Kuen 32 - RUAC KUƆTH IN RƐL RƆ

Thuk duëli tin cieŋ kui̱ yiëër Jɔr-dɛn

¹ Kä täämɛ cu gaat Rɛ-u-ben kɛnɛ gaat Gad tekɛ ɣɔ̱k ti ŋuan. Kä cukɛ mun Ya-dhɛr kɛnɛ mun Gil-yad nɛn ɛ mun la̱k ɣɔ̱ɔ̱k.

² Kä cukɛ ben kä Muthɛ kɛnɛ Ɛl-a-dhar bo̱o̱th palä kɛ bööth dolä ji̱ I-thɛ-rɛl jiök i̱,

³ “Ä-ta-roth, kɛ Di-bon, kɛ Ya-dhɛr, kɛ Nim-raa kɛ Ɛc-bon, kɛ Ɛl-a-le, kɛ Thɛ-bam, kɛ Nɛbo, kɛnɛ Be-on,

⁴ mun ëë ci Kuoth Nhial ji̱kɛ jak kä na̱kɛ ɛ ji̱ I-thɛ-rɛl, ɛ mun la̱k ɣɔ̱ɔ̱k. Kä te nɛy kɛ ɣɔ̱k.”

⁵ Kä cu kɛ wee i̱, “Mi nhɔki jɛ, käm ni nɛy mun ɛ mɔ ba̱kɔ ciɛŋ. /Cuarɛ kɔ lɛ naŋ kui̱ yiëër Jɔr-dɛn.”

⁶ Kä cu Muthɛ gaat Rɛ-u-ben kɛnɛ gaat Gad jiök i̱, “Bi gaatmuɔɔri wä ko̱o̱r kä ku yɛn lɛ te nyuurä wa̱nɛ mi?

⁷ Ɛŋu bi yɛn lo̱c ji̱ I-thɛ-rɛl jak kä jiäk ɔ kɛ wä muun in ci Kuoth Nhial ɛ ka̱m kɛ?

⁸ Ɛ jɛn mëë ci guurikun ɛ la̱t mëë cä kɛ jäk kä Ka-dɛc-bar-ni-ya wa mun guic.

⁹ Kä mëë ca mun nɛn kä Ɛc-kol cua lo̱c ji̱ I-thɛ-rɛl jak kä jiäk kɛ wä muun in ci Kuoth Nhial ɛ ka̱mkɛ.

¹⁰ Kä cu Kuoth Nhial kɛ̈c ɛn cäŋ ɛmɔ, kä cuɛ rɔ yac wee i̱,

¹¹ ‘Ɛ puc thilɛ ram mi bi mun nɛn kä nɛy tëë bä raar kä I-jëp a känɛ kä nɛy tin te run ti jiɛɛn da̱ŋ rɛw a wä nhial, mun ëë cä yac i̱ bä ka̱m Ab-ram kɛnɛ Ay-dhɛk kɛ Je-kɔb, kɛ ɣöö /ken kɛn ɣä guɔ̱ɔ̱r kɛ lɔcdiɛn kɛɛliw.

¹² Ɛ ni Ka-leb gat Yɛ-pö-nɛ raan Kɛ-nadh kɛnɛ Jɔ-cua gat Nun, kɛ ɣöö ca Kuoth Nhial guɔ̱ɔ̱r kɛ lɔcdiɛn kɛɛliw.’

¹³ Kä cu kɛ̈c Kuɔth Nhial ben kä ji̱ I-thɛ-rɛl, kä cuɛ kɛ jak kä yi̱c rɛy dɔaar kɛ run ti jiɛɛn ŋuaan, amäni mëë ci ri̱c ëë lät jiäk waaŋ Kuɔth Nhial thuɔ̱k.

¹⁴ Kä yɛn täämɛ cia gua̱th guuri ka̱n, yɛn ri̱c mi ji̱ dueeri, jak yɛn waŋ lɔaac Kuɔth Nhial kɛ ɣöö bɛ rɔ nyɔk kɛ ben kä I-thɛ-rɛl!

¹⁵ Mi wä yɛn rɔ ri̱t kɔɔrɛ, bɛ nɛy ti̱ti̱ nyɔk kɛ päl däärdɔaar. A bi yɛn kɛ jak kä duɔ̱p kɛn diaal.”

¹⁶ Kä cukɛ ben thieekä Muthɛ kä cukɛ wee i̱, “Ba̱kɔ detkɔ lät kä lueek ɛn wa̱nɛ kä ba̱kɔ gaatkɔ lät kä ti̱ec.

¹⁷ Kä ba̱kɔ wä ko̱o̱r kɛɛl kɛ ji̱ I-thɛ-rɛl, amäni mi ca̱kɔ kɛ naŋ guäthdiɛn. Mi wä gaatkɔ te rɛy ti̱ecni ti buɔ̱m buɔ̱ɔ̱m kɛ kui̱ nɛɛni tin ciaŋ kɛ mun.

¹⁸ Kä /ca̱kɔ rɔ bi ri̱t amäni mi ci ji̱ I-thɛ-rɛl gua̱thkiɛn ka̱n.

