Liib 4 - RUAC KUƆTH IN RƐL RƆ

Muc gua̱a̱cni

¹ Kä cu Kuoth Nhial Muthɛ jiök i̱,

² “Jio̱kni ji̱ I-thɛ-rɛl. Ɛn ɣöö mi wä raan ŋutdä wä töl kɛ guäc a jɛ lät ti̱ti̱.

³ Mi ɛ jɛn bööth palä min dit ni jɛn ci naath yɔ̱a̱c duerɔ a jɛ nöŋ Kuoth Nhial ruath tha̱a̱k mi thil diw ala kök kɛ kui̱ dui̱rädɛ.

⁴ A jɛ nööŋɛ thok kɛmɛkä ro̱mä kɛ Kuoth Nhial, kä bɛ jɛ buk, kä bɛ jɛ cu näk thi̱n nhiam Kuɔth Nhial.

⁵ Kä bi bööth palä in di̱i̱t tha̱a̱ŋ riɛmdɛ ben nööŋ rɛy duëël ro̱mä.

⁶ Kä bɛ yiatdɛ cua̱th rɛy riɛm ɛmɔ kä bɛ jɛ ben kiɛth ni kä bärɔw nhiam ge̱e̱lä min rɛlrɔ.

⁷ Kä bɛ tha̱a̱ŋ riɛm bat tuɔ̱ŋni yi̱kä in la wal ti kuɔ̱r kuɔ̱ɔ̱r a waŋkɛ thi̱n rɛy kɛmɛkä ro̱mä kɛ Kuoth Nhial. Kä bɛ duɔth riɛm tha̱a̱k ɛmɔ wuɔ̱c thaar yi̱kä min la thöpkɛ luur mi waŋkɛ wi̱cdɛ raar thok kɛmɛkä ro̱mä kɛ Kuoth Nhial.

⁸ Kä bɛ thio̱o̱lkɛ diaal nööŋ kɛ kɛ kɔali jiɛcdɛ.

⁹ Amäni rokɛ nikɛ kɔalikiɛn kɛ go̱o̱k cua̱nydɛ.

¹⁰ Bi bööth palä kɔali tɔ̱tɔ̱ ka̱n kä bɛ kɛ waŋ wi̱i̱ yi̱kä in la thöpkɛ luuri ti waaŋ thi̱n ce̱tnikɛ min la̱tdɛ kɛ kɔali luurä nyuaakä.

¹¹ Duundɛ ɣöö jɛn bɛ kölɛ kɛnɛ ri̱ŋdɛ kɛɛliw nikɛ wi̱cdɛ kɛ kockɛ kɛ nyin jiɛc diaal amäni wawdɛ,

¹² bɛ jɛ naŋ raar jɔk wec guäth in lɛy lɛy in la ŋɛ̈th a yia̱kɛ thi̱n, kä bɛ cu waŋ thi̱n kɛ mac jiɛɛn.

¹³ “Kä mi ɛ jɛn duɔl ji̱ I-thɛ-rɛl ci ŋuɔ̱tdä kɛl ya̱r ɔ kɛ guäc, a cäŋ kui̱c duɔlɛ, cikɛ duer.

¹⁴ Niɛ nɔ wäkɛn dueriɛn ŋa̱c ɔ akɛ nööŋkɛ ruath tha̱a̱k mi la kök dui̱rädiɛn, bikɛ jɛ nööŋ thok kɛmɛkä ro̱mä kɛ Kuoth Nhial.

¹⁵ Kä bi dit dolä jɛ buk nhiam Kuɔth Nhial, kä bacu näk ɛn wa̱nɔ.

¹⁶ Kä bi bööth palä in dit ni jɛn tha̱a̱ŋ riɛm tha̱a̱k ka̱n, kä bɛ jɛ nööŋ kɛmɛkä ro̱mä kɛ Kuoth Nhial.

¹⁷ Jɛn bɛ yiatdɛ cua̱th thi̱n, kä bɛ jɛ kiɛth ni kä bärɔw nhiam ge̱e̱lä.

¹⁸ Kä bɛ tha̱a̱ŋ riɛm wä bat tuɔ̱ŋni yi̱kä min te rɛy kɛmɛkä ro̱mä kɛ Kuoth Nhial. Kä bɛ duɔthdɛ wuɔ̱c thaar yi̱kä min la thöpkɛ luur mi waŋkɛ wi̱cdɛ raar thok kɛmɛkä ro̱mä kɛ Kuoth Nhial.

