Liib 26 - RUAC KUƆTH IN RƐL RƆ

Puɔ̱th ji̱ luthä Kuɔth

¹ “/Cuarɛ rɔ täth kuth ti jiäk kiɛ ri̱ekni kiɛ yi̱kni ti cia cuɔ̱ŋ, kä /cuarɛ rɔ moc pääm ti palɛ, kɛ ɣöö ɛ ɣän Kuoth Nhial Kuothdun.

² Tiɛtdɛ cäŋ lɔŋädä kä luɔ̱thɛ luak palädä. Ɛ ɣän Kuoth Nhial.

³ “Kä mi guur yɛn ruaacnikä kä luɔ̱thɛ ŋuɔ̱tkä kä lät yɛn kɛ,

⁴ ɣän bä yɛ ka̱m nhiaal kɛ päth kɛ, kä bi mun kuaykɛ rëp kä bi jiɛɛn ka̱a̱ni dɛykiɛn kuir.

⁵ Bi bɛlkun do̱ny mäni gua̱th ŋër bɛɛl, kä bia kɛ ŋër amäni gua̱th pi̱thä, kä bia riäŋ kɛ mi̱th, kä bia cieŋ kɛ mal wi̱cdun.

⁶ Kä bä piny moc kɛ mal, kä bia tɔ̱ɔ̱c muundun, a thil mi dual kɛ yɛ. Kä bä le̱y tin jiäk woc muundun, kä bɛ thil ko̱r mi bi ben kɛ wecdun.

⁷ Kä bia ji̱ tɛ̈run joc, kä bikɛ li̱w kɛ mut nhiamdun.

⁸ Bi nɛy da̱ŋ dhieec nɛy ti kuɔ̱r joc kä yɛ, kä bi nɛy ti kuɔ̱r nɛy ti bathdɔɔri da̱ŋ wäl joc, kɛn ji̱ tɛ̈run bikɛ li̱w kɛ mut nhiamdun.

⁹ Ɣän bä yɛ poth bia tekɛ gaat ti ŋuan, kä bä mat ruacdä kɛ yɛ jak kä thuɔ̱k.

¹⁰ Kä bia cam ni tëë ci jäny gua̱th tɔ̱wä, kä bia tëë wal woc kɛ ɣöö bia gua̱th jek kɛ kui̱ kä tin pay ciɛk.

¹¹ Ɣän bä cieŋ rɛydun, /cä bi met na̱n kɛ yɛ.

¹² Ɣän bä tekɛ kɛ yɛ, kä ba̱a̱ Kuothdun, kä bi yɛn a nɛɛkä.

¹³ Ɛ ɣän Kuoth Nhial Kuothdun, mëë käm yɛ raar muun I-jëp, kɛ ɣöö /ci yɛn bia̱ ja̱a̱ŋkiɛn, kɛ ɣöö cä buɔ̱m lätni tin dɛ̈ckɛ yɛ lony kä cä yɛ jak kä jäl kɛ ciökun.”

Duäc nɛɛni ti thil luth

¹⁴ “Kuɛ la ɣöö mi /ci yɛn ruacdä bi liŋ, kä /ci yɛn lueek ti diaal ɛ ti bi la̱t,

¹⁵ mi /cia ciɛŋkä bi tit, kä /cia ŋuɔ̱tkä bi luɔ̱th, kä cia lueekä bi la̱t kɛn diaal, ku yɛn lɛ töl ni mat ruacdä,

¹⁶ ɣän bä nɛmɛ lät kä yɛ. Ɣän bä yɛ moc kɛ da̱k, bä yɛ moc kɛ lëth pua̱ny mi yär wäŋ kä jak tëk kä bɛ̈c. Kä bia ka̱a̱kun pith kɛ kuay, kɛ ɣöö ba kɛ cam ɛ ji̱ tɛ̈run,

¹⁷ kä bä waŋ lɔacdä luɔc yɛ, kä ba yɛ däk kɛ ji̱ tɛ̈run. Kä kɛn nɛy tɔ̱ ca yɛ däk tɔ̱ ba yɛ ruac ɛ kɛn, kɛ dual bia rɔ a barɛ kä thilɛ ram mi joc yɛ.

¹⁸ Kä mi ŋot yɛn a /cia ruacdä liŋ, ɣän bä duäcdun rëp ni kä bärɔw,

¹⁹ kä bä buɔ̱mdun jak kä thil luɔt kä bä pua̱r jak kä ce̱tnikɛ yiëth kä yɛ, kä bi piny ce̱tnikɛ päm,

²⁰ kä bi buɔ̱mdun thuk ni ka̱a̱nikun, kɛ ɣöö /ci kɛ bi ciɛk, kä ci jiɛɛn dɛykiɛn bi kuir.

²¹ “Kä mi /cia jäl kɛ kɛ ɣä, kä /cia ruacdä liŋ, bä rëp ni duäcdun, kä bärɔw ce̱tkɛ ŋuan dueerikiɛn.

²² Kä bä le̱y ti jiäk luɔny rɛydun, tin ba gaatkun näk, kä ba ɣɔ̱ɔ̱kun cam kä bi duɔth ni pëk mi tɔt kä yɛ, kä bi dupkun te baaŋ.

²³ “Kä kɛn duäc ɛmɛ mi bia ŋot a /cia rɔ rit ɣä, ku yɛn lɛ thɛr ni ɣä,

²⁴ inɔ bä ɣän bä yɛ thɛr bä, a bɛc bä yɛ duäc ni kä bärɔw kɛ kui̱ dueerikun.

