Kuen 23 - RUAC KUƆTH IN RƐL RƆ

¹ Kä cu Bil-am Ba-lak jiök i̱, “Lätni ɣä kä yi̱kni da̱ŋ bärɔw ɛn wa̱nɛ mi, kä mocä kɛ thääk bärɔw kɛnɛ rueeth rɔɔmni da̱ŋ bärɔw.”

² Kä cu Ba-lak kɛ la̱t ce̱tkɛ min ca lar ɛ Bil-am. Kä cu Ba-lak kɛnɛ Bil-am thäk kɛnɛ ruath rɔmä thöp wi̱i̱ yi̱kä ɛmɔ.

³ Kä cu Bil-am Ba-lak jiök i̱, “Cuŋni gekä mucädu min waŋkɛ, a ɣä wa̱a̱. Dɔ̱ŋ bi Kuoth Nhial röm kɛ ɣä. Kä mɔ bɛ nyuɔ̱th ɣä mɔ, Bä ben la̱r ji̱.” Kä cuɛ wä nhial wi̱i̱ pa̱a̱m.

⁴ Kä cu Kuoth röm kɛ Bil-am. Kä cu Bil-am ɛ jiök i̱, “Ɣän cä yi̱kni bärɔw rialikä, kä cä thäk kɛnɛ ruath rɔmä thöp wi̱i̱kä mɔ.”

⁵ Kä cu Kuoth Nhial Bil-am ka̱m riet, kä cuɛ jiök i̱, “Locni kä Ba-lak bi jɛ wä la̱t nɛmɛ.”

⁶ Kä cuɛ luny kä Ba-lak, kä cuɛ jɛ jek cuŋä gekä mucädɛ kɛnɛ bööth Mo-ab diaal.

⁷ Kä cu Bil-am ruacdɛ lat wee i̱, “Ci Ba-lak ɣä nööŋ ni kä Ä-ram kuäär Mo-ab cɛ ɣä nööŋ ni pääm nhial ɣɔaa i̱, ‘Bër läm ni ɣä Je-kɔb, bër gak I-thɛ-rɛl!’

⁸ Kä ɛ dëë ram mi /ka̱n lam ɛ Kuoth ku lam? Kä dëë ram mi /ka̱n gak ɛ Kuoth Nhial ku lɛ gak i̱di?

⁹ Kä cä naath nɛn bi̱i̱kä päämni, ni wi̱i̱ bi̱i̱kä cä kɛ nɛn. Cä nɛy ti cieŋ kä rɔ̱ nɛn, ti /ca rɔ mat rɛy döri!

¹⁰ Kä ɛŋa mi dëë gaat Je-kɔb kuɛn, kiɛ dëë pek kuayni I-thɛ-rɛl kuɛn? A lewä kɛ lia̱a̱ raam mi tekɛ cuŋ, kä dëë guutdä ce̱tkɛ guutdɛ!”

¹¹ Kä cu Ba-lak Bil-am jiök i̱, “Ɛŋu ci lät kä ɣä mɔ? Ɣän cä ji̱ nööŋ kɛ ɣöö bi gua̱n tɛ̈rä ben lam, kä nɛnɛ ci ben poth nikɛ.”

¹² Kä cuɛ jɛ loc i̱, “Ɣän /ka̱n ji̱ la̱t min ci Kuoth Nhial ɛ la̱r ɣä?”

Ruac go̱o̱kä Bil-am in rɛwdɛ

¹³ Kä cu Ba-lak Bil-am jiök i̱, “Bër wanɛ guäth mi dɔ̱diɛn, mi dɔ̱ŋ bikɛ nɛn thi̱n. Kä bi nɛn ni tin thia̱k ni kɛn, kä /cikɛ bi nɛn kɛn diaal. Kä bikɛ cu la̱m ɣä ɛn wi̱n ɛ mi.”

¹⁴ Kä cuɛ jɛ naŋ rɛy kakä Dho-pim, ni bi̱i̱kä pa̱a̱m Pi̱dh-ga, kä cuɛ yi̱kni bärɔw täth, kä cuɛ thäk kɛnɛ ruath rɔmä thöp wi̱i̱ yi̱kä mɔ.

