Kuen 3 - RUAC KUƆTH IN RƐL RƆ

Kuën kɛnɛ lät ji̱ Lii-bay

¹ Ti̱ti̱ kɛ kuay Ä-ron kɛnɛ Muthɛ guäth ëë ci Kuoth Nhial ruac kɛ Muthɛ pääm Thi-nay.

² Ti̱ti̱ kɛ ciööt gan Ä-ron Na-dab gatdɛ min kɛ̈ɛ̈ kɛ Ä-bi-ɣu, kɛ, Ɛl-a-dhar kɛnɛ I-ta-mar,

³ kɛ kɛn gaat Ä-ron tin la bööth palä.

⁴ Duundɛ ɣöö Na-dab kɛnɛ Ä-bi-ɣu cikɛ li̱w nhiam Kuɔth Nhial mëë cikɛ wäl in kɔp mi /ka̱n la̱r kɛ thöp nhiam Kuɔth däärdɔaar Thi-nay, kä thilɛ kɛ gaat. Ɛ ni ɣöö ci Ɛl-a-dhar kɛnɛ I-ta-mar lät ala bööth palä kɛ ni̱n teekä Ä-ron gua̱ndiɛn.

Kuen ji̱ Lii-bay kɛ ɣöö ba bööth palä lätikä

⁵ Kä cu Kuoth Nhial Muthɛ jiök i̱,

⁶ “No̱o̱ŋni thok duëël Lii-bay thiekä, läthnikɛ nhiam Ä-ron bo̱o̱th palä, kɛ ɣöö bikɛ jɛ lät ikä.

⁷ Bikɛ jɛ lät kä lät amäni duɔl kɛɛliw nhiam kɛmɛkä ro̱mä ce̱tkɛ lätkiɛn rɛy luaak.

⁸ Bikɛ kuak kɛmɛkä diaal la̱t, kä bikɛ ji̱ I-thɛ-rɛl lät ikä ce̱tkɛ min lät kɛn rɛy luaak.

⁹ Käm ni ji̱ Lii-bay Ä-ron kɛnɛ gaatkɛ, kɛ ɣöö kɛ muc ti ba ka̱m ɣä ti rɛ̈l kɛ rɔ̱ rɛy ji̱ I-thɛ-rɛl.

¹⁰ Kä kuany Ä-ron kɛnɛ gaatkɛ, kɛ ɣöö ba lät bööthni la̱t. Duundɛ ni ɣöö mi wä radɔ̱diɛn ben thiekä, ba jɛ näk.”

¹¹ Kä cu Kuoth Nhial Muthɛ jiök i̱,

¹² “Nɛn ɛ, ɣän ka̱nä ji̱ Lii-bay rɛy ji̱ I-thɛ-rɛl kɛ gua̱a̱th keyni tin dapkɛ kɛ nhiam rɛy ji̱ I-thɛ-rɛl. Ji̱ Lii-bay bi ka nyinkä,

¹³ kɛ ɣöö key diaal kɛ nyinkä, cäŋ ëë na̱kä ni key rööl I-jëp, cua rɔ lëy key ji̱ I-thɛ-rɛl diaal, ke̱y nath kɛnɛ le̱yni kɛ nyinkä. Ɛ ɣän Kuoth Nhial.”

¹⁴ Kä cu Kuoth Nhial ruac kɛ Muthɛ rɛy dɔaar kä Thi-nay i̱,

¹⁵ “Kuɛn gaat Lii-bay, kɛ gua̱nikiɛn kɛ dho̱rkiɛn. Kɛn tut diaal tin runkiɛn ni kä pay kɛl a wä nhial gɔ̱rkɛ.”

¹⁶ Cu Muthɛ jɛ la̱t ce̱tnikɛ ruac Kuɔth Nhial, ce̱tnikɛ min ca la̱r jɛ.

¹⁷ Ti̱ti̱ cukɛ a kɛn gaat Lii-bay kɛ ciöötkiɛn, Ger-con kɛnɛ Kɛ-ɣath kɛ Mɛ-ra-ri.

¹⁸ Kä cu ti̱ti̱ a ciööt gan Ger-con kɛ dho̱rkiɛn, Lib-ni kɛnɛ Cimi.

