Kuen 4 - RUAC KUƆTH IN RƐL RƆ

Ji̱ Kɛ-ɣath

¹ Cu Kuoth Nhial ruac kɛ Muthɛ kɛnɛ Ä-ron i̱,

² “Kuɛ̈nɛ gaat Kɛ-ɣath rɛy gan Lii-bay, kɛ thuk duëlikiɛn kɛnɛ dho̱r gua̱ni.

³ A känɛ jɛ ni kä nɛy tin tekɛ run ti jiɛɛn diɔ̱k amäni jiɛɛn dhieec tin lua̱ŋkɛ lät tin dëë la̱t rɛy kɛmɛkä ro̱mä.

⁴ Kä lät gan Kɛ-ɣath rɛy kɛmɛkä ro̱mä ni tin rɛl gɔɔydiɛn rɔ.

⁵ Kä gua̱a̱th in ci wec thia̱k kɛ ɣöth la Ä-ron kɛnɛ gaatkɛ a coth rɛy kɛmɛkä bikɛ geel nhial ka̱p piny kä bikɛ jɛ kum ni thanduk matdä ruaacni Kuɔth.

⁶ Kä bikɛ jɛ yi̱k piny kɛ ko̱l dɛ̈ɛ̈l, kä bikɛ wi̱cdɛ kum kɛ bi̱i̱ mi yiel, kä ba cu la̱th rɛy ri̱i̱wnikɛ.

⁷ “Kä ba wi̱c Tharbët kä mi̱eth jurayni pa̱p bi̱i̱ mi yiel, kä ba kuak la̱th thi̱n, thääk tin la waŋkɛ wal, kɛ cuɔ̱ɔ̱k ma̱th mucni. Kä juray nhiam Kuɔth bɛ te thi̱n bä.

⁸ Bikɛ kɛ yi̱k piny kɛ bi̱i̱ mi do̱l, kä bikɛ kɛ kum kɛ ko̱l dɛ̈ɛ̈l kä bikɛ ri̱i̱wnikɛ la̱th thi̱n.

⁹ Kä bikɛ bi̱i̱ in yiel ka̱n, kä bikɛ gua̱a̱th cuuŋ lɛmbärä kum kɛ jɛ kɛɛl kɛnɛ lɛmbärni ɛ kɛ min la kuanykɛ jɛ kɛ min cuɔ̱thkɛ jɛ, kɛ kuakɛ diaal tin te liɛth in la pɛ̈tkɛ jɛ thi̱n.

¹⁰ “Kä ba la̱th kä min la kap kɛ jɛ kɛɛl kɛ kuakɛ diaal a ca kum kɛ ko̱l dɛ̈ɛ̈l.

¹¹ Bikɛ yi̱k dääpä wi̱cdɛ moc kɛ bi̱i̱ mi yiel, kä ba kuɔ̱m piny kɛ ko̱l dɛ̈ɛ̈l, kä ba la̱th kä ri̱i̱wnikɛ.

¹² Kä bikɛ kuak diaal tin ci naath lät kɛ kɛ rɛy luaak Kuɔth, la̱th rɛy biey mi yiel, kä ba kɛ kum kɛ ko̱l dɛ̈ɛ̈l, kä ba kɛ la̱th kä min la kap kɛ kɛ.

¹³ Kä bikɛ ŋɛ̈th naŋ raar wi̱i̱ yi̱kä kä la̱th kɛ bi̱i̱ mi do̱l thi̱n,

¹⁴ kä bikɛ kuak yi̱kä diaal tin ca lät ni la̱t, thak maac, tuɔ̱ŋ, kɛ nyinkɛ diaal tin la̱t kɛ la̱t. Ba kɛ yi̱k piny kɛ ko̱l dɛ̈ɛ̈l, kä ba to̱ŋkɛ la̱th thi̱n.

¹⁵ Mi wä Ä-ron kɛnɛ gaatkɛ wä thuɔ̱k kɛ kum kɛmɛkä kɛnɛ kuakɛ diaal mi ɣöth kɛ wec, ɛn wa̱nɔ bi gaat Kɛ-ɣath ben ba kɛ ben kap, ɛ ni ɣöö ca tin rɛl gɔɔydiɛn rɔ̱ bi nyɔt kɛ ɣöö /ci kɛ bi li̱w. Ti̱ti̱ kɛ kɛn kuak kɛmɛkä ro̱mä tin bi gaat Kɛ-ɣath kɛ kap.