¹⁵ Kä cu Bil-am Ba-lak jiök i̱, “Cuŋni gekä mucädu min waŋkɛ, a wa̱a̱ röm kɛ Kuoth Nhial wi̱n ɛ mi.”

¹⁶ Kä cu Kuoth Nhial röm kɛ Bil-am, kä cuɛ jɛ ka̱m riet wee i̱, “Locni kä Ba-lak, kä lät ni jɛ nɛmɛ.”

¹⁷ Kä cuɛ ben kä jɛ, kä cuɛ jɛ jek cuŋä gekä mucädɛ min waŋkɛ kɛɛl kɛnɛ bööth Mo-ab. Kä cu Ba-lak ɛ jiök i̱, “Ɛŋu ci Kuoth Nhial ɛ lat ɔ?”

¹⁸ Kä cu Bil-am ruacdɛ lat wee i̱, “Jiɛc rɔ Ba-lak, kä liŋ ɣä. Liŋ ɣä lö gat Dhi-por.

¹⁹ /Ci Kuoth a raan a derɛ kac kac, kiɛ ɛ gat ran a derɛ ca̱rɛ nyɔk. Tëë kɛ mi cɛ lar kä bɛ tey a /cɛ jɛ lät? Kiɛ tëë kɛ mi cɛ lar kä /kenɛ jɛ thuk?

²⁰ Nɛnɛ ɣän ca ɣä la̱r ruac puthä. Cɛ kɛ poth, kä /cä dëë ben woc.

²¹ Thilɛ duer mi cɛ nɛn kä Je-kɔb, kä thilɛ riɛk mi cɛ nɛn kä I-thɛ-rɛl. Te Kuoth Nhial Kuothdiɛn kɛɛl kɛ kɛ. Kä te ruac Kua̱r rɛydiɛn.

²² Ci Kuoth kɛ ka̱m raar kä I-jëp. Tekɛ kɛ buɔ̱m mi ce̱tkɛ buɔ̱m tha̱a̱k.

²³ Kɛ ɣöö thilɛ ti̱et mi lo̱k Je-kɔb, kä thilɛ gua̱n kuthni mi lo̱k I-thɛ-rɛl. Kä ba la̱r Je-kɔb kɛnɛ I-thɛ-rɛl täämɛ i̱, ‘Ɛŋu ci Kuoth ɛ la̱t ɔ!’

²⁴ Kä kɛnɛ nɛy ti ca rɔ jiɛc ce̱tkɛ ŋuɔ̱ɔ̱t luɔny, ce̱tkɛ lony mi yuur rɔ. /Cɛ dëë tɔ̱ɔ̱c a ni mi cɛ ley käp, kä cɛ riɛmdɛ lot.”

²⁵ Kä cu Ba-lak Bil-am jiök i̱, “/Keni kɛ nyäk kɛ la̱m kä /keni kɛ nyäk kɛ puɔ̱th.”

²⁶ Kä cu Bil-am jɛ loc i̱, “Ɣän /ka̱n jɛ la̱r ji̱ i̱, ‘Bä la̱t ni tin diaal tin ci Kuoth Nhial kɛ lar?’ ”

Ruac go̱o̱kä Bil-am in diɔ̱ɔ̱kdiɛn

²⁷ Kä cu Ba-lak Bil-am jiök i̱, “Ku ben ɛn täämɛ, bä ji̱ naŋ guäth mi dɔ̱ŋ. Dɔ̱ŋ bi Kuoth ɛ nhɔk a deri kɛ cu wä la̱m ɣä ɛn wi̱n ɛ mi.”

²⁸ Kä cu Ba-lak Bil-am naŋ bi̱i̱kä pa̱a̱m Pɛ-or, min guic ni day piny.

²⁹ Kä cu Bil-am Ba-lak jiök i̱, “Täth ni ɣä yi̱kni bärɔw, kä moc ɣä kɛ thääk bärɔw kɛnɛ rueeth rɔɔmni da̱ŋ bärɔw.”

³⁰ Kä cu Ba-lak ɛ la̱t ce̱tnikɛ min ci Bil-am ɛ lar, kä cuɛ thäk kɛnɛ ruath rɔmä thöp wi̱i̱ yi̱kä mɔ.