¹⁹ Kä gaat Kɛ-ɣath kɛ dho̱rkiɛn cua Am-ram kɛnɛ Yidh-ɣar kɛ Ɣɛb-ron kɛnɛ U-dhi-el.

²⁰ Kä ti̱ti̱ kɛ gaat Mɛ-ra-ri kɛ dho̱rkiɛn. Mali kɛnɛ Muci, ti̱ti̱ kɛ kɛn dho̱r ji̱ Lii-bay kɛ thuk duëli gua̱nikiɛn.

²¹ Cu Ger-con tekɛ ji̱ Lib-ni kɛnɛ ji̱ Cimi, cukɛ cua ji̱ dhɔaar Ger-con.

²² Kä cu pekdiɛn kɛn wutni a känɛ ni kä pay kɛl a wä nhial a nɛy ti bathdɔɔri bärɔw wi̱cdɛ kur da̱ŋ dhieec.

²³ Ɛn thok duëël Ger-con la puɔ̱t kɛ jɔk kɛmɛkä kui̱ käny ca̱ŋ.

²⁴ Kɛ Ɛl-ya-thap gat La-el min la wut gɔaal ji̱ Ger-con,

²⁵ min la bo̱o̱th gan Ger-con thok kɛmɛkä ro̱mä, ɛn kɛmɛkä kɛnɛ kumdɛ, kɛ bi̱i̱ thuɔkdɛ,

²⁶ kɛ ŋääpni geelä, kɛ bi̱i̱ thuɔk geelä min wil kɛmɛkä kɛnɛ yi̱k kɛ depkɛ, kɛ kuak diaal tin papkɛ jɛ ɛ la̱tdiɛn.

²⁷ Kuay Kɛ-ɣath cukɛ a Am-ram kɛnɛ Yidh-ɣar kɛ Ɣɛb-ron kɛ U-dhi-el, kɛ kɛn kuay Kɛ-ɣath.

²⁸ Cu pek wutnikiɛn a känɛ ni kä pay kɛl a wä nhial a nɛy ti bathdɔɔri bädäk wi̱cdɛ kur bäkɛl tin lät luak Kuɔth.

²⁹ Kɛn kuay Kɛ-ɣath la puɔ̱tkɛ cuëëc kɛmɛkä.

³⁰ Kä cu bo̱o̱th kuayni gan Kɛ-ɣath a Ɛli-dha-pan.

³¹ Kä cu la̱tdiɛn a thanduk matdä ruac, kɛnɛ kɔm mi̱thni, kɛ cuuŋ lɛmbärä, kɛ yi̱k kɛ kuak kɛmɛkä diaal tin la bo̱o̱th palä kɛ a lät, kɛ geel. Kɛ kuak diaal tin la la̱t kɛ ni tɔ̱tɔ̱.

³² Kä kuay Ɛl-a-dhar gat Ä-ron bo̱o̱th palä, ba kuäär bööthni ji̱ Lii-bay, kä bɛ nɛy tin tekɛ lät rɛy kɛmɛkä guic.

³³ Kä kuay Mɛ-ra-ri cukɛ a ji̱ Mali, kɛnɛ Muci, cua kɛn dho̱r Mɛ-ra-ri.

³⁴ Cu pekdiɛn nikɛ pek wutni a känɛ ni kä pay kɛl a wä nhial a nɛy ti bathdɔɔri bäkɛl wi̱cdɛ kur rɛw.

³⁵ Kä cu bo̱o̱th dhɔaar Mɛ-ra-ri a Dhu-ri-el gat Ä-bi-ɣa-yil, la puɔ̱tkɛ kui̱c caam kɛmɛkä.

³⁶ Kä cu la̱tdiɛn in ca kuënykɛ a kuak rɛy kɛmɛkä thääk, ri̱i̱wni, cuɔ̱ɔ̱k kɛ kuakiɛn, kɛ tin diaal tin la̱t kɛ kɛ.

³⁷ Kɛ jiɛɛn kal tin gölkɛ jɛ kɛ depkɛ kɛn löckɛ.

