Liib 22 - RUAC KUƆTH IN RƐL RƆ

Ŋuɔ̱t kɛ kui̱ mucni

¹ Cu Kuoth Nhial Muthɛ la̱r lär

² jiök ni Ä-ron kɛnɛ gaatkɛ i̱, “Tiɛtdɛ gɔy mucni ji̱ I-thɛ-rɛl, tin ca lëy ɣä, kɛ ɣöö /cikɛ ciötdä min rɛl gɔɔydɛ rɔ bi ya̱r. Ɛ ɣän Kuoth Nhial.

³ Jiök nikɛ i̱, ‘Mi wec tekɛ raan kä kuayku diaal rɛy ri̱cnikiɛn mi wä ben gekä mucni tin rɛl gɔɔydiɛn rɔ, tin lëy kɛ Kuoth Nhial ɛ ji̱ I-thɛ-rɛl, kä /cɛ gɔaa, ɛn ram ɛmɔ /cɛ la̱tdä bi nyɔk kɛ lätni. Ɛ ɣän Kuoth Nhial.

⁴ A thil raan kä gaat Ä-ron mi tekɛ dhɔp kiɛ löny pua̱ny mi jiäk, mi bi tin lɛy gɔɔydiɛn rɔ cam a ni mi cɛ gɔaa. Kä bööth palä mɔ bi duɔ̱ɔ̱r mi jiäk mi ci li̱w thiap ɔ kiɛ wut mi tekɛ ti̱i̱y,

⁵ kiɛ ram mi ci muɔl piny nyɔt mi dëë jɛ jak kä jiäk kiɛ jëk ɛ jɛ kä raan,

⁶ ɛn ram ɔ ci duɔ̱ɔ̱r nyɔt ɔ bɛ jiäk mäni thiaŋ kä /cɛ bi mi̱th kä tin rɛl gɔɔydiɛn rɔ a ni mi cɛ puak.

⁷ Mi wä cäŋ kony bɛ gɔaa. Ɛn wa̱nɔ derɛ cu mi̱th kä tin rɛl gɔɔydiɛn rɔ, kɛ ɣöö kɛ mi̱thkɛ.

⁸ Kä ɛn mɔ bi li̱w kä rɔa kiɛ ca näk ɛ le̱y dɔaar ɔ /ci bo̱o̱th palä jɛ bi cam, derɛ puɔ̱nydɛ ya̱r kɛ jɛ. Ɛ ɣän Kuoth Nhial.

⁹ Ɛ bööth palä ŋuɔ̱tkä tit, mi cikɛn kɛ bi tit bikɛ duer kä bikɛ li̱w, ɛ ɣän Kuoth Nhial min jakɛ kä gɔw.

¹⁰ “ ‘A thil ram mi bä raar gölä kä ji̱ dhɔaar bööth palä mi bi mi̱th kä muc in rɛl gɔɔydɛ rɔ. A cäŋɛ ja̱l gɔaal bööth palä kiɛ ja̱ŋdɛ /cɛ jɛ bi cam.

¹¹ Duundɛ ɣöö mi ci bööth palä ja̱ŋ kɔk kɛ yio̱w, ɛn ja̱ŋ ɛmɔ bɛ mi̱th thi̱n. Kä kɛn tin diaal tin ca dap dhɔrɛ bikɛ mi̱ethdɛ cam.

¹² Kä nya bööth palä mi ca kuɛn raar /cɛ bi mi̱th kä muc tin rɛl gɔɔydiɛn rɔ.

¹³ Ɛ ni mi nya bööth palä ɛ ciek jɔkä kiɛ ɛ kɛ̈ɛ̈, kä thil ɛ jɛ gat, kä cɛ luny dhɔr gua̱n, ce̱tkɛ mëë tëë nyi̱etdä, derɛ mi̱eth gua̱n cam. Kä ŋotdɛ thilɛ ram mi bä raar mi bi jɛ cam.

¹⁴ Mi ci raan mi̱eth in rɛl gɔɔydɛ rɔ cam a cɛ lot ni jɛ, bɛ jɛ rëp nikɛ dhieec dhieecni kä bɛ jɛ ka̱m bööth palä.

