Kuen 22 - RUAC KUƆTH IN RƐL RƆ

Ciöt Ba-lak kɛ Bil-am

¹ Kä cu ji̱ I-thɛ-rɛl ɣöth, cukɛ ben pua̱t rɛy tɔ̱ɔ̱rä Mo-ab kui̱ kiɛɛr Jɔr-dɛn kä Jɛ-ri-ko.

² Kä ci Ba-lak gat Dhi-por tëë diaal tëë ci ji̱ I-thɛ-rɛl kɛ lät kä ji̱ Ɛ-mor nɛn.

³ Kä cu ji̱ Mo-ab dual ɛlɔ̱ŋ kɛ ji̱ I-thɛ-rɛl, kɛ ɣöö ŋuankɛ. Cukɛ dual ɛlɔ̱ŋ kɛ kɛ.

⁴ Kä cu ji̱ Mo-ab bööth Mid-yan jiök i̱, “Kɛn nɛy ti̱ti̱ täämɛ ba tin diaal tin te gekädan thuk ɛ kɛn, ce̱tkɛ min la thäk wal a cam.” Inɔ cu Ba-lak gat Dhi-por mëë la kuäär Mo-ab ɛn guäth ëë,

⁵ naath jäk kä Bil-am gat Bɛ-or kä Pɛ-tur, min thiek kɛ yier Yu-pɛ-ree-tidh muun ɛmɔ wee i̱, “Nɛnɛ, ci naath ben raar kä I-jëp. Kä ca wi̱c muɔ̱ɔ̱n kum ɛ kɛn kä cieŋkɛ lotädä.

⁶ Bër ɛn täämɛ bi kɛn nɛy ti̱ti̱ ben lam, kɛ ɣöö bum nikɛn kä ɣä. Kä dɔ̱ŋ dëë kɛ luäŋ kɛ mi juɔcä kɛ, a bäkɛ juɔc raar wi̱c. Kɛ ɣöö ŋa̱cä jɛ i̱ nɛy ti ci poth cakɛ poth, kä nɛy ti ci lam cakɛ lam.”

⁷ Kä cu bööth Mo-ab kɛnɛ bööth Mid-yan däk piny a te tetkiɛn kɛ yio̱w ti ba wä ka̱m ti̱et. Kä cukɛ ben kä Bil-am cua ben la̱t ruac Ba-lak.

⁸ Kä cu Bil-am kɛ jiök i̱, “Niɛnɛ wa̱nɛ ɛn wääri nɛmɛ, kä bä yɛ luɔ̱c thok, ce̱tnikɛ mɔ bi Kuoth Nhial ɛ la̱t ɣä mɔ.” Kä cu bööth Mo-ab te kɛɛl kɛ jɛ.

⁹ Kä cu Kuoth Bil-am ben jiök i̱, “Kɛ ŋaani kɛn nɛy tɔ̱tɔ̱?”

¹⁰ Kä cu Bil-am Kuoth loc i̱, “Kɛ nɛy ti ci Ba-lak gat Dhi-por kɛ jäk kä ɣä wee i̱,

¹¹ ‘Nɛnɛ ci naath ben raar kä I-jëp, kä ca wi̱c muɔ̱ɔ̱n kum. Bër ɛn täämɛ bikɛ ben la̱m ɣä. Dɔ̱ŋ dëë ko̱riɛn luäŋ a bäkɛ juɔc raar.’ ”

¹² Kä cu Kuoth Bil-am jiök i̱, “/Ci bi wä kɛɛl kɛ kɛ. Kä /Ci naath bi lam kɛ ɣöö cakɛ poth.”

¹³ Kä cu Bil-am keer kɛ runwaŋ. Kä cuɛ bööth Ba-lak jiök i̱, “Wiaa muundun, kɛ ɣöö ci Kuoth Nhial ɣä pen wä kɛɛl kɛ yɛ.”

