Kuen 2 - RUAC KUƆTH IN RƐL RƆ

Riali puɔ̱tdä thuk duëli ikä

¹ Cu Kuoth Nhial Muthɛ kɛnɛ Ä-ron jiök i̱,

² “Kɛn ji̱ I-thɛ-rɛl a ram ɔ puɔ̱t kä rɔa thaar bɛ̈r thuɔk duëëliɛn, akɛ puɔ̱t kui̱c ni kɛmɛkä ro̱mä diaal.

³ Nɛy tin bi pua̱t kui̱c cuëëc kä käny ca̱ŋ ba thok duëël Juda, min bo̱o̱thdiɛn mɔ Na-con gat A-mi-na-dab.

⁴ Cu pekdiɛn a nɛy ti bathdɔɔri ti jiɛɛn bärɔw wi̱cdɛ ŋuaan wi̱cdɛ kur bäkɛl.

⁵ Kä thok duëël in bi pua̱t kɔriɛn ba thok duëël Yi-tha-kar tin bo̱o̱thdiɛn mɔ Nɛ-tan-el gat Dhu-ar.

⁶ Cu pekdiɛn a nɛy ti bathdɔɔri ti jiɛɛn dhieec wi̱cdɛ ŋuaan wi̱cdɛ kur ŋuaan.

⁷ Ba kɛ guɔ̱ɔ̱r ɛ thok duëël Dhɛ-bu-lun tin bo̱o̱thdiɛn mɔ Ɛli-ab gat Ɣe-lon.

⁸ Cu pekdiɛn a nɛy ti bathdɔɔri ti jiɛɛn dhieec wi̱cdɛ bärɔw wi̱cdɛ kur dhieec.

⁹ Cu ji̱ Juda diaal pekdiɛn a nɛy ti bathdɔɔri ti kuɔ̱r kɛl wi̱cdɛ jiɛɛn bädäk wi̱cdɛ bäkɛl wi̱cdɛ kur ŋuaan. Bi kɔŋ ɣöth ni kɛn kɛ nhiam.

¹⁰ “Kɛ jɔakdɛ bi pua̱t ni thok duëël Rɛ-u-ben kɛ dho̱rkiɛn tin bo̱o̱thdiɛn mɔ Ɛli-dhur gat Cɛ-de-ur.

¹¹ Cu pekdiɛn a nɛy ti bathdɔɔri ti jiɛɛn ŋuaan wi̱cdɛ bäkɛl wi̱cdɛ kur dhieec.

¹² Kä bi thok duëël Cim-on pua̱t thieekädɛ tin bo̱o̱thdiɛn mɔ Cɛ-lu-mi-el gat Dhu-ri-ca-day.

¹³ Cu pekdiɛn a nɛy ti bathdɔɔri ti jiɛɛn dhieec wi̱cdɛ bäŋuan wi̱cdɛ kur diɔ̱k.

¹⁴ Kä ba guɔ̱ɔ̱r ɛ thok duëël Gad tin bo̱o̱thdiɛn mɔ Ɛl-ya-thap gat Rɛ-u-el.

¹⁵ Cu pekdiɛn a nɛy ti bathdɔɔri ti jiɛɛn ŋuaan wi̱cdɛ dhieec wi̱cdɛ kur bäkɛl wi̱cdɛ jiɛɛn da̱ŋ dhieec.

¹⁶ Cu wec Rɛ-u-ben ji̱ kɛ diaal a nɛy ti bathdɔɔri ti kuɔ̱r kɛl wi̱cdɛ jiɛɛn dhieec wi̱cdɛ kɛl wi̱cdɛ kur ŋuaan wi̱cdɛ jiɛɛn da̱ŋ dhieec. Bikɛn a rɛw ɣo̱th.

¹⁷ “Ba kɛmɛkä ro̱mä ɣo̱th ɛ ji̱ Lii-bay kɛ där ɣöthni. Ce̱tnikɛ pua̱tdiɛn ɛ jɛn bi ɣöth kɛ kɛ mɔ, ramɔ nikɛ pekdɛ.

