Kuen 6 - RUAC KUƆTH IN RƐL RƆ

Ŋuɔ̱t kɛ kui̱ le̱yä

¹ Cu Kuoth Nhial ruac kɛ Muthɛ,

² jio̱kɛ jɛ ruacni kɛ ji̱ I-thɛ-rɛl i̱, “Mi wä wut kiɛ ciek rɔ wä lɛy, bɛ ti diaal päl ɛ bɛ lëy ni rɔ Kuoth Nhial,

³ a jɛ päl kɔaŋ, kä a /ci mäth kɛ pi̱ dɛɛni jiɛɛn tin la la̱tkɛ ni kɔaŋ ti ca dhim kiɛ ka̱n dhim.

⁴ Kɛ ni̱n leyädɛ diaal /cɛ dɛy jiɛɛn tin la̱tkɛ ni kɔaŋ bi cam a cäŋɛ ruɔŋdɛ.

⁵ “Kɛ ni̱n leyädɛ diaal tin lɛyɛ rɔ thilɛ re̱e̱t mi bi rët kɛ wi̱cdɛ, amäni mi ci gua̱a̱th in leyɛ rɔ Kuoth Nhial thuɔ̱k, ba mi gɔaa, kä bɛ miem wecdɛ pa̱l bär.

⁶ “Kɛ ni̱n diaal tin cɛ rɔ lëy Kuoth Nhial cɛ rɔ bi thieek kɛ ram mi ci li̱w.

⁷ A cäŋɛ gua̱n ci li̱w ɔ kiɛ man, däman kiɛ nyiman, ɛ rɔ cɛ yär kɛ kɛ, kɛ ɣöö bi leydɛ kɛ rɔ Kuoth Nhial a riɛkdɛ.

⁸ Ni̱n diaal tin leyɛ rɔ Kuoth Nhial ba mi gɔaa thi̱n.

⁹ “Kä mi cɛ raan pärikä kɛ lia̱a̱ thiekädɛ, a cɛ wi̱c lëyädɛ ya̱r, bɛ wi̱cdɛ mut cäŋ la̱kdɛ. Kɛ bärɔw ni̱ni bɛ mut.

¹⁰ Kɛ bädäk ni̱ni bɛ guukni rɛw kiɛ kunööri rɛw nöŋ bo̱o̱th palä thok kɛmɛkä ro̱mä.

¹¹ Bi bo̱o̱th palä kɛl thöp ala muc dui̱rä, kä bɛ min dɔ̱ŋ thöp ala muc mi waŋkɛ. Ba jɛ cu luɛl, kɛ ɣöö cɛ duer kɛ kui̱ raam in ci li̱w. Kä bɛ wi̱cdɛ lɛy kɛn cäŋ ɛ mɔ.

¹² Kä bɛ rɔ lëy Kuoth Nhial kɛ ni̱n leyädɛ, bɛ ruath dɛ̈ɛ̈l mi gur kɛl nööŋ ala muc dui̱rä, duundɛ ɣöö ba ni̱n tin nhiam päl, kɛ ɣöö ci lëydɛ nyuɔn.

¹³ “Ɛn nɛmɛ ɛ ŋuɔ̱t kɛ kui̱ nɛɛni tin lɛ̈ykɛ rɔ, mi ci pek leyä thuɔ̱k. Ba jɛ nööŋ thok kɛmɛkä ro̱mä,

¹⁴ kä bɛ mucdɛ thöp Kuoth Nhial, bɛ la ruath dɛ̈ɛ̈l mi gur kɛl kä thil diw ala muc mi waŋkɛ, kɛ nac dɛ̈ɛ̈l mi gur kɛl kä thil diw ala muc dui̱rä, kɛ dɛl mi thil diw ala muc malä,

¹⁵ kɛ di̱eny jurayni ti thil thuɔp, kɛ pat pat nupä mi ko̱k ko̱k kä ca lia̱a̱p kɛ liɛth, kɛ mun bɛɛl kɛnɛ kɔaŋ.

¹⁶ Bi bo̱o̱th palä kɛ naŋ nhiam Kuɔth Nhial, kä bɛ muc dui̱rä kɛnɛ muc in waŋkɛ thöp.

¹⁷ Kä bɛ dɛl thöp Kuoth Nhial ala muc malä kɛɛl kɛ di̱eny nuɔ̱p in thil thuɔp, kä bi bo̱o̱th palä muc bɛɛl kɛnɛ kɔaŋ thöp bä.

¹⁸ Kä bi ram in ci rɔ lɛy wi̱cdɛ mut thok kɛmɛkä ro̱mä, bɛ miem ka̱n rɛy mieem leyä wecdɛ, kä bɛ jɛ la̱th maac in te muc malä thi̱n.

¹⁹ Kä bi bo̱o̱th jiar dɛ̈ɛ̈l ka̱n guäth in cɛ tuak, kɛnɛ juray kɛl mi thil thuɔp rɛy diëny, kɛ pat pat mi thil thuɔp, kä bɛ kɛ la̱th tetdä raam in ci rɔ lɛy, kɛ kɔr kä min cɛ miem leyädɛ mut,

²⁰ bi bo̱o̱th kɛ ŋuaŋ ala muc ti ŋuaaŋ nhiam Kuɔth Nhial, kɛ ti gɔw kɛ kui̱ bo̱o̱th palä, kɛɛl kɛ kaw in ca ŋuaŋ kɛnɛ cio̱o̱k in ca muɔc. Kɛ kɔrɛ dëë ram in ci rɔ lɛy maath kɛ kɔaŋ.

²¹ “Nɛmɛ ɛ ŋuɔ̱t kɛ kui̱ ram mi ley rɔ kä cɛ rɔ yac. Bi mucdɛ kɛ Kuoth Nhial a mɔ ro̱ŋ kɛ leydɛ mɔ, ɛ kɛl kä tin kɔ̱ŋ tin cɛ thöp, ce̱tnikɛ lëy in cɛ ka̱n, ce̱tkɛ ŋuɔ̱t leyädɛ kɛ rɔ ala ram mi ci rɔ yac.”

Puɔ̱th bo̱o̱thä palä

²² Cu Kuoth Nhial ruac kɛ Muthɛ i̱,

²³ “Jio̱k ni Ä-ron kɛnɛ gaatkɛ nɛmɛ ɛ jɛn puɔ̱th in bia poth ni ji̱ I-thɛ-rɛl i̱,

²⁴ bi Kuoth Nhial yɛ poth kä bɛ yɛ tit,

²⁵ bi Kuoth Nhial buay nhiamdɛ ka̱m yɛ, kä bɛ yɛ luäk.

²⁶ Bi Kuoth Nhial yɛ tit, kä bɛ yɛ ka̱m mal.

²⁷ “Ba ji̱ I-thɛ-rɛl ŋi̱eec kɛ ciötdä, kä bäkɛ cu poth.”