Liib 16 - RUAC KUƆTH IN RƐL RƆ

Cäŋ Luël

¹ Cu Kuoth Nhial ruac kɛ Muthɛ kɛ kɔr kä mi ci gaat Ä-ron da̱ŋ rɛw li̱w, mi cikɛ wä nhiam Kuɔth kɛ muc ti jiäk.

² Cu Kuoth Nhial Muthɛ jiök i̱, “Jio̱kni dämuɔɔr ni Ä-ron i̱, /cu wä gua̱thni diaal guäth in rɛl gɔɔydɛ rɔ jɔk gëëlä nhiam gëëlä kuumä thandukä matdä ruac kɛ ɣöö ci bi li̱w, ɛ jɛn gua̱a̱th in bä jɔɔc thi̱n rɛy nyäŋä.

³ Bi ben guäth in rɛl gɔɔydɛ rɔ a jäli kɛ thäk ala luur dui̱rä kɛnɛ ruath dɛ̈ɛ̈l rɔɔmä ala luur mi waŋkɛ.

⁴ Kä a ŋot Ä-ron a /kenɛ ni wä rɛy, guäth in rɛl gɔɔydɛ rɔ, a jɛ puaak kä bɛ bieyni bööthä palä bat, bi̱i̱ in bäär kɛnɛ thuruaalikɛ, kä bɛ kɛ yian kɛ yieynikiɛn, kä bɛ kum biey cu la̱th.

⁵ Kä rɛy bunä ji̱ I-thɛ-rɛl bɛ rɔ moc thääk deet böwni da̱ŋ rɛw ala luuri dui̱rä, kɛ thäk dɛ̈ɛ̈l rɔɔmä ala luur mi waŋkɛ.

⁶ “Ɛn Ä-ron bɛ thäk thöp ala luur dui̱rädɛ, bɛ luɛlni rɔ kɛnɛ ji̱ dhɔaarɛ

⁷ inɔ bɛ thääk deet böwni da̱ŋ rɛw ka̱n, bɛ kɛ nööŋ nhiam Kuɔth Nhial thok kɛmɛkä ro̱mä kɛ Kuoth Nhial.

⁸ Kä bɛ gaakni yuɔr kɛ kui̱ thääk deet böwni da̱ŋ rɛw, kɛl kɛ kui̱ Kuɔth Nhial, min dɔ̱ŋ kɛ kui̱ A-dha-dhel.

⁹ Bɛ thäk dɛ̈ɛ̈l in ci pɛn kä Kuoth. Nööŋ nhiam Kuɔth, kä bɛ jɛ thöp ala luur kɛ kui̱ dui̱rä.

¹⁰ Kä thäk dɛ̈ɛ̈l in ci pɛn kä A-dha-dhel nööŋ nhiam Kuɔth Nhial a tëk ala lue̱e̱l, kä bɛ cu jak kä wä rɛydɔaar kä A-dha-dhel.

¹¹ “Mi wä Ä-ron thäk wä thöp ala luur dui̱rkädɛ, mi luɛlɛ ni rɔ kɛnɛ ji̱ dhɔaarɛ.

¹² A jɛ kän thak maac mi cɛ thiäŋ kɛ rual maac wi̱i̱ yi̱kä, kä bɛ rɔ jiöm kɛ tët da̱ŋ rɛw kä wal tin kuɔ̱r kuɔ̱ɔ̱r, kä akɛ nööŋɛ jɔk ge̱e̱lä guäth in rɛl gɔɔydɛ rɔ.

¹³ Ɛn wi̱ni bɛ wäl ɛmɔ la̱th maac nhiam Kuɔth Nhial, kä bi tolɛ kuum thandukä matdä ruac ŋuɔ̱tni kum, kɛ ɣöö /cɛ bi lɛ li̱w.

¹⁴ Kä bɛ tha̱a̱ŋ riɛm tha̱a̱k ka̱n, kä kɛ yiatdɛ bɛ jɛ kiɛth nhiam kuumä thandukä matdä ruac, kä bɛ tha̱a̱ŋdɛ ben kiɛth kɛ yiatdɛ nhiam thandukä matdä ruac ni kä bärɔw.

¹⁵ “A jɛ näk thäk dɛ̈ɛ̈l böwä min mɔ luur dui̱rä nath, kä bɛ riɛmdɛ naŋ jɔk ge̱e̱lä, kä bɛ jɛ la̱t ce̱tnikɛ mëë cɛ lätni riɛm tha̱a̱k, bɛ jɛ kiɛth wi̱i̱ kuumä thandukä matdä ruac, kɛnɛ nhiamdɛ.

¹⁶ Kɛn duɔ̱p ɛ mɔ bɛ gua̱a̱th in rɛl gɔɔydɛ rɔ cu lak kɛ jiäk ji̱ I-thɛ-rɛl, kɛnɛ dueerkiɛn diaal, bɛ jɛ la̱t ɛn mɛmɛ kä kɛmɛkä ro̱mä kɛ Kuoth Nhial kɛ ɣöö tëë däär wecdiɛn mi ca göl ɛ jiäk.

