛmɛkä dolä.

²⁷ Kä mi wä raan kiɛ duɔ̱ɔ̱r ri̱ŋ lɛ̱̈ɛ̱̈ ɛmɔ wä thiap bi gɔɔydɛ jɛ moc riɛk, kä mi wä riɛmdɛ rɔ kiɛth rɛy biey, bi jɛ lak ɛn riɛm ɛmɔ guäth in rɛl gɔɔydɛ rɔ.

²⁸ Kä ɛn dhaar in thal kɛ jɛ ba tiath. Kä mi ɛ ɣa̱lɛ ba pɛt kä ba lak kɛ pi̱.

²⁹ Kä bi tut diaal dho̱ri bööthni jɛ cam kɛ ɣöö ɛmɛ rɛl gɔɔydɛ rɔ.

³⁰ Duundɛ ni ɣöö thilɛ luur dui̱rä mi ca riɛmdɛ nööŋ kɛmɛkä ro̱mä kɛ Kuoth Nhial mi bacam, kɛ ɣöö luɛɛlkɛ ni jɛ naath guäth in rɛl gɔɔydɛ rɔ, bawaŋ ni jɛ kɛ mac.”