Kuen 16 - RUAC KUƆTH IN RƐL RƆ

Luɔ̱c Kora kɛn Da-tan kɛ Ä-bi-ram

¹ Ɛn täämɛ cu Kora gat Yidh-ɣar gat Kɛ-ɣath gat Lii-bay, kɛnɛ Da-tan kɛ Ä-bi-ram gaat Ɛli-ab kɛ Ɔn gat Pɛ-lɛt gat Rɛ-u-ben,

² nath ka̱n, cu kɛ rɔ jiɛc nhiam Muthɛ kɛɛl kɛ tha̱a̱ŋ ji̱ I-thɛ-rɛl ti kur rɛw wi̱cdɛ jiɛɛn dhieec bööth dolä ti ca kuany rɛy wutni ti ŋa̱ckɛ.

³ Cukɛ rɔ dol kɛɛl, gakɛ kɛ Muthɛ kɛnɛ Ä-ron, wäkɛ i̱, “Cia jiääk ɛlɔ̱ŋ! Kɛ ɣöö gɔaa duɔl ji̱kɛ diaal, kä te Kuoth Nhial rɛydiɛn, ɛŋu kap yɛn rɔ nhial ɔ wi̱i̱ ji̱ dolä Kuɔth Nhial?”

⁴ Kä min ci Muthɛ jɛ liŋ, cuɛ rɔ yuɔr piny buupä.

⁵ Kä cuɛ Kora kɛnɛ ji̱ kɔarɛ diaal jiök i̱, “Iruun kɛ runwaŋ bi Kuoth Nhial rɔ nyoth i̱, ɛŋa, kä ɛŋa gɔaa ɔ, kä bɛ jɛ jak kä wä kutdɛ. Ɛn ram ɛ bɛ mɛk ɔ bɛ jak kä wëë kutdɛ.

⁶ Lät ni nɛmɛ Kora yɛnɛ ji̱ kɔaru diaal, muɔcɛ rɔ kɛ thääk maac.

⁷ Läthni mac rɛydiɛn kä läthni wäl in kurkur rɛydiɛn nhiam Kuɔth Nhial i̱, ruun kɛ run waŋ. Kä bi ram in ca mɛk ɛ Kuoth Nhial cu gɔaa. Cia pal raar yɛn gaat Lii-bay!”

⁸ Kä cu Muthɛ Kora jiök i̱, “Liɛŋɛ jɛ ɛn täämɛ yɛn gaat Lii-bay,

⁹ a kuɛ kuɛ̈ɛ̈ ɛlɔ̱ŋ ɛn ɣöö ci Kuoth I-thɛ-rɛl yɛ lɛy rɛy ji̱ I-thɛ-rɛl diaal kɛ ɣöö cɛ yɛ nööŋ thieekädɛ i̱, bia ben lät rɛy kɛmɛkä Kuɔth Nhial kɛnɛ ɣöö bia rɔ cuŋ nhiam nath kä lät yɛn kɛ ruac Kuɔth.

¹⁰ Kɛnɛ ɣöö cɛ yɛ nööŋ thiekädɛ, yɛnɛ gaat muɔɔr diaal gaat Lii-bay kɛɛl kɛ ji̱? Kä ŋotdi go̱o̱ri böth ruac Kuɔth bä?

¹¹ Kɛ kui̱c ɛmɔ cia rɔ jëc Kuoth Nhial yɛnɛ ji̱ kɔaru tin cia rɔ dol kɛɛl. Kä Ä-ron ɛŋa, mɔ deri gaak kɛ jɛ mɔ?”

¹² Cu Muthɛ raaŋ ja̱k cɔlɛ Da-tan kɛnɛ Ä-bi-ram gaat Ɛli-ab, kä cukɛ wee i̱, “/Ca̱kɔ bi ben.

¹³ Ɛ mi tɔt ɛn ɣöö cikɔ nööŋ raar i̱, naŋikɔ muun caak kɛnɛ liɛth tuar, gula ɣöö bikɔ ben näk däärdɔaar, kä ɛ jɛn jaki rɔ kä kuäära mɔ?

¹⁴ Kä /keni kɔ lɛ naŋ muun caak kɛnɛ liɛth tuar. Kä /cikɔ moc kɛ ka̱a̱k wal kɛ kui̱ kɔaŋ kiɛ bɛl, a bi wäŋ nɛɛni ti̱ti̱ ku can? /Ca̱kɔ bi ben.”

¹⁵ Cu Muthɛ lɔcdɛ jiääk ɛlɔ̱ŋ, kä cuɛ Kuoth Nhial jiök i̱, “/Cu muckiɛn nhɔk, /ka̱n mul raam kɛl kä kɛ ka̱n kä thilɛ ram mi cä ciɛŋ ɛ jiäk kä kɛ.”

