Liib 13 - RUAC KUƆTH IN RƐL RƆ

Ŋuɔ̱t kɛ kui̱ jɔak gupä

¹ Cu Kuoth Nhial muthɛ kɛnɛ Ä-ron jiök i̱,

² “Mi wee tekɛ ram mi te puɔ̱nydɛ kɛ kuat kiɛ kuuk kiɛ nyuɔɔny kiɛ dhɔp, bajɛ nöŋ Ä-ron bööth palä kiɛ ram kɛl kä gaatkɛ min mɔ bööth palä.

³ Mi wä bööth palä jɛ wä guic ɛn jɔk ɛmɔ cɛ mi̱em jak kä buɔy kä cɛ coth gupädɛ a cɛ ŋa̱c i̱ ɛ dhɔp, niɛn nɔ cɛ ŋa̱c ɔ bɛ jiääk raam ɔ cu lat.

⁴ Kä mi /kän biɛl mi bör jɔɔc gupä ala min /kän coth thi̱n kä /kenɛ mi̱em in te thi̱n jak kä buɔy, bi bööth palä gua̱n jua̱th bat gua̱a̱thdɛ kä rɔa kɛ ni̱n bärɔw.

⁵ Kä kɛ kɔr ni̱ni da̱ŋ bärɔw bi bööth palä jɛ nyɔk kɛ guec mi ŋotdɛ cɛ jɔɔc waaŋdɛ kä /kenɛ däk puɔ̱nydɛ bɛ jɛ nyɔk kɛ mi mocɛ jɛ kɛ ni̱n bärɔw kɔ̱kiɛn gua̱a̱thdɛ kä rɔa.

⁶ Kɛ thuɔ̱k ni̱ni da̱ŋ bärɔw bɛ jɛ nyɔk kɛ mi guicɛ jɛ mi wee jɛ wä nɛn i̱ ci biɛlɛ a ca̱r, kä /kenɛ jɛ da̱k puɔ̱nydɛ, bɛ jɛ cu lat i̱ ɛ ram mi gɔaa, bɛ bieyni kɛ cu lak ɛn ram ɛmɔ kä bɛ cu gɔaa.

⁷ Kä ɛn kuuk ɛmɔ mi wee jɛ wä da̱k puɔ̱nydɛ kɛ kɔr kä min cɛ rɔ nyuɔ̱th bööth palä. A jɛ nyɔk rɔ kɛ nyoth jɛ.

⁸ Mi wä bööth palä jɛ wä nɛn i̱ cɛ da̱k puɔ̱nydɛ bɛ jɛ cu lat raar i̱ tëë kɛ dhɔp ɛn ram mɔmɔ kä cɛ jiääk.

⁹ “Mi wee wä tekɛ ram mi tëë juey, bajɛ nöŋ bööth palä.

¹⁰ Min bi jɛ wä guic, mi cɛ jɛ je̱k i̱ cɛ guɔ̱pdɛ yɔm kä cɛ mi̱em jak kä ti böör kä te rɛydɛ kɛ ri̱ŋ mi tëk.

¹¹ Ɛ juey mi ci jääny gupädɛ bi bööth palä jɛ cu lat i̱ cɛ jiääk kä /ca bilɛ la̱th gua̱a̱thdɛ kä rɔa kɛ ɣöö cɛ jiääk ni wen.

¹² Kä mi cɛ ben raar ɛn juey a cɛ puɔ̱nydɛ kum kɛɛliw, a kenɛ jɛ ni wi̱i̱dɛ cu mäni ciökɛ, nikɛ gui̱c bööth palä kɛ jɛ,

¹³ bajɛ guic ɛ bööth palä, mi wee jɛ wä je̱k a cɛ puɔ̱nydɛ thiäŋ kɛɛliw, bɛ jɛ lat i̱ gɔaa puɔ̱nydɛ ɛn raam ɔ, min ci puɔ̱nydɛ buay kɛɛliw cɛ ku gɔaa.

¹⁴ Kä duundɛ ɣöö cäŋ ɛ wä guɔ̱p mi ca̱r jɔɔc puɔ̱nydɛ mɔ bɛ jiääk.

¹⁵ Mi wä bööth palä jɛ wä nɛn ɛn guɔ̱p ɛ ca̱r ɛ mɔ, bɛ jɛ lat i̱ cɛ jiääk ɛn raam ɔ, ɛn guɔ̱p ɛ ca̱r ɛmɔ jiäkɛ, tëë kɛ juey.

¹⁶ Mi wä guɔ̱p ɛ ca̱r ɛmɔ rɔ wä nyɔk kɛ buay, bɛ loc kä bööth palä.

¹⁷ Bi bööth palä jɛ guic, mi wee jɛ je̱k i̱ cɛ buay bɛ jɛ lat i̱ cɛ gɔaa, kä bɛ cu gɔaa.

¹⁸ “Ɛ jɛn mi wä guɔ̱p pua̱ny ran wä te pia̱a̱r mi ci gɔaa,

¹⁹ kä ci mi bör ben raar thi̱n kiɛ mi dɛ̈ɛ̈r a jɛ nyothɛ bööth palä.

