Liib 12 - RUAC KUƆTH IN RƐL RƆ

La̱k ciek kɛ rɔ kɛ kɔr dapä

¹ Ɛ jɛn cu Kuoth Nhial Muthɛ ku jiök i̱,

² “Jiök ni ji̱ I-thɛ-rɛl i̱, Mi ci ciek ruët kä cɛ dap kɛ dhɔl /cɛ bi gɔaa kɛ ni̱n bärɔw, ce̱tnikɛ ni̱n thëkdɛ /cɛ bi gɔaa.

³ Kä kɛ bädäk ni̱ni baɛn dhɔlɛ mɔ cuɛl.

⁴ Kɛ kɔrɛ bi ɛn ciek liëp kɛ ni̱n ti jiɛɛn diɔ̱k wi̱cdɛ diɔ̱k kɛ ɣöö bɛ rɔ ku lɛ lak kä riɛm dapädɛ, /cɛ duɔ̱ɔ̱r kä tin rɛl gɔɔydiɛn rɔ bi gue̱r, kä /cɛ bi wä luaak Kuoth amäni mi ci ni̱n tin lakɛ rɔ thuɔ̱k.

⁵ Kä mi wee dap ni nyal /cɛ bi gɔaa kɛ juɔkni da̱ŋ rɛw ce̱tnikɛ pëk thëkdɛ, kä bɛ liëp kɛ ni̱n ti jiɛɛn bäkɛl wi̱cdɛ bäkɛl kɛ ɣöö bɛ rɔ ku lɛ lak kä riɛm dapädɛ.

⁶ “Ɛ jɛn, cäŋ in wä ni̱n la̱kdɛ kɛ rɔ wä thuɔ̱k, kɛ kɔr dapä kɛ dho̱o̱l kiɛ nyal, a jɛ nöŋ bööth palä thok kɛmɛkä ro̱mä kɛ Kuoth Nhial ruath dɛ̈ɛ̈l ro̱mä mi gur kɛl ala muc mi waŋkɛ kɛ dɔw kunnöörä kiɛ guuk ala muc dui̱rä.

⁷ Kä bi bööth palä kɛ naŋ nhiam Kuɔth Nhial, kä bɛ kɛ cu luɛl ni jɛ, kä bɛ jɛ cu lak kä riɛmdɛ in lony. Ɛn nɛmɛ bɛ cua ŋot kɛ kui̱ ciek in wä dap kɛ dho̱o̱l kiɛ nyal.

⁸ Kä mi cɛ ruath dɛ̈ɛ̈l ro̱mä bi luäŋ kɛ jëk, a jɛ nööŋ guɔ̱kni da̱ŋ rɛw kiɛ dɛy kunnööri da̱ŋ rɛw, bi kɛl a luur mi waŋkɛ, kä bi min dɔ̱ŋ a luur dui̱rä. Kɛn duɔ̱p ɛmɔ bi bööth palä jɛ cu luɛl, kä bɛ cua̱ mi gɔaa.”