Kuen 28 - RUAC KUƆTH IN RƐL RƆ

Muc ciɛŋä tin wen

¹ Kä cu Kuoth Nhial Muthɛ jiök i̱,

² “Läri jɛ ji̱ I-thɛ-rɛl i̱, ‘Mucdä, muc mi̱ethdä min waŋkɛ, min tɛɛth lɔcdä, bia jɛ thöp ɣä kɛ gua̱thdɛ.’

³ Kä biɛ la̱r kɛ bä, nɛmɛ ɛ jɛn muc in thöpkɛ kɛ mac min bia thöp Kuoth Nhial, rueeth rɔɔmni da̱ŋ rɛw ti gur kɛli kä thil diw, ala ti waŋkɛ, muc ciɛŋä tin wen bakɛ thöp ciaŋ.

⁴ Bi ruath rɔɔmä kɛl thöp kɛ runwaŋ, kä bi min dɔ̱ŋ thöp kɛ thiaŋ.

⁵ Kä biɛ thöp kɛɛl kɛ wäl lieeri nuɔ̱p mi ca lia̱a̱p kɛ liɛɛth.

⁶ Ɛ mi ba thöpkɛ ciaŋ, ce̱tkɛ mëë ca kɔn thöp pääm Thi-nay, ala ŋuäny mi gɔaa, mi thöp kɛ Kuoth Nhial kɛ mac.

⁷ Kä bi ruath rɔɔmä min dɔ̱ŋ thöp kɛ thiaŋ. Kä ce̱tnikɛ muc bɛɛl ruɔ̱nwaaŋ, kɛ kɔaŋdɛ, bikɛ thöp kɛ mac, ala ŋuäny mi gɔaa kä Kuoth Nhial.

⁸ Thäk dɛ̈ɛ̈l in dɔ̱ŋ bi jɛ thöp kɛ thiaŋ kɛɛl kɛ muc bɛɛl kɛ muc kɔŋä ce̱tnikɛ muc ruɔ̱nwaaŋ. Bi jɛ thöp ɛla muc mi waŋkɛ mi la ŋuäny mi gɔaa kä Kuoth Nhial.”

Muc ca̱ŋ lɔ̱ŋä

⁹ “Kä kɛ cäŋ lɔ̱ŋä bi rueeth rɔɔmni da̱ŋ rɛw ti gur kɛli kä thil diw, kɛ rɛw wäli lirä nuɔ̱p mi ko̱k ko̱k mi ca lia̱a̱p kɛ liɛɛth, thöp kɛɛl kɛ kɔaŋdɛ.

¹⁰ Ɛn nɛmɛ ba muc ca̱ŋ lɔ̱ŋni diaal mi waŋkɛ, gekä mucä min wen in la waŋkɛ kɛnɛ kɔaŋdɛ.”

Muc path

¹¹ “Kɛ tuk päthniku lap ni Kuoth Nhial a tho̱pi muc in waŋkɛ. Thääk da̱ŋ rɛw, ruath dɛ̈ɛ̈l böwä kɛl, rueeth rɔɔmni da̱ŋ bärɔw ti gur kɛli kä thil diw.

¹² Kɛ diɔ̱k wäli nuɔ̱p mi ko̱k ko̱k mi ca lia̱a̱p kɛ liɛɛth, ti bi thöp kɛɛl kɛ thäk ɔ. Kɛ rɛw wäli lirä nuɔ̱p mi ko̱k ko̱k mi ca lia̱a̱p kɛ liɛɛth biɛ thöp kɛɛl kɛ ruath dɛ̈ɛ̈l böwä kɛl.

¹³ Kä bi wäl wäli lirä nuɔ̱p mi ko̱k ko̱k mi ca lia̱a̱p kɛ liɛɛth thöp kɛɛl kɛ thäk dɛ̈ɛ̈l rɔɔmä mɔ. Ala muc mi thöpkɛ kɛ mac ala ŋuäny mi gɔaa kä Kuoth Nhial.

¹⁴ Kä bi thäk kɛl tekɛ liɛɛr kɔŋä, kä bi ruath dɛ̈ɛ̈l tekɛ diɔ̱k diɔ̱ɔ̱kni lieeri kɔŋä, kä bi thäk dɛ̈ɛ̈l ɔ tekɛ ŋuaan ŋuaani lieeri kɔŋä. Bi nɛmɛ a muc path mi waŋkɛ rɛy päthni runä.

