Kuen 24 - RUAC KUƆTH IN RƐL RƆ

¹ Kä min ci Bil-am ɛ ŋa̱c ɛn ɣöö nhɔk Kuoth Nhial puɔ̱th I-thɛ-rɛl, /kenɛ wä, ce̱t, kɛ min wen, duundɛ ɣöö cuɛ riet ni rɔ rɛy dɔaar.

² Kä cu Bil-am waŋdɛ kap nhial, cuɛ ji̱ I-thɛ-rɛl nɛn cikɛ pua̱t kɛ thuk duëli. Kä cu yiëë Kuɔth ben kä jɛ,

³ kä cuɛ ruacdɛ lat wee i̱, “Ruac Bil-am gat Bɛ-or, ruac raam mi nën waŋdɛ agɔaa,

⁴ ruac raam mi liŋ ruac Kuɔth, min nɛɛn nyuuth kä Kuoth in leny buɔ̱mdɛ ti diaal, pɛnkɛ piny, kä te.

⁵ Kä ku ti̱ecku gɔɔydiɛn lɛ pa̱a̱r kɛ ŋu lö Je-kɔb, gua̱th tɔ̱ɔ̱cädu lö I-thɛ-rɛl!

⁶ Ce̱tdɛ nikɛ waŋ mi wä raar, ce̱tdɛ kɛ kak mi te thok yiëër, ce̱tdɛ nikɛ tɔaar mi ca pith ɛ Kuoth Nhial, ce̱tdɛ nikɛ luääl mi te gekä yiëër.

⁷ Kä bi lölikɛ tekɛ pi̱w, kä bi bɛlkɛ tekɛ pi̱ ti ŋuan, kä bi di̱t ni kuääriɛn kä Ä-gag, kä ba kuääriɛn liak.

⁸ Ci Kuoth Nhial kɛ ka̱m raar kä I-jëp. Kä tekɛ kɛ buɔ̱m mi ce̱tkɛ buɔ̱m mök, kä bikɛ ji̱ tɛ̈riɛn cam nhial, kä bikɛ cɔ̱wkiɛn thor, kä bi bääriɛn kɛ näk.

⁹ La makɛ ce̱tkɛ lony, kä bikɛ tɔ̱ɔ̱c, ce̱tkɛ ŋuɔ̱ɔ̱t luɔny, mi thil ram mi dëë jɛ jiɛc? Ɛ puɔ̱th tekɛ ram ɔ ci ji̱ poth ɔ, kä lam akɛ ramɔ ci ji̱ lam ɔ.”

¹⁰ Kä cu Ba-lak kɛ̈c kɛ Bil-am, kä cuɛ tetkɛ pat kä cuɛ Bil-am jiök i̱, “Ɣän cɔalä ji̱ kɛ ɣöö bi ji̱ tɛ̈rä lam, kä nɛmɛ täämɛ ni kä diɔ̱ɔ̱k ci poth nikɛ.

¹¹ Kɛ kui̱c ɛmɔ täämɛ, ku wä ni wi̱i̱du. Ɣän cä wee i̱, ‘Dëë ji̱ cuɔ̱l mi gɔaa’ duundɛ ɣöö ci Kuoth Nhial ji̱ pen cut.”

¹² Kä cu Bil-am Ba-lak loc i̱, “/Ka̱nɛ la̱r ja̱a̱ŋku te ci jäk kä ɣä i̱,

¹³ ‘Cäŋ bi Ba-lak ɣä ka̱m dhɔrɛ a thi̱eŋ kɛ da̱a̱p kɛnɛ ciɛk in bo̱r, ɣän /cä ruac Kuɔth Nhial bi luäŋ kɛ ba̱l, cä mi gɔaa kiɛ mi jiäk bi la̱t kɛ wi̱cdä. Ɣän bä lat ni min ci Kuoth Nhial ɛ lar?’ ”

Ruac go̱o̱kä Bil-am in jɔak

¹⁴ Kä ɣä, wa̱a̱ kä nɛɛkä ɛn täämɛ. Bër ɛ ji̱ la̱rä min bi nɛy ti ti jɛ lät kä nɛɛku ni̱ni tɔ̱ bëë tɔ̱.

¹⁵ Kä cuɛ ruacdɛ lat wee i̱, “Ruac Bil-am gat Bɛ-or ruac raam mi nën waŋdɛ agɔaa,

¹⁶ ruac raam mi liŋ ruac Kuɔth, min tekɛ ŋäc kä min di̱t ni jɛn, min nɛɛn nyuth kɛ min leny buɔ̱mdɛ ti diaal, min tɛth, kä te gui̱c.

¹⁷ Cä nɛn, duundɛ ɣöö /ciɛ täämɛ. Ɣän guɛcä jɛ, duundɛ ɣöö /cɛ thia̱k. Kä bi cier ben raar kä Je-kɔb, lip pay ciëŋ bɛ ben kä I-thɛ-rɛl. Kä bɛ bööth Mo-ab dup. Kä bɛ gaat ce̱t diaal da̱k ni piny.

¹⁸ Ba Ɛ-dɔm ciɛŋ, ɛ ji̱ tɛ̈rɛ, duundɛ ɣöö bi I-thɛ-rɛl kulɛ wä kɛ buɔ̱m.

¹⁹ Kä bi rueec ben kä Je-kɔb, kä bɛ duɔth kä tin tëk wi̱c däk!”

²⁰ Kä cu Bil-am Ä-ma-lek guic, kä cuɛ ruacdɛ lat wee i̱, “Ä-ma-lek ɛ do̱r in nhiam kä dör, duundɛ ɣöö kɛ jɔak bɛ da̱k.”

²¹ Kä cuɛ ji̱ Kɛɛn guic, kä cuɛ ruacdɛ lat wee i̱, “Te gua̱th ciɛŋädu kɛ mal, te duelu rɛy päämni.

²² Kä ciɛ jɛn bä yɛn ji̱ Kɛɛn bia da̱k, kä bi A-cɛr yɛ kulɛ naŋ ala pɛ̈ɛ̈c i̱di?”

²³ Kä cu Bil-am ruacdɛ lat wee i̱, “Aɣ ɛŋa biku lɛ tëk ɔ mi wä Kuoth Nhial nɛmɛ wä la̱t?

²⁴ Bi babuuri ben kä Ki-tim, kä ba A-cɛr kɛnɛ E-bɛr ben ka̱n, kä kɛn bikɛ da̱k bä.”

²⁵ Kä cu Bil-am rɔ jiɛc, cuɛ wä wi̱i̱dɛ, kä cu Ba-lak wä dupdɛ bä.