¹⁹ Bɛ kɔali kɛ diaal kam raar kä bɛ kɛ waŋ wi̱i̱ yi̱kä.

²⁰ Kä bɛ ruath ɛmɔ la̱t ce̱tnikɛ jɛn la̱t ëë cɛ lät ni ruath luurä kɛ kui̱ dui̱rä, kä inɔ bɛ Kuoth lor kɛ kui̱ dui̱rä nath, kä ba kɛ cu pälikä.

²¹ Kä bɛ thäk cu naŋ raar jɔk wec, kä bɛ jɛ cu waŋ ce̱tnikɛ mëë waŋɛ luur dui̱rä pua̱a̱nydɛ, ɛn nɛmɛ ɛ luur mi wuɔ̱c kɛ ni duer ji̱ dolä.

²² “Kä mi ɛ rueec ci ŋuɔ̱tdä kɛl tölɔ kɛ guäc, cɛ duer.

²³ Kä mi wee duerɛ wä ŋa̱c a jɛ nööŋ thäk dɛ̈ɛ̈l böwä mi thil diw.

²⁴ Kä a jɛ bukɛ kä bɛ cu näk guäth in la na̱kɛ luur mi waŋkɛ thi̱n. Nɛmɛ ɛ luur mi wuɔckɛ ni duer.

²⁵ Kä bi bööth palä yiatdɛ cua̱th riɛm dɛ̈ɛ̈l, kä bɛ jɛ bat tuɔ̱ŋni yi̱kä luurä min waŋkɛ, kä bɛ duɔthdɛ cu wuɔ̱c thaar yi̱kä nɔmɔ.

²⁶ Kä bɛ paarɛ kɛɛliw waŋ wi̱i̱ yi̱kä nikɛ waŋ ëë cɛ waŋ ni paar luurä nyuaakä, kä inɔ bi bööth palä luur ɛmɔ thöp Kuoth kä bajɛ cu pälikä.

²⁷ “Kä mi wä ram mi duɛk ŋuɔ̱tdä kɛl wä töl kɛ guäc cɛ duer.

²⁸ Kä mi wee duerɛ wä mir a jɛ nööŋ nacdɛ̈ɛ̈l mi böw mi thil diw ala luur kɛ kui̱ dui̱rädɛ.

²⁹ A jɛ bukɛ kä bɛ jɛ cu näk guäth in la thöpkɛ luuri waŋkɛ thi̱n.

³⁰ Kä bi bööth palä riɛm ka̱n kɛ yiatdɛ, kä bɛ bat tuɔ̱ŋni yi̱kä wäŋä luuri, kä bɛ duɔthdɛ cu wuɔ̱c thaarɛ.

³¹ Kä bɛ kɔalikɛ koc, ce̱tkɛ min la kuɔckɛ kɔali luuri nyuaakä. Kä bi bööth palä jɛ waŋ wi̱i̱ yi̱kä ɛla ŋuäny mi gɔaa kä Kuoth Nhial. Kä inɔ bi bööth palä jɛ cu luɛl kɛ jɛn luur ɛmɔ, kä ba jɛ cu pälikä.

³² “Kä mi wee nööŋ ni rɔaam mi la luurɛ kɛ kui̱ dui̱rä, a jakɛ ni nac dɛ̈ɛ̈l rɔɔmä mi thil diɛw.

³³ Kä a jɛ bukɛ kä bɛ cu näk guäth in la na̱kɛ luuri ti waŋkɛ thi̱n.

³⁴ Kä bi bööth palä tha̱a̱ŋ riɛm ka̱n kɛ yiatdɛ, kä bɛ jɛ bat tuɔ̱ŋni yi̱kä min la luuri a waŋkɛ thi̱n, kä bɛ duɔth riɛmdɛ cu wuɔ̱c thaarɛ.

³⁵ Kä bɛ kɔalikɛ diaal ka̱m raar ce̱tnikɛ mëë la kɔali luurä nyuaakä a ka̱mkɛ raar, kä bɛ jɛ waŋ wi̱i̱ yi̱kä kɛ kɛnɛ luuri mi̱eth tin la wa̱ŋkɛ Kuoth Nhial, kä i̱ nɔ bi bööth palä jɛ cu luɛl, kä bajɛ cu pälikä.”