Juud 1 - RUAC KUƆTH IN RƐL RƆ

¹ Ɛ ɣän Juud in la läät Yecu Kritho, kä däman Je-mɛth. Gɔ̱a̱rä warɛgak ɛmɛ, yɛn nɛy tin ca mɛk kä ca nhɔk rɛy Kuɔth in la Gua̱a̱ra, kä ca gaŋ rɛy Yecu Kritho.

² A kɔ̱a̱c lɔaac, kɛnɛ mal kɛ nhök tekɛ yɛ ɛlɔ̱ŋ.

Ŋi̱eec ka̱a̱cni

³ Nhöökä, cä go̱r ɛlɔ̱ŋ ɛn ɣöö dëë yɛ gɔ̱rikä kɛ kui̱ känä min nyuaknɛ. Kä duundɛ ɣöö cä jek ɛn ɣöö bä yɛ gɔ̱r ruac mi dɔ̱ŋ, kä bä yɛ com ɛn ɣöö bia lät ɛlɔ̱ŋ kɛ kui̱ ŋäthä min ca ka̱m nɛy tin ci Kuoth kɛ lɛy ni kä kɛɛl.

⁴ Cɛ tekɛ tha̱a̱ŋ nath ti ca rɔ̱ mat rɛydun kɛ tɛ̱̈ɛ̱̈. Ci bok ruac kɛ kui̱diɛn ni wal ɛn ɣöö bakɛ luk. Kɛ kɛn ji̱ nyuɔɔni tin rietkɛ puɔ̱th Kuɔthdan kɛ ɣöö bikɛ jiäkiɛn la̱t, kä jay kɛn Yecu Kritho min la Ŋi̱i̱cdan kä Kuääran in kɛl kärɔa.

⁵ Täämɛ, ɣän göörä ɣöö bä yɛ ti̱em nɛmɛ, a cäŋ ni min ŋäc yɛnɛ ɛn ɣöö Kuäär, mëë ci naath kɔn kän muun I-jëp, cuɛ nɛy tëë thil luth kɛ jɛ näk kɛ jɔak.

⁶ Kä cuɛ ja̱a̱k nhial, tin /ken gua̱thkiɛn tit, tëë ci gua̱a̱th cieŋädiɛn ba̱ny nhial, yiɛn kɛ kuatni ti thil pek, rɛy muɔ̱th mi col col kɛ kui̱ ca̱ŋ luɔ̱k in di̱i̱t.

⁷ Kä timɛ bä ɛn ɣöö wec Thɔ-dɔm kɛnɛ Go-mo-ra kɛ rɛ̈k tëë thia̱k kɛ kɛ, tëë ci ji̱kiɛn lät ce̱tkɛ ja̱a̱k ti̱ti̱ tëë ci ciaaŋ tɔ̱ɔ̱cä kɛ leerä mi jiääk la̱t kä cukɛ kac raar. Kä cukɛ cuuc kɛ duäc maac mi do̱raar ala nyuuth kɛ kui̱ nɛɛni diaal.

⁸ Kä kɛ ciaŋ min ce̱tkɛ nɔ cu nɛy ti ji̱ la̱a̱kni ti̱ti̱ pua̱nykiɛn ya̱r, cukɛ ruac kua̱ri lo̱k, kä cukɛ ja̱a̱k ti gɔw ti te nhial lat jɔ̱ɔ̱r.

⁹ Kä duundɛ ɣöö mëë ci jääk nhial in di̱i̱t ni Mi-ka-el gaak kɛnɛ gua̱n jiäkni, kä cukɛ ŋaknɔm ŋak kɛ kui̱ pua̱a̱ny Muthɛ, /kenɛ jɛ go̱r ɛn ɣöö bɛ jɛ kuëth a bɛc, kä cuɛ wee i̱, “Bi Kuoth ji̱ luek!”

¹⁰ Kä duundɛ ɣöö wutni ti̱ti̱ kɛn diaal latkɛ tin /ken cop lɔɔcdiɛn jɔ̱ɔ̱r. Kä ya̱rkɛ rɔ kɛ nyuɔɔn tin ca ŋäc, ce̱tkɛ lät tin lät leykɛ a thil ca̱r.

¹¹ Riɛk akɛ kɛ! Kɛ ɣöö guɔ̱ɔ̱rkɛ ni ciaŋ Këën, kä pa̱lkɛ rɔ̱ duer Bil-am kɛ ɣöö ba ŋɔak jek, kä cukɛ li̱w ce̱tkɛ mëë ci Kora li̱w mëë cɛ ruac Kuɔth lo̱k.

