Kuen 15 - RUAC KUƆTH IN RƐL RƆ

Ŋuɔ̱t kɛ kui̱ mucni

¹ Cu Kuoth Nhial ruac kɛ Muthɛ,

² jio̱kni ji̱ I-thɛ-rɛl i̱, “Mi wä yɛn ben muun in bia ciɛŋ, min cä ka̱m yɛ,

³ kä bia muc thöp Kuoth Nhial rɛy ɣɔ̱ɔ̱kun kiɛ deetkun, mi bia thöp ala muc mi waŋkɛ kiɛ luur, mi thuki ya̱c kiɛ ɛ muc cärä lɔacdu kiɛ muc ca̱ŋ ti̱mädu mi la duŋ tɛthkä lɔaac Kuɔth Nhial.

⁴ Ɛ ramɔ tho̱p mucdɛ Kuoth Nhial ɔ a jɛ no̱o̱ŋ muc bɛɛl, wa̱l wa̱a̱li nuɔ̱p mi ko̱k ko̱k, kä ca lia̱a̱p kɛ theemni liɛth da̱ŋ ŋuaan.

⁵ Kɛ muc kɔaŋ mi mathkɛ kä bɛ ŋuaan ŋuaani theemni liɛth rialikä kɛɛl kɛ muc mi waŋkɛ, kiɛ kɛɛl kɛ luur rɔɔmä.

⁶ Kiɛ kɛɛl kɛ ruath dɛ̈ɛ̈l rɔɔmä mi bi rialikä kɛ muc bɛɛl kɛɛl, rɛw kä wäl themä nupä mi ca lia̱a̱p kɛ diɔ̱k diɔ̱ɔ̱kni them liɛth.

⁷ Kä kɛ muc in mathkɛ, bi diɔ̱k diɔ̱ɔ̱kni kɔaŋ thöp, ala ŋuäny mi gɔaa kä Kuoth Nhial.

⁸ Kä mi wi̱i̱ riali muc tha̱a̱k ikä, mi thuki ya̱c kiɛ ala muc tɛthkä lɔaac duŋ Kuɔth Nhial,

⁹ ɛ ni ɣöö a jɛ no̱o̱ŋ muc bɛɛl mi diɔ̱k wäli them nupä kɛɛl kɛnɛ muc tha̱a̱k, mi ca lia̱a̱p kɛ dhieec theemni liɛth.

¹⁰ Kɛ muc in mathkɛ bɛ dhieec themä kɔaŋ thöp, ala muc mi waŋkɛ kɛ mac, ala ŋuäny mi gɔaa kä Kuoth Nhial.

¹¹ “Kɛ kɛn tin ba thöp kɛɛl kɛ thäk kiɛ ruath dɛ̈ɛ̈l rɔɔmä, kiɛ kɛɛl kɛ ruath dɛ̈ɛ̈l, kiɛ kɛɛl kɛ dɛy deet.

¹² Nikɛ pek kä tin ci rialikä bi jɛ la̱t kɛɛl kɛ kɛ ce̱tkɛ pekdiɛn.

¹³ Kä nɛy diaal tin ji̱ wec bikɛ ti̱ti̱ la̱t nikɛ jɛn duɔ̱p mucni nɔmɔ, muc maac ala ŋuäny mi gɔaa kä Kuoth Nhial.

¹⁴ Kä mi ɛ ram mi guä mi cieŋ kɛɛl kɛ yɛ nikɛ ri̱cnikun, kä go̱rɛ ɣöö tho̱pɛ muc kɛ mac ala ŋuäny mi gɔaa kä Kuoth Nhial, a jɛ lätdɛ ce̱tnikɛ la̱tdun.

¹⁵ Kä ba jɛn ciaŋ ɛ kɛl ɔ kä duɔl kɛɛliw, amäni tin cieŋ rɛydun, ɛ ciaŋ mi rɛl rɔ rɛy ri̱cnikun a wä kɛ wä, ce̱tkɛ mɔ te yɛn ɔ. Bi nɛy tin cieŋ rɛydun ce̱tkɛ yɛ nhiam Kuɔth Nhial.

¹⁶ Kɛ ŋuɔ̱t kɛl kɛ ruac kɛl bikɛ tëë yɛ amäni juɔ̱r in te rɛydun.”

¹⁷ Ɛ jɛn cu Kuoth Nhial ruac kɛ Muthɛ,

¹⁸ jio̱kni ji̱ I-thɛ-rɛl i̱, “Mi wä yɛn wä muun in naŋä yɛ thi̱n.

¹⁹ Kä bia mi̱ethdɛ cam, bia Kuoth Nhial moc muc.

²⁰ Kä mi̱th bɛɛl tin nhiam bia gua̱r wacä thöp ala muc, kä muc bɛɛl tin ca kɔ̱m bia jɛ thöp.

²¹ Kä mi̱th bɛɛlkun, tin nhiam bia jɛ la ka̱mɛ Kuoth Nhial ri̱cnikun diaal.