¹⁶ Cu Muthɛ Kora jiök i̱, “Ji̱n yɛnɛ ji̱ kɔaru kɛ Ä-ron i̱, ruun bia te nhiam Kuɔth Nhial.

¹⁷ Kä ɛ ramɔ kä yɛ kän thak maacdɛ kä bɛ rɛydɛ moc wäl in kurkur nhiam Kuɔth Nhial, thääk ti kur rɛw wi̱cdɛ jiɛɛn dhieec. Amäni ji̱n yɛnɛ Ä-ron ɛ ramɔ kän thak maacdɛ.”

¹⁸ Ɛ jɛn cu ramɔ thak maacdɛ ka̱n, kä cuɛ jɛ moc mac kɛnɛ wäl in kurkur, kä cukɛ ben cuɔ̱ŋ thok kɛmɛkä kɛ Muthɛ kɛnɛ Ä-ron kɛɛl.

¹⁹ Cu Kora duɔl kɛɛliw cuŋ go̱lä thok kɛmɛkä, kä cu buay Kuɔth jɔɔc kä ji̱ dolä diaal.

²⁰ Kä cu Kuoth Nhial Muthɛ kɛnɛ Ä-ron jiök i̱,

²¹ “Lɛ̈yɛ rɔ̱ rɛy nɛɛni ti̱ti̱, kɛ ɣöö ɛn täämɛ bäkɛ dup.”

²² Kä cukɛ rɔ yuɔr piny kɛ pal, laar kɛn ɛ i̱, “Aɣ Kuoth, Kuoth yieekä nɛɛni diaal, a dëë ram kɛl ku duer kä derɛ cua̱ duer nɛɛni diaal?”

²³ Kä cu Kuoth Nhial Muthɛ jiök i̱,

²⁴ jio̱k ni duɔl i̱, “Nɔ̱a̱nɛ rɔ̱ kɛ dhɔr Kora kɛnɛ Da-tan kɛ Ä-bi-ram.”

²⁵ Cu Muthɛ rɔ jiɛc kä cuɛ wä kä Da-tan kɛnɛ Ä-bi-ram, kä cu di̱t I-thɛ-rɛl ɛ guɔ̱ɔ̱r.

²⁶ Kä cuɛ duɔl jiök i̱, “Ɣä la̱ŋä yɛ, lɛ̈yɛ rɔ, gekä kä dho̱ri nɛɛni ti jiäk ti̱ti̱, kä /cuarɛ duɔ̱ɔ̱r gueer kä nyinkiɛn, kɛ ɣöö /ca ji̱ bi puɔc dɔɔr kɛ dueerkiɛn kɛɛl.”

²⁷ Ɛ jɛn cu duɔl jiɛɛn thieekä dhɔaar Kora kɛnɛ Da-tan kɛ Ä-bi-ram. Kä cu Da-tan kɛnɛ Ä-bi-ram ben raar kä cukɛ cuɔ̱ŋ thukni duëlikiɛn kɛɛl kɛ mänkiɛn kɛnɛ gaatkiɛn.

²⁸ Cu Muthɛ wee i̱, “Ŋa̱cɛ jɛ ɛn ɣöö jäk ɣä Kuoth Nhial kɛ ɣöö bä ti̱ti̱ ben la̱t, a /ci mɔ a ruacdä.

²⁹ Kä mi wä nɛy ti̱ti̱ li̱w kɛ lia̱a̱ in la li̱w kɛ nɛy diaal, kiɛ bi riɛk in la jek naath kɛ jek. /Ci ɣä jäk Kuoth Nhial.

³⁰ Kä mi ci Kuoth Nhial mi ka̱n me̱t la̱t, la̱t. A ci piny rɔ lɛp, kä cɛ kɛ roc kɛɛl kɛ nyinkiɛn diaal, a cikɛ wä ni jɔɔkni a tëk, bia jɛ ŋa̱c ɛn ɣöö kɛn wutni ti̱ti̱ ca Kuoth Nhial lo̱k.”

³¹ Kä niɛ min cɛ thuɔ̱k kɛ lat rietni ti̱ti̱, cu piny in tekɛ thi̱n rɔ lɛp.

³² Cuɛ rɔ lɛp kä cuɛ kɛ roc, kɛɛl kɛ nyinkiɛn kɛ wutni tin te dhɔr Kora.

³³ Cu kɛn diaal wä ni jɔɔkni a tëk, kä cu piny kɛ kuɔ̱m rɛydɛ. Cuɛ cua̱ riawdiɛn kä duɔl nɔ.

