Kuen 20 - RUAC KUƆTH IN RƐL RƆ

Pi̱ rɛy pa̱a̱m

¹ Kä cu ji̱ I-thɛ-rɛl diaal ben rɛy dɔaar Dhin kɛ pay in jio̱liɛn, kä cukɛ ben cieŋ kä Ka-dɛc. Kä cu Mir-yam li̱w thi̱n, kä cua jɛ kony thi̱n.

² Kä täämɛ cuɛ thil pi̱w kɛ kui̱ dolä. Kä cukɛ rɔ dol kɛɛl gakɛ kɛ Muthɛ kɛnɛ Ä-ron.

³ Kä cukɛ gaak kɛ Muthɛ wäkɛ i̱, “Ci ŋua̱n ni mi ca̱kɔ li̱w, mëë li̱w gaatmanikɔ nhiam Kuɔth Nhial!

⁴ Ɛŋu no̱o̱ŋi nɛɛ Kuɔth Nhial rɛy dɔaarɔ kɛ ɣöö ba̱kɔ ben li̱w thi̱n ɔ, kɔn kɛ ɣɔ̱ɔ̱k ɔ?

⁵ Kä ɛŋu curi kɔ jak kä bä raar kä I-jëp ɔ, a bikɔ nööŋ ɛn guäth ɛ jiääk ɛ mi ɔ? Gua̱a̱th mi thil bɛl, kɛnɛ jiɛɛn ŋɔ̱a̱p, kɛ dɔŋpinyni. Kä thilɛ jɛ pi̱ ti mathkɛ.”

⁶ Kä cu Muthɛ kɛnɛ Ä-ron jiɛɛn rɛy dolä kä cukɛ ben thok kɛmɛkä ro̱mä kɛ Kuoth Nhial, kä cukɛ pal. Kä cu buay Kuɔth Nhial päl kä kɛ.

⁷ Kä cu Kuoth Nhial Muthɛ jiök i̱,

⁸ “Käni kɛɛt, kä wër dol nɛy diaal yɛnɛ dämuɔɔr ni Ä-ron, kä ruacni kɛ päm kä bikɛ pi̱kɛ nɛn kɛ waaŋdiɛn. Inɔ bi pi̱w ka̱m raar rɛy pa̱a̱m. Kä bi nɛy diaal cu maath amäni ɣɔ̱ɔ̱kiɛn.”

⁹ Kä cu Muthɛ kɛɛt ka̱n nhiam Kuɔth Nhial ce̱tkɛ min cɛ la̱r jɛ.

¹⁰ Kä cu Muthɛ kɛnɛ Ä-ron nɛy diaal mat nhiam pa̱a̱m, kä cuɛ kɛ jiök i̱, “Liɛŋɛ jɛ täämɛ yɛn nɛy ti la malɛ luɔc ti. No̱ŋ nɛy yɛ pi̱w ɛn rɛy pa̱a̱m ɛmɛ?”

¹¹ Kä cu Muthɛ päm yɔ̱t kä rɛw kɛ kɛɛtdɛ. Kä cu pi̱w ben raar, kä cu nɛy diaal maath amäni ɣɔ̱ɔ̱kiɛn.

¹² Kä cu Kuoth Nhial Muthɛ kɛnɛ Ä-ron jiök i̱, “Kɛ ɣöö/ci yɛn ɣä ŋäth, kä /ci yɛn ɣä luth ala mi rɛl gɔɔydɛ rɔ waaŋ ji̱ I-thɛ-rɛl, kɛ kui̱c ɛmɔ /cia nɛy ti̱ti̱ diaal bi naŋ muun in cä ka̱m kɛ.”

¹³ Cu ti̱ti̱ a pi̱ Mɛ-ri-baa mëë gak ji̱ I-thɛ-rɛl kɛ Kuoth Nhial, kä cuɛ rɔ nyoth rɛydiɛn ala mi rɛl gɔɔydɛ rɔ.

Pen Ɛ-dɔm ji̱ I-thɛ-rɛl wä

¹⁴ Kä cu Muthɛ naath ja̱k kä Ka-dɛc jäkɛ kɛ kä kuäär Ɛ-dɔm wee i̱, “Nɛmɛ ɛ min laar dämuɔɔr ni I-thɛ-rɛl ɛ. Ji̱n ŋäci bɛ̈c bɛ̈ɛ̈c diaal tëë ca nɛy jek.

