Kuen 12 - RUAC KUƆTH IN RƐL RƆ

Gëw Mir-yam kɛnɛ Ä-ron kɛ Muthɛ

¹ Cu Mir-yam kɛnɛ Ä-ron ruac kɛ kui̱ Muthɛ, kɛ ɣöö cɛ kuɛɛn kɛ ciek mi nya Kuc.

² Kä cukɛ wee i̱, “Ɛn Kuoth Nhial ruacɛ kɛ Muthɛ kä rɔa inu? A /cɛ ruac kɛ kɔ bä inu?” Kä cu Kuoth Nhial ɛ liŋ.

³ Kä Muthɛ ɛ ram mi kɔ̱c kɔ̱c, kɔ̱c ni jɛn kä nɛy diaal tin te wi̱i̱ muɔ̱ɔ̱n.

⁴ Kä cu Kuoth Nhial Muthɛ kɛnɛ Ä-ron kɛ Mir-yam pärikä jiök ɛ kɛ i̱, “Bia raar yɛn da̱ŋ diɔ̱k kä awiaa kä kɛmɛkä ro̱mä.” Kä cu kɛ ben raar kɛn da̱ŋ diɔ̱k.

⁵ Kä cu Kuoth Nhial ben piny kɛ wuɔ̱n puɔ̱rä, kä cuɛ cuɔ̱ŋ thok kɛmɛkä, kä cuɛ Ä-ron kɛn Mir-yam cɔl, kä cu kɛn da̱ŋ rɛw ben raar.

⁶ Kä cuɛ wee i̱, “Liɛŋɛ ruacdä, mi tëë kɛ gök mia̱a̱ rɛydun, ɣän Kuoth Nhial bä rɔ nyuɔ̱th jɛ kɛ nyuuth, bä ruac kɛ jɛ kɛ la̱k.

⁷ Kä ŋäc ni jɛ i̱, ja̱ŋdä ni Muthɛ /cɛ tëë nɔ. Luɔ̱th kɛ ni jɛ dhɔɔrä kɛɛliw.

⁸ Kɔnɛ jɛ ca̱kɔ ruac kɛ thuk kɔ a liɛŋ kɛ jɛ, a /ci mɔ a ruac rɛy muɔ̱th, kä cɛ ta̱a̱ Kuɔth Nhial nɛn. Kuɛ la ŋu /ci yɛn dual kɛ ruac kɛ kui̱ jäŋädä ni Muthɛ mɔ?”

⁹ Kä cu kɛ̈c Kuɔth Nhial di̱t kä kɛ, kä cuɛ kɛ ba̱ny piny.

¹⁰ Kä nɛ̈n ɛ jɛ min ci wuɔ̱n jiɛɛn wi̱i̱ kɛmɛkä, cu Mir-yam tekɛ dhɔp mi buɔy ce̱tnikɛ kën, kä cu Ä-ron rɔ riet Mir-yam, kä cuɛ nɛn tëë kɛ dhɔp.

¹¹ Kä cu Ä-ron Muthɛ jiök i̱, “Aɣ, kuäärä, cu kɔ moc duer kɛ ɣöö cakɔ lät dɔ̱ɔ̱rä kä cakɔ duer.

¹² Kä a /ci li̱w ce̱tkɛ ram mi ci tha̱a̱ŋ ri̱eŋdɛ rɔ cam, mëë bëë raar ji̱ man.”

¹³ Kä cu Muthɛ Kuoth Nhial pal i̱, “Aɣ, Kuoth la̱ŋä ni ji̱, jak ni jɛ kä gɔaa.”

¹⁴ Duundɛ ɣöö cu Kuoth Nhial Muthɛ jiök i̱, “Mi ci gua̱n ruɛy ŋuɔl waaŋdɛ, /cɛ dëë pöc kɛ ni̱n bärɔw? Läth ni jɛ raar rɛy wec kɛ nin da̱ŋ bärɔw, kɛ kɔrɛ bia cu luɔ̱ɔ̱c wi̱c.”

¹⁵ Inɔ cua Mir-yam la̱th raar rɛy wec kɛ ni̱n bärɔw. Kä /ken naath ɣöth ɛ ni̱ni tɔ̱tɔ̱ amäni mëë ca Mir-yam luɔ̱ɔ̱c wi̱c

¹⁶ Kɛ kɔrɛ cu naath ɣöth kä Ɣä-dhe-rot, kä cukɛ wä pua̱t däärdɔaar Pa-ran.