²⁰ Bi bööth palä jɛ gui̱c, mi wee jɔɔc i̱ cɛ coth rɛy ri̱ŋ kä ci mi̱emkɛ jɔɔc ala ti böör, bɛ jɛ lat i̱ cɛ jiääk kɛ ɣöö ɛ juey ɛn ɔ ci päl rɛy pi̱rä mɔ.

²¹ Kä mi wee jɛ wä guic a thilɛ mi̱em mi bör thi̱n kä /kenɛ guɔ̱p le̱ny, baɛn raam ɔ bat gua̱a̱thdɛ kä rɔa kɛ ni̱n bärɔw.

²² Mi wee jɛ da̱k puɔ̱nydɛ, bɛ jɛ lat i̱ cɛ jiääk tëë kɛ juey.

²³ Kä /mi kenɛ jɛ däk a tëë rol roolä ɛ pia̱a̱r ni jɛn, bi bööth palä jɛ lat i̱ gɔaa ɛ.

²⁴ “Kä kɛ kui̱ raam mi ci waŋ, mi tithɛ kä cɛ yɔm ɛn pia̱a̱r waŋä,

²⁵ bi bööth palä jɛ ben guic, mi ci mi̱em in ci do̱ny thi̱n buay kä cɛ coth ri̱ŋ, ɛ jɛn juey ci päl ɔ rɛy piäärä waŋä, bɛ jɛ cu lar i̱ tëë kɛ juey gupä.

²⁶ Kä mi wee jɛ wä guic a thilɛ jɛ mi̱em mi bör kä pia̱a̱r a tëë gupä kä rɔa, bɛ jɛ bat gua̱a̱thdɛ kä rɔa kɛ ni̱n bärɔw.

²⁷ Kɛ kɔr ni̱ni da̱ŋ bärɔw bɛ jɛ nyɔk kɛ guec mi däk kɛ jɛ rɛy gupädɛ, bɛ cu lat i̱ tëë kɛ juey gupä.

²⁸ Duundɛ ɣöö mi cɛ lɛn ŋot kɛ läŋ lääŋ, a wä ni jɛn kɛ cuɔl. Kä /cɛ jɛ lɛ däk wäni jɛn kɛ gɔɔy, bi bööth palä jɛ lat i̱ thilɛ jɛ juey gupä, ɛ pia̱a̱r ni jɛn.

²⁹ “Kä mi wee tekɛ wut kiɛ ciek mi tekɛ buɔ̱t wi̱i̱dɛ kiɛ ti̱kdɛ,

³⁰ bi bööth palä jɛ guic ɛn buɔ̱t ɛ mɔ. Mi cɛ coth rɛy ri̱ŋ kä ci mi̱emdɛ a yian kä ciwɛ, bɛ jɛ lat i̱ cɛ tekɛ juey ɛn ram ɛmɔ, cɛ tekɛ wuɔ̱ɔ̱k wec kiɛ ti̱äk.

³¹ Kä mi wee jɛ wä guic a thilɛ jɛ mi̱em mi ca̱r kä /kenɛ coth rɛy ri̱ŋ bɛ ram ɛmɔ la̱th gua̱a̱thdɛ kä rɔa kɛ ni̱n bärɔw.

³² Kɛ cäŋ in bärɔwdiɛn bɛ jɛ nyɔk kɛ gui̱c, mi thilɛ jɛ mi̱em mi yian kä /kenɛ coth rɛy ri̱ŋ kä /kenɛ jɛ däk,

³³ lotdɛ ni ɣöö bamud ɛn wi̱cdɛ kiɛ ti̱kdɛ, ba päl ni gua̱a̱th butdä, kä bɛ jɛ nyɔk kɛ läth gua̱a̱thdɛ kä rɔa kɛ ni̱n bärɔw kɔ̱kiɛn.

³⁴ Kɛ thuɔ̱k ni̱ni da̱ŋ bärɔw bɛ jɛ nyɔk kɛ gui̱c ɛn buɔ̱t, mi /kenɛ jɛ däk kä tëë jɔk gupä, bɛ jɛ lat i̱ thil ɛ jɛ juey, ɛn raam ɔ bɛ bieynikɛ lak kä bɛ cu gɔaa.

³⁵ Kä mi wee jɔɔc i̱ ci buɔ̱t rɔ rëp a ca lat i̱ cɛ thil juey,

³⁶ ba jɛ nyɔk kɛ gui̱c ɛ bööth palä, mi wee jɛ nɛn i̱ cɛ da̱k puɔ̱nydɛ kä te mi̱em mi yian ɛn raam ɔ cɛ tekɛ juey.

³⁷ Kä kɛ ca̱r bööthä palä mi guicɛ jɛ i̱ /kenɛ buɔ̱t däk a do̱ny mi̱em ti ca̱a̱r thi̱n kä wä ni jɛn kɛ gɔɔy, bɛ jɛ lat i̱ thil ɛ jɛ juey ɛn raam ɔ.

