Liib 10 - RUAC KUƆTH IN RƐL RƆ

Duer Na-dab kɛnɛ Ä-bi-ɣu

¹ Täämɛ cu gaat Ä-ron ni Na-dab kɛnɛ Ä-bi-ɣu ram ɔ thak maacdɛ in la waŋɛ wal ti ŋuäny thi̱n ka̱n, kä cuɛ jɛ kue̱ny mac kä cuɛ wäl la̱th thi̱n, kä cukɛ jɛ ka̱m Kuoth Nhial. Kɛ ɣöö /ciɛ mi gɔaa min cɛ la̱r kɛ.

² Niɛ wa̱nɔ cu Kuoth Nhial mac yuɔ̱ɔ̱r, kä cuɛ kɛ ben waŋ cuɛ cua̱ lia̱a̱diɛn nhiamdɛ.

³ Kä cu Muthɛ Ä-ron jiök i̱, “Nɛmɛ ɛ jɛn mi lot Kuoth Nhial ni jɛ. Mëë laarɛ jɛ i̱, ‘Ɣän bä jɔɔc rɛy nɛɛni tin thieek kɛ ɣä ala mi rɛl gɔɔydɛ rɔ, kä bä lua̱ŋdä cu nyoth rɛy nɛɛni diaal.’ ” Kä cu Ä-ron duundɛ a biɛt.

⁴ Kä cu Muthɛ Mi-ca-el kɛnɛ Ɛl-dha-pan gaat gua̱nlen Ä-ron ni U-dhi-el cɔl, kä cuɛ kɛ jiök i̱, “Bia wa̱nɛ mɛ bia ri̱ŋ gan dämuɔɔrun ben naŋ raar nhiam kɛmɛkä ro̱mä kɛ Kuoth Nhial kä naŋɛkɛ jɔk wec.”

⁵ Ɛ jɛn cu kɛ ben kä cukɛ kɛ ben kap jɔk wec a te bieyni palä pua̱nynikiɛn, ce̱tnikɛ min ci Muthɛ ɛ lar.

⁶ Kä cu Muthɛ Ä-ron kɛnɛ gaatkɛ Ɛl-a-dhar kɛnɛ I-ta-mar jiök i̱, “/Cuarɛ wuɔ̱thkun päl gɔ̱a̱k kä /cuarɛ bieynikun rɛt a nyuɔthɛ ɣöö ta̱yɛ pärä, kä mi wa jɛn inɔ bia li̱w kä bi waŋ lɔaac Kuɔth ben kä dol ji̱ I-thɛ-rɛl diaal, kuɛ la ɣöö bi watkun kä ji̱ I-thɛ-rɛl lia̱a̱ ɛ ci Kuoth Nhial ɛ nööŋ kɛ mac ɛ par.

⁷ Kä /cuarɛ jiɛɛn ɛn thok kɛmɛkä ro̱mä kɛ Kuoth Nhial, kɛ ɣöö cia bi li̱w, kɛ min ca yɛ yi̱r kɛ liɛɛth yi̱rä Kuɔth Nhial.” Kä cukɛ jɛ la̱t ce̱tnikɛ min ci Muthɛ ɛ lar.

Ŋuɔ̱t kɛ kui̱ bööthni palä

⁸ Täämɛ cu Kuoth Nhial Ä-ron jiök i̱,

⁹ “Ji̱n yɛnɛ gaatku /cia bi maath kɛ kɔaŋ guäth in wä yɛn kɛmɛkä ro̱mä kɛ Kuoth Nhial, mi wiaa wä maath bia li̱w. Nɛmɛ ɛ ŋuɔ̱t mi batit ɛ kuayku diaal.

¹⁰ Kä bi tekɛ dääk kɛ kam nyinä Kuɔth kɛn nyin nath, kam kä mi jiääk kɛnɛ mi gɔaa.

¹¹ Kä bi ji̱ I-thɛ-rɛl ŋi̱eec kɛ ŋuɔ̱t diaal tëë cä ka̱m yɛ kɛ Muthɛ.”

¹² Cu Muthɛ Ä-ron kɛnɛ gaatkɛ da̱ŋ rɛw tin ci duɔth. Ɛl-a-dhar kɛnɛ I-ta-mar jiök i̱, “Ka̱nɛ luur bɛɛl in ci duɔth kä luur in ca ka̱m Kuoth Nhial buɔlɛ jɛ camɛ jɛ gekä yi̱kä thil thuɔp, kɛ ɣöö ɛ mi rɛl gɔɔydɛ rɔ.

¹³ Kä camɛ jɛ guäth in rɛl gɔɔydɛ rɔ kɛ ɣöö ɛ jɛn cuɔ̱ɔ̱ŋdu yɛnɛ gaatku kä luur bɛɛl in ca ka̱m Kuoth Nhial. Nɔmɔ ɛ jɛn min ca la̱rä ɛ Kuoth Nhial.

¹⁴ Duundɛ ɣöö ji̱n yɛnɛ gaatku kɛ nyieeku bia kaw kɛnɛ ɣäm tin ca ŋuëŋ Kuoth cam, bia kɛ cam guäth mi puɔth puɔth. Kɛ ɣöö ca kɛ ka̱m ji̱ yɛnɛ gaatku ala cuɔ̱ŋdun kä muc nyuaakä ji̱ I-thɛ-rɛl.

¹⁵ Baɛn ɣäm kɛnɛ kaw nööŋ guäth in thöpkɛ thiɔl Kuoth Nhial, kɛ ɣöö bakɛ ben ŋuëŋ Kuoth Nhial ala muc mi ŋuaŋ, bɛ cua̱ böthdun ni ciaŋ yɛnɛ gaatku, ce̱tnikɛ min ci Kuoth Nhial ɛ lar.”

¹⁶ Kä mëë ci Muthɛ thäk dɛ̈ɛ̈l böwä luurä dui̱rä thiec kä cɛ jɛ jäk i̱ ca jɛ waŋ, cuɛ gaak kɛ Ɛl-a-dhar kɛnɛ I-ta-mar, gaat Ä-ron tin ci duɔth thiecɛ kɛ i̱,

¹⁷ “Ɛŋu mɔ /kän yɛn luur dui̱rä cam ɔ guäth in rɛl gɔɔydɛ rɔ? Kɛ ɣöö ɛ mi rɛl rɔ, kä ka̱m kɛ jɛ yɛ kɛ ɣöö bi yɛn ɛ woc ni duer, kɛ luɛlun kɛ jɛ naath nhiam Kuɔth Nhial.

¹⁸ Kä kɛ ɣöö /ka̱n riɛmdɛ nööŋ kɛmɛkä ro̱mä kɛ Kuoth Nhial kɛ Kuoth, dëë yɛn ɛn dɛl cam gekä yi̱kä ce̱tkɛ mëë cä lar.”

¹⁹ Cu Ä-ron ɛ luɔ̱c Muthɛ i̱, “Ɛn walɛ cikɛ muc dui̱rädiɛn kɛnɛ mucdiɛn in waŋ thöp nhiam Kuɔth Nhial, kuɛ la ɣöö mi ce̱tkɛ nɛmɛ cɛ tuɔɔk kä ɣä. A dëë lɔc Kuɔth Nhial ku cak tɛɛth kɛ ɣä, mi cä luur dui̱rä cam ɛn wa̱lɛ?”

²⁰ Kä mëë ci Muthɛ nɔmɔ liŋ cu lɔcdɛ cu thuɔ̱k.