¹⁷ Kä thilɛ ram mi bi wä rɛy kɛmɛkä ro̱mä kɛ Kuoth Nhial guäth in cɛ wä rɛc min luɛlɛ gua̱a̱th in rɛl gɔɔydɛ rɔ, amäni mi cɛ ben raar kä cɛ rɔ luɛl kɛnɛ ji̱ dhɔaarɛ, kɛ ji̱ I-thɛ-rɛl diaal,

¹⁸ kä bɛ ben raar yi̱kä min te nhiam Kuɔth Nhial bɛ jɛ ben lak, bɛ tha̱a̱ŋ riɛm tha̱a̱k kɛnɛ thäk dɛ̈ɛ̈l böwä ka̱n, bɛ jɛ ben bat tuɔ̱ŋni yi̱kä da̱ŋ ŋuaan.

¹⁹ Kä bɛ tha̱a̱ŋ riɛm cu kiɛth thi̱n kɛ yiatdɛ ni kä bärɔw, inɔ bɛ jɛ cu lak kä jiäk ji̱ I-thɛ-rɛl, bɛ cua̱ mi rɛl gɔɔydɛ rɔ.”

Dɛl mi naŋ dueer nath dɔɔr

²⁰ “Kä mi wä Ä-ron thuɔ̱k kɛ luël gua̱th in rɛl gɔɔydɛ rɔ kɛnɛ kɛmɛkä ro̱mä kɛ Kuoth Nhial kɛ yi̱k, a jɛ nööŋ dɛ̈ɛ̈l böwä mi tëk.

²¹ Bi Ä-ron tetkɛ da̱ŋ rɛw la̱th wi̱i̱ tha̱k dɛ̈ɛ̈l böwä mɔmɔ buk ɛ jɛ, kä latdɛ dueer ji̱ I-thɛ-rɛl diaal kɛnɛ jiäkiɛn, bɛ kɛn diaal la̱th wi̱i̱ tha̱k dɛ̈ɛ̈l, kä bɛ jɛ cu jak kä wä däärdɔaar kɛ ram ɔ cɛ kuany ɔ i̱ bi jɛ la̱t.

²² Bi thak dɛ̈ɛ̈l dueerkiɛn cu naŋ kɛ jɛ kɛ rɛydɔaar mi ca cieŋ.

²³ “Ɛ jɛn bi Ä-ron cu luny kɛmɛkä ro̱mä kɛ Kuoth Nhial, bɛ bieyni bööthä palä ben ka̱m raar tin cɛ bat guäth in wee gua̱a̱th in rɛl gɔɔydɛ rɔ, bɛ kɛ cu ba̱ny ɛn wi̱ni.

²⁴ Kä bɛ rɔ puɔk guäth mi rɛl gɔɔydɛ rɔ, kä bɛ bieynikɛ cu la̱th, kä bɛ cu ben raar bɛ muc mi waŋ ben thöp kɛ kui̱dɛ, kɛ luur mi waŋ kɛ kui̱ nath bɛ rɔ cu luɛl kɛnɛ naath.

²⁵ Kä bɛ thiɔl luurä dui̱rä waŋ wi̱i̱ yi̱kä bä.

²⁶ Kä ɛn ram min ci dɛl jak kä wä däärdɔaar kä A-dha-dhel, a jɛ lak bieynikɛ kä bɛ puaak, bɛ kulɛ ben wi̱c.

²⁷ Kä ɛn thäk min mɔ luur dui̱rä kɛnɛ böw min mɔ luur dui̱rä tin ca riɛmdiɛn nööŋ min lakkɛ gua̱a̱th in rɛl gɔɔydɛ rɔ, ba kɛ naŋ raar jɔk wec, köl, ri̱ŋ kɛ nyin jiɛc diaal ba kɛ waŋ.

²⁸ Kä ɛn ram ɔ waaŋ kɛ mɔ, bɛ bieynikɛ lak kä bɛ puaak, bɛ ku lɛ ben wi̱c.”

Ti̱t ca̱ŋ luël

²⁹ “Nɛmɛ ba ŋuɔ̱t mi do̱raar kä yɛ, ɛn ɣöö kɛ cäŋ kä wäl kä pay bärɔw (yietni) yɛn ji̱ I-thɛ-rɛl kɛ nɛy tɔ̱ cieŋ rɛydun tɔ, bia thɛɛk kä thil ɛ la̱t mi bia la̱t.

³⁰ Kɛ ɣöö ɛn cäŋ ɛmɔ bayɛ luɛl kä ba yɛ lak kä dueerkun diaal, bia cu gɔw nhiam Kuɔth.

³¹ Ɛn cäŋ ɛmɔ ɛ cäŋ lɔ̱ŋädun, bia pua̱nykun jay, ɛ cäŋ leyä mi do̱raar.

³² Kä ɛn bööth palä mɔ yi̱r kɛ mɔ kä lɛ̈ykɛ, kɛ ɣöö bɛ gua̱a̱th gua̱n ka̱n ala bööth palä in di̱i̱t, a jɛ luel kä a jɛ läth bieyni bööthä palä.

³³ Kä bɛ gua̱a̱th in rɛl gɔɔydɛ rɔ lak, kɛnɛ kɛmɛkä ro̱mä kɛ Kuoth Nhial kɛ yi̱k, bɛ kɛ lak amäni bööth palä kɛ ji̱ dolä diaal.

³⁴ Ɛn mɛmɛ ba jɛn ŋuɔ̱t mi do̱raar kä yɛ, ɛn ɣöö ba nath lak kä kɛ kɛ ruɔ̱n, dueer ji̱ I-thɛ-rɛl diaal.” Inɔ cu Muthɛ ɛ la̱t ce̱tnikɛ min ci Kuoth Nhial ɛ la̱t jɛ.