Kuen 26 - RUAC KUƆTH IN RƐL RƆ

Kuën ji̱ I-thɛ-rɛl in rɛwdɛ

¹ Kä kɛ kɔr jua̱th cu Kuoth Nhial ruac kɛ Muthɛ kɛnɛ Ɛl-a-dhar gat bo̱o̱th palä ni Ä-ron i̱,

² “Kuɛ̈nɛ duɔl ji̱ I-thɛ-rɛl kɛɛliw, a känɛ kä nɛy ti tekɛ run ti jiɛɛn da̱ŋ rɛw a wä nhial, kɛ thuk duëli gua̱ni, kɛn tin lua̱ŋkɛ ko̱r kä I-thɛ-rɛl kɛɛliw.”

³ Kä cu Muthɛ kɛnɛ bo̱o̱th palä ni Ɛl-a-dhar ruac kɛ kɛ dɛɛkä Mo-ab kui̱ yiëër Jɔr-dɛn kä Jɛ-ri-ko i̱,

⁴ “Kuënɛ naath, a känɛ nikä nɛy tin tekɛ run ti jiɛɛn da̱ŋ rɛw a wä nhial.” Ce̱tnikɛ min ci Kuoth Nhial ɛ la̱r Muthɛ kä cu ji̱ I-thɛ-rɛl tëë bä raar kä I-jëp a.

⁵ Rɛ-u-ben kɛ̈ɛ̈ Je-kɔb. Cu gaat Rɛ-u-ben a, Ä-nok ji̱ thuɔk duëël Ä-nok. Kɛ Palu ji̱ thuɔk duëël Palu.

⁶ Kɛ Ɣɛdh-ron ji̱ thuɔk duëël Ɣɛdh-ron. Kɛ Kar-mi ji̱ thuɔk duëël Kar-mi.

⁷ Kä cu tɔ̱tɔ̱ a thuk duëli Rɛ-u-ben. Kä cu pekdiɛn a bathdɔɔri ti jiɛɛn ŋuaan wi̱cdɛ diɔ̱k, wi̱cdɛ kur bärɔw wi̱cdɛ jiɛɛn diɔ̱k.

⁸ Kä cu gaat Palu a, Ɛli-ab.

⁹ Kä cu gaat Ɛli-ab a, Nɛ-mu-el, Da-tan, kɛ Ä-bi-ram, tëë ca kuany rɛy dolä, tëë gua̱c kɛ Muthɛ kɛnɛ Ä-ron kä buɔ̱n Da-tan, mëë cikɛ gua̱c kɛ Kuoth Nhial.

¹⁰ Kä cu piny rɔ lɛp cuɛ kɛ kuɔ̱m thi̱n kɛɛl kɛ Kora, mëë ci ji̱ kɔarɛ li̱w, mëë ci mac nɛy ti kur rɛw wi̱cdɛ jiɛɛn dhieec näk. Kä cukɛ a nyuuth kä naath.

¹¹ Kä /ken kar Kora li̱w.

¹² Kä cu ti̱ti̱ a gaat Cim-on ce̱tkɛ thuk duëlikiɛn, Nɛ-mu-el kä ji̱ Nɛ-mu-el, Ya-min kɛ Ya-kin kä ji̱ Ya-kin.

¹³ Dhɛra kä ji̱ Dhɛra, kɛ Thɔɔl kä ji̱ Thɔɔl.

¹⁴ Cu tɔ̱tɔ̱ a thuk duëli Cim-on. Kä cu pekdiɛn a nɛy ti bathdɔɔri ti jiɛɛn da̱ŋ rɛw wi̱cdɛ rɛw, wi̱cdɛ kur rɛw.

¹⁵ Gaat Gad ce̱tkɛ thuk duëlikiɛn, Dhɛ-pon kä ji̱ Dhɛ-pon. Agi kä ji̱ Agi, kɛ Cuni kä ji̱ Cuni.

¹⁶ Kɛ Ɔdh-ni kä ji̱ Ɔdh-ni, kɛ Eri kä ji̱ Eri.

