Liib 21 - RUAC KUƆTH IN RƐL RƆ

Ŋuɔ̱t kɛ kui̱ bööth palä

¹ Cu Kuoth Nhial Muthɛ jiök i̱ ruacni kɛ gaat Ä-ron tin la bööth palä i̱, “A thil bööth palä mi bi rɔdɛ ya̱r kɛ matdɛ kɛ rɔ kunyä ran nɛɛnikɛ.

² Ɛ ni mi gua̱n kiɛ man kiɛ gatdɛ kiɛ nyadɛ kiɛ däman,

³ kiɛ nyiman mi nyal mi ka̱n ni kuɛn, mi cieŋ kɛ jɛ kɛɛl.

⁴ A /ci puɔ̱nydɛ yär kɛ käp ri̱ŋ raam mi ci li̱w kä nɛy tin maar kɛ jɛ kɛ kui̱ kuen.

⁵ A thil bööth palä mi gëk wi̱cdɛ, kiɛ mudɛ tikdɛ, kiɛ bikɛ pua̱nykiɛn tëm, kɛ ɣöö pärkɛ.

⁶ Kä bikɛn a nɛy ti gɔw kɛ ɣän Kuothdiɛn kä /ca ciöt Kuɔthdiɛn bi jak kä thil luɔt, kɛ ɣöö käm kɛn ɣä muc bɛɛl. Kɛ kui̱ ɛmɔ bikɛ gɔw.

⁷ Kä a jɛ ci kuen kɛ ciek mi le̱r, kiɛ kɛ ciek mi ci da̱k kä cɔwdɛ, kɛ ɣöö gɔaa ɛ kä Kuothdɛ.

⁸ Kä ciɛŋɛ jɛ ala mi rɛl gɔɔydɛ rɔ, kɛ ɣöö kämɛ Kuothdun mi̱ethdɛ, bi gɔɔydɛ rɔ rɛl kä yɛ. Kɛ ɣöö ɣän Kuoth in jak yɛ kä gɔaa, rɛl gɔɔydä rɔ.

⁹ Nya bööth palä mi wee rɔ ya̱r kɛ le̱e̱r, cɛ gua̱n ya̱r, ba jɛ waŋ kɛ mac amäni lia̱a̱dɛ.

¹⁰ “Kä bööth palä mɔ bi dit ni jɛn ɔ kä gaatman, min ca wi̱cdɛ wuɔ̱c liɛɛth yi̱i̱rä, kä ca ley in bi bieyni bat, cɛ mi̱em kɛ bi päl baaŋ, kä cɛ bieynikɛ bi rɛ̈t.

¹¹ Kä /cɛ bi wä guäth in ci ran li̱w thi̱n, kä /cɛ puɔ̱nydɛ bi yär, a cäŋɛ gua̱n kiɛ man.

¹² Kä /cɛ bi wä raar rɛy luak Kuoth, kɛ ɣöö ci luak Kuothdɛ bi jiäk, kɛ gɔy liɛɛth yi̱i̱rä kuothdɛ in te wi̱cdɛ. Ɛ ɣän Kuoth Nhial.

¹³ Kä bɛ kuɛn ni nya dhuɔɔri.

¹⁴ Ciek jɔkä, kɛ̈ɛ̈, le̱r ciek, ci bööth palä in diit bi kuɛn kä kɛn män ɛ tɔ. Bɛ kuɛn ni nya dhuɔɔri kä nɛɛkɛ,

¹⁵ kɛ ɣöö ci gaatkɛ dëë jiäk rɛy nɛɛnikɛ. Ɛ ɣän Kuoth in jak jɛ kä rɛl gɔɔydɛ rɔ.”

¹⁶ Kä cu Kuoth Nhial Muthɛ la̱r lär

¹⁷ i̱ jiök ni Ä-ron, “Thil ɛ raan kä kuayku ri̱cnikiɛn dɔ̱ŋ dëë ram mi tekɛ gua̱r ɛ go̱r i̱ thöpɛ bɛl Kuɔth Nhial.

¹⁸ Kɛ ɣöö thil ɛ ram mi te gua̱r mi bi ben thiekä, ram mi cɔr kiɛ ŋɔl, kiɛ ram mi lɔɔth nhiamdɛ kiɛ cäk.

¹⁹ Kiɛ ram mi te buɔ̱t cio̱kädɛ kiɛ tetdɛ,

²⁰ kiɛ ram mi te kuɛm, kiɛ cäk, kiɛ ram mi waŋ tok kiɛ ram mi te jiöny kiɛ gɔak butdä kiɛ ɣo̱w.

²¹ Thilɛ raan kä kuay Ä-ron in bööth palä mi tekɛ buɔ̱m mi bi ben thiekä mi bi muc mi̱eth ben thöp Kuoth Nhial, min cakɛ te buɔ̱m.

²² Ɛn ram ɛmɔ bɛ mi̱eth Kuɔthdɛ dhil cam, mi̱eth in gɔaa kɛnɛ min rɛl gɔɔydɛ rɔ.

²³ Kä kɛ ɣöö te puɔ̱nydɛ kɛ buɔ̱m, /cɛ bi ben thiekä gëlä kiɛ yi̱k. Kɛ ɣöö /cɛ tin rɛl gɔɔydiɛn rɔ bi ya̱r. Ɛ ɣän Kuoth in jakɛ kä gɔw.”

²⁴ Ti̱ti̱ kɛ kɛn tin ci Muthɛ kɛ la̱t Ä-ron kɛnɛ gaatkɛ kɛ ji̱ I-thɛ-rɛl diaal.