¹⁸ “Kä kui̱c konyä ca̱ŋ bi ɣöth ni pek Ɛ-pa-rim kɛ dho̱rkiɛn tin bo̱o̱thdiɛn mɔ Ɛli-cama gat A-mi-ɣud,

¹⁹ cu pekdiɛn a nɛy ti bathdɔɔri ti jiɛɛn ŋuaan wi̱cdɛ kur dhieec.

²⁰ Kä ba guɔ̱ɔ̱r ɛ thok duëël Ma-na-thɛ tin bo̱o̱thdiɛn mɔ Gam-li-el gat Pɛ-daa-dhur,

²¹ cu pekdiɛn a nɛy ti bathdɔɔri ti jiɛɛn diɔ̱k wi̱cdɛ rɛw wi̱cdɛ kur da̱ŋ rɛw.

²² Bi thok duëël Ben-ya-min ɣöth kɛ kɔriɛn tin bo̱o̱thdiɛn mɔ Ä-bi-dan gat Gid-oni,

²³ cu pekdiɛn a nɛy ti bathdɔɔri ti jiɛɛn diɔ̱k wi̱cdɛ dhieec wi̱cdɛ kur da̱ŋ ŋuaan.

²⁴ Cu wec Ɛ-pa-rim ji̱kɛ diaal pekdiɛn kɛ dho̱rkiɛn a nɛy ti bathdɔɔri ti kuɔ̱r kɛl wi̱cdɛ bädäk wi̱cdɛ kuɔr kɛl. Bi ɣöthdiɛn a diɔ̱ɔ̱k ɣo̱thni.

²⁵ “Kui̱c caam kɛmɛkä bi pek Daan pua̱t thi̱n kɛ dho̱rkiɛn tin bo̱o̱thdiɛn mɔ A-ɣi-ɛ-dhɛr gat A-mi-ca-day.

²⁶ Cu pekdiɛn a nɛy ti bathdɔɔri ti jiɛɛn bäkɛl wi̱cdɛ rɛw wi̱cdɛ kur bärɔw.

²⁷ Ba kɛ guɔ̱ɔ̱r ɛ thok duëël A-cɛr, tin bo̱o̱thdiɛn mɔ Pag-i-el gat Ɔk-ran.

²⁸ Cu pekdiɛn a nɛy ti bathdɔɔri ti jiɛɛn ŋuaan wi̱cdɛ kɛl wi̱cdɛ kur dhieec.

²⁹ Kɛ kɔriɛn ba thok duëël Nap-ta-li, tin bo̱o̱thdiɛn mɔ Nap-ta-li gat E-nan.

³⁰ Cu pekdiɛn a nɛy ti bathdɔɔri ti jiɛɛn dhieec wi̱cdɛ diɔ̱k wi̱cdɛ kur ŋuaan.

³¹ Cu wec Daan ji̱ kɛ diaal kɛ dho̱rkiɛn a nɛy ti bathdɔɔri ti kuɔ̱r kɛl wi̱cdɛ jiɛɛn da̱ŋ dhieec wi̱cdɛ bärɔw wi̱cdɛ kur bäkɛl, bi ka nɛy tin jɔak ɣo̱th, pek ɔ nikɛ pek ɔ.”

³² Ti̱ti̱ kɛ kɛn ji̱ I-thɛ-rɛl tëë ca kuɛn nikɛ dho̱r gua̱nikiɛn, kɛn diaal kɛ dho̱rkiɛn kɛn nɛy tin ca kuɛn, cukɛ a a nɛy ti bathdɔɔri ti kur bäkɛl wi̱cdɛ diɔ̱k wi̱cdɛ kur dhieec wi̱cdɛ dhieec.

³³ Duundɛ ɣöö /ka̱n ji̱ Lii-bay kuɛ̈n rɛy ji̱ I-thɛ-rɛl ce̱tkɛ mëë ci Kuoth Nhial ɛ la̱r Muthɛ.

³⁴ Inɔ cu ji̱ I-thɛ-rɛl ti diaal la̱t ce̱tkɛ mëë ca la̱t Muthɛ, cukɛ pua̱t pe̱kni, kä ɣöthkɛ pe̱kni, ramɔ thok duëëliɛn nikɛ dho̱r gua̱ni.