¹⁷ Kɛ Ä-rod kä ji̱ Ä-rod, kɛ A-re-li kä ji̱ A-re-li.

¹⁸ Cu tɔ̱tɔ̱ a thuk duëli gan Gad. Kä cu pekdiɛn a nɛy ti bathdɔɔri ti jiɛɛn ŋuaan wi̱cdɛ kur dhieec.

¹⁹ Gaat Juda cua Ër kɛnɛ O-nan. Duundɛ ɣöö cikɛ li̱w kä Kɛ-naan.

²⁰ Kä cu ti̱ti̱ a kuay Juda ce̱tkɛ thuk duëlikiɛn. Cela kä ji̱ Cela, kɛ Pɛ-rɛdh kä ji̱ Pɛ-rɛdh, kɛ Dhɛra kä ji̱ Dhɛra.

²¹ Kä cu gaat Pɛ-rɛdh a, Ɣɛdh-ron kä ji̱ Ɣɛdh-ron. Kɛ A-mul kä ji̱ A-mul.

²² Kä cu tɔ̱tɔ̱ a thuk duëli Juda. Kä cu pekdiɛn a nɛy ti bathdɔɔri ti jiɛɛn bärɔw wi̱cdɛ bäkɛl, wi̱cdɛ kur dhieec.

²³ Gaat Yi-tha-kar kɛ thuk duëlikiɛn. Tolä kä ji̱ Tolä, kɛ Pö-wa kä ji̱ Pö-wa.

²⁴ Kɛ Ya-cub kä ji̱ Ya-cub, kɛ Cim-rɔn kä ji̱ Cim-rɔn.

²⁵ Cu tɔ̱tɔ̱ a thuk duëli Yi-tha-kar. Kä cu pekdiɛn a nɛy ti bathdɔɔri ti jiɛɛn bäkɛl wi̱cdɛ ŋuaan, wi̱cdɛ kur diɔ̱k.

²⁶ Gaat Dhɛ-bu-lun kɛ thuk duëlikiɛn, Thɛ-rɛdh kä ji̱ Thɛ-rɛdh, kɛ Ee-lon kä ji̱ Ee-lon, kɛ Ya-leel kä ji̱ Ya-leel.

²⁷ Cu tɔ̱tɔ̱ a thuk duëli Dhɛ-bu-lun. Kä cu pekdiɛn a nɛy ti bathdɔɔri ti jiɛɛn bäkɛl wi̱cdɛ kur dhieec.

²⁸ Gaat Jo-thɛp kɛ thuk duëlikiɛn, Ma-na-thɛ kɛ Ɛ-pa-rim.

²⁹ Gaat Ma-na-thɛ cua Ma-kir kä ji̱ Ma-kir, kä cu Ma-kir a gua̱n Gil-yad kä Gil-yad kä ji̱ Gil-yad.

³⁰ Kä cu ti̱ti̱ a gaat Gil-yad, I-yɛ-dhɛr kä ji̱ I-yɛ-dhɛr, kɛ Ɣe-lɛk kä ji̱ Ɣe-lɛk.

³¹ Kɛ A-thi-rel kä ji̱ A-thi-rel, kɛnɛ Cɛ-kɛm kä ji̱ Cɛ-kɛm.

³² Kɛ Cɛ-mi-dhä kä ji̱ Cɛ-mi-dhä, kɛ Ɣe-pɛr kä ji̱ Ɣe-pɛr.

³³ Kä cu gat Ɣe-pɛr ni Dhɛ-lɔ-pɛ-ɣadh thil dhɔɔl, cu te ni jɛn kɛ nyier. Kä cu ciööt nyieet Dhɛ-lɔ-pɛ-ɣadh a, Maɣ-la, kɛnɛ Nowa, kɛ Ɔg-la, kɛnɛ Mil-ka, kɛ Ti̱r-dha.

³⁴ Cu tɔ̱tɔ̱ a thuk duëli Ma-na-thɛ. Kä cu pekdiɛn a nɛy ti bathdɔɔri ti jiɛɛn dhieec wi̱cdɛ rɛw, wi̱cdɛ kur bärɔw.

