Liib 27 - RUAC KUƆTH IN RƐL RƆ

Ŋuɔ̱t kɛ kui̱ mucni ti ka̱mkɛ Kuoth

¹ Cu Kuoth Nhial ruac kɛ Muthɛ,

² jiök ni ji̱ I-thɛ-rɛl i̱, “Mi thöp raan nɛy kɔ̱kiɛn Kuoth Nhial kɛ ɣöö deek la̱t yaacä la̱t, ɛn ram ɛmɔ derɛ kɛ kɔk kɛ thöp yio̱o̱ni,

³ kä ɛn kök wutdä a tɛmɛ ni kä run ti jiɛɛn da̱ŋ rɛw amäni jiɛɛn bäkɛl ba kɛ kɔk kɛ yio̱w ti jiɛɛn dhieec ti ce̱tkɛ yio̱w luaak Kuɔth.

⁴ Kä mi ɛ ciek kɔakɛ mɔ ba yio̱w ti jiɛɛn diɔ̱k.

⁵ Kä mi ram mi tëë run dhieec die̱e̱th amäni ram mi tëë run ti jiɛɛn da̱ŋ rɛw, ba wut kɔk kɛ yio̱w ti jiɛɛn da̱ŋ rɛw kä bi ciek ɛ jiath kɛl.

⁶ Kä mi te raan kɛ pay kɛl ni däpädɛ amäni ram mi te run dhieec ba kɔk kɛ yio̱w diɔ̱k.

⁷ Kä mi te ram mi te run ti jiɛɛn bäkɛl a wä nhial, bi kök wutdä a yio̱w wäl dhieec, kä bi kök ciek a yio̱w wäl.

⁸ Kä mi raan ɛ can a /cɛ ji̱ luäŋ kɛ kök, bɛ ji̱ naŋ nhiam bööthä palä, kä bi böth palä kökdɛ pa̱a̱r, ce̱tkɛ pëk in dëë ram ɛmɔ jɛ luäŋ.

⁹ “Kä mi ɛ le̱y la muc ran ɔ kɛ Kuoth Nhial, kɛn tin diaal tin thöp raankɛ Kuoth Nhial gɔwkɛ.

¹⁰ Kä thilɛ duɔ̱ɔ̱r mi ba luɛl, mi gɔaa kɛ mi jiääk, kiɛ mi jiääk kɛ mi gɔaa. Kä mi wec le̱y wä guäl kɛ le̱y dɔ̱diɛn, kɛn le̱y da̱ŋ rɛw bikɛ gɔw mi luɛ̈lkɛ kɛnɛ min luɛlkɛ.

¹¹ Kä mi jiäkɛ ɛn le̱y in dëë thöp Kuoth Nhial ala muc, ɛ jɛn bi ram ɛmɔ le̱y nööŋ nhiam bööthä palä.

¹² Kä bi bööth palä kökdɛ guic mi gɔaaɛ kiɛ jiäkɛ, kä kök ɛ cɛ lar ɔ bɛ cua̱ jɛn.

¹³ Kä mi go̱rɛ kökdɛ, bɛ kökdɛ rëp kɛ dhiec dhieecni.

¹⁴ “Mi ci raan duelɛ ley Kuoth Nhial ala mi gɔaa, bi bööth palä jɛ guic mi gɔaaɛ kiɛ jiäkɛ, kä mɔ ci bööth palä jɛ lar ɔ, ba jɛn kökdɛ.

¹⁵ Kä ɛn ram ɔ ci duel lɛy Kuoth Nhial ɔ, mi go̱o̱rɛ ɣöö bɛ duelɛ nyɔk kɛ kök, bɛ kökdɛ rëp kɛ dhieec dhieecni yio̱o̱ni, kä bɛ cua̱ duundɛ.

¹⁶ “Mi tëë wut mi ci Kuoth Nhial ley tha̱a̱ŋ muɔ̱ndɛ mi dielɛ, inɔ biɛ pa̱a̱r kɛ pëk kuaynikɛ, ba diëny bɛɛl kɔk kɛ yio̱w ti jiɛɛn dhieec.

¹⁷ Kä mi cɛ mundɛ ley Kuoth kɛ ruɔ̱n lucä ŋɔaani gua̱th ni kiɛn, bɛ cuɔ̱ŋ pëk ko̱kädu.

