Liib 20 - RUAC KUƆTH IN RƐL RƆ

Duäc raam mi thil luth

¹ Cu Kuoth Nhial Muthɛ jiök i̱,

² “Jiök ni ji̱ I-thɛ-rɛl i̱, pëkdɛ raan I-thɛ-rɛl kiɛ nɛy tɔ̱ cieŋ rɛydiɛn tɔ, mi wee gaatkɛ wä ka̱m kuoth Mo-lɛk ba jɛ näk. Bi ji̱ dolä jɛ bo̱k.

³ Kä bä wi̱cdä ciaŋ jɔ̱ɔ̱r kä jɛn ram ɛ mɔ, kä bä jɛ tuɔ̱k raar kä nɛɛkɛ. Kɛ ɣöö cɛ gatdɛ kɛl kä gaatkɛ ka̱m kuoth Mo-lɛk, cɛ luaakdä jak kä jiäk kä cɛ ciötdä ya̱r.

⁴ Kä mi ci ji̱ dolä jɛ dhɔt ɛn ram ɛ mɔ min thöpɛ gatdɛ kɛl kä gaatkɛ kuoth Mo-lɛk kä /ken kɛn ɛ näk.

⁵ Inɔ ɣän bä wi̱cdä luɔ̱c jɛ kɛnɛ ji̱ dhɔaarɛ, kä bäkɛ cu dääk raar rɛy nɛɛnikiɛn, amäni nɛy diaal tin guɔ̱r kɛ ji̱ kä wa guɔ̱r ni kuoth Mo-lɛk.

⁶ “Kä ram mi wä gɛɛr kä ji̱ kolaaŋni, ɣän bä wi̱cdä luɔ̱c jɛn ram ɛmɔ, kä bä jɛ tuɔ̱k raar rɛy nɛɛnikɛ.

⁷ Kɛ kui̱ ɛmɔ jakɛ rɔ kä gɔw, kɛ ɣöö ɛ ɣän Kuoth Nhial Kuothdu.

⁸ Tit ruaacnikä kä yopkɛ. Ɛ ɣän Kuoth in jak ji̱ kä gɔaa.

⁹ Kä ram mi jäny gua̱n kiɛ man ba jɛ näk. Bi riɛmdɛ te wi̱i̱dɛ.

¹⁰ “Kä mi wä raan ciek gua̱n thiekädɛ wä dhɔm, kɛn dhööm da̱ŋ rɛw ba kɛ näk.

¹¹ Wut mi wä tɔ̱c kɛ ciek gua̱n, cɛ lɔc gua̱n jak kä jiäk. Ba kɛn da̱ŋ rɛw näk, kä bi riɛmdiɛn te wi̱i̱diɛn.

¹² Kä mi wee tɔ̱c kɛ ciek gatdɛ, ba kɛ näk kɛn da̱ŋ rɛw, cikɛ ruaal la̱t, bi riɛmdiɛn te wi̱i̱diɛn.

¹³ Mi ɛ wut wä tɔ̱ɔ̱c kɛ wut mi dɔ̱diɛn ɔ, kɛn da̱ŋ rɛw ca kɔɔr la̱t, ba kɛ näk, bi riɛmdiɛn te wi̱i̱diɛn.

¹⁴ Mi ci ran nyal mat kɛ kɛnɛ man, ɛ buar, ba kɛ waŋ kɛ mac, kɛn da̱ŋ diɔ̱k, kɛ ɣöö /cɛ bi lɛ te buar rɛydun.

¹⁵ Kä mi wä wut tɔ̱c kɛ le̱y ba jɛ näk. Kä ba le̱y näk bä.

¹⁶ Kä mi wä ciek rɔ ka̱m le̱y a bɛ jɛ ka̱n, bia ɛn ciek näk kɛnɛ le̱y. Bi riɛmdiɛn te wi̱i̱diɛn.

¹⁷ “Mi ci wut nyiman ka̱n, ɛ nya gua̱n kiɛ nya man, ɛ duŋ pöcä, ba kɛ tuɔ̱k raar rɛy nɛɛnikiɛn. Kɛ ɣöö cɛ nyiman ka̱n, bɛ riɛkdɛ jek ɛ jɛn.

¹⁸ Mi wä wut tɔ̱c kɛ ciek mi te buɔth cɛ buɔthdɛ ya̱r, kä /kenɛ jɛ tit, kɛn da̱ŋ rɛw ba kɛ tuɔ̱k raar rɛy nɛɛnikiɛn.

¹⁹ Cu muɔlen lony juutdä kiɛ waydu, kɛ ɣöö kɛ ji̱ maarädu, bi riɛkdɛ jek yɛn.

²⁰ Mi wä wut tɔ̱c kɛ ciek närɛ, bɛ lɔc närɛ jak kä jiäk, ɛ dueriɛn, bikɛ li̱w a thil gaat.

²¹ Mi ci wut ciek däman ka̱n, ɛ duer cɛ lɔc däman jak kä jiäk, cikɛ bi tekɛ gat.

²² “Kɛ kui̱ ɛmɔ tiɛtdɛ ruaacnikä kɛnɛ ŋuɔ̱tkä, kä la̱tdɛ kɛ, kɛ ɣöö /ci mun in bä yɛ naŋ thi̱n yɛ bi lo̱k.

²³ Kä /cia bi guɔ̱r ni ciɛŋ nɛɛni tin cä tuɔ̱k raar nhiamdun, kɛ kui̱ kä ti jiäk tin ci kɛn kɛ lät kä ɣä, cä kɛ cu lo̱k.

²⁴ Ce̱tkɛ mëë cä la̱r yɛ i̱, ‘Bia mundiɛn ka̱n, bä ka̱m yɛ ɛn mun ɛmɔ mun tuar kɛnɛ cak.’ Ɛ ɣän Kuoth Nhial Kuothdu mëë käm ji̱ raar rɛy nath.

²⁵ Kɛ kui̱ ɛmɔ bi tekɛ däk kam le̱e̱ni tin gɔw kɛnɛ tin jiäk, kam diitni tin gɔw kɛnɛ tin jiäk. Cu puɔ̱nydu bi ya̱r kɛ le̱y kɛnɛ diit kɛ tin diaal tin do̱ny piny, tin cä lar i̱ dëë ji̱ jak kä jiäk.

²⁶ Bi yiɛn gɔaa kɛ ɣä, kɛ ɣöö ɛ ɣän Kuoth mi rɛl gɔɔydɛ rɔ, kä ci yɛ dääk raar rɛy nath, kɛ ɣöö bi yiɛn a nɛɛkä.

²⁷ “Kä wut ɔ kiɛ ciek ɔ bia̱ gua̱n kolaaŋni mɔ ba. Kɛ bök kɛ dööl amäni lia̱a̱, kä bi riɛmdiɛn te wi̱i̱diɛn.”