³⁵ Kä cu ti̱ti̱ a gaat Ɛ-pa-rim kɛ thuk duëlikiɛn, Cu-tha-lɛ̈k kä ji̱ Cu-tha-lɛ̈k, kɛ Bɛ-kɛr kä ji̱ Bɛ-kɛr, kɛnɛ Tɛ̈-ɣɛ̈n kä ji̱ Tɛ̈-ɣɛ̈n.

³⁶ Kä cu ti̱ti̱ a gaat Cu-tha-lɛ̈k, E-ran kä ji̱ E-ran.

³⁷ Kä cu tɔ̱tɔ̱ a thuk duëli Ɛ-pa-rim. Kä cu pekdiɛn a nɛy ti bathdɔɔri ti jiɛɛn diɔ̱k wi̱cdɛ rɛw, wi̱cdɛ kur bärɔw. Cukɛ a kɛn gaat Jo-thɛp kɛ thuk duëlikiɛn.

³⁸ Gaat Ben-ya-min kɛ thuk duëlikiɛn. Bɛlä kä ji̱ Bɛlä, kɛ Ac-bel kä ji̱ Ac-bel, kɛnɛ Ä-ɣi-ram kä ji̱ Ä-ɣi-ram.

³⁹ Kɛ Cɛ-pam kä ji̱ Cɛ-pu-pam, kɛ Ɣu-pam kä ji̱ Ɣu-pam.

⁴⁰ Kä cu gaat Bɛlä a, A-rɛd kä ji̱ A-rɛd, kɛnɛ Naa-man kä ji̱ Naa-man.

⁴¹ Cu tɔ̱tɔ̱ a thuk duëli Ben-ya-min. Kä cu pekdiɛn a nɛy ti bathdɔɔri ti jiɛɛn ŋuaan wi̱cdɛ dhieec, wi̱cdɛ kur bäkɛl.

⁴² Gaat Daan kɛ thuk duëlikiɛn. Cu-ɣam kä ji̱ Cu-ɣam, kä cukɛ a kɛn thuk duëli Daan kɛ pekdiɛn.

⁴³ Kä cu pek thuk duëli Cu-ɣam a nɛy ti bathdɔɔri ti jiɛɛn bäkɛl wi̱cdɛ ŋuaan, wi̱cdɛ kur ŋuaan.

⁴⁴ Gaat A-cɛr kɛ thuk duëlikiɛn, Yim-naa kä ji̱ Yim-naa, kɛ Ic-wi kä ji̱ Ic-wi, kɛnɛ Bɛ-ri-ya kä ji̱ Bɛ-ri-ya.

⁴⁵ Kä cu gaat Bɛ-ri-ya a, Ɣɛ-bɛr kä ji̱ Ɣɛ-bɛr, kɛnɛ Mal-ki-yel kä ji̱ Mal-ki-yel.

⁴⁶ Kä cua nya A-cɛr cɔɔli Thɛra.

⁴⁷ Cu tɔ̱tɔ̱ a thuk duëli A-cɛr. Kä cu pekdiɛn a nɛy ti bathdɔɔri ti jiɛɛn dhieec wi̱cdɛ diɔ̱k, wi̱cdɛ kur ŋuaan.

⁴⁸ Gaat Nap-ta-li kɛ thuk duëlikiɛn, Ya-dheel kä ji̱ Ya-dheel, kɛ Guni kä ji̱ Guni.

⁴⁹ Kɛ Ye-dhɛr kä ji̱ Ye-dhɛr, kɛnɛ Ci-lem kä ji̱ Ci-lem.

⁵⁰ Cu tɔ̱tɔ̱ a thuk duëli Nap-ta-li. Kä cu pekdiɛn a nɛy ti bathdɔɔri ti jiɛɛn ŋuaan wi̱cdɛ dhieec, wi̱cdɛ kur ŋuaan.