¹⁸ Kä mi lɛyɛ kaakdɛ kɛ kɔr runä min luɔ̱ckɛ ŋɔaani gua̱thnikiɛn, bi bööth palä yio̱w ko̱kädɛ lar nikɛ pëk runi tin ci duɔth amäni ruɔ̱n in luɔckɛ ni ŋɔak gua̱th ni kiɛn, kä ba kökdɛ yuɔ̱th piny.

¹⁹ Kä ɛn ram min thöp kak go̱rɛ ɣöö bɛ nyɔk kɛ kök, bɛ kökdɛ rëp kɛ dhieec dhieecni yio̱o̱ni, kä bɛ cua̱ duundɛ.

²⁰ Kä mi /cɛ jɛ go̱r i̱ bɛ kak nyɔk kɛ kök, kä cɛ kök radɔ̱diɛn, /cɛ bi nyɔk kɛ kök,

²¹ duundɛ ɣöö kak, mi wa lony runä lucä ŋɔaani gua̱thnikiɛn, ba mi gɔaa kä Kuoth Nhial ala mi ca lëy jɛ, bɛ cua̱ duŋ bööth palä.

²² Kä mi wec lëy ni Kuoth Nhial kak mi cɛ kɔk, mi /ci mɔ a duundɛ mi dielɛ,

²³ bi bööth palä kökdɛ lar ɛ jɛn amäni ruɔ̱n lucä ŋɔaani jɔk, kä bi ɛn ram ɛmɔ pëk yio̱o̱ni ko̱kädɛ thöp kɛn cäŋ ɛ mɔ ala nyin Kuɔth Nhial ti gɔw.

²⁴ Kɛ ruɔ̱n lucä ŋɔaani jɔk ba kak luɔ̱c gua̱ndɛ mëë kɔak kɛ jɛ kä jɛ, mëë la di̱el kakä.

²⁵ Kä pëk kökni diaal bikɛ ce̱tkɛ kök luaak Kuɔth, gira ni ti jiɛɛn rɛw bi cukɛ a rial kɛl.

²⁶ “Kä ke̱y le̱e̱ni, tin di̱ethkɛ kɛ nhiam bi cukɛ a nyin Kuɔth Nhial, thilɛ ram mi biɛ thöp Kuoth, ɛ thäk kiɛ ɛ rɔam, kɛ nyin Kuɔth.

²⁷ Kä mi ɛ le̱y mi jiääk, a jɛ nyɔkɛ kɛ kök kɛ pëk ko̱kädu, kä bɛ rëp kɛ dhieec dhieecni, kä mi /ka̱nɛ nyɔk kɛ kök, biɛ kɔak kɛ pëk ɛ go̱o̱ri mɔ.

²⁸ “Kä thilɛ mi ca ka̱m Kuoth Nhial mi bi raan ɛ nyɔk kɛ kök, ɛ raan kiɛ ɛ le̱y kiɛ mun, kɛn diaal kɛ nyin Kuɔth Nhial.

²⁹ Thilɛ ram mi ca ka̱m Kuoth mi ba nyɔk kɛ kök, ba näk ni jɛ.”

Ŋuɔ̱t kɛ kui̱ wa̱l wa̱a̱li

³⁰ “Kä wa̱l wa̱a̱li muɔn diaal, bɛɛl, dɛy jiɛɛn kɛn diaal kɛ nyin Kuɔth Nhial.

³¹ Mi go̱o̱r raanɛ i̱ bɛ wa̱l wa̱a̱likɛ nyɔk kɛ kök, bɛ kökdiɛn rëp kɛ dhieec dhieecni.

³² Kä wa̱l wa̱a̱li ɣɔ̱ɔ̱k kiɛ det, kɛn le̱y cieŋ diaal wa̱l wa̱a̱likiɛn min bäkɛ raar luaak, ba duŋ Kuɔth Nhial.

³³ Kä ɛ raan ci riɛk kɛ gɔɔydɛ kiɛ jiääkdɛ, kä a /cɛ luɛl, kä mi cɛ luɛl, kɛn da̱ŋ rɛw bikɛ gɔw, kä ca bi nyɔk kɛ kök.”

³⁴ Ti̱ti̱ kɛ kɛn ŋuɔ̱t tëë ci Kuoth Nhial kɛ la̱t Muthɛ kɛ kui̱ ji̱ I-thɛ-rɛl wi̱i̱ Pa̱a̱m Thi-nay.