¹⁶ Kä bi Ɛl-a-dhar gat Ä-ron in bo̱o̱th palä la̱tdɛ a liɛth lɛmbär kɛnɛ wal tin kɔp kɛ muc bɛɛl kɛnɛ liɛth yi̱rä, kɛɛl kɛ tin diaal tin kɔ̱kiɛn rɛy kɛmɛkä tin ca lëy Kuoth.”

¹⁷ Cu Kuoth Nhial ruac kɛ Muthɛ kɛnɛ Ä-ron i̱,

¹⁸ “/Cuarɛ thok duëël ji̱ Kɛ-ɣath jak kä däk rɛy ji̱ Lii-bay.

¹⁹ Duundɛ ɣöö akɛ la̱t kɛ ti̱ti̱, kɛ ɣöö cikɛ bi li̱w mi wä kɛ ben thiekä kä tin rɛl gɔɔydiɛn rɔ̱. Ä-ron kɛnɛ gaatkɛ bikɛ wä rɛc kä ba ramɔ nyuɔ̱th la̱tdɛ kɛnɛ min bɛ kap,

²⁰ ɛ ni ɣöö cikɛ bi wä rɛc a ba tin rɛl gɔɔydiɛn rɔ̱ wä guic a cäŋɛ gua̱th mi tɔt, kɛ ɣöö /cikɛ bi li̱w.”

Ji̱ Ger-con

²¹ Cu Kuoth Nhial ruac kɛ Muthɛ i̱,

²² “Kuɛn gaat Ger-con bä, kɛ thuk duëli gua̱ni,

²³ a känɛ ni kä run ti jiɛɛn diɔ̱k a wä kä jiɛɛn dhieec, bikɛ kuɛn kɛn tin diaal tin la̱t, la̱tkɛ lät rɛy kɛmɛkä ro̱mä.

²⁴ Nɛmɛ ɛ la̱t dhɔaar ji̱ Ger-con, la̱t kɛnɛ ka̱p kɛmɛkä

²⁵ bikɛ geel kɛnɛ kɛmɛkä ni kɛɛl kɛ kuumdɛ, kɛ kuum köl dɛ̈ɛ̈l min te nhialɛ, kɛ bi̱i̱ thuɔk kɛmɛkä ro̱mä,

²⁶ kɛ geel rɛ̈ɛ̈k kɛnɛ bi̱i̱ thuɔk rɛ̈ɛ̈k min go̱o̱l kɛmɛkä kɛnɛ yi̱k, kɛ kuak la̱tdɛ diaal la̱t, kä bikɛ tin diaal tin görkɛ la̱t ɛ kɛn.

²⁷ Kä lät diaal tin ba la̱t ɛ gaat Ger-con ba la̱t ɛ Ä-ron kɛnɛ gaatkɛ kɛn tin ba kap, kɛnɛ tin diaal tin bi kɛn kɛ la̱t, kä bikɛ ka̱m tin diaal ti ba kap.

²⁸ Ti̱ti̱ kɛ kɛn lät dho̱ri gan Ger-con rɛy kɛmɛkä ro̱mä, kä la̱tdiɛn ba guic ɛ I-ta-mar gat Ä-ron bo̱o̱th palä.”

Ji̱ Mɛ-ra-ri

²⁹ “Kä kuɛn gaat Mɛ-ra-ri kɛ thuk duëli gua̱ni,

³⁰ a känɛ ni kä run ti jiɛɛn diɔ̱k a wä kä run ti jiɛɛn dhieec, kuɛn kɛn tin diaal tin kɛ la̱t rɛy kɛmɛkä.

³¹ Nɛmɛ ɛ jɛn min bi kɛn ɛ la̱t rɛy kɛmɛkä, ri̱i̱wni kɛmɛkä kɛ pinydɛ kɛ to̱ŋkɛ kɛ pänydɛ.