³⁸ “Mi wee tekɛ wut Kiɛ ciek mi te pia̱a̱r butdä mi cɛ guɔ̱pdɛ yɔm,

³⁹ bi bööth palä jɛ guic ɛn raam ɔ, mi tɔyɛ ni pia̱a̱r kä cɛ yɔm, bä ni gɔakdɛ raar thilɛ jɛ juey ɛn ram mɔmɔ.

⁴⁰ “Kä mi ci mi̱em wec ran rɔ̱ guth a cɛ tekɛ wuɔɔk, mi puɔthɛ ɛn wuɔɔk thilɛ jɛ juey.

⁴¹ Kä mi ci mi̱emkɛ rɔ̱ guth nhiamdɛ a cɛ tekɛ wuɔɔk, jɛn gɔaaɛ thilɛ jɛ juey.

⁴² Mi wee wä tekɛ mi dɛ̈ɛ̈r wokädɛ, luɔtdɛ ɣöö tëë kɛ juey gupä.

⁴³ Jɛn baben guic ɛ bööth palä, mi wee jɛ wä nɛn i̱ wuɔ̱ɔ̱kdɛ yɔmɛ jɛ kä ti̱thɛ,

⁴⁴ bɛ jɛ cu lat i̱ tëë kɛ juey gupä wi̱i̱dɛ.

⁴⁵ “Kɛ kui̱ ɛmɔ bi ram min tekɛ juey gupä ala dhɔp ciɛŋ ni bieyni ti ci rɛ̈t, kä bɛ wi̱cdɛ päl ɛ /ka̱n la̱t, kä bɛ thokdɛ kum kä wiee ɛ i̱, ‘Mi jiääk, mi jiääk.’

⁴⁶ Bɛ cieŋ ala mi jiääk kɛ pëk ɔ tëë kɛ juey thi̱n ɔ, kä bi cieŋ ni jɛn kä rɔa jɔk wec.”

Dhɔp biey

⁴⁷ “Mi wee tekɛ biɛl dhɔpä rɛy biey ɛ thup kiɛ terli̱i̱n,

⁴⁸ kiɛ rɛt biey mi la̱tkɛ kɛ thup kiɛ terli̱i̱n kiɛ la̱t kɛ jɛ kɛ köl,

⁴⁹ mi wec tekɛ biɛl mi dɛ̈ɛ̈r kiɛ mi tɔ̱c, ɛ dhɔp ba jɛ ben nyuɔ̱th bööth palä.

⁵⁰ Bi bööth palä jɛ guic kä bɛ jɛ la̱th kä rɔa kɛ ni̱n bärɔw.

⁵¹ Kɛ kɔr ni̱ni da̱ŋ bärɔw bɛ jɛ nyɔk kɛ gui̱c, mi rëp biɛɛlkɛ ni rɔ, cɛ jiäk ɛn bi̱i̱ ɛ mɔ.

⁵² Kä bɛ jɛ waŋ kɛ ɣöö cɛ tekɛ dhɔp röŋɛ kɛ wa̱ŋ.

⁵³ “Kuɛ la ɣöö mi ci bööth palä jɛ guic, kä cɛ jɛ je̱k i̱ /kän biɛl rɔ rëp puɔ̱ny biey,

⁵⁴ bɛ jɛ jak kä lak kɛ jɛ, kä ba bat gua̱a̱thdɛ kä rɔa kɛ ni̱n bärɔw kɔ̱kiɛn.

⁵⁵ Kä bɛ jɛ nyɔk kɛ guec, mi /kän biɛl thuuk, a cäŋ /kän biɛɛl rɔ rëp ŋotdɛ kɛ jiääk, bi jɛ waŋ kɛ mac, a cäŋ te biɛl dhɔpä jɔkdɛ kiɛ nhiamdɛ.

⁵⁶ “Kä kɛ min guic ɛ jɛ, mi ci biɛl biey jɔɔc ɛ mi̱r mi̱r, bɛ jɛ rɛ̈t jɔ̱ɔ̱r ɛn gua̱a̱th ɛmɔ puɔ̱ny biey kiɛ köl.

⁵⁷ Mi wä biɛl rɔ wä nyɔk kɛ mi jɔckɛ ala ti ŋuan, bi gua̱ndɛ jɛ waŋ ɛn bi̱i̱ ɛ mɔ.

⁵⁸ Kä mi wee jɛ wä lak kä bi cuäänydɛ bath, a jɛ nyɔkɛ kɛ la̱k kä bɛ cu gɔaa.”

⁵⁹ Ti̱ti̱ kɛ kɛn ŋuɔ̱t kɛ kui̱ dhɔpä mi te rɛy biey, ɛ bi̱i̱ mi thup kiɛ ɛ terli̱i̱n kiɛ mi la̱t kɛ kɛ köl ba jɛ lar mi gɔaaɛ kiɛ /cɛ gɔaa.