Kuen 10 - RUAC KUƆTH IN RƐL RƆ

Kaaŋ cikä in bo̱r

¹ Cu Kuoth Nhial Muthɛ jiök i̱,

² “Täth kaaŋni cikä min bo̱r da̱ŋ rɛw. Kɛ dey bikɛ täth, kä bikɛ la cɔɔli duɔl, kɛnɛ ɣöth wec.

³ Mi wa kɛn da̱ŋ rɛw koth, bi duɔl kɛɛliw rɔ mat guäth kɛl nhiamdu thok kɛmɛkä ro̱mä.

⁴ Duundɛ ɣöö mi ca koth ni kɛl, bi bööth thukni duëli I-thɛ-rɛl rɔ̱ duɔ̱l ji̱ kärɔ̱.

⁵ Kä mi wä köök ni yɛn, bi thok duëël in ci pua̱t kui̱c känyä ca̱ŋ ɣöth.

⁶ Kä mi wi̱i̱ köök in rɛwdɛ nyɔk, bi thok duëël in te cuëëc ɣöth, ba köök ko̱k gua̱th in ɣöthkɛ.

⁷ Kuɛ la ɣöö mi wä mat ni duɔl guäth kɛl bi koth ni kaaŋ /ci bi köök ni ji̱n.

⁸ Kä bi gaat Ä-ron tin bööth palä kaaŋ koth, ba duŋ ŋuɔ̱tniku mi do̱raar amäni ri̱c tɔ̱ bi ben tɔ̱.

⁹ Kä mi wi̱i̱ wä ko̱o̱r muundun kɛ gua̱n tɛ̈run mi ci yɛ dɛ̈p, kuɔthɛ kaaŋ kɛ ɣöö bi Kuoth Nhial Kuothdun yɛ tim, kä bia kään kä gua̱n tɛ̈run.

¹⁰ Kä bia kaaŋ koth kɛ tɛ̈th lɔacdun kɛnɛ gua̱a̱th matädun, kɛnɛ tuk pathdun, kä bi kaaŋ koth bäkɛ kui̱ mucnikun tin waŋkɛ kɛ muc malädun, ba yɛ jak kä tiɛmkɛ nhiam Kuɔthdun. Ɛ ɣän Kuoth Nhial Kuothdun.”

Jiɛɛn ji̱ I-thɛ-rɛl kä Thi-nay

¹¹ Kɛ pay in rɛwdɛ kä ruɔ̱n in rɛwdɛ, cu wuɔ̱n rɔ kap nhial wi̱i̱ kɛmɛkä ro̱mä,

¹² cu ji̱ I-thɛ-rɛl ɣöth bua̱a̱ni däärdɔaar Thi-nay. Cu wuɔ̱n ben wi̱i̱ kɛmɛkä ro̱mä däärdɔaar Pa-ran.

¹³ Kä cukɛ ɣöth kɛ ɣöth in nhiam kɛ ruac Kuɔth Nhial kɛ thok Muthɛ.

¹⁴ Cu ɣöth ni wec Juda kɛ nhiam kɛ ji̱kɛ diaal, kä cu bo̱o̱thdiɛn a Na-con gat A-mi-na-dab.

¹⁵ Kä cua thok duëël Yi-tha-kar bo̱th ɛ Nɛ-tan-el gat Dhu-ar.

¹⁶ Kä cu Ɛli-ab gat Ä-ron a bo̱o̱th thuɔk duëël Ɣe-lon.

¹⁷ Kä mi ca kɛmɛkä ro̱mä ka̱p piny, bi gaat Ger-con kɛnɛ gaat Mɛ-ra-ri tin la kapkɛ kɛmɛkä ɣo̱th.

¹⁸ Kä bi ɣöth wec Rɛ-u-ben ɣöth tin bo̱o̱thdiɛn ɛ Ɛli-dhur gat Cɛ-de-ur.

¹⁹ Kä cua ji̱ dhɔaar Cim-on bo̱th ɛ Cɛ-lu-mi-el gat Dhu-ri-ca-day.