¹⁵ Mëë ci gua̱nikɔ wä kä I-jëp kä ca̱kɔ wä cieŋ ɛn wi̱n ɛ mi kɛ pek mi bäär. Kä cu ji̱ I-jëp nɛy kɛ gua̱nikɔ ciɛŋ a jiäk.

¹⁶ Kä mëë ca̱kɔ wiee nhiam Kuɔth Nhial, cuɛ jɔwda liŋ, kä cuɛ jääk ja̱k cuɛ nɛy ben ka̱m raar kä I-jëp. Kä kɔn täämɛ te nɛy kä Ka-dɛc, wec ɛ te këth wecdu mi.

¹⁷ Täämɛ jaknikɔ kä wä kɛ mundu. /Ca̱kɔ bi wä kɛ rɛy kakä kiɛ kak wal kɛ kui̱ kɔaŋ, kä /ca̱kɔ bi maath kɛ pi̱ rɛy jieeriku. Bakɔ wä kɛ duɔ̱p kua̱r in di̱i̱t, /ca̱kɔ rɔ bi riet cuëëc kiɛ caam, amäni mi ca̱kɔ wecdu bäl.”

¹⁸ Kä cu Ɛ-dɔm ɛ loc i̱, “/Ci bi rët kɛ wecdä, mi wi̱i̱ wä ben kɛ jɛ, bä nyiëëny kɛ ji̱.”

¹⁹ Kä cu ji̱ I-thɛ-rɛl ɛ jiök i̱, “Bakɔ wä kɛ duɔ̱ɔ̱p in di̱i̱t. Kä mi wä maath kɛ pi̱ kɔnɛ ɣɔ̱ɔ̱kä, bäkɛ pik, jakni ni ɣä kä wä kärɔa a thilɛ mi dɔ̱ŋ.”

²⁰ Duundɛ ɣöö cuɛ loc i̱, “/Ci bi wä.” Kä cu Ɛ-dɔm ben raar kä kɛ, kɛ rɛm mi di̱i̱t mi bum bum.

²¹ Kä niɛ mëë ci Ɛ-dɔm kɛ pën wä kɛ wecdɛ. Kä cu ji̱ I-thɛ-rɛl rɔ̱ ri̱t kä kɛ.

Lia̱a̱ Ä-ron

²² Kä cu duɔl I-thɛ-rɛl kɛɛliw jiɛɛn kä Ka-dɛc, cukɛ ben kä Päm Ɣor.

²³ Kä cu Kuoth Nhial ruac kɛ Muthɛ kɛnɛ Ä-ron Pääm Ɣor, këth muɔ̱ɔ̱n Ɛ-dɔm wee i̱,

²⁴ “Bi Ä-ron li̱w. Kɛ ɣöö /cɛ bi wä muun in cä ka̱m ji̱ I-thɛ-rɛl, kɛ ɣöö cia ruacdä lo̱k pi̱i̱ni Mɛ-ri-baa.

²⁵ Käni Ä-ron kɛnɛ gatdɛ ni Ɛl-a-dhar, kä naŋnikɛ Pääm Ɣor.

²⁶ Kä woc bieyni Ä-ron, kä läthnikɛ puɔ̱ny gatdɛ ni Ɛl-a-dhar. Kä bi Ä-ron li̱w ɛn wi̱ni.”

²⁷ Kä cu Muthɛ ɛ la̱t ce̱tnikɛ min ci Kuoth Nhial ɛ la̱r jɛ. Kä cukɛ wä pääm Ɣor nhiam nɛɛni diaal.

²⁸ Kä cu Muthɛ bieyni Ä-ron ka̱m raar, kä cuɛ kɛ la̱th puɔ̱ny gatdɛ ni Ɛl-a-dhar. Kä cu Ä-ron li̱w nhial wi̱i̱ pa̱a̱m ɛn wi̱ni. Kä cu Muthɛ kɛnɛ Ɛl-a-dhar ben piny wi̱i̱ pa̱a̱m.

²⁹ Kä min ci duɔl ɛ nɛn kɛɛliw ɛn ɣöö ci Ä-ron li̱w, cu ji̱ I-thɛ-rɛl diaal Ä-ron par kɛ ni̱n ti jiɛɛn diɔ̱k.