¹⁹ Kɛ ɣöö /ca̱kɔ bi wä cieŋ kɛɛl kɛ kɛ kui̱ yiëër Jɔr-dɛn a wä nhiam. Kɛ gua̱a̱thda ni kui̱ yiëër Jɔr-dɛn kui̱c käny ca̱ŋ.”

²⁰ Kä cu Muthɛ kɛ jiök i̱, “Mi bia nɛmɛ la̱t, a bia wä ko̱o̱r nhiam Kuɔth Nhial,

²¹ a bi wutni köörun diaal wä kui̱ yiëër Jɔr-dɛn nhiam Kuɔth Nhial, amäni mi cɛ ji̱ tɛ̈rɛ joc nhiamdɛ.

²² Kä cia mun ka̱n nhiamdɛ. Kɛ kɔrɛ bia rɔ cu ri̱t, kä bia cu thil riɛk kä Kuoth Nhial kɛnɛ ji̱ I-thɛ-rɛl. Kä bi mun ɛ mi a duŋ duŋdun nhiam Kuɔth Nhial.

²³ Kä mi /cia nɛmɛ bi la̱t, ŋa̱cɛ jɛ i̱, cia duer lät kä Kuoth Nhial. Kä ŋa̱cɛ jɛ bi duerun yɛ jek.

²⁴ Ta̱thɛ gaatkun ti̱ec kä la̱tdɛ detkun kä lueek. Kä la̱tdɛ min cia lar.”

²⁵ Kä cu gaat Rɛ-u-ben kɛnɛ gaat Gad Muthɛ jiök i̱, “Bakɔ la̱t ce̱tnikɛ min ci lar.

²⁶ Bi gaatkɔ, kɛ mänkɔ, kɛ detkɔ, nikɛ ɣɔ̱ɔ̱kɔ diaal duɔth wi̱i̱ni Gil-yad.

²⁷ Kä kɔn wutni ko̱o̱r diaal ba̱kɔ wä ko̱o̱r kui̱ yiëër Jɔr-dɛn nhiam Kuɔth Nhial ce̱tnikɛ min ci lar.”

²⁸ Kä cu Muthɛ ruac kɛ Ɛl-a-dhar bo̱o̱th palä kɛnɛ Jɔ-cua gat Nun kɛ bööth thuk duëli ji̱ I-thɛ-rɛl.

²⁹ Kä cu Muthɛ kɛ jiök i̱, “Mi wä gaat Gad kɛnɛ gaat Rɛ-u-ben wutni ko̱o̱r wä ko̱o̱r nhiam Kuɔth Nhial kui̱ yiëër Jɔr-dɛn a bia mun ka̱n, bia kɛ ka̱m mun Gil-yad ba ciɛŋ ɛ kɛn.

³⁰ Duundɛ ɣöö mi /kenkɛ wä kui̱ yiëër Jɔr-dɛn kɛɛl kɛ yɛ, bikɛ cieŋ rɛydun muun Kɛ-naan.”

³¹ Kä cu gaat Rɛ-u-ben kɛnɛ gaat Gad jɛ loc i̱, “Ce̱tkɛ min ci Kuoth Nhial ɛ lar ba̱kɔ la̱t.

³² Ba̱kɔ wä ko̱o̱r Nhiam Kuɔth Nhial Muun Kɛ-naan, bi gua̱th ciɛŋäda te kui̱ yiëër Jɔr-dɛn.”

³³ Kä cu Muthɛ gaat Rɛ-u-ben kɛnɛ gaat Gad kɛ tha̱a̱ŋ thuɔk duëël Ma-na-thɛ gat Jo-thɛp ka̱m wec Thi-yon kuäär ji̱ Ɛ-mor, kɛ wec Ög kuäär Ba-can, mun kɛ wi̱i̱kɛ diaal.

³⁴ Kä cu gaat Gad Di-bon, kɛnɛ Ä-ta-roth kɛ Ä-ro-er,

³⁵ Kɛ At-rot-co-pan, kɛnɛ Ya-dhɛr, kɛ Yɔg-baa,

³⁶ kɛ Beth-nim-ra, kɛnɛ Bet-ɣa-ran täth, wi̱i̱ ti buɔ̱m buɔ̱ɔ̱m kɛ lueek deet.

³⁷ Kä cu gaat Rɛ-u-ben Ɛc-bon, kɛnɛ Ɛl-a-le, kɛ Kir-ya-tha-yim,

³⁸ kɛ Nɛbo, kɛnɛ Baal-me-on (tin ba ciöötkiɛn tit) kɛ Thi-bɛ-ma täth kä cu kɛ kɛ moc ciööt.

³⁹ Kä cu gaat Ma-kir gat Ma-na-thɛ Gil-yad wä ka̱n kä ji̱ Ɛ-mor tëë cieŋ thi̱n.

⁴⁰ Kä cu Muthɛ jɛ ka̱m jɛ kä cuɛ cieŋ thi̱n.

⁴¹ Kä cu Ya-ir gat Ma-na-thɛ wi̱i̱kɛ wä ka̱n, kä cuɛ kɛ cɔl i̱ Ɣa-woth-ya-ir.

⁴² Kä cu No-bɛ̈k Kɛ-nat kɛnɛ wi̱i̱kɛ ka̱n, kä cuɛ kɛ cɔl kɛ ciötdɛ i̱, No-bɛ̈k.