³⁴ Kä cu ji̱ I-thɛ-rɛl diaal tëë te thi̱n rɔ bar kɛ luliɛn. Kɛ ɣöö laar kɛnɛ i̱, “Roc mun nɛy!”

³⁵ Kä cu mac ben kä Kuoth Nhial, cuɛ nɛy ti kur da̱ŋ rɛw wi̱cdɛ jiɛɛn dhieec tëë waŋkɛ wäl in kurkur pɛt.

Kɔ̱ɔ̱li maac

³⁶ Cu Kuoth Nhial Muthɛ jiök i̱,

³⁷ “Jiök ni Ɛl-a-dhar gat Ä-ron bo̱o̱th palä kɛ ɣöö bɛ wäl in waŋkɛ woc rɛy maac, kä a jɛ yiäk mac ɛn wa̱nɔ, kɛ ɣöö kɛ ti rɛ̈l kɛ rɔ.

³⁸ Cu thääk wutni tin ci dueerkiɛn kɛ jak kä li̱w, täth ala kuum wec yi̱kä, ci ka ti gɔw kɛ ɣöö cikɛ kɛ thöp Nhiam Kuɔth Nhial. Kä cua nyuuth kä ji̱ I-thɛ-rɛl.”

³⁹ Kä cu Ɛl-a-dhar thääk cikä min bo̱r ka̱n, tëë thöpkɛ mac kɛ kɛ nɛy tëë ca lar. Cua kɛ täth ala kuum wec yi̱kä.

⁴⁰ Kɛ ɣöö ba tim kä ji̱ I-thɛ-rɛl, ram mi /ci mɔ a bo̱o̱th palä kiɛ /ci mɔ a kuɛ̈ɛ̈ Ä-ron, a jɛ ci bä thiekä kɛ ɣöö bɛ wal ben waŋ nhiam Kuɔth Nhial, kɛ ɣöö /cɛ bi ce̱tkɛ Kora kɛnɛ ji̱ kɔaarɛ. Ce̱tkɛ min ci Kuoth Nhial ɛ la̱r Ɛl-a-dhar kɛ thok Muthɛ.

Ka̱n Ä-ron kɛ naath

⁴¹ Kɛ cäŋ in rɛwdɛ cu duɔl ji̱ I-thɛ-rɛl kɛɛliw gaak kɛ Muthɛ kɛnɛ Ä-ron laarkɛn ɛ i̱, “Cia nɛɛ Kuɔth Nhial näk.”

⁴² Kɛ kɔr kä min ci duɔl rɔ dol kɛ kui̱ Muthɛ kɛnɛ Ä-ron, cukɛ rɔ riet kui̱ kɛmɛkä ro̱mä, nɛnɛ cu pua̱r ɛ kum. Kä cu buay Kuɔth jɔɔc.

⁴³ Cu Muthɛ kɛnɛ Ä-ron ben thok kɛmɛkä ro̱mä.

⁴⁴ Cu Kuoth Nhial Muthɛ jiök i̱,

⁴⁵ “Woc rɔ ɛn rɛy dolä nɛmɛ, kɛ ɣöö bäkɛ thuk ɛn täämɛ.” Kä cukɛ rɔ̱ yuɔr piny kɛ pal.

⁴⁶ Kä cu Muthɛ Ä-ron jiök i̱, “Käni thak maacdu, kä kue̱ny ni jɛ mac wi̱i̱ yi̱kä, kä mocɛ kɛ wäl in la waŋkɛ, kä naŋni jɛ rɛy dolä kɛ pɛ̈th, kɛ ɣöö bikɛ luɛl, ci kɛ̈c Kuɔth ben a ci juey rɔ ku thuŋ tok.”

⁴⁷ Ɛ jɛn cu Ä-ron ɛ la̱t ce̱tkɛ min ci Muthɛ ɛ la̱r jɛ. Kä cuɛ riŋ rɛy dolä, kä ci juey rɔ ku thuŋ tok rɛy nath. Cuɛ wäl la̱th thi̱n kä cuɛ naath luɛl.

⁴⁸ Kä cuɛ cuɔ̱ŋ kam nɛɛni tin ci li̱w kɛnɛ tin tëk. Kä cu juey cu cuɔ̱ŋ.

⁴⁹ Kä cu pek nɛɛni ti ci li̱w kɛ juey a bathdɔɔri wälŋuaan wi̱cdɛ kur bärɔw, a /ci nɛy tin ci li̱w kɛ kui̱ Kora te thi̱n.

⁵⁰ Kä cu Ä-ron loc kä Muthɛ thok kɛmɛkä ro̱mä kɛ Kuoth Nhial, mëë ci juey cuɔ̱ŋ.