Kuen 35 - RUAC KUƆTH IN RƐL RƆ

Wi̱i̱ ji̱ Lii-bay

¹ Kä cu Kuoth Nhial ruac kɛ Muthɛ rɛy tɔ̱ɔ̱rä Mo-ab kui̱ yiëër Jɔr-dɛn kä Jɛ-ri-ko i̱,

² “Jio̱kni ji̱ I-thɛ-rɛl akɛ muɔckɛ ji̱ Lii-bay kä wi̱i̱kiɛn tɔ̱ bikɛn kɛ wä ciɛŋ tɔ̱ wi̱i̱ ti bikɛ cieŋ thi̱n. Kä bia kɛ moc gua̱th la̱k ɣɔ̱ɔ̱k gekä wec.

³ Bi ka wi̱i̱ ti bi kɛn kɛ ciɛŋ kɛnɛ gua̱th la̱k ɣɔ̱ɔ̱kiɛn kɛnɛ leykiɛn diaal.

⁴ Kä ɛn mun la̱k ɣɔ̱ɔ̱k in bia ka̱m ji̱ Lii-bay ɔ a känɛ jɛ ni puɔ̱ɔ̱ny wec ba jua̱th tetni ti bathdɔɔr kɛɛliw a wi̱i̱nɛ.

⁵ Kä a tɛmɛ jɛ raar wec kui̱c käny ca̱ŋ ala jua̱th tetni ti bathdɔɔri rɛw, kä kui̱c cuëëc ala bathdɔɔri rɛw, Kä kui̱c konyä ca̱ŋ ala bathdɔɔri rɛw, kä kui̱c caam ala bathdɔɔri rɛw, bi wec ku lɛ te däär. Ba gua̱th la̱k ɣɔ̱ɔ̱k wecdiɛn.

⁶ Kɛn wi̱i̱ bäkɛl tɔ̱ bi ka̱m ji̱ Lii-bay tɔ̱, bi ka kɛn wi̱i̱ luäkä, tin bi ram mi ci raan näk rɔ la̱ny thi̱n. Kä repkɛ kɛ wi̱i̱ ti jiɛɛn ŋuaan wi̱cdɛ rɛw ti kɔ̱ŋ.

⁷ Bi wi̱i̱ diaal tin bi ka̱m ji̱ Lii-bay a wi̱i̱ ti jiɛɛn ŋuaan wi̱cdɛ bädäk kɛɛl kɛ gua̱th la̱k ɣɔ̱ɔ̱k.

⁸ Kä kɛn wi̱i̱ tin bi thöp kä wi̱i̱ ji̱ I-thɛ-rɛl, bi wi̱i̱ ti ŋuan ka̱n thok duëël mi di̱i̱t, kä bi wi̱i̱ ti tɔt ka̱n thok duëël mi tɔt. Bakɛ ka̱n kä thok duëëlɔ.”

Wi̱i̱ luäkä

⁹ Kä cu Kuoth Nhial Muthɛ jiök i̱,

¹⁰ “Läri jɛ ji̱ I-thɛ-rɛl, mi wä yɛn yier Jɔr-dɛn jiɛth wiaa muun Kɛ-naan,

¹¹ ba rɔ lieny wi̱i̱ ti bia̱ wi̱i̱ luäkä kɛ kui̱dun. Kɛ ɣöö dëë ram mi ci raan näk kɛ guäc rɔ bar thi̱n.

¹² Bi ka wi̱i̱ luäkädun kä gua̱n tɛ̈r, kɛ ɣöö ci ram in ci raan näk dëë li̱w amäni mi cɛ ben nhiam dolä kɛ luk.

¹³ Kɛn wi̱i̱ tɔ̱ bi thöp tɔ̱ bi ka wi̱i̱ luäkädun da̱ŋ bäkɛl.

¹⁴ Bi wi̱i̱ diɔ̱k ŋun kui̱ yiëër Jɔr-dɛn, kä bi wi̱i̱ diɔ̱k tin kɔ̱ŋ te muun Kɛ-naan ala wi̱i̱ luäkä.

¹⁵ Kɛn wi̱c bäkɛl tɔ̱tɔ̱ bi ka wi̱i̱ luäkä ji̱ I-thɛ-rɛl, kɛ ram mi jääl kɛ ram in cieŋ rɛydiɛn, kɛ ɣöö bi ram mi näk raan kɛ guäc rɔ la̱ny thi̱n.

