Kuen 34 - RUAC KUƆTH IN RƐL RƆ

Këth muɔ̱ɔ̱n Kɛ-naan

¹ Kä cu Kuoth Nhial Muthɛ jiök i̱,

² “Ruacni kɛ ji̱ I-thɛ-rɛl läri jɛ kɛ, mi wä yɛn coth muun Kɛ-naan (ɛ jɛn mun in bia ciɛŋ, ɛn mun Kɛ-naan kɛɛliwdɛ).

³ Kä bɛ kui̱c cuëëcdun ka̱n ni rɛy dɔaar Dhin a wä ni gekä Ɛ-dɔm, kä bi keydɛ a pek Bar Gutdä kui̱ käny ca̱ŋ.

⁴ Kä bɛ rɔ riet cuëëc Ak-ra-bim a wä guut ni kui̱ Dhin, kä bi pekdɛ wa̱a̱ ni Ka-dɛc-bar-ni-ya. Kä bɛ räth ni kä Ɣä-dhar-a-dar a pal ni kä Adh-mon.

⁵ Kä bɛ lɛ jiɛɛn kä Adh-mon bɛ wä rɛy tɔ̱ɔ̱rä I-jëp, kä bɛ wä guut ni Bar in Bo̱r min te kam wi̱i̱ni.

⁶ “Kä bi key kuec konyä ca̱ŋ a Bar in Bo̱r min te kam wi̱i̱ni.

⁷ “Kä bɛ keydu kui̱c caam ka̱n ni Bar in Bo̱r in te kam wi̱i̱ni a wee yiath ni Pääm Ɣor.

⁸ Kä bɛ lɛ ka̱n pääm Ɣor bɛ wä yiath ni dup Ä-math, bɛ wä guut ni kä Dhɛ-dad.

⁹ Kä bɛ wä amäni Dhip-ron, kä bi pekdɛ wa̱a̱ni Ɣä-dhar-e-nan. Nɔmɔ ba jɛn pek këthdu kui̱c caam.

¹⁰ “Kä bɛ keydu kui̱c känyä ca̱ŋ ka̱n kä Ɣä-dhar-e-nan a wä kä Cɛ-pam.

¹¹ Kä bɛ lɛ ka̱n kä Cɛ-pam a wä piny kä Rib-laa kui̱c käny ca̱ŋ A-yin. Kä bɛ räth ni kiir Ki-nɛ-rɛth kui̱ käny ca̱ŋ.

¹² Kä bɛ wä ni piny kä Jɔr-dɛn, kä bi pekdɛ wa̱a̱ ni Bar Gutdä. Ɛn nɔmɔ ba jɛn mundu kɛɛliw nikɛ këth kɛ.”

¹³ Kä cu Muthɛ ruac kɛ ji̱ I-thɛ-rɛl wee i̱, “Nɛmɛ ɛ jɛn mun in bia da̱a̱k kɛ yor gaakni, min ci Kuoth Nhial ɛ ka̱m thuk duëli da̱ŋ bäŋuan kɛ tha̱a̱ŋ thuɔk duëël Ma-na-thɛ.

¹⁴ Kɛ ɣöö ci thok duëël gan Rɛ-u-ben kɛ dho̱r gua̱n kɛnɛ thok duëël gan Gad kɛ dho̱r gua̱ni kɛ tha̱a̱ŋ thuɔk duëël gan Ma-na-thɛ kɛnɛ dho̱r gua̱ni pekdiɛn ka̱n.

¹⁵ Ci thuk duëli da̱ŋ rɛw kɛ tha̱a̱ŋ thuɔk duëël pekdiɛn ka̱n kui̱ yiëër Jɔr-dɛn kä Jɛ-ri-ko kui̱ käny ca̱ŋ.”

Bööth tin ba mun da̱a̱k

¹⁶ Kä cu Kuoth Nhial Muthɛ jiök i̱,

¹⁷ “Ti̱ti̱ kɛ nɛy tin ba ji̱ dääk kä mun in ba ciɛŋ. Bo̱o̱th palä ni Ɛl-a-dhar kɛnɛ Jɔ-cua gat Nun.

¹⁸ Kä bi bööth ram kɛl ka̱n thok duëël ɔ kɛ ɣöö ba mun in ba ciɛŋ da̱a̱k.

¹⁹ Kä ti̱ti̱ kɛ ciöötkiɛn Ka-leb gat Yɛ-pö-nɛ thok duëël Juda.

²⁰ Thok duëël gan Cim-on cua Cɛ-mu-el gat A-mi-ɣud.

²¹ Kɛ Ɛli-dad gat Kith-lon thok duëël Ben-ya-min.

²² Kɛ Buki gat Yɔg-li bo̱o̱th thuɔk duëël Gad.

²³ Kɛ Ɣa-ni-el gat E-pod, bo̱o̱th thuɔk duëël Ma-na-thɛ gat Jo-thɛp.

²⁴ Kɛ Kɛ-mu-ɛl gat Cip-tam bo̱o̱th thuɔk duëël Ɛ-pa-rim.

²⁵ Kɛ Ɛli-dha-pan gat Par-nak bo̱o̱th thuɔk duëël Dhɛ-bu-lun.

²⁶ Kɛ Pɛ̈l-ti-el gat A-dhan bo̱o̱th thuɔk duëël Yi-tha-kar.

²⁷ Kɛ Ä-ɣi-ɣud gat Cɛ-lo-mi bo̱o̱th thuɔk duëël A-cɛr.

²⁸ Kɛ Pɛ-da-el gat A-mi-ɣud, bo̱o̱th thuɔk duëël Nap-ta-li.

²⁹ Cu tɔ̱tɔ̱ a nɛy tin ci Kuoth Nhial kɛ la̱r ɣöö ba mun Kɛ-naan dääk kä ji̱ I-thɛ-rɛl ala duŋdiɛn.”