²⁰ Kä cua ji̱ dhɔaar Gad bo̱th ɛ Ɛl-ya-thap gat Dɛ-u-el.

²¹ Ɛ jɛn cu ji̱ Kɛ-ɣath ɣöth, kapkɛ tin rɛl gɔɔydiɛn rɔ̱, kä cua kɛmɛkä yiath piny a/kän kɛ ni cop.

²² Kä cu ɣöth ji̱ dhɔaar Ɛ-pa-rim ɣöth kɛ ji̱kɛ diaal, kä cua kɛ bo̱th ɛ Ɛli-cama gat A-mi-ɣud.

²³ Kä cua ji̱ dhɔaar Ma-na-thɛ bo̱th ɛ Gam-li-el gat Pɛ-daa-dhur.

²⁴ Kä cua ji̱ dhɔaar Ben-ya-min bo̱th ɛ Ä-bi-dan gat Gid-oni.

²⁵ Kä cu ɣöth wec Daan ɣöth kɛ ji̱kɛ diaal min la gik pek ɣo̱thni, kä cua kɛ bo̱th ɛ A-ɣi-ɛ-dhɛr gat A-mi-ca-day.

²⁶ Kä cua ji̱ dhɔaar A-cɛr bo̱th ɛ Pag-i-el gat Ɔk-ran.

²⁷ Kä cua ji̱ dhɔaar Nap-ta-li bo̱th ɛ Ä-ɣi-ra gat E-nan.

²⁸ Cu nɔmɔ a duɔ̱p ɣöth ji̱ I-thɛ-rɛl kɛ pekiɛn.

²⁹ Cu Muthɛ Ɣo-bab gat Rɛ-u-el raan Mid-yan gua̱nthudɛ jiök i̱, “Banɛ wä guäth in ci Kuoth Nhial ɛ lar i̱, ‘Bɛ ka̱m kɔn.’ Bër kɛɛl kɛ kɔ, ba kɔ ji̱ la̱t a gɔaa, kɛ ɣöö ci Kuoth Nhial mi gɔaa la̱r ji̱ I-thɛ-rɛl.”

³⁰ Duundɛ ɣöö cu Ɣo-bab ɛ loc, “Ɣän /cä bi wä, bi loc ni ɣän wi̱i̱da kä nɛɛkä.”

³¹ Kä cu Muthɛ wee i̱, “Cu kɔ bäny piny, la̱ŋä ni ji̱, kɛ ɣöö ŋäci jɛ banɛ pua̱t däärdɔaar, bi la waŋ kä kɔ.

³² Kä mi wi̱i̱ ben kɛɛl kɛ kɔ, mɔ wä Kuoth Nhial ɛ lät kä kɔ mɔ, ɛ jɛn min bakɔ lät kä ji̱ bä.”

Ɣöth nath

³³ Inɔ cukɛ ɣöth kä Thi-nay päm Kuɔth Nhial jälkɛ kɛ ni̱n diɔ̱k, kä te thanduk matdä ruac Kuɔth Nhial nhiamdiɛn kɛ ni̱n diɔ̱k, kɛ ɣöö bɛ kɛ jëk gua̱a̱th lɔ̱ŋä.

³⁴ Kä te wuɔ̱n Kuɔth Nhial wi̱i̱diɛn kɛ cäŋdäär min ɣöthkɛ wi̱i̱kiɛn.

³⁵ Kä mɔ ca thanduk ɣo̱th ɔ, bi Muthɛ wee i̱, “Aɣ, Kuoth Nhial jiɛc rɔ, kä a ji̱ tɛ̈ru däk piny, kä a ji̱ gaakdu bar kɛ rɔ̱ nhiamdu.”

³⁶ Kä mɔ cɛ pua̱t ɔ, bɛ wee i̱, “Lunyni jɔk, lö Kuoth Nhial, kä ji̱ I-thɛ-rɛl ti bathdɔɔri ti kur kä bathdɔɔr.”