Liib 19 - RUAC KUƆTH IN RƐL RƆ

Ŋuɔ̱t kɛ kui̱ gɔɔyä kɛn cuŋ

¹ Kä Cu Kuoth Nhial Muthɛ jiök i̱,

² “Ruac nikɛ duɔl ji̱ I-thɛ-rɛl diaal, jiök nikɛ i̱ ɛ gɔɔydun rɛl rɔ, kɛ ɣöö ɣän Kuoth Nhial Kuothdun rɛl gɔɔydä rɔ.

³ Kä yɛ ɛ raan luth man kɛnɛ gua̱n, kä tiɛtdɛ cäŋdä, bärɔw ni̱ni. Ɛ ɣän Kuoth Nhial Kuothdun.

⁴ Kä /cuarɛ rɔ rit kuth guäyni kä /cuarɛ rɔ täth kuth ciikni. Ɛ ɣän Kuoth Nhial Kuothdun.

⁵ “Kä mi wi̱i̱ muc malädu nöŋ Kuoth Nhial, thöp ni jɛ kɛ duɔ̱p in dëë nhɔk ni jɛ kä ji̱.

⁶ Kä ba jɛ cam ɛn cäŋ in thöpɛ ni jɛ amäni cäŋ in rɛwdɛ. Mi wec tekɛ mi ci duɔth kɛ cäŋ in diɔ̱ɔ̱kdiɛn ba jɛ waŋ.

⁷ Kä mi tëë kɛ mi wa cam thi̱n kɛ cäŋ in diɔ̱ɔ̱kdiɛn, cɛ jiääk ɛn muc ɛmɔ, /ca bi lɛ nhɔk.

⁸ Kä ɛn ram ɔ ci jɛ cam ɔ bariɛkdɛ, kɛ ɣöö cɛ min ca le̱y Kuoth Nhial ya̱r, ba jɛ tuɔ̱k raar ɛn ram ɛ mɔ rɛy nɛɛnikɛ.

⁹ “Kä mi wä yɛn bɛl ka̱a̱nikun wä ŋɛ̈r, /cuarɛ cup gëëkni kä /cuarɛ kuaanykiɛn kuany.

¹⁰ Kä /cu loc rɛy kak walku kɛ kui̱ kɔaŋ kɛ ɣöö bi tin ci rueec wä kuany, kiɛ bi tin ci pɛ̈n wä ma̱a̱t, bäny nikɛ can kɛnɛ nɛy tin guä. Ɛ ɣän Kuoth Nhial Kuothdu.

¹¹ “/Cu kue̱l kä /cu kac kac kä /cuarɛ rɔ kaŋ.

¹² /Cu rɔ yac kɛ ciötdä kɛ kac bi ciöt Kuɔthdu yär. Ɛ ɣän Kuoth Nhial.

¹³ “/Cu gua̱n thiekädu mac kiɛ kual. Kä /cu mi ci kɔk ni raan bi jak kä ni̱n kɛ ji̱ mäni runwaŋ.

¹⁴ /Cu ram mi miŋ kue̱th kä /cu päm läth nhiam cɔar, luthni Kuothdu. Ɛ ɣän Kuoth Nhial.

¹⁵ “/Cuarɛ thuɔ̱k pen rɛy luɔ̱ɔ̱knikun. /Cuarɛ can mac kä /cuarɛ dual kɛ nɛy tin riäŋ, luk gua̱n thiekädu kɛ thuɔ̱k.

¹⁶ /Cu kac lat rɛy nɛɛniku, kä /cu tëk gua̱n thiekädu bi bath. Ɛ ɣän Kuoth Nhial.

¹⁷ “/Cu dämuɔɔr lok kɛ lɔcdu, liɛŋɛ rɔ yɛnɛ gua̱n thiekädu, kɛ ɣöö ci duer bi jek kɛ kui̱dɛ.

¹⁸ /Cu tɛr tër raan kä nɛɛku, kä cu jɛ rɔm kɛ lɔcdu, nhɔk ni gua̱n thiekädu ce̱tkɛ puɔ̱nydu. Ɛ ɣän Kuoth Nhial.