¹⁴ Kä cu bööth Mo-ab wä, cua Ba-lak wä jiök i̱, “/Ci Bil-am ben lo̱k kɛɛl kɛ nɛy.”

¹⁵ Kä cu Ba-lak bööth ti ŋuan nikɛn kä tekɛ luth kä nɛy tëë nhiam nyɔk kɛ jäkni.

¹⁶ Kä cukɛ Bil-am ben jiök i̱, “Nɛmɛ ɛ min ci Ba-lak gat Dhi-por jɛ lar i̱, ‘A thil mi pen ji̱ ben kä ɣä,

¹⁷ kɛ ɣöö bä ji̱ la̱t a gɔaa, kä mɔ bi la̱r ɣä mɔ bä la̱t. Ber läm ni ɣä nɛy ti̱ti̱.’ ”

¹⁸ Duundɛ ɣöö cu Bil-am kɛ loc wee i̱, “A cäŋ bi Ba-lak ɣä ka̱m dhɔrɛ a thiäŋ kɛ ciɛk in bo̱r, kɛnɛ da̱a̱p, /cä luek Kuɔth Nhial Kuothdä dëë bäl, a bä mi tɔt kiɛ mi di̱i̱t wä la̱t.

¹⁹ Kä täämɛ kua niɛn ɛn wääri ce̱tkɛ mëë ca la̱t ɛ nɛy te nhiam, kä bä mɔ bi Kuoth Nhial ɛ lɛ la̱r ɣä mɔ lɛ jek.”

²⁰ Kä cu Kuoth ben kä Bil-am kɛ wäär jiökɛ jɛ i̱, “Mi bä nɛy tɔ̱tɔ̱ ben cɔl ni ji̱, jiɛc rɔ, wër kɛɛl kɛ kɛ. Duundɛ ɣöö lätni ni min cä la̱r ji̱ kärɔa.”

Bil-am kɛnɛ muulɛ

²¹ Kä cu Bil-am keer kɛ runwaŋ kä cuɛ muulɛ rialikä kä cuɛ wä kɛnɛ bööth Mo-ab.

²² Duundɛ ɣöö gak Kuoth kɛ ɣöö cɛ wä. Kä cu jääk Kuɔth Nhial cuɔ̱ŋ dupdɛ. Kä jɛn tëë jɔk muɔ̱lɛ, kä te la̱a̱tkɛ da̱ŋ rɛw kɛɛl kɛ jɛ.

²³ Kä cu muul jääk Kuɔth Nhial nɛn cuŋä dup kɛ thɛp tetädɛ. Kä cu muul ciɛc dup, cuɛ wä kɛ rɛy dɔar. Kä cu Bil-am muul yɔ̱t kɛ ɣöö bɛ loc dup.

²⁴ Kä cu jääk Kuɔth Nhial wä cuɔ̱ŋ dup mi ciw ciw kam ka̱a̱kni wal kɛ kui̱ kɔaŋ da̱ŋ rɛw ti tekɛ pa̱nyni.

²⁵ Kä min ci muul jääk Kuɔth Nhial nɛn cuɛ rɔ ti̱ec puɔ̱ny pa̱ny, cuɛ ciök Bil-am yieny puɔ̱ny pa̱ny. Kä cu Bil-am ɛ nyɔk kɛ yɔ̱a̱t.

²⁶ Kä cu jääk Kuɔth Nhial wä nhiam, kä cuɛ wä cuɔ̱ŋ guäth mi ril ril, mi thil gua̱a̱th mi deri rɔ riet thi̱n.

²⁷ Kä min ci muul jääk Kuɔth Nhial nɛn cuɛ tɔ̱ɔ̱c. Kä cu Bil-am kɛ̈c, kä cuɛ mul yɔ̱t kɛ kɛɛt.

²⁸ Kä cu Kuoth Nhial thok muɔ̱l lɛp, kä cuɛ Bil-am jiök i̱, “Ɛŋu mi cä lät kä ji̱, mɔ ci ɣä duäc ni kä diɔ̱ɔ̱k ɔ?”

