Liib 15 - RUAC KUƆTH IN RƐL RƆ

Löny pua̱ny ti nööŋkɛ jiäk

¹ Cu Kuoth Nhial Muthɛ kɛnɛ Ä-ron jiök i̱,

² “Jiökɛ ji̱ I-thɛ-rɛl i̱, mi wä raan puɔ̱nydɛ wä löny kɛn lony ɛmɔ, jiäkɛ.

³ Mi lönyɛ kiɛ cɛ cuɔ̱ŋ cɛ puɔ̱nydɛ jak kä jiäk.

⁴ Kä dhaŋ ɔ bɛ tɔ̱ɔ̱c thi̱n ɔ cɛ jiäk kä mi cɛ nyuur thinɔ bɛ jiääk.

⁵ Kä ɛn ram ɔ bi dhaŋdɛ nyɔt ɔ a jɛ lak bieyni kɛ, kä bɛ puaak, kɛ ɣöö bɛ jiääk mäni thiaŋ.

⁶ Kä ɛn ram ɔ bi nyuur guäth in cɛ nyuur thi̱n ɔ, a jɛ lak bieynikɛ kä a jɛ puaak, bɛ jiääk mäni thiaŋ.

⁷ Kä ram ɔ bi puɔ̱nydɛ thiap ɔ, a jɛ lak bieynikɛ kä bɛ puaak, bɛ jiääk mäni thiaŋ.

⁸ Kä mi wee raan wä ŋuɔ̱l ruɛy, a jɛ lak bieynikɛ ɛn raam ɔ kä bɛ puaak, bɛ jiääk mäni thiaŋ.

⁹ Kä mɔ cɛ cɛ jiääk.

¹⁰ Kä ɛn ram ɔ bi duɔ̱ɔ̱r thiap ɔ kä tin ci gua̱n lonyä nyuur thi̱n tɔ, bɛ jiääk mäni thiaŋ. Kä ram ɔ bi tɔ̱tɔ̱ kap nhial ɔ, a jɛ lak bieynikɛ, kä a jɛ puaak bɛ jiääk mäni thiaŋ.

¹¹ Kä ram ɔ bi gua̱n lonyä jɛ nyɔt ɔ kä cɛ tetkɛ bi lak, a jɛ lak bieynikɛ kä bɛ puaak, bɛ jiääk mäni thiaŋ.

¹² Kä dhaar ɛ bɛ nyɔt ɔ, a jɛ tiath kɛ, kä tin la̱tkɛ kɛ jiɛɛn ba kɛ lak kɛ pi̱.

¹³ “Kä kɛ kɔr kä min ci lönydɛ gɔaa ɛn gua̱n lönyä, a jɛ li̱p kɛ ni̱n bärɔw kɛ kui̱ la̱kdɛ, kä bɛ bieynikɛ cu lak, kä bɛ puaak pi̱i̱ni ti te lony, bɛ cu gɔaa.

¹⁴ Kɛ bädäk ni̱ni bɛ rɔ moc kɛ guɔ̱kni rɛw kiɛ kunnööri rɛw, kä bɛ ben nhiam Kuɔth Nhial thok kɛmɛkä ro̱mä kɛ Kuoth Nhial, kä bɛ kɛ ka̱m bööth palä,

¹⁵ bi bööth palä kɛ thöp ala muc, kɛl ba luur dui̱rä bi min dɔ̱ŋ a luur mi waŋkɛ, bɛ raam ɔ cu luɛl nhiam Kuɔth Nhial kɛ kui̱ lönyädɛ.

¹⁶ “Mi wä wut la̱k wä läkikä, a jɛ lak puɔ̱nydɛ ni kɛɛliw, kä bɛ jiääk mäni thiaŋ.

¹⁷ Kä ɛn bi̱i̱ ɛ ci ti̱i̱y pɛn thi̱n ɔ kiɛ köl, a jɛ lakkɛ, bɛ jiääk mäni thiaŋ.