³² Kɛ jiɛɛn rɛ̈ɛ̈k tin göölkɛ ni jɛ kɛ löckɛ kɛ kuakɛ diaal, kɛ nyin la̱tdɛ diaal, kä bi jɛ thöp kɛ ciötdɛ ɛn min görkɛ ka̱pdɛ.

³³ Nɛmɛ ɛ jɛn la̱t dho̱ri gan Mɛ-ra-ri, la̱tdiɛn kɛɛliw tëë kɛ I-ta-mar gat Ä-ron bo̱o̱th palä.”

Kuën ji̱ Lii-bay

³⁴ Cu Muthɛ kɛnɛ Ä-ron kɛ bööth dolä, gaat Kɛ-ɣath kuɛn kɛ thuk duëli gua̱ni

³⁵ a känɛ ni kä run ti jiɛɛn diɔ̱k a wä kä run ti jiɛɛn dhieec kä tin diaal tin lua̱ŋkɛ la̱t rɛy kɛmɛkä ro̱mä.

³⁶ Kä cu pekdiɛn kɛ dho̱rkiɛn a nɛy ti bathdɔɔri rɛw wi̱cdɛ kur bärɔw wi̱cdɛ jiɛɛn da̱ŋ dhieec.

³⁷ Cu ti̱ti̱ a pek kuayni Kɛ-ɣath kɛ dho̱rkiɛn tëë ci lät kä kɛmɛkä ro̱mä tëë ci Muthɛ kɛnɛ Ä-ron kɛ kuɛn ce̱tkɛ mëë ci Kuoth Nhial ɛ la̱r Muthɛ.

³⁸ Cu tin ca kuɛn kuayni Ger-con kɛ thuk duëli dho̱ri gua̱ni,

³⁹ a känɛ ni kä run ti jiɛɛn diɔ̱k a wä kä run ti jiɛɛn dhieec kä tin diaal tin lua̱ŋkɛ la̱t rɛy kɛmɛkä ro̱mä,

⁴⁰ cu pekdiɛn kɛ dho̱r gua̱ni a nɛy ti bathdɔɔri rɛw wi̱cdɛ kur bäkɛl wi̱cdɛ jiɛɛn da̱ŋ diɔ̱k.

⁴¹ Cu ti̱ti̱ a pek gan Ger-con tëë ci lät rɛy kɛmɛkä ro̱mä kä ca kuɛn ɛ Muthɛ kɛnɛ Ä-ron ce̱tnikɛ mëë ci Kuoth Nhial ɛ la̱r kɛ.

⁴² Cu thok duëël gan Mɛ-ra-ri tin ca kuɛn kɛ dho̱r gua̱ni,

⁴³ a känɛ ni kä run ti jiɛɛn diɔ̱k a wä ni kä run ti jiɛɛn dhieec kɛn tin diaal tin lät rɛy kɛmɛkä ro̱mä.

⁴⁴ Kä cu pekdiɛn kɛ dho̱rkiɛn a nɛy ti bathdɔɔri diɔ̱k wi̱cdɛ kur rɛw.

⁴⁵ Cu ti̱ti̱ a kuay Mɛ-ra-ri tin ca kuɛn kɛ dho̱rkiɛn ɛ Muthɛ kɛnɛ Ä-ron ce̱tkɛ mëë ci Kuoth Nhial ɛ la̱r Muthɛ.

⁴⁶ Cu tin diaal tëë ca kuɛn ɛ Muthɛ kɛnɛ Ä-ron kɛ bööth I-thɛ-rɛl nikɛ dho̱r gua̱ni kä ji̱ Lii-bay.

⁴⁷ Cuɛ ka̱n ni kä tin run ti jiɛɛn diɔ̱k a wä kä run ti jiɛɛn dhieec tin lua̱ŋkɛ la̱t rɛy kɛmɛkä ro̱mä,

⁴⁸ cukɛ a nɛy ti bathdɔɔri bädäk wi̱cdɛ kur dhieec wi̱cdɛ jiɛɛn bädäk.

⁴⁹ Nikɛ ruac ëë ci Kuoth Nhial ɛ la̱r Muthɛ, cukɛ ramɔ nyuɔ̱th la̱tdɛ kiɛ min bɛ kap. Cukɛ a kɛn tin ca kuɛn ce̱tkɛ mëë ci Kuoth Nhial ɛ la̱r Muthɛ.