⁵¹ Kä cu nɛmɛ a pek ji̱ I-thɛ-rɛl, nɛy ti bathdɔɔri ti kur bäkɛl wi̱cdɛ kɛl, wi̱cdɛ kur bärɔw wi̱cdɛ jiɛɛn da̱ŋ diɔ̱k.

⁵² Kä cu Kuoth Nhial Muthɛ jiök i̱,

⁵³ “Ba mun dääk kä kɛ ce̱tkɛ pek ciöötni.

⁵⁴ Bi thok duëël mi di̱i̱t ka̱m pek mi di̱i̱t, kä bi thok duëël mi tɔt ka̱m pek mi tɔt. Ba thok duëël ɔ ka̱m pek mi ce̱tkɛ pekdiɛn.

⁵⁵ Duundɛ ɣöö ba da̱a̱k ɛn mun kɛ yor gaakni. Nikɛ pek thuk duëli gua̱ni ba dääk kä kɛ ala duŋdiɛn.

⁵⁶ Kä ba mun da̱a̱k kɛ yor gaakni kam nɛɛni ti ŋuan kɛnɛ nɛy ti tɔt.”

⁵⁷ Cu ti̱ti̱ a ji̱ Lii-bay kɛ thuk duëlikiɛn. Ger-con kä ji̱ Ger-con, Kɛ-ɣath kä ji̱ Kɛ-ɣath, Mɛ-ra-ri kä ji̱ Mɛ-ra-ri.

⁵⁸ Kä cu ti̱ti̱ a thuk duëli Lii-bay thok duëël Lib-ni, kɛ thok duëël Ɣɛb-ron, kɛnɛ thok duëël Mali, kɛ thok duëël Muci, kɛ thok duëël Kora. Kä cu Kɛ-ɣath a gua̱n Am-ram.

⁵⁹ Kä cua ciek Am-ram cɔɔli Yo-kɛ-bɛd nya Lii-bay, mëë dapkɛ ɛ Lii-bay kä I-jëp. Kä cuɛ Am-ram da̱p Ä-ron kɛnɛ Muthɛ, Mir-yam nyimandiɛn.

⁶⁰ Kä cua Ä-ron da̱p Na-dab kɛnɛ Ä-bi-ɣu kɛ Ɛl-a-dhar kɛnɛ I-ta-mar.

⁶¹ Duundɛ ɣöö cu Na-dab kɛnɛ Ä-bi-ɣu li̱w mëë cikɛ mac mi ci rɔ lot thöp nhiam Kuɔth Nhial.

⁶² Kä cu pekdiɛn a nɛy ti bathdɔɔri ti jiɛɛn rɛw wi̱cdɛ diɔ̱k, a känɛ nikä gat dhöl mi te pay kɛl a wä nhial. Kɛ ɣöö /ka̱n kɛ kuɛ̈n rɛy ji̱ I-thɛ-rɛl, kɛ ɣöö thilɛ kɛ pek mi ca ka̱m kɛ rɛy ji̱ I-thɛ-rɛl.

⁶³ Cu tɔ̱tɔ̱ a kɛn nɛy tin ca kuɛn ɛ Muthɛ kɛnɛ Ɛl-a-dhar bo̱o̱th palä, mëë kuɛɛn ji̱ I-thɛ-rɛl dɛɛkä Mo-ab kui̱ yiëër Jɔr-dɛn kä Jɛ-ri-ko.

⁶⁴ Duundɛ ɣöö cu rɛydiɛn thil raan kä nɛy tëë ca kuɛn ɛ Muthɛ kɛnɛ Ä-ron bo̱o̱th palä, mëë kuɛɛn ji̱ I-thɛ-rɛl rɛy dɔaar kä Thi-nay.

⁶⁵ Kɛ ɣöö ci Kuoth Nhial wee i̱, “Bikɛ li̱w rɛy dɔaar.” Kä cuɛ thil ram mi cu duɔth kä kɛ, ɛ ni Ka-leb gat Yɛ-pö-nɛ kɛnɛ Jɔ-cua gat Nun.