Liib 17 - RUAC KUƆTH IN RƐL RƆ

Ya̱c mi̱eth riɛm

¹ Cu Kuoth Nhial Muthɛ jiök i̱,

² “Ruacni kɛ Ä-ron kɛnɛ gaatkɛ, kɛ ji̱ I-thɛ-rɛl diaal jiök nikɛ i̱, ‘Nɛmɛ ɛ jɛn min ci Kuoth ɛ lar i̱,

³ raan I-thɛ-rɛl ɔ bi mucdɛ thöp rɛy wec kiɛ jɔk wec ɔ, yaŋ rɔaam kiɛ böw,

⁴ a /kenɛ jɛ nööŋ thok kɛmɛkä ro̱mä kɛ Kuoth Nhial ala muc mi thöpɛ Kuoth Nhial nhiam luaak Kuɔth, ɛn raam ɔ cɛ duer kɛ wuth riɛm piny. Kä ba tuɔ̱k raar rɛy nɛɛnikɛ.

⁵ Nikɛ ɣöö bi ji̱ I-thɛ-rɛl muckiɛn tin na̱kɛ rɛy ka̱a̱ni dɔɔr nöŋ Kuoth Nhial, bikɛ jɛ nöŋ bööth palä thok kɛmɛkä ro̱mä kɛ Kuoth Nhial, kä bɛ kɛ thöp ala muc malä.

⁶ Kä bi bööth palä riɛm kiɛth yi̱kä Kuɔth Nhial min te thok kɛmɛkä ro̱mä kɛ Kuoth Nhial, kä bɛ thiɔl waŋ ala ŋuäny mi gɔaa kä Kuoth Nhial.

⁷ Kɛ ɣöö ci ji̱ I-thɛ-rɛl bi lɛ ŋot kɛ mi thöpkɛ muc deetkiɛn kuth, tin palkɛn kɛ. Ɛn mɛmɛ ba jɛn ŋut mi do̱raar kä kɛ amäni ri̱c ɛ bi ben ɔ.’

⁸ “Kä jiök nikɛ, pëkdɛ raan I-thɛ-rɛl kiɛ juɔ̱r ɛ cieŋ rɛydiɛn ɔ mɔ bi luurɛ min waŋkɛ kiɛ muc thöp ɔ,

⁹ kä /kenɛ jɛ nööŋ thok kɛmɛkä ro̱mä kɛ Kuoth Nhial a bɛ jɛ ben thöp Kuoth Nhial, ɛn raam ɔ ba jɛ tuɔ̱k raar rɛy nɛɛnikɛ.

¹⁰ “Kä mi wee tekɛ raan I-thɛ-rɛl kiɛ juɔ̱r mi wä riɛm cam, bä wi̱cdä luɔ̱c ɛn raam ɔ ci riɛm camɔ, kä bä jɛ tuɔ̱k raar kä nɛɛkɛ.

¹¹ Kɛ ɣöö te tëk ri̱ŋ rɛy riɛm. Cä ka̱m yɛ i̱ bia rɔ luɛl kɛ jɛ wi̱i̱ yi̱kä, ɛ jɛn riɛm luɛl yi̱ey tɔ.

¹² Kɛ Kui̱ ɛmɔ cä la̱r ji̱ I-thɛ-rɛl ɛn ɣöö thilɛ ram mi bi riɛm cam, amäni jur tin cieŋ rɛydiɛn thilɛ ram mi bi riɛm cam.

¹³ Kä mi wä raan I-thɛ-rɛl, kiɛ ram mi juɔ̱r kä jur tɔ̱ cieŋ rɛydiɛn tɔ̱ le̱y kiɛ dit wä kak, kä tin dɔ̱ŋ dëë cam, a jɛ wuth riɛmdɛ piny kä bɛ jɛ mol kɛ tup.

¹⁴ “Kɛ ɣöö tëk kä ti diaal te rɛy riɛmdɛ, kɛ ɣöö nɔ cä ji̱ I-thɛ-rɛl jiök i̱ /ca riɛm bi cam rɛy ri̱ŋ, kɛ ɣöö tëk ri̱ŋ ɛ riɛm, kä ram ɔ biɛ cam ɔ ba tuɔ̱k raar.

¹⁵ Kä ɛn ram ɔ bi ri̱ŋ lɛ̱̈ɛ̱̈ mi ci li̱w kä rɔa kiɛ ca näk ɛ le̱y mi dɔ̱ŋ cam ɔ kä ji̱ I-thɛ-rɛl kiɛ kä jur, a jɛ lak bieynikɛ kä a jɛ puaak, bɛ jiääk mäni thiaŋ, kɛ kɔrɛ bɛ cu gɔaa.

¹⁶ Mi wec tey a /cɛ bieynikɛ lak kä /cɛ puaak bɛ riɛkdɛ jëk ɛ jɛn.”