Kuen 17 - RUAC KUƆTH IN RƐL RƆ

Kɛɛt Ä-ron

¹ Kä cu Kuoth Nhial Muthɛ jiök i̱,

² “Ruacni kɛ ji̱ I-thɛ-rɛl a ji̱ muɔckɛ kɛ kɛtni da̱ŋ wäl rɛw, kɛl kä bo̱o̱th thuɔk duëël kä thuk duëli gua̱ni. Kä gɔ̱ri ramɔ ciötdɛ kä kɛɛtdɛ.

³ Kä gɔ̱ri ciöt Ä-ron kɛɛtdä Lii-bay. Kɛ ɣöö bi thok duëël kɛl tekɛ kɛɛt.

⁴ Kä läthnikɛ rɛy kɛmɛkä ro̱mä kɛ Kuoth Nhial nhiam thandukä matdä ruac guäth in la jekä kɛ ji̱ thi̱n.

⁵ Kä kɛɛt raam mɔ bä mɛkɔ bɛ piɛr. Inɔ ɣän bä go̱o̱nyni ji̱ I-thɛ-rɛl cu ka̱p cuɔ̱ŋ tin gɔanykɛ ni ji̱.”

⁶ Kä cu Muthɛ ruac kɛ ji̱ I-thɛ-rɛl. Kä cu bööthkiɛn diaal jɛ moc kɛtni, bo̱o̱th ɔ kɛ kɛɛt kɛl ce̱tkɛ thuk duëlikiɛn, cua kɛtni wäl rɛw nööŋ. Kä te kɛɛt Ä-ron rɛydiɛn.

⁷ Kä cu Muthɛ kɛtni la̱th rɛy kɛmɛkä ro̱mä kɛ Kuoth Nhial nhiam thandukä matdä ruac.

⁸ Kä mëë ruɔ̱ndɛ cu Muthɛ wä rɛy kɛmɛkä ro̱mä kɛ Kuoth Nhial. Kä nɛnɛ cu kɛɛt Ä-ron raan thuɔk duëël Lii-bay piɛr a bɛ tekɛ gaakni, kä cu gaaknikɛ rɔ lɛp a bɛ tekɛ dɛy.

⁹ Kä cu Muthɛ kɛtni diaal nööŋ raar nhiam Kuɔth Nhial no̱ŋɛ kɛ ji̱ I-thɛ-rɛl diaal. Kä cu ramɔ kɛɛtdɛ ka̱n.

¹⁰ Kä cu Kuoth Nhial Muthɛ jiök i̱, “Locni kɛɛt Ä-ron nhiam thandukä matdä ruac, kä ba jɛ tit ala nyuuth go̱o̱nyni, kɛ ɣöö bi go̱o̱nydiɛn te pek kɛ ɣä, kɛ ɣöö /cikɛ bi li̱w.”

¹¹ Kä cu Muthɛ jɛ la̱t ce̱tnikɛ min ci Kuoth Nhial ɛ la̱r jɛ.

¹² Kä cu ji̱ I-thɛ-rɛl Muthɛ jiök i̱, “Nɛnɛ, kɔn ba̱kɔ li̱w, ca̱kɔ bath ni kɔn diaal.

¹³ Kɛn nɛy diaal ti ci ben thiekä kɛmɛkä ro̱mä kɛ Kuoth Nhial ti, bikɛ li̱w. A ba̱kɔ cu li̱w kɔn diaal?”