²⁹ Kä cu Bil-am muul loc i̱, “Ɛ ɣöö ci ɣä jak kä dɔ̱a̱r. Ɣän cä go̱r ni mi te tetdä kɛ mut, dëë ji̱ näk.”

³⁰ Kä cu muul Bil-am jiök i̱, “/Ciɛ ɣän muulu, min la ko̱tdi jɔkdä teekädu kɛɛliw ni wal cu mäni walɛ? Ɛ mi la la̱tdä kä ji̱ ɛn nɔmɔ?” Kä cu Bil-am ɛ loc i̱, “Eey.”

³¹ Kä cu Kuoth Nhial waŋ Bil-am lɛp, kä cuɛ jääk Kuɔth Nhial nɛn tëë cuŋä dup, kɛ thɛp mi te tetädɛ. Kä cu Bil-am rɔ ka̱m mua̱a̱l kä cuɛ rɔ goŋ.

³² Kä cu jääk Kuɔth Nhial ɛ jiök i̱, “Ɛŋu ci muulu duäc ni kä diɔ̱ɔ̱k ɔ? Kä nɛnɛ, ɣän ci ben gɛw wa̱nɛ mi, kɛ ɣöö ja̱lu jiäkɛ nhiamdä.

³³ Kä muul cɛ ɣä nɛn kä cɛ ciɛc nhiamdä kä diɔ̱ɔ̱k. Duŋ mi /kenɛ cɛc kä ɣä, ɛn täämɛ ce̱t cä ji̱ näk, kä dëë jɛ päl a tëk.”

³⁴ Kä cu Bil-am jääk Kuɔth Nhial jiök i̱, “Ɣän cä duer, kɛ ɣöö ɣän kuecä jɛ ti̱i̱ cuŋä dupdä gɛɛwi ɣä. Kä täämɛ mi ci lɔcdu jiäk bä loc jɔk.”

³⁵ Kä cu jääk Kuɔth Nhial Bil-am jiök i̱, “Wër kɛɛl kɛ nɛy tɔ̱tɔ̱. Duundɛ ɣöö bi lat ni ruac in bä la̱r ji̱ kärɔa.” Kä cu Bil-am wä kɛɛl kɛ bööth Ba-lak.

Bil-am kɛnɛ Ba-lak

³⁶ Kä min ci Ba-lak ɛ liŋ i̱ ci Bil-am ben, cuɛ jɛ wä lor därwec Mo-ab këth Ar-non, ni pek ciëŋdɛ.

³⁷ Kä cu Ba-lak Bil-am jiök i̱, “Ɣän /ka̱n ji̱ jäk kä raan? Kuɛ la ŋu /keni ben kä ɣä mɔ? A /ci ɣän ji̱ dëë ku luäŋ kɛ cul duɔ̱ɔ̱r?”

³⁸ Kä cu Bil-am Ba-lak jiök i̱, “Ɣän ci ben kä ji̱ mi! Kä ɣän ta̱a̱ kɛ buɔ̱m mi dëë ruac kɛ ɣä ɛn täämɛ? Bä lat ni ruac in bi Kuoth Nhial ɛ la̱r ɣä.”

³⁹ Kä cu Bil-am wä kɛɛl kɛnɛ Ba-lak, cukɛ ben kä Kir-yath-u-dhoth.

⁴⁰ Kä cu Ba-lak thääk kɛnɛ rɔɔm thöp ala muc, kä cuɛ Bil-am kɛnɛ bööth tin te kɛɛl kɛ jɛ jäk ikä.

Ruac go̱o̱kä Bil-am in nhiam

⁴¹ Mëë ruɔ̱ndɛ cu Ba-lak Bil-am ka̱n kä cuɛ jɛ nööŋ kä Ba-moth-baal. Ɛn wi̱ni cuɛ nɛy tin thia̱k nɛn.