Kuen 13 - RUAC KUƆTH IN RƐL RƆ

Jäkni ji̱ I-thɛ-rɛl kɛ lieem kä Kɛ-naan

¹ Cu Kuoth Nhial Muthɛ jiök i̱,

² “Jäk ni nɛy ti bi ro̱l Kɛ-naan in cä ka̱m ji̱ I-thɛ-rɛl wä lim. Thuk duëli gua̱ni bi ram kɛl min mɔ bo̱o̱th ja̱k.”

³ Ni̱nɔ cu Muthɛ kɛ ja̱k däärdɔaar Pa-ran ce̱tkɛ min ci Kuoth Nhial ɛ lar, kä kɛn diaal kɛ bööth ji̱ I-thɛ-rɛl.

⁴ Kä ciöötkiɛn ti̱n, cu pek Rɛ-u-ben cua Cä-muwä gat Dha-kur,

⁵ pek Cim-on cua Ca-pat gat Ɣori,

⁶ pek Juda cua Ka-leb gat Yɛ-pö-nɛ.

⁷ Pek Yi-tha-kar cua Yig-al gat Jo-thɛp.

⁸ Pek Ɛ-pa-rim cua Ɣo-ce-ya gat Nun,

⁹ pek Ben-ya-min cua Pɛ̈l-ti gat Rapu.

¹⁰ Pek Dhɛ-bu-lun cua Ga-di-el gat Thodi.

¹¹ Pek Jo-thɛp thok duëël Ma-na-thɛ cua Gaddi gat Thuthi,

¹² pek Daan cua A-mi-el gat Gɛ-ma-li,

¹³ pek A-cɛr cua Thɛ-tur gat Mi-ka-el,

¹⁴ pek Nap-ta-li cua Nabi gat Bɔp-thi,

¹⁵ pek Gad cua Gɛ-u-el gat Ma-ki.

¹⁶ Cu tɔ̱tɔ̱ a ciööt nɛɛni tëë ci Muthɛ kɛ ja̱k i̱, ba mun wä lim. Kä cu Muthɛ Ɣo-ce-ya gat Nun ni Jɔ-cua cɔl.

¹⁷ Kä cu Muthɛ kɛ ja̱k kɛ ɣöö ba mun Kɛ-naan wä lim, jio̱k ɛ kɛ i̱, “Wiaa kä Nɛ-gɛb, kä ra̱thɛ wi̱i̱ päämni,

¹⁸ kä wiaa guicɛ mun, mi nɛy tin ciaŋkɛ jɛ kɛ nɛy ti buɔ̱m buɔ̱ɔ̱m ŋuankɛ kiɛ kui̱ykɛ,

¹⁹ kä ɛn mun gɔaa ɛ kiɛ jiäkɛ, kä ti̱eckiɛn kɛ ti̱ec ti buɔ̱m buɔ̱ɔ̱m kiɛ kɛ kɛmɛni,

²⁰ ɛ mun mi riäŋ kiɛ canɛ, tëë jiɛɛn kiɛ thil ɛ jiɛɛn. Buɔ̱mɛ rɔ̱, kä nööŋɛ dɛy jiɛɛn thi̱n.” Ɛn täämɛ ɛ gua̱a̱th ciɛkä bɛɛl tin nhiam.

²¹ Ɛ jɛn cukɛ wä, wa mun lim tuɔkɛ jɛ ni däärdɔaar Dhin a wä ni kä Rɛ-ɣob cothä nath kä Ä-math.

²² Cukɛ wä kä Nɛ-gɛb, kä cukɛ ben kä Ɣɛb-ron kɛnɛ Ä-ɣi-man, Ce-cay kɛ Tal-may, mëë cieŋ kuay Ä-nak thi̱n. Gua̱a̱th ëë ca Ɣɛb-ron täth kɛ kɔr runi da̱ŋ bärɔw a /ka̱n Dho-an kä I-jëp ni täth.

²³ Kä cukɛ ben lo̱o̱lä Ɛc-kol kä cukɛ yuan jiaath kɛl mi ci nook kɛ dɛy kä cɛ rɛk jɔp, cukɛ jɛ kap kɛn da̱ŋ rɛw, cukɛ dɛy ŋɔ̱a̱p nööŋ kɛɛl kɛnɛ thɔa̱a̱r.

²⁴ Ɛn gua̱a̱th ɛ mɔ cɔal ciötdɛ i̱, lo̱o̱l Ɛc-kol kɛ kui̱ yuanä min ca ŋok thi̱n ɛ ji̱ I-thɛ-rɛl.

Luuc ruac limä

²⁵ Kɛ thuɔ̱k ni̱ni ti jiɛɛn da̱ŋ ŋuaan cu lieem luny jɔk Limä muɔ̱ɔ̱n.

²⁶ Cukɛ ben kä Muthɛ kɛnɛ Ä-ron kɛ duɔl ji̱ I-thɛ-rɛl diaal däärdɔaar Pa-ran kä Ka-dɛc. Cukɛ kɛ nöŋ ruac, kä cukɛ kɛ nyuɔ̱th dɛy jiɛɛn tin ci kɛn kɛ nööŋ muun Kɛ-naan.

²⁷ Kä cu kɛ jɛ jiök i̱, “Cakɔ luny jɔk muun in cikɔ jäk kä thi̱n. Ɛ mun caak kɛnɛ tuaar, ti̱ti̱ kɛ dɛy jiɛɛn kɛ.

²⁸ Ɛ ni ɣöö kɛn nɛy tin ciaŋkɛ jɛ kɛ nɛy ti buɔ̱m buɔ̱ɔ̱m kä ti̱eckiɛn kɛ ti̱ec ti buɔ̱m buɔ̱ɔ̱m ɛlɔ̱ŋ kä cakɔ kuay Ä-nak nɛn thi̱n bä.

²⁹ Cieŋ ji̱ Ä-ma-lek kä Nɛ-gɛb, kä ji̱ Ɣɛ̈th kɛnɛ ji̱ Yɛ-buth kɛ ji̱ Ɛ-mor cieŋkɛ däär wec pa̱a̱m. Kä ji̱ Kɛ-naan cieŋkɛ wi̱i̱ yiëër kɛnɛ taŋ kiɛr Jɔr-dɛn.”

³⁰ Duundɛ ɣöö cu Ka-leb naath gok nhiam Muthɛ, wee i̱, “Wanɛ ɛn täämɛ banɛ mun wä ka̱n, kɛ ɣöö ban ɛ jɛ luäŋ kɛ käni.”

³¹ Kä cu nɛy tin ci wä kɛɛl kɛ jɛ wee i̱, “Canɛ kɛ /dëë me̱t luäŋ kɛ juc. Kɛ ɣöö bum nikɛn kä kɔn.”

³² Inɔ cukɛ ji̱ I-thɛ-rɛl nöŋ ruac kacä mi jiäk kɛ kui̱ muɔ̱ɔ̱n ëë ci kɛn ɛ wä lim, ɛ laar kɛn ɛ i̱, “Ɛn mun ëë cakɔ wä lim, ɛ mun mi wuth nɛy tin te thi̱n piny. Kä nɛy diaal tëë cakɔ nɛn thi̱n kɛ nɛy ti ba̱r ba̱a̱r.

³³ Ɛn wani ca̱kɔ Nɛ-pɛ-lim gat Ä-nak raan Nɛ-pɛ-lim nɛn, wäŋnikɔ cua̱ kɔ ce̱tnikɛ rak, inɔ cua̱ kɔ ce̱tkɛ rak waaŋdiɛn bä.”