¹⁶ “Duundɛ ɣöö mi wä raan raan wä yɔ̱t kɛ yiëëth a bɛ li̱w, näkɛ ni jɛ. Ba ram in näk raan näk.

¹⁷ Kɛnɛ mi te ni tetdɛ kɛ päm mi dëë raan näk, kä cɛ raan näk, näkɛ ni jɛ. Ba ram in ci raan näk näk.

¹⁸ Kä mi yɔ̱tdɛ ni jɛ kɛ kɛɛt, kä ci raan li̱w, cɛ näk. Bä ram in näk raan näk.

¹⁹ Bi ram in col raan, ram in näk raandɛ näk, mi cikɛ röm.

²⁰ Kä mi wä raan raan wä ɔak Kä duɔ̱ɔ̱r kiɛ bɛ jɛ bo̱k a bɛ li̱w,

²¹ kiɛ cɛ jɛ yɔ̱t kɛ ɣöö tekɛ kɛ tɛr a cɛ li̱w, ɛn ramɔ yɔ̱ɔ̱t raanɔ ba näk. Cɛ raan näk. Bi ram in col raan ɛ näk mi cikɛ röm.

²² “Duundɛ ɣöö mi cɛ jɛ ɣɔk a /cɛ lot ni jɛ, kiɛ cɛ jɛ pi̱m a kui̱cɛ,

²³ kiɛ cɛ bo̱k kɛ guäc a /kenɛ jɛ nɛn, kä cɛ li̱w, kä thilɛ kɛ tɛr.

²⁴ Inɔ bi duɔl kam raam in ci raan näk kɛnɛ ram in cool jɛ luk kɛ ŋuɔ̱t ti̱ti̱.

²⁵ Bi duɔl ram in ci raan näk gaŋ kä ram in dëë jɛ col, kä bɛ jɛ luɔc wi̱c luäkä min cɛ rɔ la̱ny thi̱n. Bɛ tëë wi̱ni amäni lia̱a̱ bo̱o̱thä palä min di̱i̱t ëë ca yi̱r kɛ liɛɛth mi rɛl rɔ.

²⁶ Duundɛ ɣöö mi wä ram in ci raan näk key wec luäkä min cɛ rɔ lua̱k thi̱n wä bäl.

²⁷ Kä bi gua̱n tɛ̈r ɛ jek kui̱ këth wec luäkä min cɛ rɔ la̱ny thi̱n, kä cɛ jɛ näk, cɛ bi tekɛ duer kɛ riɛmdɛ.

²⁸ Kɛ ɣöö ɛn ram in ci ran näk bɛ te rɛy wec luäkä amäni mi ci bo̱o̱th palä min di̱i̱t li̱w. Duundɛ ɣöö kɛ kɔr li̱eth bo̱o̱thä palä min di̱i̱t, bi ram in ci raan näk loc wi̱i̱dɛ min ciɛŋɛ.

²⁹ “Kä kɛn ti̱ti̱ bi ka ŋuɔ̱t kä ri̱ckun gua̱th cieŋnikun diaal.

³⁰ Kä ram ɔ bi raan näk ɔ ba näk kɛ nën nath. Kä /ca raan bi näk kɛ nën raam kɛl.

³¹ Kä cu kök nhɔk kɛ kui̱ teekä raam mi ci raan näk. Ba jɛ dhil näk.

³² Kä cu kök nhɔk kä ram mi ci rɔ bar wi̱c luäkä, kɛ ɣöö bɛ ben cieŋ wi̱c ɛ /ken bo̱o̱th palä min di̱i̱t ni li̱w.

³³ Kä /cuarɛ mun in cieŋ yɛn thi̱n yär. Kɛ ɣöö riɛm yärɛ mun, kä thilɛ mi dëë mun luɛl kä riɛm in ca wuɔ̱th thi̱n, ɛ ni mi ɛ riɛm raam min wuth riɛm thi̱n.

³⁴ /Cu mun in ciɛŋi yär, gua̱th in cieŋä thi̱n. Kɛ ɣöö ɣän Kuoth Nhial cieŋä rɛy ji̱ I-thɛ-rɛl.”