²² “Kä mi wä raan ɛ kui̱c, kä /kenɛ kɛ tim kɛn ŋuɔ̱t tëë ci Kuoth Nhial kɛ la̱t Muthɛ,

²³ kɛn tëë diaal tëë cɛ la̱t yɛ kɛ Muthɛ nikɛ cäŋ ëë tho̱pɛ nikɛ a wä kɛ wä rɛy ri̱cniku diaal.

²⁴ Mi la̱t kɛ jɛ a/ka̱n ɛ ŋa̱c, kä kui̱c duɔl kɛɛliwdɛ ba thäk kɛl thöp ala muc mi waŋkɛ, ala ŋuäny mi gɔaa kä Kuoth Nhial. Ba muc bɛɛl thöp kɛnɛ muc kɔaŋ kɛɛl kɛ jɛ ce̱tnikɛ luɔtdɛ, kɛ thäk dɛ̈ɛ̈l böwä kɛl mi la muc dui̱rä.

²⁵ Kä bi bo̱o̱th palä ji̱ I-thɛ-rɛl diaal luɛl kä ba kɛ cu pälikä, kɛ ɣöö ɛ duer mi /ca lot ni jɛ, kä bikɛ mucdiɛn nööŋ. Kä ba wa̱ŋ Kuoth Nhial, kɛnɛ muc dui̱rädiɛn, kɛ ɣöö cikɛ duer.

²⁶ Kä ba duɔl ji̱ I-thɛ-rɛl diaal pälikä, amäni jur tin cieŋ rɛydiɛn, kɛ ɣöö duer cɛ nɛy diaal dɔp.

²⁷ “Kä mi ci duer ni ram kɛl, a jɛ no̱o̱ŋ dɔ dɛ̈ɛ̈l böwä mi gur kɛl ala luur dui̱rä.

²⁸ Kä bi bo̱o̱th palä jɛ luɛl ɛn ram in ci duer la̱t a kui̱cɛ, kä ba jɛ cu pälikä.

²⁹ Kä bia tekɛ ŋuɔ̱t kɛ kui̱ raam mi bi duer kɛ guäc. Kɛ kui̱ ram mi la gua̱n wec kɛnɛ ram mi yieni jɛn kɛɛl kɛ yɛ.

³⁰ Kä ram mi wä duer a ŋäcɛ jɛ, mi ɛ raan wec kiɛ ɛ jur mi cieŋ rɛydun lätdɛ jɛ kä Kuoth Nhial, ɛn ram ɛmɔ ba jɛ tuɔ̱k raar kä nɛɛkɛ.

³¹ Kɛ ɣöö cɛ ruac Kuɔth lo̱k, kä cɛ ŋuɔ̱tdɛ to̱l. Ɛn raamɔ ɛ puc ba jɛ tuɔ̱k raar kä nɛɛkɛ, kä bɛ cua riɛkdɛ.”

Ram mi /ke̱n cäŋ lɔ̱ŋä tit

³² Kɛ gua̱th ëë te ji̱ I-thɛ-rɛl däärdɔaar, cukɛ wut mi kuany tɔŋ jek kɛ cäŋ lɔ̱ŋä.

³³ Kä cu nɛy tëë jekɛ jɛ ɛ kuanyɛ tɔŋ jɛ nöŋ Muthɛ kɛnɛ Ä-ron, kɛ duɔl I-thɛ-rɛl kɛɛliw.

³⁴ Cua jɛ la̱th guäth mi gaŋ kɛ jɛ thi̱n, kɛ ɣöö kuec kɛ mɔ dëë lät kä jɛ mɔ.

³⁵ Kä cu Kuoth Nhial Muthɛ jiök i̱, “Ɛn wut ɛmɔ na̱kɛ jɛ. Ɛ duɔl kɛɛliw jɛ bo̱k kɛ pääm raar jɔk wec.”

³⁶ Kä cu duɔl ɛ naŋ raar rɛy wec, kä cua jɛ bök kɛ pääm amäni lia̱a̱dɛ, ce̱tkɛ min ci Kuoth Nhial ɛ la̱t Muthɛ.

Dhuɔɔr biey

³⁷ Cu Kuoth Nhial Muthɛ jiök i̱,

³⁸ “Ruacni kɛ ji̱ I-thɛ-rɛl i̱, ruɔ̱pɛ thuk bieynikun dhuɔɔr rɛy ri̱cni diaal, kä bia thukiɛn yiën cuit, mi yiel.

³⁹ Kä bia kɛ la guɛcɛ kɛn cueetni tɔ̱ yiel tɔ̱tɔ̱. Bi yɛn luëëk Kuɔth Nhial diaal la tiɛmɛ, kä bia kɛ la̱t a /cia bi guɔ̱ɔ̱r ni cär lo̱cnikun kɛnɛ tin nɛɛn wäŋkun kɛ. A bia la̱t ni nyin leerä tin nhɔk yɛn nikɛ.

⁴⁰ Inɔ bia ŋuɔ̱tkä diaal tim, kä lëyɛ rɔ Kuothdun.

⁴¹ Ɛ ɣän Kuoth Nhial Kuothdu, mëë naŋ ji̱ raar ro̱o̱l I-jëp kɛ ɣöö ba̱a̱ Kuothdu. Ɛ ɣän Kuoth Nhial Kuothdu.”