¹⁵ Kä ɛn bööth palä cɛ nyin I-thɛ-rɛl tin rɛl gɔɔydiɛn rɔ bi ya̱r, tin ca thöp Kuoth Nhial,

¹⁶ Kä a /cikɛ bi jak kä dui̱rkɛ, kɛ mi̱ethdiɛn kɛ tin rɛl gɔɔydiɛn rɔ, inɔ bɛ duer nööŋ mi bikɛ moc riɛk. Ɛ ɣän Kuoth Nhial min jak yɛ kä gɔw.’ ”

¹⁷ Cu Kuoth Nhial Muthɛ jiök,

¹⁸ ruacni kɛ Ä-ron kɛnɛ gaatkɛ kɛ ji̱ I-thɛ-rɛl diaal i̱, “Mi wä raan dhɔaar I-thɛ-rɛl kiɛ ram mi cieŋ rɛydiɛn mucdɛ nööŋ, ɛ muc cutdä yäcä kiɛ ɛ muc lɔacdɛ mi thöpɛ Kuoth ala muc mi waŋ,

¹⁹ kɛ ɣöö ba nhɔk ala tuut mi thil diw, ruath tha̱a̱k rɔɔmä kiɛ böw.

²⁰ /Cu duɔ̱ɔ̱r mi tekɛ diw thöp, kɛ ɣöö /ci Kuoth Nhial ɛ bi nhɔk.

²¹ Kä mi wä raan muc malädɛ wä thöp Kuoth Nhial, mi yacɛ ni rɔ kiɛ muc lɔacdɛ, bɛ jɛ ka̱n rɛy ɣɔ̱ɔ̱kɛ kiɛ rɛy deetkɛ, kɛ ɣöö bi Kuoth Nhial ɛ nhɔk ba mi kök kök, mi thil diw puɔ̱nydɛ.

²² /Cuarɛ muc mi waŋkɛ thöp Kuoth Nhial wi̱i̱ yi̱kä kä le̱y ɛ ti. Ley mi cɔr, ŋɔl, kiɛ mi löny puɔ̱nydɛ, kiɛ te kuat, kiɛ cäk.

²³ Kä thäk kɛnɛ ruath ro̱mä tin tɔ̱ cäkni bia kɛ nöŋ ala muc tɛthkä lɔacdun, kä mi wec wa̱a̱ muc yäcä ca jɛ bi nhɔk.

²⁴ Kä mi te le̱y mi ca nhiandɛ kuit kiɛ ca doŋ, /cia jɛ bi thöp Kuoth Nhial kä cɛ bia luur guäth ciɛŋädun

²⁵ /cuarɛ le̱y mi nööŋkɛ ɛ ram mi guä thöp Kuothdun ala luur mi̱eth kä tekɛ kɛ diw kä kɛ cäkni, /ci Kuoth Nhial ɛ bi nhök yɛ.”

²⁶ Cu Kuoth Nhial Muthɛ jiök i̱,

²⁷ “Mi wa ruath wä diëth ɛ rɔam kiɛ ɛ böw, bɛ man luɛth kɛ ni̱n bärɔw, kɛ cäŋ in bädäkdiɛn, dëë jɛ nhɔk ala muc mi wa̱ŋkɛ Kuoth Nhial.

²⁸ Cu yaŋ thöp ala muc kɛnɛ dɔwdɛ kiɛ rɔam kɛnɛ ruathdɛ kɛn cäŋ ɛ kɛlɔ.

²⁹ Kä mi wee muc tɛthkä lɔaac wä thöp Kuoth Nhial, guuri ŋuɔ̱tkɛ kɛ ɣöö ba jɛ nhök yɛ.

³⁰ Kä ba jɛ cam niɛ cäŋ ɔ, thil ɛ mi bi duɔth mi bi runwaŋ cop. Ɛ ɣän Kuoth Nhial.

³¹ “Inɔ tiɛtdɛ ŋuɔ̱tkä kä la̱t ɛ kɛ. Ɛ ɣän Kuoth Nhial.

³² Kä /cuarɛ ciötdä yär, duundɛ ɣöö bi gɔɔydä rɔ rɛl rɛy ji̱ I-thɛ-rɛl. Ɛ ɣän Kuoth min jak yɛ kä gɔw

³³ mëë käm yɛ raar rööl I-jëp min la Kuothdun. Ɛ ɣän Kuoth Nhial.”