Liib 5 - RUAC KUƆTH IN RƐL RƆ

Ciɛŋ kɛ kui̱ mucä Kuɔth kɛ kui̱ dui̱rä

¹ “Kä mi wa ran wä cɔal guäth luɔ̱k kɛ ɣöö bɛ thokdɛ wä lat kɛ min cɛ nɛn kiɛ cɛ liŋ, mi wee wä biɛt a /cɛ ruac, bi riɛkdɛ je̱k ni jɛ.

² Kä mi wä raan puɔ̱nydɛ ya̱r kɛ ɣöö cɛ mi jiäk thiap, a kui̱cɛ, ri̱ŋ lɛ̱̈ɛ̱̈ mi te dɔɔr kiɛ ley cieŋ kiɛ muɔl, cɛ rɔ ya̱r.

³ Kiɛ mi wee thiap ni kɛl cukɛ a tin la ya̱rkɛ raan a kui̱cɛ, kä mi wee jɛ wä ŋa̱c kɛ kɔrɛ. Cɛ ku thuŋ duer.

⁴ Kä mi wä raan rɔ wä yac kɛ kac kiɛ thuɔ̱k, kä ɛn nɔ cɛ rɔ pär ya̱c kɛ jɛ mɔ, a kui̱cɛ, mi wee jɛ ŋa̱c, cɛ duer.

⁵ Mi wä raan duer kɛ duɔ̱p kɛl kä dup ɛ ti, a jɛ lat duerɛ nhiam nath.

⁶ Kä kɛ cut kä mi jiäk in cɛ la̱t, a jɛ nööŋ muc dui̱rä min cɛ la̱t nhiam Kuɔth Nhial. A jɛ nööŋɛ rɛy deetkɛ ŋuɔ̱ɔ̱t böwä kiɛ rɔaam ala muc dui̱rä, kä bi bööth palä jɛ cu luɛl ni dueerkɛ.

⁷ “Kä mi wä raandun wä tey a /cɛ dɛl mi rɔaam kiɛ böw luäŋ kɛ jek, a jɛ nööŋ kunnööri rɛw kiɛ guɔ̱kni rɛw kɛ kui̱ dui̱rä min cɛ la̱t ba kɛl thöp ala muc dui̱rä kä bi min dɔ̱ŋ a muc mi waŋ.

⁸ Kä akɛ nöŋɛ bööth palä, min bi kɔn thöp ni muc dui̱rä. Kä bɛ ŋuäkdɛ dan, a /cɛ jɛ put puɔ̱nydɛ.

⁹ Kä bɛ riɛmdɛ tha̱a̱ŋdɛ kiɛth buɔ̱lä yi̱kä. Kä bɛ duɔthdɛ nhiac thaar yi̱kä. Nɔmɔ ɛ muc dui̱rä.

¹⁰ Kä ɛn bööth palä bɛ dit in dɔ̱ŋ thöp ala muc mi waŋ ce̱tnikɛ dupkɛ diaal tin la thöpkɛ ni jɛ, inɔ bɛ dueer raam ɔ cu luɛl kɛ jɛ, kä ba cu palikä.

¹¹ “Kä mi /cɛ kunnööri da̱ŋ rɛw kiɛ guɔ̱kni da̱ŋ rɛw bi luäŋ kɛ jëk kɛ kui̱ dui̱rä min cɛ la̱t a jɛ nööŋ tok nupä mi kök kök da̱ŋ rɛw ala muc dui̱rä. Kä a jɛ /cɛ moc liɛɛth kɛnɛ wäl in kurkur, kɛ ɣöö ɛmi la muc dui̱rä.

¹² Kä bɛ jɛ nöŋ bööth palä, in bi tetdɛ thi̱eŋ thi̱n ɛ tiɛm kä ɣöö ca le̱y Kuoth Nhial kä bɛ jɛ waŋ wi̱i̱ yi̱kä, guäth in la muc Kuɔth Nhial a waŋkɛ thi̱n, kɛ ɣöö ɛ muc mi wuɔckɛ ni duer.

¹³ Kɛ kui̱ ɛmɔ bi bööth palä jɛ cu luɛl ni duerɛ min cɛ la̱t, kä bajɛ cu pälikä. Kä bi duɔth nuɔ̱p ɛmɔ cua̱ duŋ bööth palä ce̱tkɛ min te muc bɛɛl.”

Muc ti cuɔlkɛ

¹⁴ Cu Kuoth Nhial Muthɛ jiök i̱,

¹⁵ “Mi wä raan duer wä la̱t a cɛ lot ni jɛ, kɛ ɣöö /kenɛ tin ca le̱y Kuoth Nhial thöp, a jɛ nöŋ Kuoth Nhial ruath dɛ̈ɛ̈l rɔɔmä mi thil diw rɛy deetkɛ ala cut kɛ kui̱ dui̱rädɛ, kä bi kökdɛ pa̱a̱r kɛ pëk kökä luaak Kuɔth kɛ ɣöö ɛ muc dui̱rä,

¹⁶ kä bɛ duer in cɛ la̱t cutdɛ rëp kɛ dhieec dhieecni kä bɛ thöp bööth palä, kä bi bööth palä dɛl cu thöp Kuoth, ala luur kɛ kui̱ dui̱rädɛ, kä ba jɛ cu palikä.

¹⁷ “Mi ci raan ŋut Kuɔth Nhial töl, cɛ tekɛ duer, kä bɛ pëk cuat dhil thöp.

¹⁸ Kä bɛ nööŋ ni ruath dɛ̈ɛ̈l rɔɔmä mi thil diw deetkɛ, kä bɛ la mi ca pe̱k ko̱kädɛ pa̱a̱r kɛ pe̱k kökä luaak Kuɔth, kä bi bööth palä luur ɛmɔ thöp Kuoth kɛ kui̱ dui̱rä min ci raan ɛ la̱t ɛ kui̱cɛ, kä ba cu pälikä.

¹⁹ Nɔmɔ ɛ muc cutdä mi ci gua̱ndɛ due̱r nhiam Kuɔth Nhial.”