Liib 24 - RUAC KUƆTH IN RƐL RƆ

Lɛmbär luaak Kuɔth

¹ Cu Kuoth Nhial Muthɛ jiök,

² ruacni kɛ ji̱ I-thɛ-rɛl i̱, “Bä ji̱ nöŋ liɛɛth mi kök kök mi nhiackɛ kä Ɔ-lip kɛ kui̱ lɛmbärä, kɛ ɣöö dëë macdɛ dɔap a /cɛ li̱w.

³ Bi Ä-ron kɛ dɔp kɛ thiaŋ bikɛ dɔap mäni runwaŋ a /cɛ li̱w nhiam Kuɔth Nhial, raar gëëlä rɛy kɛmɛkä ro̱mä kɛ Kuoth Nhial Kuɔth Nhial, ba ɛn ciaŋ kä kuaykun diaal.

⁴ Bɛ lɛmbär jak kä pɛtdɛ rɛy yio̱mä dääpädɛ min la cuŋɛ thi̱n nhiam Kuɔth Nhial a /cɛ li̱w.”

Juray mi ca la̱th nhiam Kuɔth

⁵ “Kä bi rɔ moc nup mi kök kök, kä biɛ bul jurayni wäl rɛw, bi juray kɛl te liɛr nuɔ̱p.

⁶ Kä bikɛ car kɛ bëër rɛw, te ber ɔ kɛ bäkɛl wi̱i̱ thaac dääpä.

⁷ Kä bi ber ɔ moc kɛ wal ti waŋkɛ, dɔ̱ŋ dëë kɛ wä kɛ kɛ juray ala luur ti̱mä mi̱eth kä Kuoth Nhial.

⁸ Kä bi Ä-ron mac lɛmbärä la dɔp kɛ bärɔw ni̱ni nhiam Kuɔth Nhial kɛ kui̱ ji̱ I-thɛ-rɛl ala ŋuɔ̱t mi do̱raar.

⁹ Ɛn juray ɛ duŋ Ä-ron kɛnɛ gaatkɛ, kä bi kɛn ɛ cam guäth in rɛl gɔɔydɛ rɔ, kɛ ɣöö ɛn nɛmɛ ɛ mi rɛl gɔɔydɛ rɔ kä muc ti̱mä Kuɔth, ɛ duŋ bööthni.”

Duäc raam mi yär ciöt Kuɔth

¹⁰ Tëë kɛ gat nya I-thɛ-rɛl, mi gua̱n ɛ wut I-jëp, cuɛ wä kɛɛl kɛ rɛy ji̱ I-thɛ-rɛl, kä cuɛ nyiëëny kɛ raan I-thɛ-rɛl rɛy wec.

¹¹ Cu gat nya I-thɛ-rɛl ciöt Kuɔth kuëth kɛ lam, kä cua jɛ nöŋ Muthɛ, kä jɛn cɔalkɛ man i̱ Cɛ-lo-mith nya wutdä mi cɔal i̱ Di-bɛ-ri thok duëël Daan.

¹² Kä ba jɛ gaŋ, amäni ɣöö ci Kuoth Nhial kɛ nyuɔ̱th mɔ bi kɛn ɛ lät kä jɛ mɔ.

¹³ Kä cu Kuoth Nhial Muthɛ jiök i̱,

¹⁴ “Naŋ ni wut ɛmɔ raar rɛy wec. Kä kɛn nɛy diaal tëë ci jɛ liŋ a kuethɛ la̱thkɛ tetkiɛn wi̱i̱dɛ, kä a bökɛ ɛ duɔl nɛɛni diaal mäni lia̱a̱dɛ.

¹⁵ Kä jiök ni ji̱ I-thɛ-rɛl i̱, ram ɔ bi Kuothdɛ Kuethɔ bi riɛkdɛ jëk ni jɛ.

¹⁶ Kä ram ɔ bi ciöt Kuɔth ya̱r ɔ ba näk, ɛ raan I-thɛ-rɛl kiɛ ram mi cieŋ rɛydiɛn, ba bo̱k ɛ ji̱ dolä diaal mäni lia̱a̱dɛ.

¹⁷ Kä ram ɔ bi raan näk ɔ ba näk bä.

¹⁸ Kä ram ɔ bi le̱y näkɔ bɛ jɛ col, kɛ ɣöö ɛ tëk kɛ tëk.

¹⁹ Kä ram wä radɔ̱diɛn moc kɛ buɔ̱t, ɛn nɔ cɛ lät kä ram ɛmɔ ba lät kä jɛ bä,

²⁰ mi cɛ raan töl ba jɛ töl, kä mi ɛ waŋ ran cɛ mutɔ ba waŋdɛ mut, kä mi ɛ ley ran cɛ ka̱m raar ɔ ba leydɛ ka̱m raar bä, pëkdɛ mɔ cɛ lät kä radɔ̱diɛn ɔ ba lät kä jɛ.

²¹ Kä ram mi wä le̱y näk bɛ jɛ col. Kä mi wee näk ni raan ba jɛ näk.

²² Kä bia tekɛ ŋuɔ̱t kɛl ja̱a̱ŋ kɛ ji̱ wec. Kɛ ɣöö ɛ ɣän Kuoth Nhial Kuothdun.”

²³ Mëë ci Muthɛ ruac ɛmɔ la̱t ji̱ I-thɛ-rɛl. Cukɛ ram min ci kue̱th naŋ raar rɛy wec, kä cukɛ jɛ bök kɛ dööl mäni lia̱a̱. Inɔ cu ji̱ I-thɛ-rɛl la̱t ni min ci Kuoth Nhial ɛ la̱r Muthɛ.