²⁵ Kä bä yɛ nöŋ mut, mi bi yɛ thuk kɛ ɣöö cia mat ruacdan töl, kä mi bia rɔ dol rɛy wi̱i̱nikun, bä jua̱th kɛ thil wal jäk kä rɛydun. Bia cu pɛn te̱tni gua̱n tɛ̈run.

²⁶ Kä ɣän mi wa̱a̱ mi̱thdun wä ŋok, bi män da̱ŋ wäl thaal kɛ mac kɛl, kä ba mi̱ethdun luɔc yɛ kɛ tuɔ̱k, bia cam, kä /cia bi riäŋ.

²⁷ “Kä mi bia ŋot a /cia ɣä bi liŋ, a thɛr yɛn ni ɣä,

²⁸ ɣän bä yɛ thɛr kɛ gakdä bä, kɛ kui̱ dueerikun bä yɛ duäc ni kä bärɔw.

²⁹ Bia cam ni ri̱ŋ gankun, kɛnɛ ri̱ŋ nyieetkun.

³⁰ Ɣän bä gua̱th palikun däk wuɔ̱thni päämni, kä bä yi̱kni walkun thia̱y piny, kä bä pua̱nykun yuɔr pua̱nyni kuthnikun, kä bi yiëëdä yɛ cany.

³¹ Kä bä wi̱i̱kun däk, bä lueekkun jak kä thil luɔt, kä /cä tɛth lɔacdun bi lɛ guic.

³² Kä bä mundun däk, a bi ji̱ tɛ̈run tin cieŋ thi̱n ga̱a̱c kɛ däkdɛ.

³³ Kä bä yɛ riaw rɛy döri, kä bä mut jäk kä kɔɔrun, kä bi mundun thil raan, bi ti̱eckun a baŋ.

³⁴ “Kä bi mun lɔ̱ɔ̱ŋ kɛ ta̱a̱dɛ baaŋ, kam in ta̱yɛ muun ji̱ tɛ̈run, bi mun lɔ̱ɔ̱ lɔ̱ɔ̱ŋ.

³⁵ Min tëë baaŋ ɛn mun bɛ lɔ̱ɔ̱ŋ, lɔ̱a̱ŋ in /cia dëë ka̱m jɛ mëë cieŋ yɛn thi̱n.

³⁶ Kä kɛ kui̱ nɛɛni tin ci duɔth kä yɛ, bä dual jäk kä lo̱cnikiɛn rɛy muɔn ji̱ tɛ̈riɛn, kä bi ji̱th jiaath kɛ jak kä dual a bikɛ rɔ bar ce̱tkɛ ram bar rɔ kɛ ko̱r, kä bikɛ tëth kä thilɛ mi joc kɛ.

³⁷ Kä bi ramɔ tɛth jɔk raamɔ ce̱tkɛ mi le̱ny yɛn ni ko̱r, kä thilɛ mi joc yɛ, kä thilɛ mi te kɔɔrun, kä bia cu thil buɔ̱m mi cuŋ kɛ yɛ nhiam ji̱ tɛ̈run.

³⁸ Kä bia cu riaw rɛy röli, bä yɛ cu bath mun ji̱ tɛ̈run.

³⁹ Kä tin ci duɔth kä yɛ bikɛ riaw mun ji̱ tɛ̈riɛn kɛ kui̱ dueerikiɛn, kä kɛ kui̱ dueeri gua̱nikiɛn bikɛ riaw.

⁴⁰ “Kä mi ba dueerkiɛn ben lat kɛnɛ dueer gua̱nikiɛn kɛ lo̱k ëë ci kɛn ɛ lo̱k ni ɣä, kɛ thëriɛn kɛ duɔ̱pdä,

⁴¹ kɛ kui̱ ɛmɔ cä kɛ thɛr kä cä kɛ nööŋ muun ji̱ tɛ̈riɛn, ɛ ni mi ci lo̱ckiɛn ti jiäk rɔ ri̱t kɛ dueerkiɛn

⁴² inɔ bä mat ruacdä tim kamäda kɔnɛ Je-kɔb, kä bä mat ruacdä tim kamäda kɔnɛ Ay-dhɛk, kɛ ma̱t ruacdä kɔnɛ A-bɛ-ram, kä bä mun tim.

⁴³ Duundɛ ɣöö bikɛ mun ba̱ny piny, kä bɛ lɔ̱ɔ̱ŋ kam in tëë baaŋ min ci kɛ te thi̱n, kä bikɛ rɔ rit kä dueerkiɛn, kɛ ɣöö ci kɛ lueekä lo̱k, kä ci ti̱eydiɛn ciɛŋkä cany.

⁴⁴ A cäŋ ni mɔ ca jɛn inɔ mɔ, min ŋot kɛ muun ji̱ tɛ̈riɛn, /cä kɛ bi lo̱k kiɛ /cä kɛ bi kon ala ɣöö bäkɛ thum /cä gukdä bi däk kɛ kɛ, kɛ ɣöö ɛ ɣän Kuoth Nhial Kuothdiɛn.

⁴⁵ Kɛ kui̱diɛn, bä gukdä tim kamäda kɔnɛ gua̱ndɔɔŋnikiɛn, tëë ka̱mä raar rööl I-jëp waaŋ nɛɛni kɔ̱kiɛn, kɛ ɣöö bä la Kuothdiɛn. Ɛ ɣän Kuoth Nhial.”

⁴⁶ Ti̱ti̱ kɛ kɛn ciɛŋ kɛ lueek kɛ ŋuɔ̱t tëë ci Kuoth kɛ la̱th kamädɛ kɛnɛ ji̱ I-thɛ-rɛl wi̱i̱ Pa̱a̱m Thi-nay kɛ thok Muthɛ.