¹² Nɛy ti̱ti̱ kɛ gua̱r guäth mi̱eth ti̱mädun, mi̱thkɛ kɛɛl kɛ yɛ a thil dual, kä diɛɛr ni kɛn kɛ pua̱nykiɛn mi di̱i̱t kɛɛl, kɛ pua̱nykiɛn kärɔ̱. Ce̱tkɛ kɛ pua̱a̱r nhial ti /ci dɛ̈m, ti lɔk jiɔam kɛ. Ce̱tkɛ kɛ jiɛn ti thil dɛy, ti ci li̱w kä rɛɛw, kä cakɛ yut ni ciöknikiɛn.

¹³ Kä ce̱tkɛ kɛ muaŋ baar mi di̱i̱t mi tekɛ tuɔ̱mbuɔ̱ɔ̱ri ti thil ŋu kɛ kui̱ po̱cädiɛn. Kä ce̱tkɛ kɛ kuɛl ti wi̱el rɛy puɔ̱ɔ̱rä kä ca muth mi col tɔ̱w kɛ kui̱diɛn a thil pek.

¹⁴ Cu Ä-nɔk min guur A-dam kɛ ka̱a̱th bärɔw, ruac go̱o̱kä lat bä kɛ kui̱ nɛɛni ti̱ti̱, mi wëë i̱, “Nɛ̈nɛ jɛ, Kuäär ni Kuoth bëëkɛ kɛnɛ ja̱a̱kɛ ti kur bathdɔɔri ti rɛ̈lkɛ rɔ̱.

¹⁵ Bëë kɛ ɣöö bɛ nɛy diaal ben luk, kä bɛ nɛy tin thil Kuoth kuɛth kɛ kui̱ nyuɔɔnikiɛn diaal tin ci kɛn kɛ la̱t kɛ dup ti jiäk, kɛnɛ rieet diaal ti jiäk tin ci ji̱ dueeri tin thil Kuoth kɛ lat kɛ kui̱dɛ.”

¹⁶ Kɛ kɛn ji̱ kuɔɔkni, nɛy tin la bɛ̈lkɛ nɛy tin kɔ̱ŋ, la̱tkɛ ni tin jiäk tin di̱t lo̱ckiɛn kɛ kɛ. Kä liakɛ rɔ kɛ pua̱nykiɛn, pɛlkɛ naath kɛ ɣöö bikɛ ti gɔw jek kä kɛ.

Luek kɛnɛ comni

¹⁷ Kä yɛn, nhöökä, tiɛm ruaacni tëë ca lat ɛ jaak Kua̱ran ni Yecu Kritho dhil tit.

¹⁸ Cikɛ yɛ jiök i̱, “Kɛ gua̱a̱th in jɔak bɛ tekɛ nɛy ti buɔ̱ykɛ naath ti guɔ̱ɔ̱rkɛ ni tin go̱o̱r kɛn kɛ tin thil Kuoth.”

¹⁹ Kɛ kɛn nɛy tin nöŋkɛ dääk kam nath tin nhɔakɛ ni nyin muɔ̱ɔ̱n ɛ jiääk ɛmɛ, kä thilɛ Yiëë rɛy lo̱cnikiɛn.

²⁰ Kä yɛn nhöökä, bia ŋa̱thdun in gɔaa jakä di̱t rɛydun. Kä palɛ kɛ Yiëë in Gɔaa in Rɛl Rɔ.

²¹ Yuɔpɛ rɔ rɛy nho̱kä Kuɔth. Liɛpɛ kɔ̱a̱c lɔaac Kua̱ran ni Yecu Kritho min no̱o̱ŋ tëk mi do̱raar.

²² Kä nyuɔ̱th tha̱a̱ŋ nath tin tekɛ diw kɔ̱a̱c lɔaac.

²³ Ka̱nɛ tha̱a̱ŋ nath kɛ gɔpdiɛn raar rɛy maac. A lo̱ckun kɔ̱c kɛ tha̱a̱ŋ nath kɛ dual, kä lökɛ bi̱i̱, mi ca ya̱r kɛ pua̱nykiɛn.

Pal liakä Kuɔth

²⁴ Täämɛ a Kuoth min tekɛ lua̱ŋ kɛ ɣöö bɛ yɛ gaŋ kä tëth, kä bɛ yɛ jakä cuŋ a thil bɛ̈l nhiam Kuɔth kɛ tɛ̈th lɔaac.

²⁵ A puɔny tekɛ Kuoth in kɛl kärɔa, min la Käändan rɛy Yecu Kritho in la Kuääran, min tekɛ buay, kɛ buɔ̱m, kɛnɛ lua̱ŋ kɛ kuäär te thi̱n gua̱thni diaal, ɛn täämɛ, amäni cäŋ kɛl. Inɔnɔ.