¹⁵ Kä bi thäk dɛ̈ɛ̈l böwä kɛl thöp Kuoth Nhial kɛ kui̱ dui̱rä. Ba thöp kɛ gëk mucä ci ciɛŋä min wen in la waŋkɛ kɛnɛ kɔaŋdɛ.”

Muc ca̱ŋ ŋarä mi thil thuɔp

¹⁶ “Kɛ cäŋ kä wäl ŋuaan kä pay in jio̱l, ɛ cäŋ bälä Kuɔth Nhial.

¹⁷ Kä kɛ cäŋ kä wäl dhieec kä pay ɛ mɔ ɛ cäŋ ŋarä. Kä ba cam ni juray mi thil thuɔp.

¹⁸ Kä cäŋ in nhiam ba cäŋ dolä mi rɛl rɔ, /cia bi lät thi̱n.

¹⁹ Duundɛ ɣöö bia Kuoth Nhial thöp muc thi̱n kɛ mac. Bia rueeth thääkni da̱ŋ rɛw, kɛ ruath dɛ̈ɛ̈l böwä kɛl, kɛ thääk deet rɔɔmni da̱ŋ bärɔw ti gur kɛli, ti thil diw thöp.

²⁰ Kä bia kɛ thöp kɛɛl kɛ muc nuɔ̱p mi ko̱k ko̱k mi ca lia̱a̱p kɛ liɛɛth. Bi diɔ̱ɔ̱k wäli lirä nuɔ̱p thöp kɛɛl kɛ thäk, kɛ rɛw wäli lirä nuɔ̱p thöp kɛɛl kɛ ruath dɛ̈ɛ̈l böwä.

²¹ Kä bi wäl wäli thöp kɛɛl kɛ dɛy rɔɔmni da̱ŋ bärɔw.

²² Kɛ thäk dɛ̈ɛ̈l böwä kɛl kɛ kui̱ dui̱rä, mi luɛli ni rɔ.

²³ Bi kɛn tɔ̱tɔ̱ thöp kɛ gëk mucä ruɔ̱nwaaŋ in waŋkɛ, min la waŋkɛ ni wen.

²⁴ Kɛ jɛn duɔ̱ɔ̱p ɛmɔ bi jɛ a tho̱pi ni ciaŋ kɛ ni̱n bärɔw, ala muc mi thöpkɛ kɛ mac, ɛ ŋuäny mi gɔaa kä Kuoth Nhial. Ba thöp kɛ gëk mucä min waŋkɛ kɛnɛ kɔaŋdɛ a wee wä.

²⁵ Kä kɛ bärɔw ni̱ni ba duɔl mi rɛl gɔɔydɛ rɔ. Thilɛ mi bia la̱t thi̱n.”

Muc ca̱ŋ ŋarä ŋër

²⁶ “Kɛ cäŋ in tho̱pi Kuoth Nhial muc bɛɛlku tin nhiam, kɛ cäŋ ŋarä ŋër, ta̱yɛ kɛ duɔl mi rɛl rɔ. Kä /cuarɛ lät thi̱n,

²⁷ thöpɛ ni Kuoth Nhial muc, ala ŋuäny mi gɔaa. Rueeth thääkni da̱ŋ rɛw, kɛ ruath dɛ̈ɛ̈l böwä, kɛ rueeth rɔɔmni da̱ŋ bärɔw ti gur kɛli.

²⁸ Kɛɛl kɛ nup mi ko̱k ko̱k mi ca lia̱a̱p kɛ liɛɛth, diɔ̱ɔ̱k wäli lirä nuɔ̱p kɛɛl kɛ thäk, kɛ rɛw wäli lirä nuɔ̱p kɛɛl kɛ ruath dɛ̈ɛ̈l.

²⁹ Kɛ wäl wäli nuɔ̱p kɛɛl kɛ dɛy rɔɔmni da̱ŋ bärɔw bikɛ thöp.

³⁰ Kɛ thäk dɛ̈ɛ̈l böwä kɛl mi bi luɛl ni rɔ.

³¹ Bikɛ thöp kɛ gëk mucä min waŋkɛ ni ciaŋ, kɛɛl kɛ muc bɛɛl, kɛnɛ kɔaŋ, ala ti thil diw.”