¹⁸ Kä mi ci wut tɔ̱ɔ̱c kɛ ciek, akɛ puakɛ rɔ, kä bikɛ jiääk mäni thiaŋ.

¹⁹ “Kä mi thek ciek ce̱tkɛ ta̱a̱dɛ min wen, bɛ tekɛ jɛ kɛ ni̱n bärɔw. Kä ram mi wä jɛ nyɔt bɛ jiääk mäni thiaŋ.

²⁰ Kä tin diaal tin cɛ tɔ̱ɔ̱c thi̱n guäth in thekɛ cɛ jiääk. Kä tin cɛ nyuur thi̱n bä cikɛ jiääk.

²¹ Kä ɛn ram ɔ bi kölɛ nyɔt ɔ a jɛ lak bieynikɛ kä bɛ puaak bɛ jiääk amäni thiaŋ.

²² Ɛn ram ɔ bi duɔ̱ɔ̱r mi cɛ nyuur thi̱n thiap ɔ, a jɛ lak bieynikɛ kä a jɛ puaak, bɛ jiääk amäni thiaŋ.

²³ Mi ɛ köl kiɛ ŋu cɛ nyuur thi̱n ɔ, mi wi̱i̱ jɛ wä nyɔt bi jiääk amäni thiaŋ.

²⁴ Kä mi te wut mi ci tɔ̱ɔ̱c kɛ jɛ guäth in thekɛ, bɛ jiääk kɛ ni̱n bärɔw, kä kölɔ cɛ tɔ̱ɔ̱c thi̱n ɔ cɛ jiääk.

²⁵ “Kä mi wä ciek wä thɛɛk kɛ pëk mi bäär a /cɛ ni̱nkɛ bäl tin la thek kɛ jɛ, kɛn ni̱n thek tɔ̱ diaal ɛ tɔ̱ bɛ kɛ thuk bäkɛ jiääk ce̱tnikɛ mëë thekɛ, bɛ jiääk.

²⁶ Kä ɛn köl ɛ cɛ tɔ̱ɔ̱c thi̱n ɔ kɛ ni̱n thekädɛ, ba köl kɛ kui̱ thëkdɛ, kä mɔ cɛ nyuur thi̱n ɔ, bɛ jiääk ce̱tnikɛ thëkdɛ.

²⁷ Kä ram ɔ bi ti̱ti̱ nyɔt ɔ bɛ jiääk, a jɛ lak bieynikɛ kä a jɛ puaak bɛ jiääk amäni thiaŋ.

²⁸ Kä mi ci thek thuɔ̱k, a jɛ kuɛn ni̱n bärɔw kɛ kɔriɛn bɛ cu gɔaa.

²⁹ Kɛ bädäk ni̱ni bɛ rɔ moc guɔ̱kni rɛw kiɛ kunnööri rɛw kä bɛ kɛ ben ka̱m bööth palä thok kɛmɛkä ro̱mä kɛ Kuoth Nhial.

³⁰ Bi bööth palä kɛl thöp ala luur dui̱rä kä bi min dɔ̱ŋ a luur mi waŋkɛ, bɛ ciek ɛmɔ cu luɛl nhiam Kuɔth Nhial kɛ kui̱ thëkdɛ.

³¹ “Bia gaat I-thɛ-rɛl nɔ̱an kɛ tin la kɛ a jak kä jiääk, kɛ ɣöö /cikɛ bi li̱w kɛ jiääkdiɛn, kɛ yäridiɛn kɛ kɛmɛkä ro̱mädä min te rɛydiɛn.”

³² Ti̱ti̱ kɛ ŋuɔ̱t kɛ kui̱ wutdä mi löny kiɛ ram ɔ bi jiääk kɛ tieey ɔ läkä,

³³ kɛ kui̱ ciek ni̱ni thekädɛ, kɛ kui̱ wutdä kɛnɛ ti löny, amäni wut mi tɔ̱ɔ̱c kɛ ciek mi thek.