¹⁹ “Tit ni luëëkä. /Cu ɣɔ̱ɔ̱ku jak kä tekɛ dör ti kɔŋ, cu kaakdu pith kɛ bɛl ti gööl, kä /cu bi̱i̱ mi ca kɔc kɛ bieyni ti gööl bi la̱th puɔ̱nydu.

²⁰ “Mi ci wut tɔ̱ɔ̱c kɛ ciek mi ja̱ŋ nyaal mi ca ka̱m wut mi dɔ̱ŋ kä ɛn wut ɛmɔ thilɛ mi cɛ thöp kɛ kui̱ nyaamɔ kä /kenɛ jɛ lony, ba kɛ kum, duundɛ ɣöö /ca kɛ bi näk, kɛ ɣöö /ka̱n nyaamɔ kɔn lony.

²¹ Kä kuɛ la ɣöö ɛn wut ɛmɔ bɛ thäk dɛ̈ɛ̈l rɔmä nööŋ thok duëël ro̱mä ala muc cutdä Kuɔth Nhial.

²² Kɛn thäk dɛ̈ɛ̈l rɔmä muc dui̱rä mɛmɛ bi bo̱o̱th palä jɛ luɛl ni duerɛ nhiam Kuɔth kɛ kui̱ dui̱rä min cɛ la̱t, kä bacu pa̱l duerɛ.

²³ “Kä mi wä yɛn wä ben mun Kɛ-naan, kä bia jiɛɛn dɛɛni mi̱eth pith, ŋa̱cɛ jɛ ɛn ɣöö dɛykiɛn jiäkɛ. Kɛ run da̱ŋ diɔ̱k /cikɛ ro̱ŋ kɛ mi̱eth.

²⁴ Kä kɛ ŋuaan runi bi dɛykiɛn diaal a ti gɔw ti ba thöp Kuoth.

²⁵ Kä kɛ dhieec runi bia dɛykiɛn cam. Kɛn duɔ̱p ɛmɔ bi jiɛɛnkun dɛy ti ŋuan kuir. Ɛ ɣän Kuoth Nhial Kuothdun.

²⁶ “/Cu ri̱ŋ mi tekɛ riɛm cam. Kä cu kuth pal.

²⁷ /Cuarɛ wi̱cdun gëk kä /cuarɛ mi̱em ti̱ekdun yup.

²⁸ /Cuarɛ pua̱nykun te̱m kɛ kui̱ li̱ëth kä /cuarɛ pua̱nykun moc biɛl. Ɛ ɣän Kuoth Nhial.

²⁹ “/Cu nyaadu moc jiath lɔaac kɛ jakdu kɛ jɛ kä lër, kɛ ɣöö /ci naath bi le̱e̱r a bikɛ cu thil lua̱ŋ.

³⁰ Tit cäŋ lɔ̱ŋä cäŋdä kä luɔ̱thɛ luaakdä. Ɛ ɣän Kuoth Nhial.

³¹ “/Cu com wä go̱r kä raan kiɛ yiey kä jɔɔk, kɛn tɔ̱tɔ̱ ba ji̱ yär. Ɛ ɣän Kuoth Nhial Kuothdu.

³² “Jiɛc rɔ luthä nhiam di̱tni, nyuth nikɛ luthdu, kɛ dualu kɛ Kuothdu. Ɛ ɣän Kuoth Nhial.

³³ “Mi cieŋ juɔ̱r kɛ kɛ yɛ, /cuarɛ jɛ ciɛŋ a jiäk.

³⁴ Ɛn juɔ̱r ɛ mɔ a jɛ cieŋ ala raan wec rɛydun, kä nhɔakɛ jɛ ce̱tkɛ pua̱nykun, kɛ ɣöö ci yɛn kɔnɛ jur muun I-jëp. Ɛ ɣän Kuoth Nhial Kuothdun.

³⁵ “/Cu bi duer mi thɛmi bär kä duɔ̱ɔ̱r kiɛ pëkdɛ kɛnɛ di̱tdɛ.

³⁶ A te ni ji̱n kɛ theemni ti päär, pëk ti päär, took ti päär. Ɛ ɣän Kuoth Nhial Kuothdun, mëë käm yɛ raar kä I-jëp.

³⁷ Luthni ŋuɔ̱tkä kɛnɛ lueekä diaal kä guuri kɛ. Ɛ ɣän Kuoth Nhial.”