³⁸ Kä la puɔ̱t kɛn Nhiam kɛmɛkä kui̱c käny ca̱ŋ, kä Muthɛ kɛnɛ Ä-ron kɛnɛ gaatkɛ la̱tdiɛn ni la̱t rɛy kɛmɛkä kɛ kui̱ nath. Kä ram mi wä rɔ thieek kɛ kɛmɛkä ba näk.

³⁹ Kɛn diaal tin ca kuɛn kä ji̱ Lii-bay ɛ Muthɛ kɛnɛ Ä-ron kɛ ruac Kuɔth Nhial, kɛ dho̱rkiɛn, kɛn wutni diaal a känɛ ni kä pay kɛl a wä nhial, cukɛ a bathdɔɔri ti jiɛɛn rɛw wi̱cdɛ rɛw a juc.

Guäl ji̱ Lii-bay kɛ gua̱th gan tin ke̱y

⁴⁰ Kä cu Kuoth Nhial Muthɛ jiök i̱, “Kuɛn ke̱y diaal tin dhɔɔl kä gaat I-thɛ-rɛl, a känɛ ni kä pay kɛl a wä nhial kuɛn kɛ ni ciöötni.

⁴¹ Kä bi ɣä ka̱m ji̱ Lii-bay, kɛ gua̱a̱th keyni gan I-thɛ-rɛl diaal, kä bi ɣä ka̱m key ɣɔ̱ɔ̱k ji̱ Lii-bay kɛ gua̱a̱th keyni ɣɔ̱ɔ̱k ji̱ I-thɛ-rɛl ɛ ɣän Kuoth Nhial.”

⁴² Ɛ jɛn cu Muthɛ key gan I-thɛ-rɛl diaal kuɛn ce̱tkɛ min ci Kuoth Nhial ɛ la̱rɛ.

⁴³ Kɛnɛ tut tin la key nikɛ ciöötkiɛn, a känɛ ni kä tin tekɛ pay kɛl a wä nhial, cukɛ a bathdɔɔri ti Jiɛɛn da̱ŋ rɛw wi̱cdɛ rɛw wi̱cdɛ kur rɛw wi̱cdɛ jiɛɛn bärɔw wi̱cdɛ diɔ̱k.

⁴⁴ Cu Kuoth Nhial Muthɛ jiök i̱,

⁴⁵ “Käni ji̱ Lii-bay rɛy ji̱ I-thɛ-rɛl kɛ gua̱a̱th keyni gan I-thɛ-rɛl diaal kɛnɛ ɣɔ̱ɔ̱kiɛn kɛ gua̱a̱th ɣɔ̱ɔ̱k ji̱ I-thɛ-rɛl, kä ji̱ Lii-bay bi ka nyinkä. Ɛ ɣän Kuoth Nhial.

⁴⁶ Kä kɛ kui̱ luël keyni gan I-thɛ-rɛl ti kur rɛw wi̱cdɛ Jiɛɛn bärɔw wi̱cdɛ diɔ̱k tin te wi̱i̱ gan ji̱ Lii-bay tin wutni,

⁴⁷ bi yio̱w da̱ŋ dhieec ka̱n ti ce̱tkɛ yio̱w luak Kuɔth, yio̱w ti jiɛɛn rɛw.

⁴⁸ Kä bi yio̱w tɔ̱tɔ̱ tin luɛ̈lkɛ ni gaat ka̱m Ä-ron kɛnɛ gaatkɛ.”

⁴⁹ Cu Muthɛ yio̱w luël ka̱n kä nɛy tin cieŋ wi̱i̱ni ji̱ Lii-bay.

⁵⁰ Kä key gan I-thɛ-rɛl cuɛ yio̱w ka̱n ti bathdɔɔr kɛl wi̱cdɛ kur diɔ̱k wi̱cdɛ jiɛɛn bäkɛl wi̱cdɛ dhieec ti päär kɛ yio̱w luaak Kuɔth.

⁵¹ Cu Muthɛ yio̱w luël ka̱m Ä-ron kɛnɛ gaatkɛ ce̱tnikɛ min ci Kuoth Nhial ɛ la̱r jɛ.