Kuen 27 - RUAC KUƆTH IN RƐL RƆ

Nyiee Dhɛ-lɔ-pɛ-ɣadh

¹ Ɛ jɛn cu nyiee Dhɛ-lɔ-pɛ-ɣadh gat Ɣe-pɛr, gat Gil-yad, gat Ma-kir, gat Ma-na-thɛ thok duëël Ma-na-thɛ gat Jo-thɛp rɔ̱ ti̱eec thiekä. Kä ciööt nyieekɛ ɛ, Maɣ-la kɛnɛ Nowa kɛ Ɔg-la, kɛnɛ Mil-ka, kɛ Ti̱r-dha.

² Kä cukɛ cuɔ̱ŋ nhiam Muthɛ kɛnɛ Ɛl-a-dhar bo̱o̱th palä kɛ bööth nath nhiam nɛɛni diaal thok kɛmɛkä ro̱mä kɛ Kuoth Nhial wäkɛ i̱,

³ “Ci gua̱a̱ra li̱w rɛy dɔaar. Kä /cɛ te rɛy nɛɛni tëë ca rɔ̱ mat tëë gua̱c kɛ Kuoth Nhial nɛɛ Kora, li̱w ɛ kɛ dueerkɛ. Kä thilɛ jɛ dhɔɔl.

⁴ Ɛŋu wuɔckɛ ciöt gua̱a̱ra mɔ thok dueeliɛn, ɛ ɣöö thilɛ jɛ dhɔɔl? Muɔcɛ kɔ pek rɛy gua̱nlenikɔ.”

⁵ Kä cu Muthɛ ruacdiɛn naŋ nhiam Kuɔth Nhial.

⁶ Kä cu Kuoth Nhial Muthɛ jiök i̱,

⁷ “Te nyiee Dhɛ-lɔ-pɛ-ɣadh kɛ cuɔ̱ɔ̱ŋ. Moc kɛ kɛ pek rɛy gua̱nlenikiɛn, käm nikɛ pek gua̱ndiɛn.

⁸ Kä läri jɛ ji̱ I-thɛ-rɛl i̱, ‘Mi ci raan li̱w kä thilɛ jɛ dhɔl, ka̱mɛ peekdɛ nyaadɛ.

⁹ Kä mi thilɛ jɛ nyal, bia ka̱m gaatman.

¹⁰ Kä mi thilɛ jɛ gaatman, bia ka̱m gua̱nlenikɛ.

¹¹ Kä mi thilɛ jɛ gua̱nlenikɛ, bia ka̱m ram mɔ thia̱k maariɛn ɔ thok dueeliɛn, bɛ jɛ ciɛŋ. Kä ba ŋut kä ji̱ I-thɛ-rɛl ce̱tkɛ min ci Kuoth Nhial ɛ la̱r Muthɛ.’ ”

Guäl Jɔ-cua kɛ gua̱a̱th Muthɛ

¹² Kä cu Kuoth Nhial Muthɛ jiök i̱, “Wër nhial wi̱i̱ pa̱a̱m Ä-ba-rim ɛ mi, kä guic mun in cä ka̱m ji̱ I-thɛ-rɛl.

¹³ Kä kɛ kɔr kä min ciɛ guic, bi cu li̱w, ce̱tkɛ mëë ci dämuɔɔr ni Ä-ron li̱w.

¹⁴ Kɛ ɣöö /ka̱nɛ ruacdä luɔ̱th rɛy dɔaar kä Dhin, mëë gak duɔl, kɛ ɣöö derɛ ɣä liak nhiamdiɛn rɛy pi̱i̱ni.” (Kɛn pi̱w tɔ̱tɔ̱ kɛ pi̱ gaak kä Mɛ-ri-baa rɛy dɔaar kä Dhin.)

¹⁵ Kä cu Muthɛ Kuoth Nhial jiök i̱,

¹⁶ “Ɛ Kuoth Nhial Kuoth yiëëni pua̱nyni diaal kuany ram min bi te wi̱i̱ dolä,

¹⁷ mi bi naath bo̱th. Kɛ ɣöö ci duɔl Kuɔth Nhial bi ce̱tkɛ rɔɔm ti thil yieen.”

¹⁸ Kä cu Kuoth Nhial Muthɛ jiök i̱, “Käni Jɔ-cua gat Nun, ɛ ram mi tekɛ yiëë, kä läthni tetdu wi̱i̱dɛ.

¹⁹ Kä jak ni jɛ kä cuŋ nhiam Ɛl-a-dhar bo̱o̱th palä kɛnɛ duɔl kɛɛliw, kä käm ni jɛ böth nhiamdiɛn.

²⁰ Kä käm ni jɛ tha̱a̱ŋ ruëcdu, kɛ ɣöö ba luɔ̱th ɛ duɔl ji̱ I-thɛ-rɛl diaal.

²¹ Kä a jɛ cuŋ nhiam Ɛl-a-dhar bo̱o̱th palä min bi jɛ nyuɔ̱ɔ̱th kɛ ruec kɛ yor U-rim nhiamdä. Kä ba liŋ ni ruac Ɛl-ya-dhar kɛnɛ ji̱ I-thɛ-rɛl diaal.”

²² Kä cu Muthɛ jɛ la̱t ce̱tkɛ min ci Kuoth Nhial ɛ la̱r jɛ. Kä cuɛ Jɔ-cua jak kä cuŋ nhiam Ɛl-a-dhar kɛnɛ duɔl kɛɛliw,

²³ kä cuɛ tetdɛ la̱th wi̱i̱dɛ, kä cuɛ jɛ ka̱m ruec ce̱tkɛ min ci Kuoth Nhial ɛ la̱r jɛ.